Ligongo Cici Tukusakolanjikwa Kuti Mboni sya Yehofa?

Ŵandu ŵajinji akusaganisya kuti Mboni sya Yehofa lili lina lya dini jasambano. Nambope, yaka 2,700 yipiteyo, ŵaŵatumicilaga Mlungu jusyesyene ŵakolangaga kuŵa “mboni” syakwe. (Yesaya 43:10-12) Munyumamu mpaka mu 1931, twamanyikaga kuŵa Ŵakulijiganya Baibulo. Ligongo cici twasagwile lina lyakuti Mboni sya Yehofa?

Lina lyetuli likusamanyisya Mlungu jwetu. Mwakamulana ni yakulemba yakala, lina lya Mlungu, Yehofa, likusasimanikwa malo gamajinji m’Baibulo. Mu Mabaibulo gejinji linali alityosisyemo mmalo mwakwe aŵisilemo mena gaucimbicimbi, mpela Ambuje kapena Mlungu. Nambope, Mlungu jusyesyene ŵamsalile Musa lina lyakwe lyakuti Yehofa, jwalakwe ŵaŵecete kuti: “Lyeleli ni lina lyangu mpaka kalakala.” (Ekisodo 3:15) Mwakuŵeceta yeleyi, jwalakwe ŵalilekangenye ni milungu jine josope jawunami. Tukusasangalala kumanyika ni lina lyeswela lya Mlungu.

Lina lyetuli likusalosya masengo getu. Ŵandu ŵajinji ŵakala, kutandila ni mundu jwakulupicika Abele, ŵatendele umboni ya cikulupi cawo pa Yehofa. Yaka yejinji payapitaga, ŵandu ŵane mpela Nowa, Abulahamu, Sala, Musa, Daudi, ni ŵane ŵalijisoni mu “liwunde lya mboni.” (Ahebeli 11:4–12:1) Mpela mwayikusaŵela kuti mundu komboleka kumtendela umboni mundu jwangalemwa mu luŵala lwa magambo, m’weji tuli ŵakusacilila kwamanyisya ŵane yisyesyene pakwamba ya Mlungu jwetu.

Tukumsyasya Yesu. Baibulo jikusamkolanga Yesu kuŵa “mboni jakulupicika ni ja usyesyene.” (Ciunukuko 3:14) Yesu ŵaŵecete kuti jwalakwe ‘ŵatendekasisye lina lya Mlungu kumanyika,’ soni ŵajendelecele ‘kutendela umboni ya usyesyene’ pakwamba ya Mlungu. (Yohane 17:26; 18:37) M’yoyo, ŵakumkuya Klistu ŵasyesyene akusosekwa kola lina lya Yehofa nikwamanyisyaga ŵane linalyo. Mboni sya Yehofa sikulingalinga kutenda yeleyi.

• Ligongo cici Ŵakulijiganya Baibulo ŵajigele lina lyakuti Mboni sya Yehofa?

• Ana Yehofa aŵele ali ni mboni syakwe pacilambo capasi kwandaŵi jelewu catuli?

• Ana nduni jwali Mboni jekulungwa ja Yehofa?