Kubatisidwa Chili Chakulinga Chambone

Yesu jwasasile kuti Aklistu akusosekwa kubatisidwa. (Aŵalanje Mateyu 28:19, 20.) Nambo ana ubatiso ukusagopolelaga chichi? Soni ana mundu akusosekwa kutenda chichi kuti abatisidwe?

1. Ana ubatiso ukusagopolelaga chichi?

Liloŵe lyakuti “kubatisya” likusatyochela ku liloŵe lya Chigiliki lyalikusagopolela “kutiŵisya” m’mesi. Yesu paŵam’batisyaga, ŵamtiŵisye mu Lusulo lwa Yolodani, kaneko ‘jwachuwiche . . . m’mesimo.’ (Maliko 1:9, 10) Mwakulandana ni Yesu, Aklistu ŵasyesyene akusiŵabatisyaga mwakwatiŵisya m’mesi.

2. Ana mundu pabatisidwe akusalosya kuti atesile chichi?

Mundu pabatisidwe akusalosya kuti alipeleche kwa Yehofa Mlungu. Nambo ana mundu akusalipeleka chamtuli kwa Yehofa? Mundu mkanabatisidwe soni ali kwajika, akusapopela kaje kwa Yehofa, ni akusamsalila kuti akusaka kumtumichila mpaka kalakala. Mundujo akusasimichisya kuti chachimtumichila Yehofape soni kuti chindu chakusosekwa mnope paumi wakwe chichiŵa kutenda yakusasaka Yehofajo. Pelepatu yikusalosya kuti jwalakwe asagwile ‘kuliliŵalila msyene . . . ni kukuyaga’ yakusajiganya Yesu soni chisyasyo chakwe. (Mateyu 16:24) Kulipeleka soni kubatisidwaku, yikusamkamuchisya kuŵa paunasi wambone ni Yehofa soni ŵakulupilila achimjakwe.

3. Ana mundu akusosekwa kutenda chichi mkanabatisidwe?

Mkanabatisidwe, akusosekwa kulijiganya yakwamba Yehofa soni amkulupilileje mnope jwalakwe. (Aŵalanje Ahebeli 11:6.) Pakummanyilila Yehofa soni pakumkulupilila mnope jwalakwe, chachitanda kumnonyela mnope. Kaneko chachiŵa ŵakusachilila kulalichila yakwamba jwalakwe soni kutendaga yakusaka yakwe. (2 Timoteo 4:2; 1 Yohane 5:3) Mundu patandite ‘kwenda m’matala gele Ambuje akugasaka ni kutenda yindu yakwasangalasya Ambuje,’ jwalakwe akusasagula kulipeleka kwa Mlungu ni kubatisidwa.—Akolose 1:9, 10.a

KULIJIGANYA YEJINJI

4. Yatukulijiganya kutyochela pa ubatiso wa Yesu

Aŵalanje Mateyu 3:13-17 kuti alijiganye yejinji yakwamba ubatiso wa Yesu. Kaneko akambilane yiwusyo yakuyichisyayi:

• Ana Yesu jwabatisidwe ali likandi?

• Ana jwabatisidwe chamtuli? Ana ŵagambile kummisa mesi?

Yesu ali abatisidwe ni paŵatandite utumiki wakusosekwa mnope waŵampele Mlungu. Aŵalanje Luka 3:21-23 soni Yohane 6:38, kaneko akambilane chiwusyo achi:

• Ana Yesu pajwagambile kubatisidwa, ni masengo gapi gaŵagawonaga kuŵa gakusosekwa mnope paumi wakwe?

5. Yili yakomboleka kubatisidwa

Pakuganisya yakulipeleka kwa Mlungu soni kubatisidwa, komboleka kutendaga woga. Atamose yili myoyo, naga akupitilisya kulijiganya ya Yehofa soni kusaka kummanyilila chenene, chachiŵa ŵakulimba mtima kusagula kuti abatisidwe. Ana ŵandu ŵane ŵatesile yamtuli kuti abatisidwe? alolele FIDIYO.

FIDIYO: Yampaka Tutende Kuti Tuŵe Paunasi ni Yehofa (1:11)

Aŵalanje Yohane 17:3 soni Yakobo 1:5, kaneko akambilane chiwusyo achi:

• Ana ni chichi champaka chimkamuchisye mundu kuti abatisidwe?

1. Tukusalipeleka kwa Yehofa mwakumsalila kuti tukusaka kumtumichila mpaka kalakala

2. Pa ubatiso ŵetu, tukusalosya kwa ŵandu kuti tulipeleche kwa Mlungu

6. Patubatisidwe tukusaŵa mliŵasa lya Yehofa

Patubatisidwe, tukusaŵa mbali ja liŵasa lya ŵandu ŵakamulana pachilambo chosope. Atamose kuti tukusatyochela m’yilambo yakulekanganalekangana soni tukwete ndamo syakulekanganalekangana, nambope tukusakulupilila yakulandana soni tukusakuyaga malamusi ga m’Baibulo gakulandana. Aŵalanje Salimo 25:14 soni 1 Petulo 2:17, kaneko akambilane chiwusyo achi:

• Ana ubatiso ukusamkamuchisyaga uli mundu kuŵa paunasi ni Yehofa soni ŵandu ŵakusamkulupililaga jwalakwe?

YALIJIGANYISYE

Yesu jwasasile kuti Aklistu akusasosekwa kubatisidwa. Nambo kuti mundu abatisidwe, akusasosekwa kulimbisya chikulupi chakwe, kuyaga ndamo sya m’Baibulo soni kulipeleka kwa Mlungu.

Yiwusyo Yakuwilisya

• Ana ubatiso ukusagopolelaga chichi? Soni ligongo chichi uli wakusosekwa?

• Ana pana kukamulana kwamtuli pasikati pakulipeleka soni kubatisidwa?

• Ana mundu akusasosekwa kutenda chichi kuti alipeleche soni abatisidwe?

YAKULINGA YINESONI

Alijiganye yawukusagopolela ubatiso.

“Ana Ubatiso Ukusagopolela Chichi?” (Ngani ja pa intaneti)

Alole yampaka yimkamuchisye mundu kuti abatisidwe.

“Kumnonyela Soni Kumyamichila Yehofa Mpaka Kwalimbikasye Kuti Abatisidwe” (Sanja ja Mlonda, Malichi 2020)

Aŵalanje kuti amanyilile yaŵasagwile mundu jwine kuti abatisidwe. Soni chayiwone kuti yaŵasagwileyi nganikuŵa kujigalika nganisyo.

“Ŵasakaga Kuti Simichisye Jika Yisyesyene Yakwe” (Sanja ja Mlonda, Febuluwale 1, 2013)

Amanyilile ligongo lyakwe yili yakusosekwa kulingalinga kuti abatisidwe soni yampaka atende pakosechela kubatisidwa.

“Ana Ngusosekwa Kubatisidwa?” (Mayankho a Zimene Achinyamata Amafunsa Buku 2, mtwe 37)