Litala Lyakuŵajilwa Lyakumlambilila Mlungu

1. Ana ŵani ŵampaka atusalile litala lyakuŵajilwa lyakumlambilila Mlungu?

DINI syejinji sikusasala kuti sikusajiganya yisyesyene yakwamba Mlungu. Nambo yeleyi nganiŵa yikomboleche ligongo lyakuti dinisi sikusajiganya yakulekanganalekangana pakwamba ya Mlungu soni mwampaka tumlambileje. Ana mpaka tumanyilile chatuli litala lyakuŵajilwa lyakumlambilila Mlungu? Yehofa ni jwampaka atusalile yatukusosekwa kutenda kuti tumlambileje.

2. Ana mpaka alijiganye chamtuli litala lyambone lyakumlambilila Mlungu?

² Yehofa atupele Baibulo jampaka jitukamuchisye kumanyilila litala lyakuŵajilwa lyakumlambilila jwalakwe. M’yoyo, alijiganye Baibulo, soni Yehofa chachakamuchisya kupikanichisya yijiganyo yakwe, ligongo jwalakwe akusasamala ya wawojo.—Yesaya 48:17.

3. Ana Mlungu akusasaka kuti m’weji tutendeje chichi?

³ Ŵandu ŵane akusasala kuti Mlungu akusajitichisya kulambila kulikose, nambo yeleyi yikulekangana ni yaŵatusalile Yesu. Jwalakwe ŵatite, “Ngaŵa kuti mundu jwalijose jwakusaŵecheta kwa une kuti Ambuje, Ambuje, tachijinjila mu Uchimwene wa kwinani, nambo jwakusatenda yakusaka ya Atati.” M’yoyo, yili yakusosekwa kwa m’weji kulijiganya yakusaka ya Mlungu soni kutenda mwakamulana ni yakusaka ya Mlunguyo. Kutenda yeleyi kuli kwakusosekwa mnope ligongo Yesu ŵalandenye ŵandu ŵangampikanila Mlungu ni ŵandu ŵangalondeka, wali “ŵandu ŵangapikanila malamusi.”—Mateyu 7:21-23.

4. Ana Yesu ŵasasile yamtuli pakwamba yakutenda yakusaka ya Mlungu?

⁴ Yesu ŵatukalamwisye kuti naga tukusaka kutenda yakusaka ya Mlungu nikuti tuchisimana ni yakusawusya. Jwalakwe ŵatite, “Jinjilani pamlango chakanganika, ligongo litala lyekulungwa soni lyangasawusya kwendamo likwawula kuchiwonasiko, soni ŵandu ŵajinji akwendamo, nambo chipata chakwinjilila ku umi chili chakanganika nambosoni litala lyakwe lili lyamwana, soni ŵakulipata ali ŵakuŵalanjika.” (Mateyu 7:13, 14) Litala lyamwana, kapena kuti litala lyakuŵajilwa lyakumlambilila Mlungu likusalongolela ŵandu ku umi wangamala. Litala lyekulungwa, kapena kuti litala lyakulemwecheka lyakumlambilila Mlungu, likusiŵalongolela ŵandu kukonasika. Nambo Yehofa ngakusaka kuti mundu jwalijose awe. Mlungu akusampaga mundu jwalijose upile ŵakulijiganya yakwamba jwalakwe.—2 Petulo 3:9.

ANA MPAKA AJIMANYILILE CHAMTULI DINI JISYESYENE?

5. Ana mpaka ajimanyilile chamtuli dini jisyesyene?

⁵ Yesu ŵasasile kuti yili yakomboleka kwamanyilila ŵakusamlambila Mlungu m’litala lyakuŵajilwa. Jemanjaji mpaka twamanyilile patukuwungunya yakusakulupilila soni yitendo yawo. Jwalakwe ŵatite, “Timchamanyilila ni yisogosi yawo.” Ni ŵapitilisye kuti, “Chitela chilichose chambone chikusasogola yisogosi yambone.” (Mateyu 7:16, 17) Yeleyi ngayikugopolela kuti ŵandu ŵakusamlambila Yehofa mwakuŵajilwa ali ŵamlama. Nambo kuti ŵakutumichila ŵa Mlungu akusalingaga kutenda yindu yakuŵajilwa. Kwende sambano tulole yampaka yitukamuchisye kwamanyilila ŵandu ŵakusalambila Mlungu m’litala lyakuŵajilwa.

6, 7. Ligongo chichi yijiganyo ya dini jisyesyene yikusatyochela m’Baibulo? Ana tukulijiganya chichi kutyochela pa yaŵatendaga Yesu?

⁶ Yijiganyo yetu yikusatyochelaga m’Baibulo. Baibulo jikusati, “Malemba gosope gasalilidwe ni Mlungu soni gali gakamuchisya pakwiganya, pakwamuka, pakongola yindu, pakongolela mwachilungamo, kuti mundu jwa Mlungu aŵe jwakuŵajilwa chenene soni jwakoseka kutenda masengo galigose gambone.” (2 Timoteo 3:16, 17) Ndumetume Paulo jwalembele Aklistu kuti, “Paŵapochele maloŵe ga Mlungu, gaŵagapikene kutyochela kwa m’weji, nganagapochela mpela maloŵe ga ŵandu, nambo mpela mugaŵelele maloŵe ga Mlungu.” (1 Atesalonika 2:13) M’yoyo dini jisyesyene jikusajigala yijiganyo yawo m’Maloŵe ga Mlungu gagali Baibulo. Yijiganyoyo yangatyochela pa nganisyo sya ŵandu, ndamo syawo kapena kwine kulikose.

⁷ Yiliyose yaŵajiganyaga Yesu yatyochelaga m’Maloŵe ga Mlungu (Aŵalanje Yohane 17:17.) Jwalakwe ndaŵi syejinji ŵakamulichisyaga masengo malemba pakwiganya. (Mateyu 4:4, 7, 10) Ŵakutumichila ŵasyesyene ŵa Mlungu akusakuyaga yaŵatendaga Yesuyi mwati chilichose chakusajiganya chikusatyochela m’Baibulo.

8. Ana Yesu ŵatujiganyisye yamtuli yakwamba kumtumichila Yehofa?

⁸ Tukusamlambilaga Yehofa jika. Pa lilemba lya Salimo 83:18 pakusati, “Wawo, ŵele lina lyawo lili Yehofa, ŵalakwe jika ali Ŵamwinani Mnope ŵakulamulila chilambo chosope chapasi.” Yesu ŵasakaga kuti ŵandu amanyilile yisyesyene yakwe yakwamba Mlungu jusyesyene. M’yoyo jwalakwe ŵajiganyisye yakwamba lina lya Mlungu. (Aŵalanje Yohane 17:6.) Yesu ŵatite, “Yehofa Mlungu jwenu ni jwamkusosekwa kumlambila, soni ni jwele jwamkusosekwa kumtumichila basi.” (Mateyu 4:10) M’yoyo, mpela ŵakutumichila ŵa Mlungu, tukusakuyaga chisyasyo cha Yesu. Tukusalambilaga Yehofa jika, tukusakamulichisya masengo lina lyakwe, soni tusajiganya ŵane ya lina lya Mlunguli, soni yachachitutendela kusogolo.

9, 10. Ana tukusalosyaga chamtuli kuti tukusanonyelana?

⁹ Tukusanonyelana. Yesu ŵajiganyisye ŵakulijiganya ŵakwe kuti anonyelaneje. (Aŵalanje Yohane 13:35.) Kwanonyela ŵane ngakukusajigalila chilambo chatutyochele, ndamo jetu, soni kapate ketu. Kunonyelana kutukamuchisyeje kuŵa ŵakamulana mpela abale ni alongo. (Akolose 3:14) M’yoyo ngatukusaputaga nawo ngondo ni kwawulagaga ŵandu. Baibulo jikusati, “Ŵanache ŵa Mlungu ni ŵa jwakusalakalajo akusawonechela m’litala lyakuti, Jwalijose jwangakusatenda yindu mwachilungamo ali jwangatyochela kwa Mlungu, m’yoyosoni jwangakusamnonyela mlongo mjakwe.” Baibulo jikusasalasoni kuti, “Tunonyelaneje jwine ni mjakwe, tukaŵa mpela Kaini, juŵatyochele kwa jwakusakala jula ni kum’wulaga mlongo mjakwe.”—1 Yohane 3:10-12; 4:20, 21.

¹⁰ Tukusakamulichisya masengo ndaŵi jetu, machili, soni yindu yetu pakwakamuchisya soni kwalimbikasya ŵandu ŵane. (Ahebeli 10:24, 25) ‘Tukusiŵatendelaga ŵandu wosope yambone.’—Agalatiya 6:10.

11. Ana ligongo chichi tukusosekwa kulupilila kuti chikulupusyo mpaka tuchipate kupitila mwa Yesu?

¹¹ Tukusakulupilila kuti chikulupusyo mpaka tuchipate kupitila mwa Yesu. Baibulo jikusati, “Chikulupusyo changasimanikwa mwa jwalijose, pakuŵa pangali lina line pasi pa liwunde lyalipelechedwe kwa ŵandu lyatukusosekwa kulupuka nalyo.” (Masengo 4:12) Mu Mtwe 5 wa buku ajino, twalijiganyisye kuti Yehofa ŵamtumisye Yesu kukupeleka umi wakwe mpela mtuka wakuwombola ŵandu ŵakupikanila. (Mateyu 20:28) Yehofa amsagwile Yesu kuti aŵe Mwenye ja chilambo chosope chapasi. Lyeleli ni ligongo lyakwe Baibulo jikusatusalila kuti naga tukusaka kupata umi wangamala tukusosekwa kumpikanila Yesu.—Aŵalanje Yohane 3:36.

12. Ana ligongo chichi ngatukusatendaga nawo yandale?

¹² Ngatukusatendaga nawo yandale. Yesu nganatendaga nawo yandale. Yesu paŵajimbidwaga magambo, ŵamsalile jwakulamulila jwachiloma, Pilato, kuti, “Uchimwene wangu nganuŵa wakutyochela pachilambo chapasi.” (Aŵalanje Yohane 18:36.) Pakujigalila chisyasyo cha Yesuchi, tukusaŵa ŵakulupichika ku Uchimwene wa Mlungu wakwinani. Ni ligongo lyakwe ngatukusajinjililaga nawo yandale kulikose kwatuli. Nambope Baibulo jikusatulamulaga kuti tupikanileje ‘maulamusi gamakulungwa’ gagali maboma. (Aloma 13:1) Tukusapikanilaga malamusi ga chilambo chatukusatamaga. Nambo naga lilamusi likusisyana ni malamusi ga Mlungu, tukusakuyaga ŵandumetume, ŵaŵatite, “Tukusosekwa kumpikanila Mlungu mpela jwakulamulila jwetu, ngaŵaga ŵandu.”—Masengo 5:29; Maliko 12:17.

13. Ana tukusalalichila yamtuli yakwamba Uchimwene wa Mlungu?

¹³ Tukusakulupilila kuti Uchimwene wa Mlungupe ni wawuchimasya yakusawusya ya ŵandu. Yesu ŵasasile kuti “utenga wambone wakwamba ya Uchimwene” uchilalichidwa pachilambo chosope chapasi. (Aŵalanje Mateyu 24:14.) Pangali boma ja ŵandu jampaka jitende yawuchitutendela Uchimwene wa Mlungu. (Salimo 146:3) Yesu ŵatujiganyisye kuti tupopeleleje Uchimwene wa Mlungu paŵatite, “Uchimwene wawo uyiche. Lisosa lyawo litendekwe pachilambo chapasi, mpela kwinani.” (Mateyu 6:10) Baibulo jikusatusalila kuti Uchimwene wa Mlungu uchijonanga maboma gosope ga ŵandu soni kuti Uchimwenewo “chiwuchitama kwandaŵi josope.”—Daniele 2:44.

14. Ana ŵani ŵakuganisya kuti akusalambilaga Mlungu m’litala lyakuŵajilwa?

¹⁴ Palijiganyisye fundo syelesi, aliwusye kuti, ‘Ana ŵani ŵakusajiganya yakutyochela m’Baibulo? Ana ŵani ŵakusiŵasalilaga ŵane yakwamba lina lya Mlungu? Ŵani ŵakusalosyaga chinonyelo chisyesyene kwa jwine ni mjakwe soni ŵakusakulupilila kuti Mlungu ŵamtumisye Yesu pachilambo chapasi kukutukulupusya? Ŵani ŵangakusajinjililaga nawo ya ndale? Soni ŵani ŵakusalalichila kuti Uchimwene wa Mlungupe ni wawuchimasya yakusawusya yetu?’ Ana nganaŵa Ŵamboni sya Yehofape?—Yesaya 43:10-12.

ANA AKUSOSEKWA KUTENDA CHICHI?

15. Ana tukusosekwa kutenda yatuli naga tukusaka kuti Mlungu ajitichisyeje kalambile ketu?

¹⁵ Kwamba kulupilila kuti Mlungu apali ngaŵa kwakwanila. Atamose misimu jakusakala jikusakulupilila kuti Mlungu apali nambo jangampikanila. (Yakobo 2:19) Naga tukusaka kuti Mlungu ajitichisyeje kalambile ketu, tukusosekwa kutendaga yakusatusalila ngaŵa kwamba kulupilila kuti apali.

16. Ana ligongo chichi tukusosekwa kujikana dini jaunami?

¹⁶ Kuti Mlungu ajitichisye kalambile ketu, tukusosekwa kujikana dini jaunami. Jwakulochesya Yesaya jwalembile kuti, “Mkopoche mwa jwalakwe, soni m’we ŵaswela.” (Yesaya 52:11; 2 Akolinto 6:17) Lyeleli ni ligongo lyakwe tukusosekwa kana chilichose chakamulana ni kulambila kwaunami.

17, 18. Ana “Babulo Jwamkulungwa ali chichi,” soni ligongo chichi akusosekwa kukopokamo mwachitema?

¹⁷ Ana dini jaunami jili chichi? Jili dini jilijose jajikusajiganya kuti tumlambileje Mlungu m’litala lyangakamulana ni Maloŵe gakwe. Baibulo jikusasikolanga dini syosope syaunami kuti “Babulo Jwamkulungwa.” (Chiwunukuko 17:5) Ana ligongo chichi? Panyuma pa chikumba cha m’masiku ga Nowa, kwapagwile yijiganyo yejinji yaunami. Yeleyi yatandile mumsinda wa Babulo. Yijiganyo yeleyi yawandile pachilambo chosope chapasi. Mwambone, ŵandu ŵaŵatamaga mumsinda wa Babulo ŵalambilaga milungu jitatujitatu. Lelojinosoni, dini syejinji sikusajiganya kuti mwa Mlungu jumo mwana milungu jitatu. Nambo Baibulo jikusajiganya mwakupikanika chenene kuti Mlungu jusyesyene apali jumo, Yehofa, soni kuti Yesu ali Mwanagwe. (Yohane 17:3) Ŵandu ŵaŵatamaga mu Babulo ŵakulupililagasoni kuti mwa mundu mukusakopoka chindu chine chachikusajendelechela kuŵa ni umi mundu pawile, soni kuti chindu chelecho mpaka chikalaje ku moto. Nambo yeleyi ngaŵa yisyene.—Alole Maloŵe Gakumbesi 14, 17.

¹⁸ Mlungu akusala kuti pachangakaŵapa dini jaunami chijijonanjidwe. (Chiwunukuko 18:8) Ana akuliwona ligongo lyakwe akusosekwa kujileka dini jaunami mwachitema? Yehofa Mlungu akusaka kuti atende yeleyi mwachitema.—Chiwunukuko 18:4.

19. Ana Yehofa chachasamalila chatuli naga akusagula kumtumichila?

¹⁹ Ŵane mwa achimjawo soni ŵamwiŵasa mwawo ngaŵa mkupikanichisya naga akusagula yakutyoka mu dini jaunami ni kutanda kumtumichila Yehofa, soni mpaka atande kwalagasya. Nambo Yehofa ngasiŵaleka wawojo. Chachiŵa mbali ja liŵasa lyapachilambo chosope lya ŵandu mamiliyoni gagakusanonyelana jwine ni mjakwe, soni chachikola chembecheyo cha kutama ni umi wangamala m’chilambo chasambano cha Mlungu. (Maliko 10:28-30) Komboleka kuti mkupita kwandaŵi ŵane mwa achimjawo soni ŵamwiŵasa ŵaŵalagasyaga ŵala kutanda kulijiganya Baibulo.

20. Ligongo chichi akusosekwa kumlambila Mlungu m’litala lyakuŵajilwa?

²⁰ Pachangakaŵapa, Mlungu chamasye yakusakala yosope soni Uchimwene wakwe uchilamulilaga pachilambo chosope chapasi. (2 Petulo 3:9, 13) Jeleji jichiŵa ndaŵi jakusangalasya. Jwalijose chachimlambila Yehofa m’litala lyakusasaka Yehofajo kuti tumlambilileje. M’yoyo akusosekwa kutendapo kandu sambano jino nikutanda kumlambila Mlungu m’litala lyakuŵajilwa.