Asaguleje Acimjawo Ŵakusamnonyela Mlungu

1-3. (a) Ana tukulijiganya cici pa lilemba lya Misyungu 13:20? (b) Ligongo cici tukusosekwa kusagula acimjetu mwalunda?

ANA pakwete pam’weni mwanace ali mkulola yakusatenda acinangolo ŵakwe? Atamose mkanatande kuŵeceta, jwalakwe akusajigalila yosope yakulola soni kupikana kwa acinangolo ŵakwe. Pakukula, akusatanda kwasyasya acinangolo. Yili yangasimonjesya kuti acakulungwasoni mpaka atande ganisya soni kutenda yindu mpela ŵandu ŵakusamalila nawo ndaŵi.

² Pa Misyungu 13:20, tukusalijiganya kuti, “Mundu jwakwenda ni ŵandu ŵalunda caciŵa jwalunda.” Pa lilembali maloŵe gakuti “kwenda ni” mundu jwine gakupwatika kunguluka ni mundujo kwa ndaŵi jelewu. Yeleyi ngayikugopolela kuti kwamba kwendape ni mundujo. Namatetule jwine jwa Baibulo jwasasile kuti kwenda ni mundu kukusagopolela kunonyelana, soni kukamulana najo. Tukusajigalila mnope yakutenda ya ŵandu ŵatukusaŵa nawo kwa ndaŵi jelewu, mnopemnope ŵandu ŵele ŵatukusawona kuti ali acimjetu ŵa pamtima.

³ Acimjetu mpaka atutendekasye kuti tutendeje yambone kapena yakusakala. Lilemba lya Misyungu 13:20, likusajendelecela kusala kuti, “Nambo jwakutenda yindu ni ŵandu ŵakuloŵela caciwulala.” M’cihebeli, maloŵe gakuti “kutenda yindu” ni mundu jwine mpaka gagopolele “kamulana ni” mundu jwine, kapena kuti kuŵa pa ujakwe. (Misyungu 22:24; Ŵakulamula 14:20) Acimjetu ŵakusamnonyela Mlungu mpaka atulimbikasye kuti tuŵe ŵakulupicika kwa jwalakwe. Pakusaka kutukamucisya kuti tusaguleje acimjetu mwalunda, kwende tulole ya ŵandu ŵakusiŵasagula Yehofa kuŵa acimjakwe.

ANA ACIMJAKWE ŴA MLUNGU ALI ŴANI?

4. Ligongo cici uli upile wekulungwa kuŵa mjakwe jwa Mlungu? Ligongo cici Yehofa ŵamkolasile Abulahamu kuti “mjangu”?

⁴ Yehofa, Jwakulamulila jwa yindu yosope akusatupa upile wakuŵa najo pa ujakwe. Welewutu uli upile wekulungwa mnope. Jwalakwe akusasagula acimjakwe mwakusamala mnope. Akusasagula acimjakwe ŵakusamnonyela soni ŵakusakola cikulupi mwa jwalakwejo. Mwambone, aganicisye ya Abulahamu. Jwalakwe jwaliji jwakoseka kumtendela cilicose Mlungu. Mwakuwilisyawilisya, Abulahamu jwalosisye kuti jwaliji jwakulupicika soni jwakupikanila. Jwalakwe jwayikene pakusimicisya kumpeleka Isaki mpela mbopesi. Abulahamu jwakwete cikulupi cakuti “Mlungu akwete macili gakumjimusya ku ŵawe.” (Ahebeli 11:17-19; Genesesi 22:1, 2, 9-13) Abulahamu jwaliji jwakulupicika soni jwakupikanila, mwamti Yehofa ŵamkolasile jwalakwe kuti “mjangu.”—Yesaya 41:8; Yakobo 2:21-23.

5. Ana Yehofa akusiŵawona wuli ŵandu ŵali ŵakulupicika kwa jwalakwe?

⁵ Yehofa akusiŵawona acimjakwe kuŵa ŵakusosekwa mnope. Akusiŵanonyela ŵandu ŵakusaŵa ŵakulupicika kwa jwalakwe kupunda cine cilicose. (Aŵalanje 2 Samuele 22:26.) Jemanjaji akusaŵa ŵakulupicika kwa jwalakwe ligongo lyakuti akusamnonyela. Baibulo jikusasala kuti Mlungu “akusamnonyela mnope mundu jwagoloka mtima” soni wosope ŵakusampikanila. (Misyungu 3:32) Yehofa akusiŵaŵilanga acimjakwe kuŵa acalendo “m’nyumba” jakwe jakulambilila. Akusiŵaŵilanga kuti amlambileje soni kupopela kwa jwalakwe ndaŵi jilijose.—Salimo 15:1-5.

6. Ana mpaka tulosye camtuli kuti tukusamnonyela Yesu?

⁶ Yesu ŵasasile kuti, “Naga mundu akusanonyela une cacisunga maloŵe gangu, soni Atati ŵangu cacimnonyela.” (Yohane 14:23) Kuti tuŵe mjakwe jwa Yehofa, tukusosekwasoni kumnonyela Yesu soni kutenda yaŵatusalile. Mwacisyasyo, tukusapikanila yaŵatusalile Yesu yakuti tulalicileje ngani syambone soni kupanganya ŵakulijiganya. (Mateyu 28:19, 20; Yohane 14:15, 21) Ligongo lyakuti tukusamnonyela Yesu, “Tukusakuya sajo syakwe mwakusamala.” (1 Petulo 2:21) Yehofa akusasangalala pakutuwona tuli mkutenda yampaka tukombole pakujigalila cisyasyo ca Mwanace jwakwe pa yatukusaŵeceta soni kutenda.

7. Ligongo cici tukusosekwa kusimicisya kuti acimjetu ŵatukwasagula aŵeje acimjakwe ŵa Yehofa?

⁷ Acimjakwe ŵa Yehofa akusaŵa ŵakulupicika, ŵakupikanila, soni akusamnonyela Yesu. Ana m’weji tukusasagula acimjetu mpela yakusati Yehofa pakusagula? Naga mjawojo akusamsyasya Yesu soni akusiŵajiganya ŵane yakwamba Ucimwene wa Mlungu, nikuti mpaka ŵakamucisye wawojo kuŵa mundu jwambone soni jwakulupicika kwa Yehofa.

YAMPAKA TULIJIGANYE PA YISYASYO YA M’BAIBULO

8. Ana cici cacikwasangalasya ni ujakwe wa Lute ni Naomi?

⁸ M’Baibulo tukusaŵalanga ya ŵandu ŵajinji ŵaŵaliji pa ujakwe. Mwambone, Lute ni akwegwe ŵakwe, Naomi. Acakongwe ŵeleŵa ŵatyocelaga mmikuli soni ndamo jakulekangana mnope. Naomi jwaliji jwamkulungwa pakulandanya ni Lute. Nambo jemanjaji ŵaliji pa ujakwe ligongo wosope ŵamnonyelaga Yehofa. Pandaŵi jele Naomi ŵasakaga kuwujila kumangwakwe ku Yisalayeli kutyoka m’cilambo ca Mowabu, “Lute ŵakanilile kuti calongane.” Jwalakwe ŵamsalile Naomi kuti, “Ŵandu ŵawo cakaŵe ŵandu ŵangu, soni Mlungu jwawo cakaŵe Mlungu jwangu.” (Lute 1:14, 16) Lute ŵamnonyelaga mnope Naomi. Ali ayice ku Yisalayeli, Lute jwakamulaga masengo mwakulimbicila kuti amkamucisyeje mjakwejo. Naomi ŵamnonyele mnope Lute, mwamti ŵamsalilaga maloŵe gakamucisya. Lute ali apikanile yaŵamsalilagayo, yakuyicisya yakwe yaliji yakuti wosope ŵapocele majali gejinji.—Lute 3:6.

9. Ana cici cacikwatendekasya lung’wanu ni ujakwe wa pasikati pa Daudi ni Yonatani?

⁹ Cisyasyo cine ni ca Daudi ni Yonatani ŵaŵaliji pa ujakwe. Jemanjaji ŵaliji ŵakulupicika kwa Yehofa. Pandaŵiji, Yonatani jwakwete yaka ciŵandika 30. Jwalakwe jwaliji jwamkulungwa pakulandanya ni Daudi. Yonatani jwaliji pa msela wakuŵa mwenye jwakuyicisya jwa Ayisalayeli. (1 Samuele 17:33; 31:2; 2 Samuele 5:4) Nambo ali amanyilile kuti Yehofa amsagwile Daudi kuti caŵe mwenye jwa Ayisalayeli, Yonatani, nganatenda jelasi kapena kulimbana najo. M’malo mwakwe, jwatesile yiliyose yakakombwele kuti amkamucisye Daudi. Mwambone, pandaŵi jele mwenye Sauli ŵasakaga kum’wulaga Daudi, Yonatani ŵamkamucisye Daudi kuti, “Ajegamileje Yehofa.” Jwalakwe jwayikene pakuŵika umi wakwe pangosi ligongo lya Daudi. (1 Samuele 23:16, 17) Nombe najo Daudi jwaliji jwakulupicika. Jwalakwe jwatesile cilanga cakuti cacisamalila liŵasa lya Yonatani, mwamti jwasunjile cilangaci atamose Yonatani paŵawile.—1 Samuele 18:1; 20:15-17, 30-34; 2 Samuele 9:1-7.

10. Ana akulijiganya cici kutyocela pa ujakwe wa anyamata ŵatatu Ŵacihebeli?

¹⁰ Sadilaki, Mesaki ni Abedinego ŵaliji ŵacinyamata ŵa Cihebeli ŵaŵajigalidwe kwawula nawo ku ukapolo ku Babulo. Nambo jemanjaji ŵaliji pa ujakwe. Atamose kuti ŵaliji kwakutalikangana ni acinangolo ŵawo, nambo ŵalimbikasyanaga kuti ajendelecele kuŵa ŵakulupicika kwa Yehofa. Kaneko ali akusile, cikulupi cawo calinjikwe pandaŵi jele Mwenye Nebukadinesala ŵalamwile jemanjaji kuti atindiŵalile ciwanicisyo ca mlungu jwakupanganyidwa ni golidi. Nambo Sadilaki, Mesaki ni Abedinego, ŵakanile kutindiŵalila ciwanicisyoci ni ŵamsalile mwenyejo kuti, “Ngatutumicila milungu jawo, soni ngatulambila ciwanicisyo ca mlungu jwakupanganyidwa ni golidi.” Pandaŵi jele cikulupi cawo calinjikwaga, anyamata ŵatatuŵa ŵajendelecele kuŵa ŵakulupicika kwa Mlungu jwawo.—Daniele 1:1-17; 3:12, 16-28.

11. Ana tukumanyilila wuli kuti Paulo ni Timoteyo ŵaliji pa ujakwe wambone?

¹¹ Ndaŵi jele ndumetume Paulo ŵasimene ni jwacinyamata Timoteyo, jwalakwe ŵayiweni kuti Timoteyo ŵamnonyelaga mnope Yehofa soni kuti jwakamucisyaga mu mpingo. M’yoyo, Paulo ŵamjiganyisye Timoteyo kuti ŵakamucisyeje abale ni alongo m’mikuli jine. (Masengo 16:1-8; 17:10-14) Timoteyo jwakamulaga masengo mwakulimbicila, mwamti Paulo jwasasile kuti, “Atumicile yimpepe ni une mpela acikapolo pakuwandisya ngani syambone.” Paulo jwamanyililaga kuti Timoteyo mpaka “asamale mnope” ya abale ni alongo. Pandaŵi jaŵatumicilaga Yehofa yalumo, Paulo ni Timoteyo ŵaliji pa ujakwe wambone.—Afilipi 2:20-22; 1 Akolinto 4:17.

ANA MPAKA TUSAGULE CAMTULI ACIMJETU ŴAMBONE?

12, 13. (a) Ligongo cici tukusosekwa kusagula cenene acimjetu atamose mu mpingo? (b) Ligongo cici Paulo ŵasasile maloŵe gakalamusya gagali pa 1 Akolinto 15:33?

¹² Mumpingo, mpaka tulijiganye kutyocela kwa abale ni alongo soni kulimbikasyana kuŵa ŵakulupicika. (Aŵalanje Aloma 1:11, 12.) Nambo atamose mumpingo, tukusosekwa kulolecesya mnope patukusagula ŵandu ŵane kuti aŵe acimjetu ŵa pamtima. Tukwete abale ni alongo ŵa ndamo soni ŵakutyocela kwakulekanganalekangana. Ŵane ali ŵacasambano mumpingo, soni ŵane aŵele ali mkutumicila Yehofa kwa yaka yejinji. Mpela mwayikusaŵela kuti cisogosi cikusajigala ndaŵi jelewu kuti cijiwule, yili yakulandanasoni kuti unasi wa mundu ni Yehofa kuti uŵe wakulimba mnope pakusajikala ndaŵi. M’yoyo, tukusalosya kuwusimana mtima, kunonyelana, nambosoni ndaŵi syosope tusaguleje acimjetu mwalunda.—Aloma 14:1; 15:1; Ahebeli 5:12–6:3.

¹³ Ndaŵi sine, mumpingo mpaka mutendekwe yindu yine yampaka m’weji tusosekwe kuŵa ŵakusamala mnope. Mpaka yiŵe kuti m’bale kapena mlongo akutenda ndamo jinejakwe jele Baibulo jikusasala kuti jili jakulemweceka. Kapena mundu jwine mpaka akole mtima wakunonyela kudandawula wampaka ujonanje mpingo. Nambotu yeleyi yili yangasimonjesya ligongo atamose mipingo ja mundaŵi ja ŵandumetume, ndaŵi sine jakolagasoni yakusawusya. Ni ligongo lyakwe ndumetume Paulo ŵakalamwisye Aklistu mundaŵi jelejo kuti, “Akamlambusya. Kusyoŵekana ni ŵandu ŵakusakala kukusajonanga ndamo syambone.” (1 Akolinto 15:12, 33) Paulo ŵamkalamwisyesoni Timoteyo kuti ŵasosekwaga kulolecesya ŵandu ŵaŵasagulaga kuŵa acimjakwe ŵa pamtima. Masiku agano m’wejisoni tukusosekwa kutenda yakulandanayo.—Aŵalanje 2 Timoteo 2:20-22.

14. Ligongo cici yatukusatenda pakusagula acimjetu yikusakwaya unasi wetu ni Yehofa?

¹⁴ Tukusosekwa kuwucenjela unasi wetu ni Yehofa. Unasi wetu uli cindu capenani mnope catukwete. M’yoyo, tukusaŵambala kuŵa pa ujakwe ni jwalijose jwampaka anandiye kulupicika kwetu soni konanga unasi wetu ni Yehofa. Mpela mwayikusaŵela kuti naga tuloŵece litonji m’mesi geŵilile ngatukusajembeceya kuti litonjilyo tilikopoce lili lyetakate, m’yoyosoni yili yangakomboleka kola ndamo syambone naga tukusakunguluka ni ŵandu ŵakusakala. M’yoyo, tukusosekwa kusagula acimjetu mwakusamala.—1 Akolinto 5:6; 2 Atesalonika 3:6, 7, 14.

15. Ana mpaka atende cici kuti akole acimjawo ŵambone mumpingo?

¹⁵ Mumpingo, mwana ŵandu ŵakusamnonyela Yehofa yisyesyene. Ŵeleŵa ni ŵampaka aŵe acimjawo ŵa pamtima. (Salimo 133:1) Akagambaga kusagula acimjawo ŵa yaka yakulandana kapena ŵakutyocela ku mkuli umo. Akumbucileje kuti Yonatani jwaliji jwamkulungwa pakulandanya ni Daudi, soni Naomi jwaliji jwamkulungwa kwa Lute. Tukusaka kuya yajikusasala Baibulo kuti, “Awugule mitima jawo.” (2 Akolinto 6:13; aŵalanje 1 Petulo 2:17.) Patukulingalinga kumsyasya Yehofa, ŵandu ŵajinji ni pakusasakasoni kuti aŵe acimjetu.

NAGA YAKUSAWUSYA YIKUPAGWA

16, 17. Ana tukusosekwa kuŵambala kutenda cici naga mundu jwine atutengwisye?

¹⁶ M’liŵasa lililyose, mwana umundu, kaganisye soni katende ka yindu kakulekanganalekangana. Yeleyi yili yakulandana ni mumpingo. Kulekanganaku kukusatendekasya kuti tukomboleje kulijiganya yindu yejinji kutyocela kwa ŵandu ŵane. Nambo ndaŵi sine kulekanganaku kukusatendekasya kuti tukapikanicisyaga abale ni alongo mpaka kwika pakwatumbilila. Ndaŵi sine mpaka atukuŵasye, kapena kututumbilikasya kwene. (Misyungu 12:18) Ana tucikunda yakutendekwa yeleyi kutukuŵasya mpaka kuyikana pakuleka kusongana ni mpingo?

¹⁷ Iyayi. Atamose mundu jwine ali atutengwisye m’litala lililyose, tukaleka kusongana ni mpingo. Ngaŵa kuti Yehofa ni jwatutumbilikasisye. Jwalakwe atupele umi soni yindu yosope. Jwalakwe ali jwakuŵajilwa kupocela cinonyelo cetu soni kulupicika kwetu. (Ciwunukuko 4:11) Mpingo uli mtuka watupele Yehofa wawukusatukamucisya kuti tujendelecele kulimbisya cikulupi cetu. (Ahebeli 13:17) Ngasitukana mtuka wakwewu ligongo lyakuti mundu jwine atutengwisye.—Aŵalanje Salimo 119:165.

18. (a) Ana cici campaka citukamucisye kuti tukamulaneje ni abale ni alongo ŵetu? (b) Ligongo cici tukusosekwa kwakululucila ŵatulemwecesye?

¹⁸ Kwanonyela abale ni alongo ŵetu kukusatulimbikasya kuti tukamulaneje nawo. Yehofa jwangajembeceya kuti ŵandu ŵakusiŵanonyela atendeje yindu mpela ŵamlama, m’wejisoni tukajembeceyaga yeleyo kwa ŵakulambila acimjetu. (Misyungu 17:9; 1 Petulo 4:8) Wosopewe tukusalemwesya, nambo cinonyelo cicitukamucisya kwendelecela “kululucilana ni mtima wosope.” (Akolose 3:13) Cinonyelo cicitukamucisya kuti tukakusyaga yakulemwa yamwana kuŵa yekulungwa. Yili yisyene kuti mundu jwine patutengwisye, yikusaŵa yakusawusya kuti tulece kuyiganicisya. Soni yili yangasawusya kumtumbilila mundu jwatutengwisyejo. Nambo yeleyitu mpaka yigambeje kututendekasya kuŵa ŵangasangalala, soni ŵakutumbila. Nambo naga tukusagula kumkululucila mundu jwatulemwecesye, tukusakola mtendele wa mumtima, tukusaŵa ŵakamulana mumpingo, soni cakusosekwa mnope tukusaŵa paunasi wambone ni Yehofa.—Mateyu 6:14, 15; Luka 17:3, 4; Aloma 14:19.

NAGA MUNDU JWINE AMTYOSISYE MUMPINGO

19. Ana pandaŵi japi jatukusosekwa kuleka kunguluka ni mundu jwine mumpingo?

¹⁹ Naga liŵasa lili lyacinonyelo, jwalijose mwiŵasamo akusatenda yakuti liŵasalyo liŵeje lyakusangalala. Nambo aganicisye kuti mundu jumo asapwice. Jwalijose mwiŵasamo ŵalinjile kumkamucisya mundujo nambo ŵakanile cikamucisyoci. Kaneko jwalakwe akusagula ya kutyoka pamlangopo kapena mtwe ŵa liŵasali akumsalila mundujo kuti atyoce pamlangopo. Yeleyi ni yampaka yitendekwe mumpingo. Mundu mpaka asagule kwendelecela kutenda yindu yangamsangalasya Yehofa soni ya konanga mpingo. Jwalakwe mpaka akaneje cikamucisyo soni mwa yakutenda yakwe mpaka yilosyeje kuti ngakusakasoni kuŵa mbali ja mpingo. Jwalakwe mpaka asagule kutyoka jika mumpingo, kapena mpaka atyosyedwe. Baibulo jikusatusalila kuti naga yeleyi yitendekwe tukusosekwa “kuleka kusyoŵekana najo.” (Aŵalanje 1 Akolinto 5:11-13; 2 Yohane 9-11) Nambo yeleyi mpaka yiŵe yakusawusya kuyitenda naga jwatyosyegwejo ali mjetu jwapamtima kapena ali jwa mu liŵasa mwetu. Nambo payakutendekwa mpela yeleyi, kulupicika kwetu kwa Yehofa kukusosekwa kuŵa kwakulimba mnope kulekangana ni kuŵa jwakulupicika kwa mundu.—Alole Maloŵe Gakumbesi 8.

20, 21. (a) Ana kutyosya mumpingo mundu jwakulemwa jwangakupitikuka mtima kukusalosya camtuli cinonyelo? (b) Ligongo cici yili yakusosekwa kuti tusaguleje acimjetu mwalunda?

²⁰ Kutyosya mundu mumpingo jwangakupitikuka mtima patesile cakulemwa, kuli cinonyelo cakutyocela kwa Yehofa. Yikusakamucisya mpingo kuŵa weswela naga wosope ŵangakusapikanila yiwundo ya Yehofa atyosyedwe. (1 Akolinto 5:7; Ahebeli 12:15, 16) Yikusatukamucisyasoni kulosya cinonyelo cetu pa lina lyeswela lya Yehofa, ndamo syakwe syapenani, soni Yehofa msyenejo. (1 Petulo 1:15, 16) Kutyosya mundu mumpingo kukusalosya cinonyelo kwa jwakulemwa jwanganaŵasoni mumpingomo. Camuko camacilici cikusamkamucisya mundu kumanyilila kuti yakutendayo yili yakulemweceka soni cikusamlimbikasya kucenga ndamo jakwejo. Ŵajinji ŵaŵatyosyegwe mumpingo, apano ŵawujilesoni kwa Yehofa mwamti ŵapoceledwe cenene mumpingo.—Ahebeli 12:11.

²¹ Yili yisyene kuti acimjetu mpaka atujambucisye yitendo yawo. Ni ligongo lyakwe tukusosekwa kuti tusaguleje acimjetu mwalunda. Naga tukusasagula acimjakwe ŵa Yehofa kuŵa acimjetu, nikuti tuciŵa ni ŵandu ŵampaka atukamucisye kwendelecelape kuŵa ŵakulupicika kwa jwalakwe mpaka kalakala.