MBALI 12
Lunda lwa Mlungu Lwalukusatulongola Cenene pa Umi
Buku ja Misyungu jili ja maloŵe gakamucisya gakutyocela kwa Mlungu, gakutulongola pa umi wetu. Maloŵe gejinji m’bukuji ŵalembile Solomoni
ANA Yehofa ali Jwakulamulila jwalunda? Kuti tujanje cenene ciwusyo celeci, tukusosekwa kulola maloŵe gakusaŵeceta. Ana maloŵega gali gakamucisya? Ana kugakamulicisya masengo kukusakamucisya kuti mundu akole umi wambone? Mwenye jwalunda Solomoni ŵalembile misyungu jejinji. Misyunguji jikusasala ciŵandika cilicose pakwamba ya umi. Kwende tugambe kulola jine mwa jeleji.
Kumkulupilila Mlungu. Kuti tuŵe paunasi wambone ni Yehofa, tukusosekwa kumkulupilila. Solomoni ŵalembile kuti: “Mumkulupilile Yehofa ni mtima wenu wosope, soni mkajegamila pa lunda lwenu. Mumcimbicisyeje m’matala genu gosope, soni jwalakwe cacijongola kajende kenu.” (Miyambo 3:5, 6) Kumkulupilila Mlungu mwa kumpikanila ni kutenda mwakamulana ni maloŵe gakwe gakutulongola kukusakamucisya kuti umi uŵeje wambone. Kutenda yeleyi kukusakamucisya kuti mundu asangalasyeje mtima wa Mlungu, soni yikusatendekasya kuti Yehofa ajanje pangani jiŵajitandisye Satana, mmagongo jwa Mlungu.—Miyambo 27:11.
Kutama ni ŵandu mwalunda. Maloŵe ga Mlungu gali gakamucisya mnope moŵa agano kwa acalume, acakongwe, ni ŵanace mwiŵasa kupundana ni kalakose. Pakwagombelecesya kuti aŵeje ŵakulupicika kwa ŵamkwawo, Mlungu akwasalila acalume kuti, “msangalaleje ni jwamkongwe jwa mu ucanda wenu.” (Miyambo 5:18-20) Kwa acakongwe ŵapeŵasa, m’buku ja Misyungu gapali maloŵe gakumcimbicisya jwamkongwe jwakutenda cenene mwiŵasa, jwakumtogolela ŵamkwakwe ni ŵanace ŵakwe. (Miyambo, caputala 31) Soni gapali maloŵe gakwalimbikasya ŵanace kwapikanila acinangolo ŵawo. (Miyambo 6:20) Buku jeleji jikulosyasoni kuti mundu kola acimjakwe kuli kwakusosekwa, ligongo kulilekanganya ni acimjakwe kukusatendesya mundu kuŵa jwangaganicisya ŵane. (Miyambo 18:1) Acimjakwe mundu komboleka kumtendekasya kuŵa jwambone kapena jwakusakala, ni tukusosekwa kusagula acimjetu mwalunda.—Miyambo 13:20; 17:17.
Alisamaleje jika mwalunda. M’buku ja Misyungu gapali maloŵe gakamucisya mnope kuti tukamwaga ukana mwakulemwaceka, tukoleje nganisyo syambone syakamucisya ni kusileka nganisyo syakonanga, soni kuti tuŵeje ŵakulimbicila masengo. (Miyambo 6:6; 14:30; 20:1) Jikutukalamusya kuti kwegamila pa lunda lwa mundu, ngaŵaga lwakutyocela kwa Mlungu, kukusajonanga. (Miyambo 14:12) Jikusatulimbikasya kuti tulicinjilicisyeje acimsyewe ni mtima wetu ku yindu yakonanga, mwakutukumbusya kuti “mu mtima ni mwawukutyocela umi.”—Miyambo 4:23.
Ŵandu mamiliyoni gejinji pacilambo capasi ayiweni kuti kukuya maloŵe gelega paumi wawo kukusakamucisya kuti atameje ni umi wambone. Pa ligongo lyeleli, akusam’wona Yehofa kuŵa Jwakulamulila jwawo.
—Nganiji jityocele m’buku ja Miyambo.