Nyumba Jakulambilila Yehofa

Solomoni paŵaŵele mwenye ja Ayisalayeli, Yehofa ŵam’wusisye kuti, ‘Ana mkusaka ndili nampele cici?’ Solomoni ŵajanjile kuti, ‘Une ndili mwanace soni ngangumanyilila yakutenda. Conde ambe lunda kuti nalongolele cenene ŵandu ŵawo.’ Yehofa ŵatite, ‘Ligongo lyakuti m’ŵendile lunda, Cinjimpa lunda kupunda jwalijose pacilambo cosope capasi. Cinjimpasoni yipanje yejinji, soni naga cimumbikanileje, cimcitama ni umi welewu.’

Solomoni ŵatandite kutaŵa nyumba jakulambilila. Ŵakamulicisyaga masengo yindu yambone mnope ya golidi, silifa, matabwa, soni maganga. Acalume ni acakongwe masausande gejinji ŵakamulaga masengo gakutaŵa nyumba jakulambililaji. Pali pamasile yaka 7, nyumbajo jamasile, soni jaliji ndaŵi jakuti atende cindimba cakujipeleka kwa Yehofa. Nyumbaji jakwete malo gakupelecela mbopesi ni ŵaŵisilepo mbopesi pa malogo. Solomoni ŵatindiŵele kusogolo kwa malo gakupelecela mbopesi ni ŵatandite kupopela kuti, ‘Wawo Yehofa, nyumbaji nganijiŵa jekulungwa kapena jakusalala mnope kwa wawojo, nambo tukwaŵenda kuti ajiticisye kulambila soni kupikana mapopelo getu.’ Ana Yehofa ŵapikanile lipopelo lya Solomoni soni kusangalala ni nyumba jakulambililajo? Solomoni paŵamalisisye kupopela, moto watyocele kwinani ni kutinisya mbopesi syosope syasyaliji pamalo gakupelecela mbopesigo. Yehofa ŵajijiticisye nyumba jakulambililaji. Ayisalayeli paŵayiweni yeleyi ŵasangalele.

Lunda lwa mwenye Solomoni lwapikanice mu Yisalayeli mosope nambosoni m’mikuli jakutalicila. Ŵandu ŵayikaga kwa Solomoni kuti akaŵende cikamucisyo payakusawusya yawo. Atamose mwenye jwamkongwe jwa ku Seba jwayice kukumlinga Solomoni pakum’wusya yiwusyo yakusawusya. Pajwapikene kajanje ka Solomoni, jwalakwe jwatite, ‘Nakayicilaga yaŵasalile ŵandu yakwamba mmweji, nambo sambano nayiweni kuti mkwete lunda kupunda muŵaŵecetelaga ŵanduwo. Yehofa Mlungu jwenu ampele majali.’ Umi waliji wambone m’cilambo ca Ayisalayeli, soni jemanjajo ŵaliji ŵakusangalala. Nambo yindu yasigele panandi kucenga.