Maloŵe Gakamucisya pa Cikulupi, Yitendo, ni Cinonyelo

YAKOBO ni Yuda ŵaliji acapwakwe ŵa Yesu mu liŵasa lya Yosefe ni Maliya. Petulo ni Yohane ŵaliji ŵane mwa ŵandumetume 12 ŵa Yesu. Acalume mceceŵa ŵalembile yikalata yakwana msano ni yiŵili yayikusimanikwa m’Malemba Gacigiliki Gaciklistu. Cikalata cilicose cikumanyika ni lina lya jwakulembajo. Maloŵe ga m’yikalata yeleyi galiji gakwakamucisya Aklistu kwendelecela kuŵa ŵakulupicika kwa Yehofa ni Ucimwene wakwe.

Aklistu akusosekwa kulosya cikulupi. Kwamba kuŵeceta kuti mundu ukwete cikulupi nganikuŵa kwakwanila. Cikulupi cisyesyene cikusawoneka mu yitendo. Yakobo ŵalembile kuti, “cikulupi cacili cangali yitendo cili caciwe.” (Yakobo 2:26) Kulosya cikulupi patukusimana ni yipwetesi kukusakamucisya kuti tuŵeje ŵakupilila. Kuti Mklistu akombolece kupilila akusosekwa kuŵenda lunda lwa Mlungu, soni kuŵaga ni cikulupi cakuti Mlungu campe lundalo. Kupilila kukusamtendekasya mundu kuŵa jwakuŵajilwa pameso pa Mlungu. (Yakobo 1:2-6, 12) Naga jwakulambila Mlungu mwakulupicika akwendelecela kuŵa jwagoloka, Yehofa cacimkamucisya. Yakobo akuŵeceta kuti, ‘Mum’ŵandicile Mlungu, nipo jwalakwe cacim’ŵandicila ŵanganyamwe.’—Yakobo 4:8.

Cikulupi ca Mklistu cikusosekwa ciŵeje camacili kuti cimkamucisyeje kuyiŵambala yakutulinga, soni yitendo yakusakala. Ligongo lya kuwanda mnope kwa ndamo syakusakala, Yuda ŵalimbikasisye ŵakulambila acimjakwe kuti ‘amenyane ni mtawu ngondo jakucicenjela cikulupi.’—Yuda 3.

Aklistu akusosekwa kola ndamo syambone. Yehofa akusaka kuti ŵakulambila ŵakwe aŵeje ŵaswela, ŵakutakata mu yindu yosope. Petulo ŵalembile kuti, “mtameje nomwe ŵaswela mu yitendo yenu yosope, pakuŵa yilembece kuti, ‘mtameje ŵaswela pakuti une [Yehofa] ndili jwamswela.’” (1 Petulo 1:15, 16) Aklistu akwete jwakuti amsyasyeje. Petulo ŵalembile kuti: “[Klistu] ŵayipikene yipwetesi kwa ligongo lyenu, ni ŵamlecele cisyasyo cakuti msikuyeje sajo syakwe.” (1 Petulo 2:21) Atamose kuti Aklistu komboleka kusimana ni yipwetesi ligongo lyakuya ndamo sya Mlungu, jemanjaji akusaŵa “ni mtima wangali kandu kakuwusisya.” (1 Petulo 3:16, 17) Petulo akwalimbikasya Aklistu kuti aŵeje ni ndamo syambone, soni atendeje yakulosya kulipeleka kwawo kwa Mlungu, pakwembeceyaga lisiku lya Mlungu lyakwelusya, ni cilambo capasi ca cilangano, ‘mwele mwamucisimanikwa cilungamo.’—2 Petulo 3:11-13.

Aklistu akusosekwa kulosya cinonyelo. Yohane ŵalembile kuti, “Mlungu ali unonyelo wene.” Ndumetumeju ŵatite kuti Mlungu ŵalosisye cinonyelo cakwe cekulungwa paŵamtumisye Yesu kuti aŵe “ciwombosi ca yakulemwa yetu.” Ana Aklistu ni akusosekwa kutenda cici? Yohane akutagulila kuti: “Ŵakunonyelwamwe, naga Mlungu ŵatunonyele mnope kwati yeleyi, menema nowe ŵakwe tukuŵajilwa kunonyelana.” (1 Yohane 4:8-11) Litala limo lyampaka tulocesye cinonyelo celeci ni mwakwatendelaga yambone ŵakulambila acimjetu.—3 Yohane 5-8.

Nambo ana ŵakulambila Yehofa mpaka alosye catuli kuti akumnonyela Mlungu? Yohane akwanga kuti, ‘kumnonyela Mlungu kuli kuya malamusi gakwe, nipo malamusi gakwe nganigaŵa kose gakusitopa.’ (1 Yohane 5:3; 2 Yohane 6) Ni kupali kusimicisya kwakuti ŵele ŵakumpikanila Mlungu, jwalakwe cajendelecele kwanonyela, soni ‘cacapa ŵanganyawo umi wangamala.’—Yuda 21.

​—Nganiji jityocele m’mabuku ga Yakobo; 1 ni 2 Petulo; 1, 2, ni 3 Yohane; ni Yuda.