MBALI 2
Ana Chikulupi Chisyesyene Chili Chichi?
Mpela mwasiŵelele mbiya, chikulupi chikusosekwa kuŵa chisyesyene kuti chiŵe chakamuchisya
KWAMBA kummanyililape Mlungu kwangalosya kuti mundu akwete chikulupi chisyesyene. Kwana ŵandu mamiliyoni ŵakusakulupilila Mlungu, nambo akusatendaga yakusakala mwamele. “Chikulupi” mpela chelechi chili mpela mbiya jaunami. Chikusawoneka mpela chisyesyene nambo chili changali mate. Sambano, ana chikulupi chisyesyene chili chamtuli?
Mundu jwakwete chikulupi chisyesyene akusosekwa kumanyilila chenene Malemba Geswela Malemba gakusatusalila yisyesyene pakwamba ya Mlungu, soni gakusatukamuchisya kuti tummanyilile. Gakusatukamuchisya kumanyilila malamusi ga Mlungu, chakulinga cakwe, soni yakusajiganya. Yindu yakusajiganya Mlungu yili ayi:
Mlungu ali jumope basi. Pangali jwakulandana najo.
Yesu nganaŵa Mlungu Jwamachiligose. Ali jwakulochesya jwa Mlungu.
Mlungu jwangasangalala kuti ŵandu atumichileje milungu jakupanganyidwa.
Ŵandu akwembecheya lisiku lyakwelusya.
Ŵandu ŵawe ŵajinji chachijimuka m’Paladaiso.
Mundu jwakwete chikulupi chisyesyene akusatenda yindu yambone. Yindu yambone yakusatendayo yikusamchimbichisya Mlungu soni yikusaŵa yakamuchisya kwa mundujo ni ŵane. Yindu yamboneyi yili ayi:
kumtumichila Mlungu.
kola ndamo syakusasaka Mlungu kuti tukole, mnopemnope chinonyelo.
kuŵambala nganisyo ni yakumbila yakusakala.
kwendelechela kulupilila Mlungu atamose pakusimana ni yipwetesi.
kwajiganya ŵane ya Mlungu.
Chikulupi chisyesyene chikusamtendekasya mundu kutenda yindu yambone
Ana Mpaka Atende Chichi Kuti Akole Chikulupi Chisyesyene?
Mpela minowu, chikulupi chikusakula naga chikukamula masengo gakwe
Amŵende Mlungu Kuti Ŵakamuchisye. Jwakulochesya Musa ŵapopesile kwa Mlungu kuti, “Musa ŵapopesile kwa Mlungu kuti, “Ananjile matala gawo kuti namanyilile ŵalakwe, soni kuti apunde kusalalila mtima.”a Mlungu ŵapikene ni kwanga lipopelo lyakwe. Musa ŵakwete chikulupi chisyesyene. Mlungu chachakamuchisyasoni wawojo kuti akole chikulupi chisyesyene.
Akoleje ndaŵi jakuŵalanga Malemba Geswela. Malemba ga Mlungu mpela Tola, Masalimo, soni Ngani Syambone, komboleka kugapata m’Baibulo Jeswela jajili buku jakuwanda mnope pachilambo chapasi. Ana akwete bukuji?
Akamulichisyeje masengo maloŵe ga mu Buku Jeswela pa umi wawo. Chikulupi chili mpela minowu, jajikusakula naga jikukamula masengo. Chikulupi chawo chichikuleje naga akuchikamulichisya masengo. Chachiyiwona jika kuti Maloŵe ga Mlungu gakusakamuchisya. Yisyene, maloŵe ga m’Malemba Geswela gakamuchisye umi wa ŵandu ŵajinji. Ajendelechele kuŵalanga kuti alole yisyasyo ya ŵandu ŵane ŵele yindu yajendele chenene pa umi ligongo lya Malemba Geswela.