Acayimwene Ŵambone ni Ŵakusakala

MWAKAMULANA ni muŵaŵecetele Yehofa, ucimwene wa Yisalayeli wagaŵanyice Solomoni paŵalesile kulambila kusyesyene. Lehobowamu mwanace jwa Solomoni juŵajinjile ucimwenewo ŵaliji jwangalwe. Ni ligongo lya yeleyi, ngosyo likumi sya Ayisalayeli syajimucile ni kupanganya ucimwene wa Yisalayeli wakumpoto. Ngosyo siŵili ni sisyasigalile ni kamulana ni mwenye jwa mu ucimwene wa Daudi mu Yelusalemu, uciŵaga ucimwene wakummwela wa Yuda.

Maucimwene ganagaŵiliga galiji gangatamilicika, soni mwapali yakusawusya yejinji ligongo lyakuti acayimwene ŵakwe ŵaliji ŵangakulupicika, soni ŵangapikanila. Mu ucimwene wa kumpoto wa Yisalayeli ni mumwasakele mnope kulekangana ni mu ucimwene wa Yuda, ligongo lyakuti kutandila pandanda pene acayimwene ŵakwe ŵalimbikasyaga kulambila kwaunami. Mwangasamala kandu ya masengo gekulungwa gaŵakamwile ŵakulocesya mpela Eliya ni Elisa, ŵaŵayikene wosope mpaka pakwimusya ŵandu ŵawe, Ayisalayeli ŵajendelecelagape kuwilisya kutenda yakusakala. Pambesi pakwe, Mlungu ŵakundile kuti Asuli ajonanje ucimwene wa kumpotowu.

Ucimwene wa Yuda wajendelecele kwa yaka yakupunda 100 ucimwene wa Yisalayeli uli ujonasice, nambo nombe nawo wapocele cilango ca Mlungu. Acayimwene ŵa ucimwene wa Yuda ŵakuŵalanjikape ni ŵaŵapikanile maloŵe ga ŵakulocesya ŵa Mlungu, ni ŵalinjile kwakamucisya ŵandu kuti awujile kwa Yehofa. Mwambone mwenye Yosiya ŵatandite kuswejesya ucimwene wa Yuda, kuwutyocesya kulambila kwaunami, ni kujilinganyasoni nyumba jakupopelela ja Yehofa. Pajasimanikwe buku ja Malamusi ga Mlungu jaŵapocele Musa, Yosiya yamkwayiye mnope nganisyo, ni ŵalimbicile masengo gakulinganya yindugo.

Nambope yakutesya canasa ni yakuti ŵaŵajinjile ucimwenewo panyuma pa Yosiya, nganakuya muŵatendelaga cenene Yosiya. Ni Yehofa ŵakundile kuti ulamusi wa Babelo usumule ucimwene wa Yuda, ni konanga Yelusalemu yimpepe ni nyumba jakwe jakupopelela. Ŵaŵasigele ni umi pakusumulako, ŵajigalile ku ukapolo m’cilambo ca Babelo. Mlungu ŵaliji ali alocesye kuti ukapolo wucimala yaka 70. Cilambo ca Yuda casigele cangali ŵandu ndaŵi josopeji, mpakana paŵakundile ŵanduwo kuti awujile kumangwawo mwakamulana ni maloŵe ga Mlungu.

Nambo yaliji yakuti pangali jucalamulileje mu liŵasa lya Daudi mpaka pakutanda kulamulila kwa Mkulupusyo juŵamlocesye kala, Masiya. Acayimwene ŵajinji ŵaŵatemi pacitengu ca Daudi mu Yelusalemu, yitendo yawo yakusakala yalosisye kuti ŵandu ŵaulemwa nganaŵa ŵakuŵajilwa kuŵa ŵakulamulila. Masiyape ni jwakaŵele jwakuŵajilwa yisyesyene kulamulila. Ni Yehofa ŵamsalile mwenye jwakumalisya jwa mu liŵasa lya Daudi kuti: “Atyosye cipewa ca ucimwene. . . . Ciciŵa kwene cangali msyene mpaka pacaciyika msyene jwakuŵajilwa mwalilamusi, ni cinjipeleka celeci kwa jwalakwe.”—Ezekieli 21:26, 27.

​—Nganiji jityocele pa 1 ni 2 Mafumu; 2 Mbiri caputala 10 mpaka 36; Yeremiya 25:8-11.