MBALI 6

Ana Chakulinga cha Mlungu cha Chilambo Chapasi Chili Chamtuli?

MLUNGU ŵapanganyisye chilambo chapasi kuti chiŵe malo gambone kutama ŵandu. Maloŵe gakwe gakusasala kuti: “Pakwamba ya kwinani, kwinani kuli kwa Yehofa, nambo chilambo chapasi ŵachipeleche kwa ŵanache ŵa ŵandu.”—Masalimo 115:16.

Mkanampanganye mundu jwandanda Adamu, Mlungu ŵasagwile mbali jine jachilambo chapasi jakolanjikwa Edeni ni ŵajipangenye kuŵa mgunda wakusalala. Malemba gakusasala kuti sulo sya Filate ni Tigilisi (Hidekeli) syatyochelaga mu Edeni.a Yikuwoneka kuti mgunda wa Edeni waliji chakungopoko lyuŵa kwa chilambo chachikukolanjidwa masiku agano kuti Turkey. Yili yisyene kuti mgunda wa Edeni wapali pachilambo chapasichi.

Mlungu ŵampanganyisye Adamu ni kum’ŵika mu mgunda wa Edeni kuti “alimeje ni kuwulolela.” (Genesesi 2:15) Kaneko Mlungu ŵapanganyisye jwamkongwe jwa Adamu, Hawa. Mlungu ŵalilamwile liŵasali kuti: “M’ŵelekane mtupe, mgumbale pachilambo chapasi, mchigomeche.” (Genesesi 1:28) Yili yakumanyika kuti, Mlungu “nganachipanganya [chilambo chapasi] pali pangali chakulinga, [nambo] ŵachigumbile kuti atameje ŵandu.”—Yesaya 45:18.

Nambo mwanja Adamu ni Hawa, mwamele ŵamjimuchile Mlungu pangapikanila malamusi gakwe. M’yoyo Mlungu ŵatopwele mumgunda wa Edeni. Paladaiso ŵajasiche. Soni yakuyichisya yakusakala ya ulemwa wa Adamu yajendelechele. Malemba gakutusalila kuti: ‘Ulemwa wayiche m’chilambo chapasi ligongo lya mundu jumo, nipo ulemwawo wayikasisye chiwa. Ni iyoyo chiwa chajenele kwa ŵandu wosope, pakuŵa kuti wosope ŵalemwisye.’—Aloma 5:12.

Ana chakulinga cha Yehofa chapandanda chakuti ŵandu ŵakusangalala atameje m’chilambo chapasi cha paladaiso chamasile basi? Iyayi! Mlungu akusala kuti: “Maloŵe gangu gakutyochela mkamwa mwangu, ngasigawuja kwangune pachabe. Nambo gachitenda chingusaka, soni gachikula munagatumichisye.” (Yesaya 55:11) Paladaiso jichiwujilasoni pachilambo chapasi.

Ana umi uchiŵa wamtuli mu Paladaiso? Alole yagakusala Malemba mapeji gaŵili gakuyichisyaga.

a Lilemba lya Genesis 2:10-14 likusala kuti: “Lusulo lwakukopoka mu Edeni m’momo, lwajilimaga mesi ni lwaliji mkwitila mgundawo. Lusulolo lwagaŵikene kupanganya sulo mcheche. Lusulo lwandanda lina lyakwe lyaliji Pishoni . . . lusulo lwaŵili lina lyakwe Gihoni . . . lwatatu lina lyakwe Tigilisi [kapena Hidekeli] lwele lwalukupita kungopoka lyuŵa kwa chilambo cha Asiliya. Nipo lusulo lwa mcheche lina lyakwe Filate.” Sulo siŵili syandandasyo, soni malo gakwe ngayikumanyika.

Chilambo Chapasi cha Paladaiso Chachikwisa

Ŵawe chachijimuka: “Ŵandu wosope ŵele ŵali m’malembe tachigapilikana maloŵe gakwe ni tachikopoka m’malembe mwawo.”—Yohane 5:28, 29.

Ŵandu ngasakalambala, kulwala, soni ngasawa: “Ŵakutama mwelemo pangali jwachachijila kuti: ‘Une ngulwala.’” (Yesaya 33:24) Mlungu “tachasyula [kupukuta] misosi jawo m’meso mwawo. Chiwa ngasichipagwasoni, atamuno kulila malilo, kapena kulila kapena kuyiwona yipwetesi, yindu yandanda yili yipite.”—Chiunukuko 21:4.

Yakulya yejinji: “Chilambo chapasi chichisogola yisogosi: Mlungu, Mlungu jwetu, chachitupa majali.”—Masalimo 67:6.

Nyumba ni masengo gakusangalasya: “Nipo jemanjajo chachitaŵa nyumba ni kutamaga . . . Ŵesagulwe ŵangu chachisangalala moŵa gejinji ni masengo ga makono gawo.”—Yesaya 65:21, 22.

Ngondo kasa malamusi, soni kuwulasyana kuchiŵa kwangali: Yehofa “akulekasya ngondo mpaka kumbesi kwa chilambo chapasi.” (Masalimo 46:9) “Nambo ŵakusakala chachakata m’chilambomo. Ŵachiwembu chachatupula.”—Misyungu 2:22.