5. Ana Yakusawusya Yichimala?

Kusosekwa kwa Chiwusyochi

Naga pana umboni wakuti yakusawusya yichimala, mpaka yitukamuchisye kuwuwona umi wetu kuti uli wakusosekwa mpela mwakusawuwonelaga Mlungu.

Yajikusasala Baibulo

Ŵajinji akusasachilila kumasya yakusawusya, nambo akusalepela. Kwende tulole yakuyichisyayi,

Mwangasamala kandu ya mitela jajipali . . .

• Ulwele wamtima ukutendekasya kuti ŵandu ŵajinji aweje.

• Ulwele wakansa ukusawulaga ŵandu mamiliyoni chaka chilichose.

• Jwakulemba mabuku jwine jwatite, “Ŵandu ŵajinji m’chilambochi alinjilelinjile kumasya yilwele yakupelegana nambo alepele.”—Dr. David Bloom in the journal Frontiers in Immunology.

Mwangasamala kandu kuti pana yilambo yine yakusichila . . .

• Ŵanache mamiliyoni gejinji akusawaga chaka chilichose, soni yeleyi yikusatendekwa mnopemnope kumalo kwele ŵandu ŵakwe ali ŵakulaga.

• Ŵandu mabiliyoni gejinji akusatama malo gangali chasa.

• Ŵandu mamiliyoni gejinji akusamwa mesi gangasamalidwa.

Mwangasamala kandu kuti pana ŵandu ŵakusalola ya ufulu wa ŵandu . . .

• Lipoti lyakutyochela ku bungwe ja United Nations lyatite, yilambo yejinji ŵandu ŵakusatenda yindu yachinyengo ngakusapedwa chilango. Yeleyi yikusatendekwa ligongo lyakuti ŵandu ŵakwete udindo ngakusamanyilila yayikusatendekwa kapena ŵangali yindu yakwakamuchisya kuti apeleche chilango kwa jemanjaji.

  KUTI AMANYILILE YEJINJI

  Alolele fidiyo jakuti Ana Uchimwene wa Mlungu Uli Chichi? pa jw.org.

Yajikusasala Baibulo

Mlungu akusasamala ya m’weji.

Jwalakwe akusayimanyilila yakusawusya yetu.

“[Mlungu] nganamnyosya kapena kumkana mundu jwakulaga; nganamtundumalila kapena kuti kusisa ngope jakwe kwa mundu jwakulaga, nambo ŵampikene piŵadandawile.”—SALIMO 22:24.

“Mtule pa jwalakwejo yidandawulo yenu yosope, pakuti jwalakwejo ni jwakusamsamalila jemanja.”—1 PETULO 5:7.

Yakusawusya yichimala.

Baibulo jasasile kuti chakulinga cha Mlungu chichikwanilichikwa.

“Mlungu. . tachipukuta misosi josope m’meso mwawo. Ngasipapagwa chiwa, chanasa, kulila, kapena kupikana yipwetesi. Yindu yakala yosope yeneyi yimasile.”—CHIWUNUKUKO 21:3, 4.

Mlungu chachimasya yayikusatandikasya yakusawusya ya ŵandu.

Jwalakwe chachitenda yeleyi pakukamulichisya masengo Uchimwene wakwe. Baibulo jikusasala kuti Uchimwenewu jili boma jisyesyene.

“Mundaŵi ja ayimwene ŵelewo, Mlungu jwakwinani chachitamilikasya Uchimwene wele ngisiwujonasika. . . . nipo uchimwene welewo pewo tiwuchitama mpaka kalakala.”—DANIELE 2:44.