Ana Chakulinga Cha Mlungu Kwa M’weji Chili Chamtuli?

PAKUŴALANGA nyusipepala, kulolela TV, kupikanila wailesi, akusayiwona soni kupikana ngani syejinji sya ŵandu ŵangapikanila malamusi, sya ngondo, soni sya uchiswamba. Komboleka kuti wawojo akulaga ni ulwele soni mwine mundu jwaŵamnonyelaga ajasiche.

Aliwusye kuti:

• Ana yeleyi ni yakusasaka Mlungu kuti yindendechele uneji soni liŵasa lyangu?

• Ana mpaka mbate kwapi yakungamuchisya kupilila yakusawusya yangu?

• Ana mtendele usyesyene uchipatikana?

Baibulo jikusajanga yiwusyo yeleyi mwakupikanika chenene.

BAIBULO JIKUSAJIGANYA KUTI MLUNGU CHACHITENDA YINDU YAKUSIMONJESYA PACHILAMBO CHAPASI.

• Ŵandu ngasasimanaga ni yakupweteka, ngasakalambala, soni kuwa.—Chiwunukuko 21:4

• ‘Pandaŵi jelejo jwamlemale chachisumba mpela mbaŵala.’—Yesaya 35:6

• “Meso ga ŵangalola gachilola.”—Yesaya 35:5

• Ŵawe chachiŵasoni ni umi.—Yohane 5:28, 29

• Pangali ŵachachilwalaga.—Yesaya 33:24

• Jwalijose pachilambo chapasi chachikola yakulya yejinji.—Salimo 72:16

  

YAJIKUSAJIGANYA BAIBULO YILI YAKAMUCHISYA

Mpaka yiŵe yangasawusya kuganisya kuti yatugambile kuŵalanga kweneyi yili sagamisi. Nambo Mlungu akutusimichisya kuti chatende yeleyi pachilambo chapasi pamkaŵapa, soni Baibulo jikusasala mwachachitendela yeleyi.

Baibulo jikusasalasoni yejinji kupunda pelepa. Jikusatusalila yatukusosekwa kumanyilila kuti tuŵe ŵakusangalala yisyesyene paumi wetu lelojino. Agambe ganichisya kaje ya yindu yayikusiyalagasya nganisyo. Yeleyi mpaka yipwatichepo kusowa kwa mbiya, yakusawusya ya mwiŵasa, kulwala, kapena chiwa cha mundu jwatukusamnonyela. Baibulo mpaka jakamuchisye mwampaka amalanile ni yakusawusya yeleyi. Nambosoni mpaka jatondoye pajikwanga yiwusyo ayi:

• Ligongo chichi tukusasimana ni yakusawusya?

• Ana tutendeje chichi patusimene ni yakusawusya?

• Ana liŵasa lyetu mpaka liŵe lyakusangalala?

• Ana chikusatendekwa chichi patuwile?

• Ana yichikomboleka kwawonasoni ŵakunonyelwa ŵetu ŵaŵawile?

• Ana mpaka tusimichisye chatuli kuti Mlungu chachitenda yosope yasasile?

Kuŵalanga kwawo bukuji kukulosya kuti akusaka kumanyilila yajikusajiganya Baibulo. Bukuji chijakamuchisye. Ndime jilijose jana yiwusyo yachiyakamuchisyeje wawojo kujipikanichisya chenene Baibulo. Ŵandu ŵajinji akusasangalala kukambilana ya Baibulo ni Ŵamboni sya Yehofa. Tukukulupilila kuti wawojosoni chasangalale. Mlungu ŵajaliwe pakwendelechela kumanyilila yajikusajiganya Baibulo.