ANA AKUDANDAWULA NI KUKWELA KWA MITENGO JA YINDU?
Aŵeje Ŵakupeleka
Naga ngakukwanisya kusuma yindu yakusosechela ligongo lyakukwela mitengo kwa yindu, mpaka ayiwoneje kuŵa yakusawusya kwagayila ŵane. Nambope, kupeleka mpaka kwakamuchisye mnope. Yili yakomboleka kwakamuchisyaga ŵandu ŵane nambo ni ngajonangaga mbiya syejinji.
LIGONGO LYAKWE YILI YAKUSOSEKWA
Tukusaŵa ŵakusangalala mnope patukwagayila ŵane atamose kuti yinduyo yili yamnono. Mwamti madokotala gane gakusasala kuti kupeleka kukusamkamuchisya mundu kola chilu chambone soni kuŵa jwaganisya chenene. Mwachisyasyo, mpaka kunandiye kulagasika nganisyo, kudandawula, bp, soni kupweteka kwa mchilu. Nambosoni kukusamkamuchisya mundu kuti apateje lugono lwambone.
Patukwakamuchisya ŵane mwakwapa mbiya kapena yindu yine, mpaka yiŵe yangasawusya kupochela chikamuchisyo pandaŵi jatukusosechela. Howard jwakusatama ku England jwasasile kuti, “Une ni ŵamkwangu patukulingalinga kupata matala gakwakamuchisya ŵane, yikusaŵa yangasawusya kupochela chikamuchisyo chakutupa ŵane.” Kusala yisyene, ŵandu ŵakusapeleka ni mtima wosope ŵangajembecheyaga kuti ŵandu ŵane chiŵawuchisye. Nambo chakusapata jemanjaji chili achimjawo ŵasyesyene ŵakusasachilila kwakamuchisya pandaŵi jakusosechela chikamuchisyo.
YAMPAKA ATENDE
Agaŵaneje ni ŵane yakwete. Yili yakomboleka kwagayila ŵane atamose ali akwete yindu yamnono. Mwachisyasyo mpaka ŵagaŵileje tuyakulya twamwanamwana. Duncan jwakusatama ku Uganda yalumo ni liŵasa lyakwe ali ŵakulaga nambope jemanjaji ali ŵakupeleka. Duncan jwatite, “Lyamlungu lililyose une ni ŵamkwangu tukusamŵilanjila mundu kunyumba kuti akalye chakulya. Mwamti tukusasangalalaga kukunguluka ni ŵandu ŵane.”
Nambope patukwagayila ŵane tukusosekwa kuŵa ŵaganisya chenene. Ngatukusosekwa kupeleka yindu yejinji mwamti ni kwika pakuti liŵasa lyetu likusoŵa yindu yakusosechela.—Yobu 17:5
Alinje kutenda ayi: Amgayile mundu jwine chakulya kapena chakumwa. Naga akwete yindu yakuti ngakuyikamulichisya masengo, ŵape achimjawo kapena ŵandu ŵakuŵandikana nawo majumba ŵampaka yakamuchisye. Mwamti jemanjaji mpaka ayamichile mnope.
Kupeleka pakamulichisya masengo matala gane. Yindu yine yambone yampaka tupeleche yangasaka kusuma ni mbiya. Mwachisyasyo, mpaka tupeleche ndaŵi jetu soni kutenda yindu yampaka yakamuchisye ŵane. Atamose maloŵe gambone mpaka gaŵe mtuka nditu. Myoyo ŵasalileje jemanjaji kuti akusiŵanonyela soni akusiŵawona kuŵa ŵakusosekwa.
Alinje kutenda ayi: Ŵakamuchisye ŵane masengo ga pamlango, kulinganyasoni nyumba kapena kwapatila masengo. Alembe kadi kapena meseji kwa mjawo jakumsalila kuti wawojo akuganichisya mnope ya jwalakwejo.
Pakupata matala gakuti aŵeje ŵakupeleka yichakamuchisya kuti apateje yindu yambone yejinji.