1. Ana Tumjimbeje Magambo Mlungu Pa Yakusawusya Yatukusasimana Nayo?
Kusosekwa kwa Chiwusyochi
Ŵandu ŵajinji ŵangasaka kumtumichila Mlungu ligongo akusaganisya kuti ni jwakusatandikasya yakusawusya.
Yatukusosekwa Kuyiganichisya
Achimlongola ŵa dini ŵajinji akusajiganya kuti Mlungu ni jwakusatandikasya yakusawusya yetu. Mwachisyasyo, ŵane akusajiganyaga yakuyichisyayi:
Ngosi syachilengedwe sili chilango chakutyochela kwa Mlungu.
Ŵanache akusawa ligongo Mlungu akusasaka malayika gejinji kwinani.
Mlungu akusajigala nawo mbali pajikutendekwa ngondo, yayikusatendekasya kuti ŵandu asimane ni yakusawusya.
Nambo ana mpaka tujile kuti yakusajiganyaga achimlongola ŵa dini yakwamba Mlunguyi yili yisyene? Nambi Mlungu akusayijitichisya yeleyi?
KUTI AMANYILILE YEJINJI
Alolele fidiyo jakuti Ligongo Chichi Tukusosekwa Kulijiganya Baibulo? pa jw.org/yao.
Yajikusasala Baibulo
Mlungu jwangatendekasya yakusawusya yetu.
Akaŵe kuti akusatendekasya yakusawusyayi, nikuti yikaliji yakutindana ni ndamo syakwe mwakamulana ni yajikusasala Baibulo. Mwachisyasyo:
“Yitendo ya [Mlungu] yosope yili yagoloka ni yachilungamo. . . . Akusatenda yindu yakwenela ni ya mtendele.”—DETULONOMO 32:4.
“Mlungu ngaŵa mkutenda chindu chakusakala, Mlungu jwamachiligosope ngaŵa mkutenda chindu chakulemwecheka.”—YOBU 34:10.
“Jwamachiligosopejo ngaŵa mkulamula mwangalungama.”—YOBU 34:12.
Mlungu akusasikana dini syosope syasikusajiganya yaunami pakwamba ya jwalakwe.
Yeleyi yikupwatikapo dini syasikusajiganya kuti Mlungu ni jwakusatendekasya yakusawusya yetu. Nambosoni dini syasikusajigala nawo mbali pa ngondo kapena yachiwawa.
“Yakuti ŵakulochesyawo akusalochesya mu lina lyangu, yili ya unami yeleyo. Une nganinasagula, soni nganinatuma kapena kuŵecheta nawo. Jemanjajo akusalochesyaga yindu ya unami yele yakusatiji kuti ŵayiweni m’mesomkulola.”—YELEMIYA 14:14.
Yesu ŵajamwiche achimlongola ŵa dini ligongo lya chinyengo chawo.
“Ngaŵa mundu jwalijose jwakusangolanga une kuti, ‘Ambuje, Ambuje,’ tachijinjila mu Uchimwene wa kwinani iyayi. Nambo ŵitachijinjila ni ŵelepewo ŵakusatenda lisosa lya Atati ŵangu ŵakwinani. Pa lyele lisikulyo, ŵandu ŵajinji tachitiji kuti, ‘Ambuje, Ambuje, ana ngati uwe twaliji mkulalichila maloŵe ga Mlungu mu lina lyawo? Ngati uweji twaliji mkukoposya misimu jakusakala pakukolanga lina lyawo? Ana ngati uwe ŵeŵala ŵitwatendaga masengo gamachili gejinji mu lina lyawo?’ Pelepo tinjasalila mwangasisa kuti, ‘Ngingum’manyilila kose. Mtyoche apa ŵandu ŵa yitendo yakusakala.’”—MATEYU 7:21-23.