Kuwonechela kwa Mesiya

PALI papite yaka yakupunda 500 Daniyele ali asasile kala yakwamba Mesiya, lilayika lya Mlungu Gabuliyele lyawonechele kwa mwali jwakolanjikwa kuti Maliya. Mwaliji jwapagwile mu msela wa ŵanache ŵa Mwenye Daudi. Gabuliyele ŵaŵechete kwa mwaliji kuti: “Moni Maliya, Ambuje amsagwile kumtendela yambone yekulungwa.” (Luka 1:28) Nambo Maliya wamkamwile woga. Ana Gabuliyele ŵasakaga kuti amsalile yamtuli Maliya?

Gabuliyele ŵatite: “Kasimjogopa Maliya, Mlungu amsalalalile mtima. Timkole chitumbo, ni tim’beleche mwanache jwamlume. Timchimta lina lyakwe Yesu. Nipo tachiŵa jwamkulungwa, ni tachiŵilangwa Mwanagwawo Mlungu ŵakwinani mnope. Ambuje tachimpa chitengu cha uchimwene wa Daudi babagwe, nipo . . . uchimwene wakwe tiuchiŵa wangamala.” (Luka 1:30-33) Jeleji jaliji ngani jakusangalasya mnope. Maliya jwaliji jwakuti chaŵeleche Mesiya, jajaliji “mbeju” jaŵajijembecheyaga ŵandu kwa ndaŵi jelewu.

Chaka chakuyichisya chakwe, Yesu ŵapagwile ku Betelehemu. Chilo chaŵapagwile Yesu, lilayika lyasasile kwa ŵakuchinga yilango kuti: “Mlole nimjigalile ŵanganyamwe ngani jambone jitijisangalalisye mnope . . . Pakuŵa lelo jino Mkulupusyo jwenu apagwile kukwenu m’musi wa Daudi. Jwelejo akuŵilangwa Klistu, Ambuje.” (Luka 2:10, 11) Kaneko, achinangolo ŵa Yesu ŵapite kukutama ku Nasaleti kwaŵakulile Yesu.

Mu chaka cha 29 C.E., Mesiya ŵawonechele. Yesu ŵatandite kutumichila mpela jwakulochesya jwa Mlungu, “paŵaliji ni yaka mpela makumi gatatu.” (Luka 3:23) Ŵandu ŵajinji ŵatandite kumanyilila kuti Mlungu ŵamtumisye Yesu. Jemanjajo ŵatiga: “Jwakulochesya jwamkulungwa atuwonechele pachilikati petu.” (Luka 7:16, 17) Ana Yesu ŵajiganyaga yamtuli?

Yesu ŵajiganyaga kuti ŵandu amnonyeleje Mlungu ni kumtumichila: Jwalakwe ŵaŵechete kuti: “Ambuje Mlungu ŵetu, ŵelewo jikape ali Ambuje, nipo mwanonyeleje Ambuje Mlungu ŵenu ni mtima wenu wosope, ni umi wenu wosope, ni lunda lwenu losope, ni machili genu gosope.” (Maliko 12:29, 30) Ŵaŵechetesoni kuti: “Mkatindiŵalile Ambuje Mlungu ŵenu, ŵawowopewo mkatumichileje.”—Luka 4:8.

Yesu ŵalimbikasisye ŵandu kuti anonyelaneje: Jwalakwe ŵatite: “Mumnonyeleje mjenu mpela yamkuti pakulinonyela mwasyene.” (Maliko 12:31) Ŵaŵechetesoni kuti: “Yosope yamkuyisaka kuti ŵandu angamtendele ŵanganyamwe, mwatendeleje ŵanganyawo iyoyo nombe nawo. Ni yele yayikwiganya malamusi pampepe ni ŵakulochesya.”—Mateyu 7:12.

Yesu ŵalalichilaga ŵane mwamtawu ya Uchimwene wa Mlungu: Jwalakwe ŵatite: “Une ngwenela kulalichila Ngani Syambone sya Uchimwene wa Mlungu kumisi jine nombe nako, pakuŵa ni yele Mlungu yiŵandumile kuyitenda.” (Luka 4:43) Ligongo chichi Uchimwene wa Mlungu uli wakusosekwa mnope?

Malemba gakusajiganya kuti Uchimwene wa Mlungu uli boma jakwinani jajichilamulila pachilambo chosope chapasi. Yesu Mesiya, ali Mwenye jwakusagulidwa ni Mlungu. Daniyele jwasasile mkanipaŵe kuti Mlungu chachimpa Mesiya “ulamusi, ni uchimbichimbi ni uchimwene.” (Daniele 7:14) Uchimwenewu uchitamilikasya Paladaiso pachilambo chosope, soni uchipeleka mbote ja umi wangamala kwa ŵakutumichila ŵa Mlungu. Ana jeleji ngaŵa ngani jambone?