Kulijiganya Kutyochela kwa Mesiya

MLUNGU ŵasasile mkanipaŵe kuti chachimsagula Masiya kuŵa Jwakulongolela jwa ŵandu wosope. Mlungu akusamanyilila mlongola jwatukusasosechela kusyesyene. Jwalakwe akusamanyililasoni kusagula Mlongola jwambone mnope kwa m’weji. Ana Mesiya jwaliji Jwakulongolela jwamtuli? Ana ŵaliji Jwakulongolela jwa asilikali jwamachili mnope? Kapena mundu jwakumanyilila mnope ya ndale? Mundu jwamlijiganye mnope? Malemba Geswela gakusasala kuti Mesiya jwaliji jwakulochesya jwapajika mnope. Mesiyaju jwaliji Yesu Klistu.—Mateyu 23:10.

Mlungu ŵalolechesye kuti Yesu apagwe jwamlama soni jwamswela. Yesu ŵakanilesoni yakulingalinga ya Satana pakusaka kumsakasya. Yaŵatendaga Yesu soni yaŵaŵechetaga yalosyaga kuti ŵakamulichisyaga masengo machili gakwe mpela muŵatendelaga Mlungu. Mwakulandana ni Mlungu, nombe najo Yesu jwaliji jwachilungamo, jwalunda, soni jwachinonyelo. Alole yampaka tulijiganye kwa Yesu.

Ŵakamulichisye masengo machili gaŵampele Mlungu pakwakamuchisya ŵane. Yesu ŵasamalaga ya ŵandu mnope, soni ŵakamulichisyaga masengo machili gakwe mwakoloŵa magasa pakusaka kwakamuchisya ŵane. Yesu ŵaŵechete kuti: “Ngwete nawo chanasa aŵa ŵanduŵa, ligongo . . . nganakola chakulya.” (Maliko 8:2) Kaneko Yesu mwakusimonjesya ŵalisisye likuga lyekulungwa lyalyayiche kukumpikanila.

Yesu ŵajendagajendagasoni, achijiganyaga ni ‘kuposya yilwele yosope ya ŵandu, yakupoteka ya m’yilu mwawo.’ (Matayo 4:23) Ni ligongo lyakwe ŵandu ŵajinji ŵamkuyaga, soni ‘ŵandu wosope ŵasakaga kumkwaya, pakuti machili gagaliji mkukopoka mwa Yesu nigo gagaposisye wosope.’ (Luka 6:19) Yisyene, Yesu ŵayiche, “ngaŵa kuti ŵane amtumichile, nambo kuti ŵatumichile ŵandu, ni kupeleka umi wakwe kwawombola ŵandu ŵapawinji.” (Mateyu 20:28)a Ana achimlongola ŵalingwa ŵampaka alosye mtima wakulijima mpela welewu?

Ŵalosisye chilungamo cha Mlungu. Yesu ŵakuyaga chilamusi cha Mlungu, soni ŵatendaga yindu mwakamulana ni chilamusicho. Mpela mugasasile Malemba mkanipaŵe, jwalakwe jwakwete mtima mpela wa Daudi juŵatite, “Ngusanonyela kutenda lisosa lyawo, wawo Mlungu jwangu, soni chilamusi chawo chili mumtima mwangu.” (Salimo 40:8) Yesu ŵanonyelaga ŵandu wosope, ŵakusichila ni ŵakulaga, achalume ni achakongwe, ŵanache ni achakulungwa, soni ŵachimbichisyaga, mpela mwakusatendela Mlungu. Ndaŵi jine, ŵakulijiganya ŵa Yesu ŵakalipile achinangolo ŵaŵayikaga nawo ŵanache ŵawo kwa Yesu. Nambo Yesu ŵatite: “Mwalecheni ŵanache ayiche kwa une, kasimwalekasya, pakuti Uchimwene wa Mlungu uli wawo ŵati iyiyiŵa.”—Maliko 10:14.

Ŵalosisye lunda lwaŵampele Mlungu. Yesu ŵapikanichisyaga mnope ŵandu. “Jwelejo msyene ŵamanyililaga ya m’mitima mwa ŵandu.” (Yohane 2:25) Achimmagongo ŵa Yesu paŵatumisye ŵandu kuti akamkamule, atamose jemanjaji ŵaŵechete kuti: “Pangali jwine jwele juŵaŵechete mpelaga mundu jweleju chitandilile kala kose.” Ana Yesu ŵajigele kwapi lunda lwakwe? Jwalakwe jwatite: “Yele yingwiganya ngaŵa yangu ngwamba, nambo yili ya Atati ŵele ŵaŵandumile.”—Yohane 7:16, 46.

Ŵalosisye chinonyelo cha Mlungu. Yesu ŵalijisoni jwachanasa kwa ŵandu. Mundu “jwamatana chiilu chosope” ŵamŵendile kuti: “Ambuje, naga akusaka akukombola kuswejesya.” Ligongo lya chanasa, Yesu “ŵatambasukwile mkono wakwe ni ŵamkwayiye achitiji, ‘Chambone ngusaka, swejelani.’ Papopo matana gala gaposile.” (Luka 5:12, 13; Maliko 1:41, 42) Yesu ŵasachililaga yisyene kumasya kulagasika kwa mundu jwakulagajo.

Ana Yesu akusasamalasoni ya wawojo? Yesu msyene akwanga kuti, ‘Myiche kukwangu, ŵanganyamwe wosope ŵamkupela ni ŵakusitopelwa, nipo une tinampumusye. Twichilani likongwa lyangu nipo mlijiganye kwa une, pakuti ndili jwakuweŵa ni jwa mtima wakulitulusya.’—Mateyu 11:28, 29.

Yesu ali Mlongola jwambone mnope kwa m’weji. Ni ligongo lyakwe, jwalakwe akutulimbikasya kuti: “Mlijiganye kwa une.” Pakuŵa akwaŵenda kutyochela pasi pamtima, ana chakunde kulijiganya kwa jwalakwe? Naga akukunda chachikola umi wakusangalala.