Chikalata Chakutyochela ku Likuga Lyakulongolela

Ŵakunonyelwa Ŵakulalichila Ngani Syambone Achimjetu:

Uli upile wekulungwa kuŵa ŵakamulana pakulambila Mlungu jusyesyene, Yehofa! M’weji tuli ‘ŵamasengo achimjakwe,’ ŵatupochele masengo gakulupusya umi gagali kulalichila soni kwiganya utenga wambone wakwamba Uchimwene wakwe wawutamilikasisye. (1 Akoli. 3:9; Mat. 28:19, 20) Kuti tukwanilisye masengo gapachilambo chosopega mwamtendele soni mwakamulana, tukusosekwa kutenda yindu mwakulongosoka.—1 Akoli. 14:40.

Bukuji chijakamuchisye kupikanichisya mwawukusajendechesya yindu mpingo wa Chiklistu lelo jino. Jikusala ya upile soni maudindo gakwete mpela jwa Mboni sya Yehofa. Naga akusayamichila upile wakwete soni kwanilisya maudindo gawo, ‘chikulupi chawo chichilimbangana mnope.’—Mase. 16:4, 5; Aga. 6:5.

Myoyo, tukwalimbikasya kuti ajiŵalanje chenene bukuji. Apate matala gampaka akamulichisye masengo yachalijiganye pa umi wawo. Mwambone, naga aŵele jwakulalichila jwangabatisidwa pachangakaŵapa, ana akusosekwa kutenda chichi kuti abatisidwe ni kuŵa jwa Mboni sya Yehofa? Nambo naga ŵabatisidwe kala, ana akusosekwa kutenda chichi kuti akule mwausimu soni konjechesya yakutenda pakumtumichila Yehofa? (1 Tim. 4:15) Ana mpaka atende chichi kuti alimbikasye nawo mtendele mumpingo? (2 Akoli. 13:11) Apate kwanga kwa yiwusyoyi m’bukuji.

Naga wawojo ali jwamlume jwam’batisidwe, ana akusosekwa kutenda chichi kuti aŵajilwe kutumichila mpela jwakutumichila jwakamuchisya soni kaneko kuŵa jwamkulungwa jwa mumpingo? Ŵandu ŵajinji pakupitilisya kwinjila m’gulu ja Yehofa, pakusosekwa abale ŵajinji ŵakuŵajilwa ŵakuti alongoleleje mumpingo. Bukuji chijakamuchisye kumanyilila yakusosekwa kutenda pakulingalinga kuti akwanilisye yakulinga ya usimuyi.—1 Tim. 3:1.

Tukwapopelela kuti bukuji jakamuchisye kumanyilila malo gawo mu yalinganyisye Yehofa soni kugawona kuti gali gakusosekwa mnope. Tukusitwanonyela wosope soni tukupitilisya kwapopelela kuti chaŵe nawo mu gulu ja ŵandu ŵachachisangalala kulambila Atati ŵetu ŵakwinani, Yehofa kwangamala.—Sal. 37:10, 11; Yes. 65:21-25.