Ana Lisosa lya Mlungu Lili Cici?

Mlungu akusaka kuti tutame mwamtunjelele soni mwakusangalala mu paladaiso pacilambo capasi mpaka kalakala!

Komboleka kusimonga kuti ana yeleyi mpaka yikombolece catuli?’ Baibulo jikusaŵeceta kuti Ucimwene wa Mlungu ucikombolekasya yeleyi, soni Mlungu akusaka kuti ŵandu alijiganye yakwamba Ucimwenewo ni lisosa lyakwe kwa m’weji.—Masalimo 37:11, 29; Yesaya 9:7.

Mlungu akusaka kuti yindu yitujendeleje cenene.

Mpela mwayikusaŵela kuti mtati jwambone akusiŵasosela yambone ŵanace ŵakwe, Atati ŵetu ŵakwinani akusaka kuti tuŵeje ŵakusangalala mpaka kalakala. (Yesaya 48:17, 18) Ŵalakwewo asasile cilanga cakuti “jwakutenda yele yakusaka Mlungu, akutama citamile kwandala syosope.”—1 Yohane 2:17.

Mlungu akusaka kuti tujendeje m’matala gakwe.

Baibulo jikusala kuti Mkupanganya jwetu akusaka “kutujiganya matala gakwe” soni kuti tukomboleceje “kwenda m’matala gakwe.” (Yesaya 2:2, 3) Mlungu asongangenye “ŵandu ŵakwe” kuti lisosa lyakwe limanyice pacilambo cosope capasi.—Masengo 15:14.

Mlungu akusaka kuti tukamulaneje pakumlambila.

M’malo mwakwagaŵanya ŵandu, kulambila Yehofa kusyesyene kukwakamulanya ŵandu pampepe mwacinonyelo cisyesyene. (Yohane 13:35) Ana lelo ŵani ŵakwajiganya kulikose acalume ni acakongwe kuti atumicileje Mlungu mwakamulana? Tukwaŵenda kuti awungunye kwanga kwakwe mu kabukuka.