Ana Mpaka Atende Yamtuli Kuti Mlungu Aŵe Mjawo?

1, 2. Ana ŵandu ŵane ŵapi ŵaŵaliji achimjakwe ŵa Yehofa?

ANA ŵandu ŵamtuli ŵakusasaka kuti aŵe achimjawo? Ali ŵandu ŵatukusitwanonyela, soni ŵatukusakamulana nawo. Ŵandu ŵakwete chanasa soni ndamo sine syatukusasikumbila mwa jemanjajo.

² Yehofa akusasagulaga ŵandu ŵane kuti aŵe achimjakwe. Mwambone, Abulahamu ŵaliji mjakwe jwa Yehofa. (Yesaya 41:8; Yakobo 2:23) Yehofa ŵamnonyelagasoni Daudi, mwati ŵasasile kuti ŵaliji “mundu jwapamtima pakwe.” (Masengo 13:22) Soni jwakulochesya Daniyele jwaliji ‘jwakunonyelwa mnope’ kwa Yehofa.—Daniele 9:23.

3. Ana Yakomboleche chamtuli kuti Abulahamu, Daudi, soni Daniyele aŵe achimjakwe ŵa Yehofa?

³ Nambo ana yakomboleche chatuli kuti Abulahamu, Daudi, soni Daniyele aŵe achimjakwe ŵa Yehofa? Yehofa ŵamsalile Abulahamu kuti, “Mpikanile maloŵe gangu.” (Genesesi 22:18) M’yoyo Yehofa akusaŵa mjakwe jwa ŵandu ŵakusampikanila. Yili yakombolekasoni Yehofa kuŵa paunasi ni mtundu wa ŵandu. Pakuŵecheta kwa mtundu wa Ayisalayeli Yehofa jwatite, “Apikanileje maloŵe gangu, ni chinjiŵa Mlungu jwawo, soni jemanja chimchiŵa ŵandu ŵangu.” (Yelemiya 7:23) M’yoyo naga akusaka kuŵa mjakwe jwa Yehofa akusosekwa kumpikanilaga.

YEHOFA AKUSIŴACHENJELA ŴANDU ŴAKWE

4, 5. Ana Yehofa akusiŵachenjela chamtuli achimjakwe?

⁴ Baibulo jikusati Yehofa akusasosasosa matala “kuti alosye machili gakwe kwa ŵandu ŵali ni mtima wakulungama kwa jwalakwejo.” (2 Mbili 16:9) Pa Salimo 32:8 Yehofa akusiŵasimichisya achimjakwe kuti, “Chinjimpa lunda soni chinjimkamuchisya kwenda m’litala limkusosekwa kwendamo. Chinjimsalila yamkusosekwa kutenda soni kumlolela.”

⁵ Pana mdani jwamachili jwakusaka kutulekasya kuŵa achimjakwe ŵa Mlungu. Nambo Yehofa akusaka kutuchenjela. (Aŵalanje Salimo 55:22.) M’weji mpela achimjakwe ŵa Yehofa, tukusamtumichila ni mtima wetu wosope. Tukusaŵa ŵakulupichika kwa jwalakwe atamose patusimene ni yakusawusya, soni tukwete chikulupi mpela cha Daudi. Pakwamba ya Yehofa jwalakwe jwalembile kuti, “Pakuŵa ali kumkono wangu wamlyo, ngasindenganyika.” (Salimo 16:8; 63:8) Ana Satana akusatendaga yatuli pakusaka kuti tukaŵa achimjakwe ŵa Mlungu?

SATANA AKUSIŴAJIMBAGA ŴANDU MAGAMBO

6. Ana Satana akusasalaga yamtuli yakwamba ŵandu?

⁶ Mu Mtwe 11 twalijiganyisye kuti Satana ŵamsisisye Yehofa soni ŵasalaga kuti jwalakwe ali jwakulambusya soni jwangali chilungamo ligongo nganiŵakunda Adamu ni Hawa kuti alisagulileje jika yambone soni yakusakala. Buku ja m’Baibulo ja Yobu jikusatujiganya kuti Satana akusiŵasoselaga magongo ŵandu ŵakusaka kuŵa achimjakwe ŵa Mlungu. Satana akusasalaga kuti ŵandu akusamtumichila Mlungu ngaŵa ligongo lyakuti ŵanduwo akusamnonyela, nambo pakusaka kupata yindu kwa jwalakwe. Satana akusasalasoni kuti mpaka ŵasepusye ŵandu wosope kwa Mlungu. Kwende tulole yampaka tulijiganye kutyochela kwa Yobu soni yaŵatite Yehofa pakumchenjela.

7, 8. (a) Ana Yehofa ŵam’wonaga chamtuli Yobu? (b) Nambo ana Satana ŵaŵechete yamtuli yakwamba Yobu?

⁷ Ana Yobu ŵaliji ŵani? Ŵaliji mundu jwambone juŵapali yaka chiŵandika 3,600 yipiteyo. Yehofa ŵasasile kuti pandaŵijo pachilambo chapasi paliji pangali mundu jwambone kupunda jwalakwe. Yobu jwamchimbichisyaga mnope Mlungu, soni jwayiŵengaga yindu yakusakala. (Yobu 1:8) M’yoyo, Yobu jwaliji mjakwe jusyesyene jwa Yehofa.

⁸ Satana ŵasasile kuti Yobu ŵamtumichilaga Mlungu ligongo lya kutunduka. Satana ŵamsalile Yehofa kuti, “Ana wawo nganamchinjila jwalakwe, pa nyumba jwakwe, ni payosope yakwete? Ampele upile pa masengo ga makono gakwe, soni yilango yakwe yitupile pachilambo chosope. Nambope sambano atambasukule mkono wawo ni kwaya yakwe yosope, alole naga ngaŵatukana peswela.”—Yobu 1:10, 11.

9. Ana Yehofa ŵamkundile Satana kutenda chichi?

⁹ Satana ŵasalaga kuti Yobu ŵamtumichilaga Yehofa pakusaka kupata yindu kwa jwalakwe. Satana ŵasasilesoni kuti jwalakwe mpaka apakombole kumlekasya Yobu kutumichila Yehofa. Nambo Yehofa ŵasisisye yaŵasasile Satanayi, mwati ŵamkundile Satanajo kumlinga Yobu kuti asimichisye naga Yobu ŵaliji mjakwe jwa Yehofa ligongo lyakuti ŵamnonyelaga.

SATANA ŴAMLAGASISYE YOBU

10. Ana Satana ŵamlagasisye chamtuli Yobu, soni ana Yobu ŵatesile yamtuli?

¹⁰ Chandanda, Satana ŵajiŵile soni konanga yilango yosope ya Yobu. Ŵawulejesoni ŵamasengo ŵajinji ŵa Yobu. Yobu nganakolasoni chilichose. Pambesi pakwe, Satana ŵawuleje ŵanache likumi ŵa Yobu ni chimbungo. Atamose kuti yaliji m’yoyo, Yobu ŵajendelechele kuŵa jwakulupichika kwa Yehofa. Nambo “payosopeyi Yobu nganalemwa, soni nganaŵecheta kuti Mlungu atesile yangalumbana.”—Yobu 1:12-19, 22.

11. (a) Ana Satana ŵatesilesoni chichi kwa Yobu? (b) Nambo ana Yobu ŵatesile chichi?

¹¹ Satana ŵajendelechele kumlagasya Yobu. Ŵamsisisye Mlungu pakuŵecheta kuti, “atambakusule mkono wawo ni kwaya liwupa ni mnowu wakwe, alole naga ngaŵatukana peswela.” M’yoyo Satana ŵamlagasisyesoni Yobu ni ulwele wakupweteka mnope. (Yobu 2:5, 7) Nambope Yobu ŵajendelechele kuŵa jwakulupichika kwa Yehofa. Jwalakwe jwasasile kuti, “Mpaka une kuwa ngasindeka kuŵa jwakulupichika!”—Yobu 27:5.

12. Ana Yobu ŵalosisye chatuli kuti Satana ŵaliji jwakulambusya?

¹² Yobu nganamanyililaga kuti Satana ŵampatilaga magongo. Jwalakwe nganamanyililasoni ligongo lyakwe ŵasimanaga ni yakusawusya yosopeyi. Yobu ŵaganisyaga kuti Yehofa ni juŵatendekasyaga yakusawusya yaŵasimanaga nayo. (Yobu 6:4; 16:11-14) Nambo atamose yaliji m’yoyo, Yobu ŵajendelechele kuŵa jwakulupichika kwa Yehofa. Pelepa yili yangakayikasya kuti Yobu ŵamtumichilaga Mlungu ni mtima wosope, ngaŵaga kusaka kupata yindu. Jwalakwe jwaliji mjakwe jwa Mlungu ligongo lyakuti ŵamnonyelaga Mlungujo. Yosope yaŵasalaga Satana yakwamba Yobu yaliji yaunami.

13. Ana kulupichika kwa Yobu kwakwete yakuyichisya yamtuli?

¹³ Atamose kuti Yobu nganamanyililaga yayatendekwaga kwinani, nambo jwalakwe jwajendelechele kuŵa jwakulupichika kwa Mlungu, yayalosisye kuti Satana ali jwakusakala.—Yobu 42:12-17.

ANA SATANA AKUSAŴAJIMBA WAWOJO MAGAMBO MWATULI?

14, 15. Ana Satana akusiŵajimbaga ŵandu magambo gamtuli?

¹⁴ Mpaka tulijiganye lijiganyo lyakusosekwa mnope kutyochela pa yayamtendechele Yobuyi. Moŵa agano, Satana akusiŵajimbaga magambo gakuti akusamtumichila Yehofa ligongo lyakusaka kupata yindu. Pa Yobu 2:4, Satana ŵatite, “Chilichose chakwete mundu chachipeleka kulipa umi wakwe.” M’yoyo Satana akusasala kuti ŵandu wosope, ngaŵa Yobupe, akusamtumichila Mlungu pakusaka kupata yindu. Pali papite yaka mahandiledi chiwile Yobu, Satana jwajendelechele kumnyosya Yehofa soni kwajimba magambo ŵakutumichila ŵakwe. Mwambone, pa Misyungu 27:11, tukusaŵalanga kuti, “Mwanangu, m’ŵeje jwalunda, ni m’wusangalasye mtima wangu, kuti namjanje jwele jwakunyosya.”

¹⁵ Komboleka kusagula kumpikanila Yehofa ni kuŵa mjawo jwakulupichika. Pakutenda yeleyi chachilosya kuti Satana ali jwakulambusya. Atamose kuti yindu mpaka yichenje mnope ligongo lyakusagula kuti Mlungu aŵe mjawo, nambo chelechi chili chakusagula chambone mnope pa yindu yampaka asagule kutenda. Kusagula kuti Mlungu aŵe mjawo kuli ngani jakusosekwa mnope. Satana akusasala kuti wawojo ngaŵa mkuŵa ŵakulupichika kwa Mlungu pasimene ni yakusawusya. Jwalakwe mwakalamuka akusatutega kuti tuŵe ŵangakulupichika kwa Mlungu. Ana akusatenda yeleyi chamtuli?

16. (a) Ana Satana akusakamulichisya masengo matala gapi pakusaka kwalekasya ŵandu kumtumichila Yehofa? (b) Ana Satana mpaka ŵalekasye chamtuli wawojo kumtumichila Yehofa?

¹⁶ Satana akusakamulichisya masengo matala gakulekanganalekangana pakusaka kutulekasya kuŵa achimjakwe ŵa Mlungu. (1 Petulo 5:8) Akasimonga naga achimjawo, ŵamwiŵasa mwawo, kapena ŵandu ŵane akwalekasya kulijiganya Baibulo kapena kutenda yindu yambone. Payikututendechela yeleyi komboleka kulipikana mpela atenda kutuwulasya.a (Yohane 15:19, 20) Satana akusalilosya mpela “lilayika lya lilanguka.” M’yoyo jwalakwe mwakalamuka mpaka atutendekasye kuti tukampikanila Yehofa. (2 Akolinto 11:14) Litala line lyakusalikamulichisya masengo Satana pakusaka kutulekasya kuti tukamtumichilaga Yehofa, lili kututendekasya kuliwonaga kuŵa mundu jwangaŵajilwa kumtumichila Mlungu.—Misyungu 24:10.

APIKANILEJE MALAMUSI GA YEHOFA

17. Ana ligongo chichi tukusosekwa kumpikanila Yehofa?

¹⁷ Patukumpikanila Yehofa ni patukusalosya kuti Satana ali jwakulambusya. Ana chichi champaka chitukamuchisye kuŵa ŵakupikanila? Baibulo jikusati, “Mumnonyeleje Yehofa Mlungu jwenu ni mtima wenu wosope, ni umi wenu wosope, ni machili genu gosope.” (Detulonomo 6:5) Tukusampikanila Yehofa ligongo lyakuti tukusamnonyela. Patukumnonyela mnope Yehofa, ni patuchiŵasoni ŵakusachilila kutenda yiliyose yakusatuŵenda jwalakwe kuyitenda. Ndumetume Yohane jwalembile kuti, “Pakuŵa kumnonyela Mlungu kukusagopolela kugakosya malamusi gakwe, soni malamusi gakwego nganigaŵa gakusitopesya.”—1 Yohane 5:3.

18, 19. (a) Ana yindu yine yapi yakusasala Yehofa kuti yili yakulemwecheka? (b) Ana tukumanyilila chamtuli kuti Yehofa jwangatuŵenda kutenda yindu yanganituŵa tuyikombwele?

¹⁸ Nambo ana yindu yapi yakusatusalila Yehofa kuti yili yakulemwecheka? Alole yine yayili m’libokosi lyakuti “Ayiŵenjeje Yakusayiŵenga Yehofa.” Pandanda komboleka kuyiwonaga yinduyi kuŵa yangasakala mnope. Nambo pakuŵalanga Baibulo mwakusamala soni kuyiganichisya yakuŵalangayo, chachipikanichisya kuti luli lunda kupikanila malamusi ga Yehofa. Kombolekasoni kuliwona kuti akusosekwa kuchenga yindu yine paumi wawo. Atamose kuti kutenda yeleyi mpaka kuŵe kwakusawusya ndaŵi sine, nambo naga akuchenga, chachikola mtendele soni chachiŵa ŵakusangalala ligongo lya kuŵa mjakwe jwakulupichika jwa Mlungu. (Yesaya 48:17, 18) Ana tukumanyilila chatuli kuti yili yakomboleka kuchenga yindu yine paumi wetu?

¹⁹ Yehofa jwangatuŵenda kutenda yindu yanganituŵa tuyikombwele. (Detulonomo 30:11-14) Pakuŵa jwalakwe ali mjetu jusyesyene, akusatumanyilila chenene kupunda mwatukusalimanyila achimsyeŵe. Jwalakwe akusamanyilila yindu yampaka tukombole kuyitenda soni yanganituŵa tuyikombwele. (Salimo 103:14) Ndumetume Paulo akutulimbikasya kuti, “Mlungu ali jwakulupichika, soni ngasakunda kuti tulinjidwe kupunda pampaka tupalepele kupilila, nambo patukusimana ni yakulingwa jwalakwe chachipeleka litala lyakulupuchila kuti tupakombole kupilila.” (1 Akolinto 10:13) M’yoyo tukakayichilaga kuti Yehofa chachitupa machili gakutukamuchisya kutenda yakuŵajilwa. Jwalakwe chachitupa “machili gakupunda gachipagwa” kuti gatukamuchisye kupilila mundaŵi jakusawusya. (2 Akolinto 4:7) Ali apochele chikamuchisyo kutyochela kwa Yehofa mundaŵi syakusawusya, Paulo jwasasile kuti, “Mu yindu yosope, ngusapataga machili kutyochela kwa jwele jwakusamba machili.”—Afilipi 4:13.

ALIJIGANYE KUNONYELA YINDU YAKUSAYINONYELA MLUNGU

20. Ana mpaka asasye ndamo syapi sya Mlungu, soni ligongo chichi?

²⁰ Naga tukusaka kuŵa achimjakwe ŵa Yehofa, tukusosekwa kuleka kutenda yindu yakusasala Yehofa kuti yili yakulemwecheka. Nambo tukusosekwa kutenda yine kupunda pelepa. Achimjakwe ŵa Mlungu akusanonyela yakusayinonyelaga Mlungu. Jemanjaji akusatenda yakuyisala pa Salimo 15:1-5. (Aŵalanje.) Achimjakwe ŵa Yehofa akusasyasyaga ndamo syakwe soni akusalosya “chinonyelo, kusangalala, mtendele, kuwusimana mtima, chanasa, umbone mtima, chikulupi, kufasa, soni kuligosa.”—Agalatiya 5:22, 23.

21. Ana mpaka atende yamtuli kuti alosyeje ndamo syakusasinonyela Mlungu?

²¹ Ana mpaka atende yamtuli kuti alosyeje ndamo syambonesi? Akusosekwa kulijiganya kunonyela yakusanonyela Yehofa mwakuŵalanga soni kulijiganya Baibulo mwakutamilichika. (Yesaya 30:20, 21) Pakutenda yeleyi, ni pachachimnonyela mnope Yehofa, soni chachiŵa ŵakusachilila kumpikanila jwalakwe.

22. Ana pachiŵa yakuyichisya yamtuli naga akumpikanila Yehofa?

²² Kuchenga kwa mpaka atende paumi wawo mpaka tukulandanye ni kuwula yakuwala yakala ni kuwala yasambano. Baibulo jikusati akusosekwa “awule umundu wakala” ni aliweche “umundu wasambano.” (Akolose 3:9, 10) Atamose kuti kutenda yeleyi mpaka kuŵe kwakusawusya, nambo patukuchenga umi wetu ni kumpikanilaga Yehofa, jwalakwe akutusimichisya kuti chachitupa “mbote jekulungwa.” (Salimo 19:11) M’yoyo, kwende tumpikanikanileje Yehofa kuti tulosye kuti Satana ali jwakulambusya. Tutumichileje Yehofa, ngaŵaga ligongo lyakuti chachitupa mbote kusogolo, nambo ligongo lyakuti tukusamnonyela ni mtima wosope. Patukutenda yeleyi tuchiŵa mjakwe jusyesyene jwa Mlungu.