Ana Yakusalijiganya Kucalici Kwawo Yikusakamulana Ni Baibulo?

ANA WAWOJO ali Mklistu? Naga yili m’yoyo, nikuti ali mlikuga lya ŵandu ŵakupunda 2 biliyoni pacilambo cosope ŵakusati akumkuya Klistu. Moŵa agano, kwana macalici gejinji gakusati gali ga Ciklistu, nambo gosopega gakusalekangana yijiganyo soni yitendo yawo. Yeleyi yikulosya kuti yakusakulupilila wawojo yili yakulekanganasoni ni yikulupi ya macalici gane ga Ciklistu. Nambo yikulupi ya macalici gosope ga Ciklistu yikusosekwa kuŵa yakulandana pakuŵa wosope tukusajigalila Ciklistu caŵatandisye Yesu. Ana pana cakusawusya cilicose ni kulekangana kwa yikulupi? Elo, jeleji jili ngani jekulungwa naga tukusaka kuŵa mu calici cacikusatenda yajikusajiganya Baibulo.

Ŵakumkuya ŵa Yesu Klistu ŵandanda ŵatandite kumanyika kuti ali “Aklistu.” (Masengo 11:26) Aklistuŵa, nganasosekwaga kumanyika ni lina line ligongo lyakuti pandaŵijo ŵakulupililaga yakulandana. Jemanjaji ŵakuyaga yaŵajiganyaga Yesu, juŵatandisye Ciklistu. Uli pakwamba ya calici cawo? Ana akusakulupilila ku calici cawoco cikusajiganya yaŵajiganyaga Yesu soni yaŵakulupililaga Aklistu ŵandanda? Ana mpaka amanyilile catuli yeleyi? Pana litala limope lyakwakamucisya kumanyilila yeleyi. Litala lyakwe lili kulijiganya Baibulo.

Mwambone, Yesu Klistu ŵagacimbicisyaga Malemba pakumanyilila kuti gali Maloŵe ga Mlungu. Jwalakwe nganasangalalaga ni ŵandu ŵaŵakuyaga misyungu jawo mmalo mwakuya yajikusajiganya Baibulo. (Maliko 7:9-13) Yeleyi yikulosya kuti yakusakulupilila ŵakumkuya ŵa Yesu ŵasyesyene yikusatyocela m’Baibulo. M’yoyo, Mklistu jwalijose mpaka atende cenene kuliwusya kuti, ‘Ana yangusalijiganya ku calici kwangu yili yakamulana ni Baibulo?’ Kuti apate kwanga kwa ciwusyo celeci akusosekwa kulola naga yakusalijiganya kucalici kwawo yili yakamulana ni yajikusasala Baibulo.

Yesu ŵatite kuti kulambila kwetu Mlungu kukusosekwa kwegamila mu usyesyene wawukusasimanikwa m’Baibulo. (Yohane 4:24; 17:17) Ndumetume Paulo jwaŵecete kuti cikulupusyo cetu cikwegamila “pakumanyilila cenene usyesyene.” (1 Timoteo 2:4) M’yoyo kuli kakusosekwa kuti yikulupi yetu yijegamileje pa usyesyene wa m’Baibulo, ligongo yatukusakulupilila mpaka yitukamucisye kuti citukulupuce.

ANA YAKUSAKULUPILILA YIKUSAKAMULANA NI YAJIKUSAJIGANYA BAIBULO?

Tukwaŵenda kuti aŵalanje yiwusyo 6 yayili pasipa ni kulola kwanga kwakwe kwakusimanikwa m’Baibulo. Alole Malemba ga m’Baibulogo ni aganicisye mwakusokoka kwangako. Kaneko aliwusyeje kuti, ‘Ana yangusalijiganya kucalici kwangu yikamulana ni yajikusala Baibuloyi?’

Yiwusyo yakuŵalanjika yayili pasipa mpaka yakamucisye kumanyilila naga yakusalijiganya kucalici kwawo yili yakamulana ni yajikusajiganya Baibulo. Ana mpaka asace kumanyilila yine yajikusasala Baibulo pakulekanganya ni yakusalijiganya kucalici kwawo? Ŵamboni sya Yehofa mpaka ŵakamucisye kupikanicisya usyesyene wa m’Baibulo. Wuli ngam’ŵenda jumo Jwamboni kuti ŵajiganyeje Baibulo? Kapena ajawule pa webusayiti jetu ja www.jw.org/yao.