Kummanyilila Mmagongo Jwampaka Ajonanje Chikulupi Chetu

YEHOFA Mlungu mkanapanganye chilambo chapasi, ŵapanganyisye malayika kwinani. Nambo pajapitaga ndaŵi, lilayika line lyatandite kumbila kuti ŵane alilambileje mpela Mlungu. Ligongo lya kukumbilaku, lilayikali lyalipangenye jika kuŵa Satana, kugopolela kuti “Jwakusisya,” kapena kuti jwakusasisya Mlungu. Ana Satana ŵamsisisye chamtuli Mlungu?

Satana mwa ukalamusi ŵamnyenjelele Hawa kuti akapikanila Mlungu. Mwaukalamusi, jwalakwe ŵasasile kuti Yehofa Mlungu akumjima chindu chine chambone mwakumlekasya kuti akalya chisogosi cha m’chitela chine. Mwachipongwe ŵamkolasile Mlungu kuti ali jwakulambusya, soni kuti Hawa ngakusosekwa Mlungu kuti amlongoleleje. Jwalakwe ŵaŵechete kuti: “Mlungu akumanyilila kuti katema katimchilya yisogosi yeleyi, meso genu tigachiwuguka ni timchiŵa mpela mwaŵelele Mlungujo, timchimanyilila yindu yambone ni yakusakala.” (Genesesi 3:5) Mwakuloŵela, Hawa ŵakulupilile unami wa Satanawu. Hawa nganapikanila lilamusi lya Mlungu soni ŵatendekasisye kuti Adamu nombe najo akapikanila. Kutandila kalakala, Satana aŵele mmagongo jwa ŵandu ŵakola chikulupi chisyesyene. Jwalakwe akwendelechela kwalambusya ŵandu mpaka lelo jino. Ana akutenda yeleyi chamtuli?

Chikulupi cha Unami Chikuwanda

Satana ŵakamulichisye masengo kulambila milungu jakupanganyidwa ni ndamo sya ŵandu kuti ŵasakasye Ayisalayeli. Yesu jwali Mesiya, ŵasalile achimlongola ŵa dini kuti ligongo lyakuti ŵajiganyaga “tumalamulo twakupanganya ŵandu msape, ni mpela kuti gali malamusi ga Mlungu kwene,” kulambila kwawo kwaliji kwangali mate. (Mateyu 15:9) Ayisalayeli paŵamkanile Mesiya, nombe Mlungu ŵakanilesoni. Yesu ŵasalile kuti, “Mlungu tachimsumula Uchimwene wakwe ni kuwupeleka ku lukosyo lwa ŵandu ŵele ŵatachimpikanila.” (Mateyu 21:43) Myoyo ŵaŵamkuyaga Yesu ŵaliji ŵandu ŵakunonyeledwa ni Mlungu.

Kaneko Satana ŵatesile yakuti asakasye ŵakumkuya Yesu. Ana ŵakombwele kwasakasya? Kupitila mu chiwanichisyo chine, Yesu ŵasasile yayichitendekwa kusogolo. Mu chiwanichisyocho, mundu ŵapandile tiligu jwambone mumgunda. Kaneko, mmagongo jwakwe ŵapandilesoni yikoko pasikati patiligu. Mbeju syosopesyo ŵasilesile kuti sikule mpaka pandaŵi jagungula. Kaneko ŵatyosisye yikoko yila pasikati pa tiligu ni kuyijonanga. Nambo tiligu ŵamsongenye ni kumtaga mungokwe.

Kaneko Yesu ŵasalile ŵakulijiganya ŵakwe kugopolela kwa chiwanichisyocho. Yesu msyene ali Mkupanda. “Mbeju syambone sila ni ŵandu ŵele ŵali mu Uchimwene wa Mlungu, yikoko yila niwo ŵandu ŵa jwangalumbana jula. Kukata kula niko kumala kwa chilambo chapasi chino, ni ŵakukata ŵala niwo malayika.” (Mateyu 13:38, 39) Yesu ŵalandanyichisye ŵakumkuya ŵakwe ŵasyesyene ni tiligu. Nambo Satana ŵapandile ŵakumkuya ŵaunami, ŵali mpela yikoko, pasikati pa ŵakumkuya ŵa Yesu ŵasyesyene. Myoyo mpela muŵaŵechetele Yesu kuti pali papite yaka chiwilile jwalakwe, ŵakumkuya ŵaunami ŵawonechele. Jemanjaji ŵalimbikasisye yijiganyo ya unami, mpela chijiganyo chakuti mwa Mlungu jumo mwana milungu jitatu. Ŵakulijiganya ŵaunamiŵa ŵatanditesoni kulambila milungu jakupanganyidwa ni kwinjilila ya ndale. Ŵamnonope ni ŵaŵajendelechele kuya yijiganyo ya Yesu.

Ŵandu Ŵakwete Chikulupi Chisyesyene Chichipunda

Nambope, mpela muŵaŵechetele Yesu, pachiŵa kuchenga. Malayika ga Mlungu gachajonanga ŵanganakola chikulupi chisyesyene. Nambo ŵakwete chikulupi chisyesyene chachimanyika mwangasawusya. Pambesi pakwe, Satana, mmagongo jwa chikulupi, chachimjonanga. Ŵakwete chikulupi chisyesyene chachipunda

Nambo ana mpaka twamanyilile chamtuli ŵakwete chikulupi chisyesyene lelo jino? Mu ngani jakuyichisya, chitukambilane kwanga kwa chiwusyochi.