Ana Mboni sya Yehofa Ali Ŵandu Ŵatuli?

Ana wawojo akwamanyilila ŵa Mboni sya Yehofa ŵalingwa? Ŵane mwa m’weji komboleka kuti tuŵandikene nawo nyumba, tukukamulila yimpepe masengo, kapena tukulijiganya sukulu yimpepe. Soni komboleka kuti pakwete patutagulilene ngani sya m’Baibulo. Ana m’weji tuli ŵani kusyesyene, soni ligongo cici tukusasalilaga ŵane yakwamba cikulupi cetu?

Tuli ŵakulandana ni ŵandu ŵane wosope. Twakusile mwakulekanganalekangana, soni tuli ŵakupata mwakulekanganalekangana. Ŵane mwa m’weji kala twaliji mu dini sine, soni ŵane nganakulupililaga Mlungu. Mkanutuŵe Mboni, wosopewe twakwete ndaŵi jakuwungunya mwakusamala yajikusajiganya Baibulo. (Masengo 17:11) Twajiticisye yatwalijigenyeyo, kaneko pajika twasagwile kumlambila Yehofa Mlungu.

Kulijiganya Baibulo kukusatukamucisya. Mpela mundu jwalijose, tukusalimbana ni yakusawusya nambosoni yakulemwa yetu. Nambo patukulingalinga kamulicisya masengo maloŵe gakutulongola ga m’Baibulo, umi wetu usindile mnope. (Masalimo 128:1, 2) Ni ligongo lyakwe tukusasalilaga ŵane ya yindu yambone yatulijigenye kutyocela m’Baibulo.

Tukusakuya Malamusi ga Mlungu. Malamusi gatukusalijiganya m’Baibulo, gakusatulimbikasya kuŵa ŵakusengwa, soni kwacimbicisya ŵane, nambosoni kola ndamo syambone mpela kulupicika ni canasa. Malamusiga gakusatukamucisya kola umi wambone, soni kuŵa ŵandu ŵambone kwatukutama, soni gakusalimbikasya maŵasa kuŵa gakamulana soni gandamo syambone. Pakuŵa tuli ŵakusimicisya kuti “Mlungu jwangali lusagu,” tukusaliwona kuti tuli muliŵasa lya pacilambo cosope lyalikusaŵa pamkamulano ligongo lya yikulupi yetu, lyangalikusasagulana mtundu kapena cilambo catyocele mundu. Atamose kuti tuli mpela ŵane wosope, nambo tuli ŵandu ŵapajika.—Masengo 4:13; 10:34, 35.

• Ana Mboni sya Yehofa sikusalandana catuli ni ŵandu ŵane?

• Ana ndamo syapi syalijigenye ŵa Mboni kutyocela m’Baibulo?