MBALI 24

Paulo Akujilembela Mipingo Yikalata

Yikalata ya Paulo yikwalimbikasya Aklistu ŵandanda

MPINGO wasambano wa Ciklistu wakwete masengo gakusosekwa gakwanilisya lisosa lya Yehofa. Nambope mkanipapite ndaŵi, Aklistu ŵandandaŵa ŵasimene ni ngalwe. Ana Aklistuŵa akajendelecele kuŵa ŵagoloka paŵasimanaga ni ngalwe syakutyocela kusa kwa mpingo, soni yakusawusya ya mu mpingo? M’Malemba Gacigiliki Gaciklistu mwana yikalata yakwana 21 yiyaliji yakulimbikasya, soni yakupeleka camuko.

Mwa yikalata 21 yeleyi, yikalata 14 ŵalembile ndumetume Paulo, kutandila pa Aloma mpaka pa Ahebeli. Yikalatayi yakwete mena gakulosya kwayikwawula, cinga kwa mundu jumo, kapena ŵandu ŵa mumpingo wine wakwe. Kwende tulole ngani sine syasikusimanikwa mu yikalata ya Paulo.

Maloŵe gakamucisya pa ndamo ni yitendo. Ŵandu ŵakutenda yamsese, yacikululu, soni yakulemwa yine yekulungwakulungwa “ngasajinjila kose mu ucimwene wa Mlungu.” (Agalatiya 5:19-21; 1 Akolinto 6:9-11) Ŵakulambila Mlungu akusosekwa kuŵa ŵakamulana atamose aŵe ŵakutyocela m’yilambo yakulekangana. (Aloma 2:11; Aefeso 4:1-6) Akusosekwa kuŵa ŵakulipeleka ni mtima wosope pakwakamucisya Aklistu acimjawo ŵakulaga. (2 Akolinto 9:7) Paulo akuŵeceta kuti, ‘apopeleje mwangalecesya.’ Jwalakwe pelepa akwalimbikasya ŵakulambila kumsalila Yehofa mwipopelo yosope yayili mu mtima mwawo. (1 Atesalonika 5:17; 2 Atesalonika 3:1; Afilipi 4:6, 7) Kuti Mlungu apikanile mapopelo gawo, akusosekwa kupopela ni cikulupi.—Ahebeli 11:6.

Ana cici campaka cikamucisye kuti maŵasa gajendeje cenene? Acalume akusosekwa kwanonyela aciŵamkwawo mpela mwakusacinonyelela cilu cawo. Acakongwe akusosekwa kwacimbicisyaga mnope aciŵamkwawo. Ŵanace akusosekwa kwapikanilaga acinangolo ŵawo, ligongo yeleyi yikusamsangalasya Yehofa. Acinangolo akusosekwa kwalongolela ni kwajiganyaga ŵanace ŵawo mwacinonyelo pakamulicisya masengo maloŵe ga Mlungu.—Aefeso 5:22–6:4; Akolose 3:18-21.

Mapu gakulosya malo gele Paulo ŵatumisyeko yikalata

Cikamucisyo pakupikanicisya cenene lisosa lya Mlungu. Yejinji yakusimanikwa m’Malamusi ga Musa yacinjilicisyaga ni kwalongola Ayisalayeli mpaka pandaŵi jakwisa kwa Klistu. (Agalatiya 3:24) Nambope Aklistu moŵa agano ngakusosekwa kuya Malamusi gelego pakumlambila Mlungu. Pakwalembela Ahebeli, ŵaŵaliji Aklistu ŵa Ciyuda, Paulo ŵatagulile cenene gopolela kwa Malamusi ga Musa, soni yalikuti kwanilicika lisosa lya Mlungu mwa Klistu. Paulo ŵaŵecete kuti yindu yejinji ya m’Malamusi ga Musa yalocesyaga ya msogolo. Mwambone, mbopesi sya nyama syalocesyaga ciwa cambopesi ca Yesu, cacikakamucisye kululucila kusyesyene ulemwa. (Ahebeli 10:1-4) Kupitila mu ciwa ca Yesu, Mlungu ŵamasisye cilangano ca Malamusi ga Musa, ligongo camasile masengo gakwe.—Akolose 2:13-17; Ahebeli 8:13.

Umo mwa mipingo jakala ukupikanila pakuwalana cikalata caŵalembele Paulo

Cikamucisyo pa kajendesye kambone ka mpingo. Acalume ŵakusaka kamula masengo ga mumpingo, akusosekwa kuŵa ŵandamo syambone, soni aŵeje ŵakuŵajilwa mwausimu. (1 Timoteo 3:1-10, 12, 13; Tito 1:5-9) Ŵakulambila Yehofa Mlungu akusosekwa ndaŵi syosope asonganeje ni ŵakulambila acimjawo kuti alimbikasyaneje. (Ahebeli 10:24, 25) Misongano jakulambilila Mlungu jikusosekwa kuŵa jakulimbikasya ni jakwiganya.—1 Akolinto 14:26, 31.

Pandaŵi jiŵalembaga Paulo cikalata caŵili cakwawula kwa Timoteyo, ndumetumeju ŵaliji ali awujile ku Loma kuŵaliji mu ukaidi, kwembeceya kumjimba magambo. Ŵaŵayikaga kukumlola ŵaliji ŵakulimba mtimape basi. Paulo ŵamanyilile kuti ndaŵi jakwe jisigele panandi. Jwalakwe ŵaŵecete kuti: “Menyene ngondo jambone, malisisye cenene makani ga luŵilo, nicigosile cikulupi.” (2 Timoteo 4:7) Komboleka kuti pali pagambile kupita ndaŵi panandi Paulo ŵam’wuleje ligongo lya cikulupi cakwe. Nambo yikalata ya ndumetumeju yikwalongolape ŵakulambila ŵasyesyene ŵa Mlungu moŵa agano.

—Nganiji jityocele m’mabuku ga Aloma; 1 ni 2 Akolinto; Agalatiya; Aefeso; Afilipi; Akolose; 1 ni 2 Atesalonika; 1 ni 2 Timoteo; Tito; Filimoni; ni Ahebeli.

ANA NDUNI JWALI MBEJU JIŴAJILOCESYE?

Paŵalemwisye Adamu ni Hawa, Mlungu ŵaŵecete mwakuwanicisya kuti: “Tinjiŵika uŵengani cilikati ca m’mwejo ni jwamkongweju, ni cilikati ca mbeju jenu ni mbeju jakwe. Mbeju ja jwamkongweju jicikasa mtwe wenu nipo m’mwejo cimciluma cindende cakwe.” (Genesis 3:15) Malemba gakulosya kuti Satana ni jwali “lijoka lyakala lila.” (Ciunukuko 12:9) Ngani jiŵalocesye Mlungu pakwamba ya jucaciŵa Mbeju kapena kuti Mkulupusyo jaliji jakusisika. Nambo yaka yejinji payaliji mkupita yakusisikayi yatandite kumanyika kupitila m’Baibulo.

Yili yipite yaka 2,000 kutyocela paŵalemwisye Adamu ni Hawa, Yehofa ŵalosisye kuti Mbeju jiŵajilocesye jicipagwa kutyocela mu uŵelesi wa Abulahamu. (Genesis 22:17, 18) Kaneko yili yipite yaka yejinji, ndumetume Paulo ŵasasile kuti mbali jandanda ja Mbejuji ali Masiya, Yesu Klistu. (Agalatia 3:16) Mwakamulana ni maloŵe ga pa Genesis 3:15, Yesu paŵam’wuleje yaliji mpela ‘kumluma cindende.’ Nambope, Mlungu ŵamjimwisye Yesu ku ŵawe, ni ‘kumpa umi wausimu.’—1 Petulo 3:18.

Mlungu ŵalinganyisyesoni kuti ŵandu ŵa pacilambo capasi ŵakwana 144,000 aŵe mbali jaŵili ja mbeju jila. (Agalatia 3:29; Ciunukuko 14:1) Pati awile akusiŵajimucisyaga ku umi wausimu kuti akaŵe ŵakulamulila pamo ni Klistu mu Ucimwene wa kwinani.—Aloma 8:16, 17.

Pakuŵa Yesu ali Mwenye jwaulamusi wekulungwa kwinani, pangakaŵapa cacityosya Satana ni mbeju jakwe, jajili ŵandu ŵakusakala, soni yiŵanda yayili kumbali ja Satana. (Yohane 8:44; Aefeso 6:12) Kaneko ulamusi wa Yesu ciwuciyikasya mtunjelele ni kusengwa kwa ŵandu wosope ŵakupikanila. Kaneko Yesu cacilikasa lijoka lila ‘mtwe,’ kapena kuti kumjonanga Satana kuti akasimanikwasoni.—Ahebeli 2:14.