Amanyilileje Ndamo Syambone sya Ŵane

Chakusawusya Chachipali

Kulinonyela mpaka kututendekasye kola mtima walusagu. Mundu jwakulinonyela akusaliwona kuti ali jwakusosekwa mnope. Jwalakwe akusaliwona kuŵa jwapenani soni akusiŵawona ŵandu ŵa mtundu wine kuŵa ŵakutuluka. Jwalijose mpaka atande ganisya m’litala lyeleli. Buku jine jasasile kuti, “Mitundu jejinji ja ŵandu jikusayiwona kuti mwakusatendela yindu paumi wawo pangani ja yakulya, kawale, yikulupi yawo, yitendo yawo, ndamo soni yine, yili yapenani kujipunda mitundu jine.” Ana mpaka tuŵambale chamtuli kaganisye kakulemwechekaka?

Fundo ja m’Baibulo

“Mŵeje ŵakulinondiya, soni jwalijose amwoneje mjakwe kuti ali jwakumpunda jwalakwejo.”—AFILIPI 2:3.

Ana tukulijiganya chichi palilembali? Kuti tupakombole kumalana ni kulinonyela, tukusosekwa kuŵa ŵakulinandiya. Naga tuli ŵakulinandiya tuchimanyilila kuti ŵane ali ŵakutupunda m’matala gane. Tumanyilileje kuti pangali mtundu wa ŵandu wawukwete ndamo syambone syosope soni wampaka ukombole kutenda chilichose.

Kwende tulole chisyasyo cha Stefan. Jwalakwe jwakulile m’chilambo cha Chikomyunisimu nambo jwakombwele kumalana ni nganisyo syakwatendela lusagu ŵandu ŵa m’yilambo yanganiyiŵa ya Chikomyunisimu. Jwalakwe jwatite, “Kwawona ŵane kuŵa ŵakukupunda kukusakamuchisya kumalana ni lusagu. Une ngangusamanyilila yosope. Mpaka nalijiganye kanekakwe kutyochela kwa ŵane.”

Yatukusosekwa Kutenda

Aliwungunyeje soni ajitichisyeje kuti ndaŵi sine akusalemwesyaga. Amanyilileje kuti pana yindu yine yele achimjawo mpaka atende chenene kwapunda wawojo. Akaganisyaga kuti ŵandu wosope ŵa mtundu wine wakwe akwete yakulepela yakulandana.

M’malo mwakuganisya mwakulemwecheka ya mundu jwa mtundu wine wakwe, akusosekwa kuliwusya kuti:

Amanyilileje kuti pana yindu yine yele achimjawo mpaka atende chenene kwapunda wawojo

‘Ana ndamo syangangusinonyela sya munduju sili syakusakala, kapena sigambile kuŵa syakulekangana ni syangu?’
‘Ana munduju mpaka apate yakulemwecheka mwa une?’
‘Ana ni yindu yapi yakusatenda chenene munduju kumbunda unejo?’

Naga akwanga yiwusyo yeleyi mwakuwona mtima, chachimasya mtima walusagu nambosoni chachipata yindu yine yakumbilichika mwa mundujo.

Yakutendekwa Yisyesyene: Nelson (United States)

“Nakulile mudela jele ŵandu ŵajinji ŵaliji ŵa mtundu umo soni ŵa ndamo syakulandana. Nambo ndili ngwete yaka 19 nasamile kumsinda wekulungwa kunatandite kamula masengo. Kweleko nakamulaga masengo soni kutama ni ŵandu ŵakulekangana mitundu soni ndamo.

“Panamanyilile chenene ŵakamula nawo masengoŵa soni kuŵa nawo paujakwe, nalijiganyisye kuti kwamba kulola kawoneche ka mundu, chiŵecheto chakwe, kapena chilambo chakutyochela nganimba manyilile kulimbichila kwakwe masengo, kulupichika kwakwe soni mwakupikanila mumtima.

“Kaneko nalombele jwamkongwe jwa m’chilambo chine. Yeleyi yangamuchisye kuti ndande kunonyela yakulya soni nyimbo syakulekangana ni sya m’chilambo changu. Yakutendekwa ya paumi yinjiganyisye kuti wosope tukwete ndamo syambone soni syakusakala. Kusala yisyene, kujigalila ndamo syambone kwa ŵandu ŵakulekangana nawo mtundu, kungamuchisye kuŵa mundu jwambone.”