Akoleje Achimjawo Ŵakutyochela ku Mitundu Jine

Chakusawusya Chachipali

Naga ngatukusanonyelaga ŵandu ŵa mtundu wine, mpaka tuŵe ŵalusagu mnope. Nambosoni naga tugambile kola achimjetu ŵa mtundu wetupe, mpaka tuganisyeje kuti kaganisye ketu, mwatukusapikanila mumtima, soni yatukusatenda yili yakuŵajilwa.

Fundo ja m’Baibulo

‘M’wugule mitima jenu.’—2 Akolinto 6:13.

Ana tukulijiganya chichi palilembali? “Mtima” wetu mpaka ugopolele yatukusaganisyaga soni yatukusanonyela kutenda. Naga tukusanonyela ŵandu ŵa mtundu wetupe, mpaka yiŵe yakusawusya kwanonyelasoni ŵandu ŵa mtundu wine. Kuti tuŵambale yeleyi, tukusosekwa kungulukaga ni ŵandu ŵa mtundu wine.

Kola achimjetu ŵakutyochela ku mitundu jine kukusakamuchisya

Kwamanyilila chenene ŵandu ŵane mpaka kutukamuchisye kupikanichisya ligongo lyakwe akusatenda yindu yine mwakulekangana ni m’weji. Mkupita kwa ndaŵi mpaka tutande kwawona mpela ŵandu ŵa mtundu wetu. Tukusayika pakwawona kuŵa ŵakusosekwa mnope, soni tukusitwaganichisya mnope.

Kwende tulole chisyasyo cha Nazaré. Jwalakwe jwatendelaga lusagu ŵandu ŵakutyochela ku yilambo yine. Jwalakwe jwasasile yayamkamuchisye kumalana ni lusagulu. Jwatite, “Nakungulukaga nawo soni nakamulaga nawo masengo. Nayiweni kuti yaŵaŵechetaga ŵandu yakwamba ŵandu ŵakutyochela m’yilambo yine yaliji yakulekangana ni mwaŵeleledi ŵanduwo. Naga tukusakunguluka ni ŵandu ŵa mtundu wine tuchimanyililaga kuti ŵandu wosope ŵa mtunduwo nganaŵa ŵakulandana, nambosoni tuchanonyelaga soni tuchim’wonaga mundu jwalijose pajika kuti ali jwakusosekwa.”

Yatukusosekwa Kutenda

Alinje kuŵechetana ni ŵandu ŵakutyochela m’chilambo chine, ŵakulekangana nawo ndamo, kapena chiŵecheto. Mpaka atende ayi

Ŵawusye kuti ŵasalile yakwamba jemanjajo.
Ŵaŵilanjile kumangwawo kuti akalile yimpepe yakulya.
Ŵapikanileje chenene pakulondesya mbili jawo soni kulola yakusayiwona kuŵa yakusosekwa kwa jemanjajo.

Kupikanicisya yasimene nayo paumi kuchakamuchisya kwamanyilila chenene jemanjajo nambosoni mtundu wawo.

Yakutendekwa Yisyesyene: Kandasamy soni Sookammah (Canada)

“Twakulile ku South Africa pandaŵi jele ŵandu ŵa m’chilambomo ŵasagulanaga mitundu. Mitundu ja ŵandu ŵajikanganichisyaga kuti jitame mwakulekanganalekangana. Yeleyi yalimbikasyaga mitundujo kuti jitendelaneje lusagu. Uweji nganituniŵa asungu, soni twaŵengaga asungu ligongo ŵane mwa asunguwo ŵatuwonaga mpela ŵakutuluka. Pandaŵi jeleji nganituganisyaga kuti yatwatendagayo lwaliji lusagu. M’malo mwakwe twaganisyaga kuti asunguwo ni ŵakututendela lusagu.

“Kuti tuchenje kaganisye ketuka, twatesilepo kandu. Twatandite kunguluka ni ŵandu ŵa mitundu jakulekanganalekangana. Patwatandite kunguluka ni asungu, twamanyilile kuti m’weji ni jemanjaji twalandanaga yindu yejinji. Twayimanyi kuti wosope twasimanaga ni yindu yakulandana paumi.

“Mwati ndaŵi jine twaliŵilasile liŵasa lyachisungu kuja kutama kumangwetu kwa ndaŵi jelewu. Twamanyigene chenene ni liŵasali. Kaneko twatandite kwawona kuti ali achimjetu nambosoni kuti tuli ŵakulandana. Yakuyichisya yakwe twatandite kwawona asungu wosope mwakuŵajilwa.”