MBALI 7
Yaŵasasile Mlungu Kupitila mwa Ŵakulochesya
ŴAKULOCHESYA ŵakala ŵalosisye chikulupi mwa Mlungu. Ŵakulupililaga yilanga yakwe, soni ŵatamaga umi wakamulana ni yilangayo. Ana yilangayo yaliji yamtuli?
Adamu ni Hawa ali agambile kulemwa kwene mu mgunda wa Edeni, Mlungu ŵapeleche ŵasasile kuti chachimsagula jwine juchachikasa mtwe wa “lijoka,” kwimila “chingwena chachikulungwa . . . chelechi nilyo lijoka lyakala lila, lyakuŵilanjikwa “Satana.” Jwakusaligulidwajo chachimjonanga Satana. (Genesesi 3:14, 15; Chiwunukuko 12:9, 12) Ana ŵani ŵachachikasa mtwe wa “lijoka”?
Pali papite yaka 2,000 ali asasile yeleyi, Yehofa ŵamsalile jwakulochesya Abulahamu kuti Jwakwisajo chachiŵa jwa mumbagwilo jakwe. Mlungu ŵamsalile Abulahamu kuti: “Nipo mitundu josope ja ŵandu ŵa pa chilambo chapasi, tijichipata upile kupitila mwa yisukulu [“mbeju,” NW] yenu, ligongo m’mwejo mgapikene maloŵe gangu.”—Genesesi 22:18.
Mu 1473 B.C.E., Mlungu ŵamsalile jwakulochesya Musa yindu yine pakwamba ya “mbeju.” Musa ŵasalile ŵanache ŵa Yisalayeli kuti: “Yehofa Mlungu jwenu chachapa jemanja jwakulochesya mpela une, kutyochela pasikati pawo, kutyochela kwa achanasi ŵawo, jemanja akusosekwa kumpikanila.” (Detulonomo 18:15) Myoyo, jwakulochesya mpela Musa ŵaliji jwakuti chachiyika kutyochela pasikati pa ŵanache ŵa Abulahamu.
Jwakulochesyajo ŵaliji jwakuti chachiŵasoni jwa mbagwilo ja Mwenye Daudi: “Chinjijimusya mbeju jenu panyuma penu, soni chinjitamilikasya mwakutamilichika chitengu chakwe cha uchimwene kwangamala.” (2 Samuele 7:12, 13) Mlungu ŵasasilesoni kuti jwa mu mbagwilo ja Daudiju chachikolanjikwaga kuti “Mwenye jwa Mtendele.” Jwalakwe jwaŵechetesoni kuti: “Ulamusi wakwe wa uchimwene, soni mtendele ngasiyimala pachitengu cha Daudi ni pa uchimwene wakwe kuti utamilichiche mnope, soni kuti ujendelechele mwachilungamo, soni mwakulungama, kutandila sambano jino mpaka kalakala.” (Yesaya 9:6, 7) Yisyene, Mlongola jwakulungamaju chachiyikasya mtendele ni chilungamo. Nambo ana Mlongoloju ŵaliji jwakuti chachiyika chakachi?
“Mbeju” jaŵajisasile mkanipaŵe jaliji jakuti . . . jichityochela kwa Abulahamu, jichiŵa jwakulochesya mpela Musa, jichityochela mu msele wa Daudi, jichikopochela mu 29 C.E., jichikasa lijoka jwali Satana
Pali papite ndaŵi, lilayika Gabuliyele lyamsalile jwakulochesya Daniyele kuti: “Mkusosekwa kumanyilila ni kola umanyilisi wakuti kutandila pa kupikanika kwa maloŵe gakuti akalinganye ni kutaŵasoni Yelusalemu mpaka ndaŵi ja Mlongola Masiya, pachiŵa milungu 7, nambosoni milungu 62.” (Daniele 9:25) Milungu jelejo jaliji ja yaka, mlungu uliwose uchikolaga yaka 7. Yeleyi yikulosya kuti yaliji yaka 483. Yakayi yatandile mu 455 B.C.E. mpaka 29 C.E.a
Ana yisyene kuti Mesiya, juŵaliji jwakulochesya mpela Musa, soni “mbeju” jaŵajijembecheyaga ŵandu, ŵakopochele mu 29 C.E.? Kwende tulole.
a Alole maloŵe gakumbesi 2 m’buku ja Asangalaleje Mpaka Kalakala papeji 255. Jakuwandisya ŵa Mboni sya Yehofa.