Nyimbo sya M’maloŵe ga Mlungu Syasikusatondoya ni Kwiganya

BUKU jajikulungwa mnope m’Baibulo jili ja nyimbo. Buku ja nyimboji jajigele yaka 1,000 kuti jimale kulemba. M’buku ja Malumboji gapali maloŵe galunda, soni gakulimbikasya mnope cikulupi, kulekangana ni mabuku gane. M’bukuji gapali maloŵe gejinji gakulosya mwakusapikanila mundu mu mtima, kutandila kusengwa, kulumba, kutogolela, soni kola canasa ni kupitikuka mtima. Yikuwoneka kuti ŵakulemba malumboŵa ŵakwete unasi usyesyene ni Mlungu. Kwende tulole sine mwa ngani syasikusimanikwa m’maloŵe ga nyimbosi.

Yehofa ni jwali Jwakulamulila Jwamkulungwa jwakuŵajilwa kumlambila ni kumlumba. Tukusaŵalanga pa Salmo 83:18 kuti; “Wawojope, lina lyawo ni Yehofa, Ŵalakwe ali Ŵamwinani Mnope pacilambo cosope capasi.” Malumbo gane gali gakumlumba Yehofa ligongo lya yiŵapanganyisye, mpela ndondwa sya kwinani, ya umi yakusimonjesya ya pacilambo capasi, soni cilu ca mundu cakusimonjesya. (Masalmo 8, 19, 139, 148) Ŵakulemba ŵane akumlumba Yehofa ligongo ali Mlungu jwakusiŵakulupusya ni kwacinjilicisya ŵali ŵakulupicika kwa jwalakwe. (Masalmo 18, 97, 138) Nambosoni ŵane akumlumba ligongo ali Mlungu jwacilungamo, jwakusiŵakamucisya ŵandu ŵakulaga ni ngalwe, soni kwapa cilango ŵandu ŵakusakala.—Masalmo 11, 68, 146.

Yehofa akusiŵakamucisya ni kwatondoya ŵakusamnonyelaga. Komboleka kuti nyimbo jakumanyika mnope jili ja 23, pakuŵeceta Daudi kuti Yehofa ali Mkucinga jwacinonyelo, jwakusasilongola, kusicinjilicisya, soni kusisamalila ngondolo syakwe. Salmo 65:2 jikwakumbusya ŵakulambila Mlungu wosope kuti Yehofa ali “Jwakupikana lipopelo.” Ŵandu ŵajinji ŵatesile yakulemwa yekulungwa apatile citondoyo cekulungwa kutyocela mu Masalmo 39 ni 51, mwakuŵeceta Daudi kutyocela pasi pamtima pakwamba ya kupitikuka mtima kwakwe pa yakulemwa yekulungwa yiŵatesile, soni akulosya cikulupi cakwe pa kukululucila kwa Yehofa. Pa Salmo 55:22 pana maloŵe gakutulimbikasya kumkulupilila Yehofa, soni kumlecela Jwalakwe yakusawusya yetu yosope.

Yehofa cacisinda cilambo capasi pakamulicisya masengo Ucimwene wa Masiya. Ndime syejinji sya mu Masalmo mwakupikanika cenene sikwamba ya Masiya, Mwenye juŵamlocesye kala. Salmo 2 jikulocesya kuti jwakulamulilaju cacijonanga mitundu ja ŵandu ŵakusakala, ŵakulimbana ni jwalakwejo. Salmo 72 jikulosya kuti Mwenyeju cacimasya sala, kusoŵa cilungamo, soni ngalwe. Mwakamulana ni Salmo 46:9, Mlungu kupitila mu Ucimwene wa Masiya cacimasya ngondo, soni cacijonanga yida yosope yakuputila ngondo. Mu Salmo 37 tukusaŵalanga kuti ŵandu ŵakusakala cacimala, nambo ŵandu ŵakutenda yambone cacitama m’cilambo capasi kwangamala, cacisangalalaga ni mtunjelele wa pacilambo cosope, soni caciŵa ŵakamulana.

​—Nganiji jityocele m’buku ja Masalmo.