MBALI 1
Ana Mlungu Akusasamala ya M’weji?
MASIKU AGANO, pachilambo pagumbele yakusawusya yejinji mpela ngondo, ngosi syachilengedwe, yilwele, kulaga, chinyengo soni yipwetesi yine yejinji yakusimana nayo ŵandu. Wawojo kombolekasoni kusimanaga ni yipwetesiyi. Nambo ana ŵani ŵampaka atukamuchisye? Ana apali ŵakusasamala ya m’weji?
Chinonyelo cha Mlungu pa m’weji chili chekulungwa mnope kupundana ni cha mama pa mwanache jwakwe
Tukulupilileje kuti Mlungu akusasamala ya m’weji. M’Maloŵe Geswela jwalakwe akusasala kuti: “Ana yili yakomboleka jwamkongwe kumliŵalila mwanagwe, ngamtendela chanasa mwanache jwakuŵeleka jika? Atamose komboleka kumliŵalila mwanache, une ngasinamliŵalila kose.”a
Yeleyi yili yakulimbikasya. Chinonyelo cha Mlungu chikusapundaga mnope chinonyelo cha mama chachili chinonyelo chekulungwa chakusalosya mundu. Mlungu ngasatuleka jika. Kusala yisyene jwalakwe alosisye kala kuti akusatusamalila m’litala lyapenani. Ana atesile yeleyi chamtuli? Atesile yeleyi mwakutulosya yampaka tutende kuti tuŵe ni umi wakusangalala mwakola chikulupi chisyesyene.
Kola chikulupi chisyesyene kuchitukamuchisya kuti tuŵe ŵakusangalala. Chikulupichi chichitukamuchisya kuti tuŵambaleje yakusawusya yejinji soni kuti tumalaneje nayo mwakuŵajilwa. Chichitukamuchisyasoni kuti tuŵe paunasi ni Mlungu soni kola mtundele wa mumtima. Chikulupi chisyesyene chikusatukamuchisya kuti tukole sogolo jambone, jajili umi wangamala mu Paladaiso.
Nambo ana chikulupi chisyesyene chili chichi? Soni mpaka tuchipate ni kuchikusya chamtuli?
a Alole Yesaya 49:15 m’Malemba Geswela.