4. Ana Chaliji Chakulinga Cha Mlungu Kuti Tusimaneje Ni Yakusawusya?

Kusosekwa kwa Chiwusyochi

Kwanga kwa chiwusyochi kukusakwaya umi wetu.

Yakusosekwa Kuyiganichisya

Ana yili yakupikanika kuti Mlungu juŵapanganyisye yindu yakusalala m’chilambochi, mpaka akunde kuti tusimaneje ni yakusawusya?

Ŵandu ŵangakulupilila ya Mlungu akusamkayichilaga jwalakwe ligongo lya yakusawusya yatukusimana nayoyi. Jemanjaji akusakayichilasoni yakuti Mlungu apali. Akusakulupilila kuti yakusawusyayi yili umboni wakuti (1) Mlungu jwangali machili gakuyilekasya, (2) Mlungu jwangasaka kuti yimale, kapena (3) Mlungu kwangali.

Ana gelegape gali magongo gakupikanika kuti ŵandu asimaneje ni yakusawusya?

Yajikusasala Baibulo

Mlungu nganatupanganya kuti tusimaneje ni yakusawusya.

Jwalakwe akusasaka kuti tusangalaleje ni umi.

“Ngumanyilila kuti kwa mundu pangali soni chindu chine chambone kupunda kutama mwakusangalala pa ndaŵi jituli chijumi. Wosope ŵene tukwenela kulya ni kumwa ni kusangalala pa masengo gosope gitukusatenda, pakuti welewu uli mtuka wa Mlungu.”—JWAKULALICHILA 3:12, 13.

Mlungu ŵapele ŵandu ŵaŵili ŵandanda chilichose chaŵasosechelaga kuti akasimanaga ni yakusawusya.

Nganichiŵa chakulinga cha Mlungu kuti jemanjaji soni ŵanache ŵawo asimaneje ni yakusawusya.

“Ŵapele upile ŵanduwo pakwasalila kuti, ‘Mŵelekane, mtupe, mgumbale chilambo chapasi.’”—GENESESI 1:28.

Ŵandu ŵaŵili ŵandandawo ŵasagwile kuti akampikanila Mlungu.

Yakuyichisya yakwe yaliji yakuti jemanjaji ni ŵanache ŵawo wosope ŵaliyikachisye yakusawusya yejinji.

“Ulemwa wayiche pa chilambo chapasi ligongo lya mundu jimo, nipo ulemwawo wayiche nacho chiwa. Myoyo chiwa chijendelechele kwa ŵandu wosope ligongo jwalijose alemwisye.”—ALOMA 5:12.a

Mlungu nganiŵapanganya ŵandu m’litala lyakuti alilongoleleje jika.

Mpela mwayiŵelele kuti mundu nganaŵa akombwele kutamaga m’mesi, yili yangakombolekasoni mundu kulilamulila jika.

“Mundu ngaŵa mkomboleka kulilongolela jikape.”—YELEMIYA 10:23.

Mlungu ngakusasaka kuti tusimaneje ni yakusawusya.

Jwalakwe akusasaka kuti tutendeje yampaka tukombole pakuŵambala yakusawusya.

“Mkambikanile malamusi gangu, Mtendele wenu ukamyichile mpela mesi ga mu lusulo.”—YESAYA 48:18.