Solomoni Akulamulila Mwalunda

ANA umi mpaka uŵe watuli naga ŵandu wosope ni jwakulilamulila jwawo ali mkum’wona Yehofa kuŵa Jwakulamulila Jwamkulungwa ni kupikanilaga malamusi gakwe? Yeleyi ni yiyawonece mu yaka 40 ya ulamusi wa Mwenye Solomoni (Sulayimani).

Daudi mkanawe, ŵamsagwile Solomoni mwanagwe kuti aŵe mwenye. Mlungu ŵamsalile Solomoni mu sagamisi kuti aŵende cakusaka. Solomoni ŵaŵendile lunda ni umanyilisi kuti akomboleje kwelusya ŵandu cenene, soni mwalunda. Yehofa ŵasangalele nayo yeleyi, ni ŵampele Solomoni mtima walunda ni waumanyilisi. Yehofa ŵamsalilesoni kuti naga akwendelecela kuŵa jwakupikanila campe yipanje, ucimbicimbi ni umi wa yaka yejinji.

Solomoni ŵamanyice mnope ligongo lya kwelusya kwakwe kwalunda. Pandema jine acakongwe ŵaŵili ŵakanganilaga likandi lyalilume. Jwalijose ŵatiga likandilyo lyakwe. Solomoni ŵalamwile kuti mwanacejo amkate pasikati kuti jwalijose ampe mbali jimo. Jwamkongwe jumo ŵajiticisye yeleyi, nambo msyene mwanacejo ndaŵi jijojo ŵacondelele kuti mwanacejo agambe kumpeleka kwa jwamkongwe jwinejo. Solomoni sambano ŵayimanyi kuti jwamkongwe jwacanasajo ni juŵaliji msyene mwanacejo, ni ŵampelece mwanacejo kwa jwalakwe. Mwacangakaŵa Ayisalayeli wosope ŵapikene mukwajendele kwelusyaku, ni ŵanduwo ŵamanyilile kuti Solomoni ŵakwete lunda lwa Mlungu.

Cimo mwa yekulungwa yiŵatesile Solomoni caliji kutaŵa nyumba ja Yehofa jakuwoneka cenene mnope mu Yelusalemu, jijaliji jakuti jiŵe malo gakupopelela mu Yisalayeli. Pakuwugulila kwa nyumba jakupopelelaji, Solomoni ŵapopesile kuti: “Alole! kwinani, elo kwinani kweneko, kweleko ngaŵa mkwakwanila wawojo, ni nambi wuli pakwamba ya nyumba jandaŵileji!”—1 Mafumu 8:27.

Mbili ja Solomoni jawandile m’yilambo yine, mpaka m’cilambo ca Seba, ku Alabia. Mwenye jwamkongwe jwa ku Seba ŵajesile ulendo kwawula kukulola ucimbicimbi ni yipanje ya Solomoni, soni kukumlinga naga yisyene ŵakwete lunda lwejinji. Mwenye jwamkongweju yamkamwile mtima mnope paŵaluweni lunda lwa Solomoni, soni kwenda cenene kwa yindu mu Yisalayeli mwakuti ŵacimbicisye Yehofa ligongo lyakusagula mundu jwalundaju kuti aŵe mwenye. Ligongo lyakuti Yehofa ŵakamucisyaga, ulamusi wa Solomoni waliji wakwenda cenene mnope, soni wamtunjelele mnope kupunda wine wuliwose mu mbili ja Yisalayeli jwakala.

Nambo yakutesya canasa kuti Solomoni ŵalepele kwendelecela kutenda yindu mwakamulana ni lunda lwa Yehofa. Jwalakwe nganapikanila lilamusi lya Mlungu ni ŵalombele acakongwe ŵajinji mnope, ŵane ŵaliji ŵakulambila milungu jine. Acakongweŵa panandipanandi ŵatandite kutendekasya mtima wakwe kuleka Yehofa ni kutanda kulambila mitembe. Yehofa ŵamsalile Solomoni kuti mbali jine ja ucimwenewo cacijityosya kwa jwalakwe. Mlungu ŵaŵecete kuti liŵasa lya Solomoni licisigala ni kambali kamnono, ligongo lya cilanga ciŵatesile ni Daudi, babagwe Solomoni. Atamose kuti Solomoni ŵalesile kutumicila Mlungu mwakulupicika, Yehofa nganamasya cilanga ca Ucimwene ciŵatesile ni Daudi.

​—Nganiji jityocele pa 1 Mafumu caputala 1 mpaka 11; 2 Mbili caputala 1 mpaka 9; Deuteronomo 17:17.