Gulu Jakutenda Yakusasaka Yehofa

PACHILAMBOPA pana magulu ga dini, ga ndale, ga malonda, soni mabungwe gejinji. Chakulinga chawo soni katende kawo ka yindu kali kakulekanganalekangana. Nambo pana gulu jimo jakulekangana mnope ni magulu gosopega. Maloŵe ga Mlungu gakusalosya kuti guluji jili ja Mboni sya Yehofa.

² Yili yakusangalasya kuti wawojo ali m’gulu ja Yehofa. Myoyo akutenda chakulinga cha Mlungu ligongo lyakuti achimanyi chakulingacho. (Sal. 143:10; Alo. 12:2) Sambano ŵalakwe ali jwakutumichila pampepe ni gulu ja ŵandu ŵakunonyelana ja pachilambo chosope. (2 Akoli. 6:4; 1 Pet. 2:17; 5:9) Mwakamulana ni yagakusasala Maloŵe ga Mlungu, chachipata upile, soni chachiŵa ŵakusangalala mnope ligongo lyakutumichila m’guluji. (Mis. 10:22; Maliko 10:30) Naga sambano jino akutenda chakulinga cha Yehofa mwakulupichika, yichakamuchisya kuti chakole sogolo jambone mnope.—1 Tim. 6:18, 19; 1 Yoh. 2:17.

³ Mkupanganya jwamkulungwa akwete gulu japajika ja pachilambo chosope jakusajilongolela. Yeleyi yikugopolela kuti Yehofa jwali mtwe wa yosope ni jwakulamulila guluji. M’weji tukusamkulupilila mnope jwalakwe. Jwalakwe ali Jwakutulamula, Jwakutupa Malamusi, soni Mwenye jwetu. (Yes. 33:22) Pakuŵa jwalakwe ali Mlungu jwakusatenda yindu mwakulondeka chenene, alingenye yakuti ‘tukamuleje najo masengo’ pakusaka kuti tutendeje chakulinga chakwe.—2 Akoli. 6:1, 2.

⁴ Mbesi ja chilambo chapasi pajikuŵandichila mnope, tukupitilisya kupikanila Mwenye jwesagulwe, Yesu Klistu. (Yes. 55:4; Chiw. 6:2; 11:15) Yesu ŵasasile mkanipaŵe kuti ŵakumkuya ŵakwe chachitenda yindu yekulungwa kupunda yaŵatesile jwalakwe paŵaliji pachilambo chapasi. (Yoh. 14:12) Yeleyi yaŵele yisyesyene, ligongo lyakuti kwandaŵi jelewu chiŵalanjilo cha ŵakumkuya ŵa Yesu chaŵele chili mkutupa, soni jemanjajo ŵalalichilaga m’mikuli jejinji. Ŵakumkuyaŵa ŵaliji ŵakuti chachilalichila ngani syambone sya Uchimwene pachilambo chosope chapasi.—Mat. 24:14; 28:19, 20; Mase. 1:8.

⁵ Yeleyi ni yayitendekwe. Nambope, Yesu ŵasasile mwakupikanika chenene kuti masengo gakulalichila ngani syambone gachimala pandaŵi jaŵasagwile Yehofa. Yakulochesya ya Mlungu yikulosya kuti lisiku lyekulungwa lya Yehofa ni lyakutesya woga liŵandichile.—Yow. 2:31; Sef. 1:14-18; 2:2, 3; 1 Pet. 4:7.

⁶ Patuchimanyi chakulinga cha Yehofa mu ndaŵi jambesiji, tukusosekwa kulingalinga kulimbichila kutenda yakusasaka Mlungu. Myoyo tukusosekwa kumanyilila chenene mwajikusajendela gulu ja Mlungu, soni kamulana nalyo mnope. Guluji jikusajenda chenene ligongo lyakuti jikusakuyaga yagakusasala Malemba, yayikupwatikapo malamusi soni yijiganyo yayili m’Maloŵe ga Mlungu.—Sal. 19:7-9.

⁷ Ŵandu ŵa Yehofa pakukuya yajikusasala Baibulo, akusatenda yindu mwamtendele, soni mwakamulana. (Sal. 133:1; Yes. 60:17; Alo. 14:19) Ana chichi chachikusatukamuchisya kuti tuŵeje ŵakamulana kulikose kwatuli? Chili chinonyelo. Kuŵa ŵachinonyelo ni kwakukusatulimbikasya kuti tukamulaneje. (Yoh. 13:34, 35; Akolo. 3:14) Ligongo lyakuti Mlungu akusasaka kuti yindu yijendeje m’litala lyeleli, tukusapakombola kwenda yalumo ni mbali jakwinani ja gulu ja Yehofa.

MBALI JAKWINANI JA GULU JA YEHOFA

⁸ Jwakulochesya Yesaya, Esekieli soni Danieli ŵajiweni m’mesomkulola mbali jakwinani ja gulu ja Yehofa. (Yes., chaputala 6; Esek., chaputala 1; Dan. 7:9, 10) Nombenajo ndumetume Yohane, ŵajiweni mbali jakwinaniji ni ŵatumanyisye yeleyi mwakata m’buku ja Chiwunukuko. Jwalakwe ŵam’weni Yehofa ali atemi pachitengu cha uchimwene chauchimbichimbi soni malayika gagaliji mkwimba kuti: “Ŵaswela, ŵaswela, ŵaswela ali Ambuje, Mlungu jwamachili gosope, juŵapali, jwapali ni jwele jwakwisa.” (Chiw. 4:8) Yohane ŵam’wenisoni “mwanache jwa ngondolo ali ajimi pasikati pa chitengu cha uchimwene,” Mwanache jwa ngondolo jwa Mlunguju, jwali Yesu Klistu.—Chiw. 5:6, 13, 14; Yoh. 1:29.

⁹ Mesomkulola ga ŵagaweni Yohane gakulosya Yehofa ali atemi pa chitengu, gakusimichisya kuti Yehofajo ni jwali Jwakulongolela guluji. Pakwamba ya jwalakwe soni udindo wakwe wapenani, lilemba lya 1 Mbili 29:11, 12 likusati, “Wawo Ambuje, ali ŵakulungwa, ali ŵamachili, ali ŵalumbili, ali ŵakupunda nipo soni ŵalakwe ali mwenye. Yindu yosope yakwinani ni pasi pano yili yawo Ambuje, soni wawo ali mwenye, ŵakulamulila yosope yene. Yipanje yosope yikusatyochela kwa wawo; soni wawo akusalamulila yosope ni machili gawo; nipo wawo jikape akukomboleka kumkwesya mundu jwalijose kuŵa jwamkulungwa ni kumpa machili.”

¹⁰ Mpela jwamasengo mjakwe jwa Yehofa, Yesu Klistu akwete udindo wapenani kwinani, soni ampele ulamusi wekulungwa. Mlungu “ŵampele Klistu ulamusi pa yindu yosope ni ŵamŵisile kuŵa jwamkulungwa jwa mpingo.” (Aef. 1:22) Ndumetume Paulo ŵasasile ya Yesu kuti, “Mlungu ŵamkwesisye mnope, ni kumpa lina lyakupunda mena gosope. Ŵatesile yeleyi kuti pakupikana lina lya Yesu, yakupanganyidwa yosope ya kwinani, pasi pano ni pasi pa chilambo tiyitindiŵale pasi mwakulambila. Yosope tiyijitichisye kuti, ‘Yesu Klistu ali Ambuje,’ nipo pakutenda m’yoyo yichimbichisye Atati ŵakwinani.” (Afi. 2:9-11) Myoyo, mpaka tuwukulupilile mnope ulamusi wachilungamo wa Yesu Klistu.

¹¹ Jwakulochesya Danieli, m’mesomkulola ŵam’weni Jwawula Syakala ali atemi pachitengu chakwe cha uchimwene kwinani, soni “paliji pana likuga lyejinji lya malayika gakumtumichila jwalakwejo, nambosoni paliji pana likuga line lyejinji mnope lya malayika kupunda linelyo lilyajimi pameso pakwe.” (Dan. 7:10) Baibulo jikusajisala gulu ja malayikaji kuŵa ‘misimu jakutumichila Mlungu, jakusajituma kukwakamuchisya ŵandu ŵele ŵitachipochela chikulupusyo.’ (Ahe. 1:14) Yakupanganyikwa yausimu yosopeyi ayiŵisile kuŵa ‘yitengu ya uchimwene’ mauchimwene, soni maulamusi.’—Akolo. 1:16.

¹² Patukuganichisya mbali jakwinani ja gulu ja Yehofali, mpaka tupikanichisye yaŵatesile Yesaya ali agaweni mesomkulola. Jwalakwe ‘ŵam’weni Yehofa ali atemi pachitengu cha uchimwene chelewu soni chapenani’ soni ‘penani pa Yehofa pajimi aselafi.’ Yesaya jwatite, ‘Likungu kwa une! Njonasiche pakuti ndili mundu jwangomo syakusakala, nipo ngusatama sikati ja ŵandu ŵa ngomo syakusakala. Nambope meso gangu gam’weni mwenye, Yehofa Ŵamachiligosope.’ Kusala yisyene Yesaya ŵasimonjile mnope soni ŵalinandiye paŵamanyilile ukulu wa gulu ja Yehofa. Jwalakwe paŵagaweni mesomkulola yamkwayiye mnope, mwamti paŵapikene maloŵe kutyochela kwinani gakwamba ya masengo gapajika gakwenesya ya chamuko cha Yehofa, Yesaya ŵajanjile kuti, “Une ndili apano! Andume!”—Yes. 6:1-5, 8.

¹³ Kumanyilila soni kuyamichila gulu ja Yehofa, kukusalimbikasya ŵandu ŵa Mlungu kola msimu wakulipeleka mpela wa Yesaya. Guluji pajikwawula pasogolo, tukusalingalinga kwendela najo yalumo. Masiku agano, tukusatenda yampaka tukombole pakulosya kuti tukusajikulupilila gulu ja Yehofaji.

GULU JA YEHOFA JIKWAWULA PASOGOLO

¹⁴ Mtwe wandanda m’buku ja Esekieli, Yehofa akum’wanichisya ali akwesile pa ligeleta lyekulungwa lyakwinani. Ligeleta lya uchimbichimbili likwimila mbali jangawoneka ja gulu ja Yehofa. Jwalakwe akulijendesya ligeletali ni kulilongolela mwakuŵajilwa soni akusalikamulichisya masengo mwakamulana ni chakulinga chakwe.—Sal. 103:20.

¹⁵ Chitayala chilichose cha ligeletali chikwete chitayala chine chakulandana nacho mkati mwakwe. Yitayalayi ŵayiŵisile mwakupinjikanya. Yeleyi ni yayikusatendekasya kuti yitayalayi ‘yijawuleje mbali jilijose ja mbali mcheche.’ (Esek. 1:17) Yitayalayi mpaka yichenje kwayikwawula ndaŵi jilijose. Nambope ngaŵa kuti ligeletali likusagamba kulijendela jikape, apali jwine jwakusalijongolela. Yehofa jwangagamba kujileka gulu jakwe kwawula kulikose kwajikusaka. Lilemba lya Esekieli 1:20 likusati, ‘Yiwumbeyo yajawulaga kulikose kwawusachile msimu.’ Myoyo, Yehofa ni jwakusatendekasya gulu jakwe kwawula kulikose kwawusachile msimu wakwe kuti jijawule. Jwalijose akusosekwa kuliwusya kuti, ‘Ana ngwenda mwakamulana ni guluji?’

¹⁶ Kwendela yalumo ni gulu ja Yehofa kukusapwatikapo yejinji, ngaŵape kusimanikwa pamisongano soni kulalichila. Nambo, chakusosekwa mnope chili kwawula kwetu pasogolo mwausimu. Ndaŵi syosope ‘tukusasagula yayili yambone mnope’ soni kumanyilila kuchenga kulikose pakapikanichisye ketu ka yindu yausimu. (Afi. 1:10; 4:8,  9; Yoh. 17:3) Ndaŵi syosope tukusosekwa kumbuchilaga kuti, guluji jikusajenda chenene naga pana mkamulano wambone. Myoyo tukusosekwa kukuwona kusosekwa kwakamulichisya masengo chenene yindu yausimu, soni yakuchilu yatupele Yehofa pakusaka kuti tukwanilisye masengo gakwe. Patukwendela yalumo ni ligeleta lya kwinani lya Yehofa, tukusatama mwakamulana ni utenga watukusalalichila.

¹⁷ Ligongo lya chikamuchisyo cha gulu ja Yehofa, tukusajawula pasogolo patukutenda chakulinga cha Mlungu. Tukumbuchileje kuti Yehofa ni jwakwendesya ligeleta lyakwinanili. Myoyo, patukwendela yalumo ni ligeletali tukusalosya kuti tukusamchimbichisya Yehofa soni kuti tukusakulupilila Lwala lwetu. (Sal. 18:31) Baibulo jikusasala chilanga chakuti, “Ambuje chachipeleka machili kwa ŵandu ŵakwe ni kwapa upile ni mtendele.” (Sal. 29:11) Pakuŵa tuli mbali jimo ja gulu ja Yehofa masiku agano, tukusakola machili gakusapeleka soni tukusasangalala ni mtendele wakusapeleka kwa ŵandu ŵakwe ŵakulinganichika. Kusala yisyene, tukakayichilaga kuti Yehofa chachitupa upile wekulungwa naga tukupitilisya kutenda chakulinga chakwe apano mpaka msogolo.