Ana Yayikutendekwayi ni Yaŵasakaga Mlungu?

AŴALANJE nyusipepala jilijose. Alolele TV kapena apikanile wayilesi. Ngani syasikusapikanika mnope sili syakwamba kasa malamusi, ngondo, soni yauciswamba. Aganisyesoni ya yakusawusya ya paumi wawo. Komboleka kuti akulaga mnope nganisyo ni ulwele kapena ciwa ca mundu jwaŵamnonyelaga. Mpaka apikaneje mpela mwaŵapikanilaga Yobu, jwaŵaŵecete kuti, “yipwetesi yimbijikanile mnope.”​—Yobu 10:15, The Holy Bible in the Language of Today.

Aliwusye jika kuti:

• Ana yayikutendekwayi ni yaŵasakaga Mlungu kuti yindendeceleje unejo, soni ŵandu wosope?

• Ana cikamucisyo cakumalanila ni yakusawusya yangu mpaka nacipate kwapi?

• Ana pana cembeceyo cilicose cakuti tucikola mtendele pacilambopa?

Baibulo jikusajanga cenene yiwusyo yeleyi.

BAIBULO JIKUSAJIGANYA KUTI MLUNGU CACITENDA YAKUYICISYAYI PACILAMBO CAPASI

• “Jwalakwejo tacipukuta misosi josope m’meso mwawo. Ngasipapagwa ciwa, canasa, kulila kapena kupikana yipwetesi.”​—Ciunukuko 21:4

• “Ŵalemale cacikwela m’matumbi mpela mwajikusatendela ngolombwe.”—Yesaya 35:6

• “Meso ga ŵangalola gacilola.”​—Yesaya 35:5

• “Ŵandu wosope ŵali m’malembe gacikumbucilo . . . tacikopoka.”​—Yohane 5:28, 29, NW

• “Ŵakutama mwelemo pangali jwacaciŵeceta kuti: ‘Une ngulwala.’”​—Yesaya 33:24

• “M’cilambomo muciŵa yagungula yejinji penani pa matumbi.”​—Salimo 72:16

UMBONE WA YAJIKUSAJIGANYA BAIBULO

Akasajanguya kuganisya kuti yayili pa mapeji gamunyumamu kuli kwamba kusaka yindu yambone. Mlungu asasile kuti cacitenda yeleyi, soni Baibulo jikusasala mwacaciyitendela.

Nambo Baibulo jikusasalasoni yine yejinji. Jikusasala yakutukamucisya kuti tusangalaleje ni umi atamose apanopano. Aganicisye kaje yayikusalagasya munganisyo, soni yakusawusya yawo. Yeleyi komboleka kuŵa kusoŵa kwa mbiya, yakusawusya ya muliŵasa, ulwele, kapenasoni ciwa ca mundu jwakusamnonyela. Baibulo mpaka jakamucisye kumalana ni yakusawusya moŵa agano, soni komboleka kwatamikasya mtima pasi pajikwanga yiwusyo mpela ayi:

• Ana ligongo cici tukusalagasika?

• Ana mpaka tumalane catuli ni yakusawusya ya paumi?

• Ana mpaka tutende cici kuti liŵasa lyetu liŵeje lyakusengwa?

• Ana cici cacikusatutendecela patuwile?

• Ana tucawonasoni ŵakunonyelwa ŵetu ŵaŵawile?

• Ana mpaka tukulupilile catuli kuti yilanga ya Mlungu ya m’bujo yicikwanilicika?

Kuŵalanga kwawo bukuji uli umboni wakulosya kuti akusaka kumanyilila yajikusajiganya Baibulo. Bukuji cijakamucisye. Ndime jilijose jikwete ciwusyo cakwe pambesi pa peji. Ŵajinji pakutagulilana ya m’Baibulo ni Mboni sya Yehofa, akusasangalala kamulicisya masengo litala lya kuwusya ni kwanga. Tukulupilila kuti nombe wawojo casangalale ni litala lyeleli. Mlungu ŵape majali pakusangalala ni kulijiganya yajikusajiganya Baibulo kusyesyene!