Maloŵe Gandanda

Kwa Ŵandu Ŵakumnonyela Yehofa:

Yesu ŵaŵecete kuti: ‘Timciwumanyilila usyesyene ni usyesyenewo tiwucimgopola.’ (Yohane 8:32) Maloŵe gelega gali gakulimbikasya mnope, ngati m’yoyo? Yili yakomboleka kuwumanyilila usyesyenene atamose ‘m’masiku gambesi’ gakusawusya gano gele unami utupile mnope. (2 Timoteo 3:1) Ana akusakumbucila ndaŵi jaŵatandite kuwumanyilila usyesyene mpela mwasalile m’Maloŵe ga Mlungu? Ndaŵi jelejo jaliji jakusangalasya kwabasi!

Nambope, atamose kuti tukusosekwa kola umanyilisi wakwamba usyesyene, soni kujigala nawo mbali mwakwanila pakwasalila ŵane yakwamba usyesyene, tukusosekwasoni tutendeje yindu mwakamulana ni usyesyenewo. Kuti tutende yeleyi tukusosekwa kwendelecela kuŵa m’cinonyelo ca Mlungu. Ana tukusosekwa kutenda cici kuti tujendelecele kuŵa m’cinonyelo ca Mlungu? Yaŵaŵecete Yesu cilo cakuti cawe malaŵi gakwe yikwanga ciwusyo celeci. Jwalakwe ŵasalile ŵakulijiganya ŵakwe kuti: “Naga mkupikanila malamusi gangu, tinjipitilisya kumnonyela jemanja, mpela mundendele une pakupikanila malamusi ga Atati ŵangu, nipo akupitilisya kunonyela.”​—Yohane 15:10.

Alole kuti Yesu ŵajendelecele kuŵa m’cinonyelo ca Mlungu mwakupikanila malamusi ga Atati ŵakwe. M’wejisoni tukusosekwa kupikanila malamusi ga Yehofa lelo jino. Kuti tujendelecele kuŵa m’cinonyelo ca Mlungu, tukusosekwa kukamulicisya masengo usyesyene pa umi wetu lisiku lililyose. Cilo cicoco Yesu ŵaŵecete kuti: ‘Taciŵa ŵakusangalala naga ayitendeje yele yinduyo.’​—Yohane 13:17.

Tukukulupilila kuti bukuji cijakamucisye wawojo kwendelecela kamulicisya masengo usyesyene pa umi wawo ni ‘kulisunga m’cinonyelo ca Mlungu . . . pakwembeceya umi wangamala.’​—Yuda 21.