Ana Masengo Getu Gakulalicila ya Ucimwene Tukusagakamula Catuli?

Ali asigele panandi kuwa, Yesu ŵasasile kuti, “Ngani Syambone syakwamba ya Ucimwene tisicilalicikwa pacilambo capasi kuti ŵandu ŵangosyo syosope asipikane. Pelepo nipo mbesi tijiciyika.” (Matayo 24:14) Nambo ana masengo gakulalicila pacilambo cosopega gacikomboleka catuli? Mwakuya cisyasyo caŵatamikasisye Yesu pacilambo capasi.—Luka 8:1.

Tukusalinga kwajawulila ŵandu kumangwawo. Yesu ŵajigenye ŵakulijiganya ŵakwe kulalicila ngani syambone kunyumba ni nyumba. (Matayo 10:11-13; Masengo 5:42; 20:20) Ŵakulalicila ŵa mu yaka 100 yandandaŵa ŵapele mikuli jakuti alalicileko. (Matayo 10:5, 6; 2 Akolinto 10:13) Lelo jinosoni, masengo getu gakulalicila gakusajenda cenene, soni mpingo uliwose ukwete mkuli wakwe wakulalicila. Yeleyi yikusakombolekasya kuti tukwanilisye lilamusi lya Yesu lyakuti, ‘tulalicile ngani syambone kwa ŵandu ni kutendela umboni mwakwanila.’—Masengo 10:42.

Tukusalingaga kwasimana ŵandu pamalo gampaka asimanikwe. Yesu ŵatupele cisyasyo cambone pakulalicila m’malo gakusimanikwa ŵandu ŵajinji, mpela mungulugulu nyasa kapena pacisima ca m’musi. (Maliko 4:1; Yohane 4:5-15) M’wejisoni tukusaŵeceta ni ŵandu ya Baibulo kumalo kulikose kwatuli, mpela mwitala, pamsika, m’mapaki, kapena patelefoni. Naga pana lipesa lyambone tukusalalicilasoni ŵatuŵandikene nawo nyumba, acimjetu ŵakumasengo, ŵatukusalijiganya nawo sukulu, soni acanasi ŵetu. Ligongo lya mtawu welewu ŵandu mamiliyoni gejinji pacilambo cosope apikene “ngani syambone sya cikulupusyo.”—Masalimo 96:2.

Ana mpaka aganisye ya mundu jwampaka amsalile ngani syambone sya Ucimwene wa Mlungu, soni kuti ngani syambonesyo sikugopolela cici pakwamba ya m’bujo mwakwe? Akagamba kutama ni utenga wa cembeceyowu. Alinje kwasalila ŵane mwacitema!

• Ana “ngani syambone” syapi syasikusosekwa kusilalicila?

• Ana Mboni sya Yehofa sikukuya catuli cisyasyo ca Yesu ca kulalicila?