LIJIGANYO 3

Ana Usyesyene wa M’Baibulo Wamanyicesoni Catuli?

Kakuga ka acalume kakulijiganya Baibulo myaka ya mma 1870 — Ŵakulijiganya Baibulo, m’ma 1870

Jwamlume akuŵalanga Nsanja ja Mlonda jandanda — *Sanja ja Mlonda* jandanda mu 1879

Jwamkongwe ajigele magasini ga Sanja ja Mlonda soni Ajimuce! — *Sanja ja Mlonda* ja moŵa agano

Baibulo jasasile mkanipaŵe kuti pacaciwa Yesu, kucipagwa ŵakwiganya ŵaunami pasikati pa Aklistu ŵandanda, ŵacacisokonasya usyesyene wa m’Baibulo. (Masengo 20:29, 30) Mkupita kwandaŵi, yeleyi yatendekwe. Jemanjaji ŵawangenye yijiganyo ya Yesu ni nganisyo sya dini jacikusa, m’yoyo kwapagwile mtundu wine wa Ciklistu caunami. (2 Timoteo 4:3, 4) Ana lelo jino mpaka tusimicisye catuli kuti tukuyipikanicisya mwakuŵajilwa yajikusajiganya Baibulo kusyesyene?

Jakwanile ndaŵi jakuti Yehofa ŵamanyisye ŵandu usyesyene. Yehofa ŵasasile cile kuti ‘pandaŵi jambesi, umanyilisi usyesyene ucitupa.’ (Danieli 12:4) Mu caka ca 1870, kalikuga kamwana ka ŵandu ŵakusosasosa usyesyene kamanyilile kuti yijiganyo ya dini syejinji nganiyiŵa yakutyocela m’Baibulo. M’yoyo ŵatandite kusaka kumanyilila yijiganyo yisyesyene ya m’Baibulo, yakuyicisya yakwe yaliji yakuti Yehofa ŵakamucisye kumanyilila malemba.

Ŵandu ŵambone mtima ŵalijiganyaga Baibulo mwakusamala. Ŵakulijiganya Baibulo ŵamtawu, ŵaŵapali munyuma mwetu, ŵapatile litala lyakulijiganyila lyatukusakamulicisya masengo lelo jino. Ŵatagulilanaga ngani sya m’Baibulo mtwe ni mtwe. Naga asimene ndime jine jakusawusya kujipikanicisya, ŵasosaga malemba gane gagakutagulila cenene nganijo. Payice pambesi pakwiwona kuti ndimejo jikamulene ni malemba gane gala, ŵalembaga yapatileyo. M’yoyo ligongo lyakuti ŵajikundile Baibulo kuti jiligopoleleje jika, jemanjaji ŵamanyililesoni yisyesyene yakwamba lina lya Mlungu ni Ucimwene wakwe, lisosa lyakwe kwa ŵandu soni cilambo capasi, ndamo ja ŵawe, soni cembeceyo ca kwimuka ku ŵawe. Kusosasosa kwawo kwakamucisye kuŵa ŵagopoka ku yikulupi ni yitendo yaunami.—Yohane 8:31, 32.

Mu caka ca 1879 ŵakulijiganya Baibuloŵa ŵayiweni kuti jakwanile ndaŵi jakuwandisya usyesyene pacilambo cosope. M’yoyo caka cicoco, ŵatandite kupanganya magasini ga Nsanja ya Olonda Yolengeza Ufumu wa Yehova jatukujikamulicisya masengo moŵa agano. Sambano tukuwandisya usyesyene wa m’Baibulo kwa ŵandu mu yilambo yakupunda 230, soni mu yiŵeceto 600. Nganiyitendekwe nikalakose kuti umanyilisi usyesyene utupe mpela mwayiŵelelemu!

Ana yaŵele wuli ni usyesyene wa m’Baibulo paŵagambile kuwa Klistu?
Ana cici cacikamucisye kuti tuwumanyililesoni usyesyene wa m’Baibulo?