Detulonomo
27 Kaneko Mose pampepe ni achakulungwa ŵa Ayisalayeli ŵalamwile ŵanduwo kuti, “Msunjeje lilamusi lililyose lyangumlamula lelojino. 2 Nambosoni palisiku lyachimchijomboka Yolodani kuti mjinjile m’chilambo chakumpa Yehofa Mlungu jwenu mkasosesose maganga gekulungwakulugwa ni kugajala kaneko mkagatende pulasitala.* 3 Pachimchigamba komboka Yolodani mkalembe pamagangapo maloŵe gosope ga m’Chilamusi chelechi. Mkatende yeleyi ni chakulinga chakuti mkajinjile m’chilambo chakumpa Yehofa Mlungu jwenu, chilambo chakwenda mkaka ni uchi, mwakamulana ni chilanga chaŵatesile Yehofa Mlungu jwa achinangolo ŵenu kwa jemanja. 4 Pachimkagambe komboka Yolodanipo mkajale magangago pa Litumbi lya Eba kaneko mkagatende pulasitala* mpela yatite pakumlamulayi. 5 Pamalogo mkataŵesoni malo gakupelechela mbopesi kwa Yehofa Mlungu jwenu. Malogo mkagataŵe ni maganga, nambo magangago mkaja kugasepela ni yida yachisyano. 6 Maganga gamchimkataŵile malo gakupelechela mbopesi ga Yehofa Mlungu jwenugo gakaŵeje gamtundu, soni pamalopo mkapeleche mbopesi syakutinisya syakwawula kwa Yehofa Mlungu jwenu. 7 Mkapeleche mbopesi syamkamulano soni mkalye mbopesisyo papopo. Pelepo chimchiŵa ŵakusangalala pameso pa Yehofa Mlungu jwenu. 8 Nambosoni maloŵe gosope ga m’Chilamusi chelechi mkagalembe mwakuwoneka chenene pamagangapo.”
9 Kaneko Mose soni ŵakutaga mbopesi ŵa Chilefi ŵaŵechete ni Ayisalayeli wosope. Ŵasalile kuti, “Jemanja Ayisalayeli mjile jii ni mpikane ayi: Lelo mŵele ŵandu ŵa Yehofa Mlungu jwenu. 10 Mkusosekwa mpikanileje maloŵe ga Yehofa Mlungu jwenu nambosoni kukuya malamusi gakwe gangumlamula lelojinoga.”
11 Palisikulyo Mose ŵalamwile ŵanduwo kuti, 12 “Pachimkajomboche Yolodani, mbumba* syakuyichisyasi sikajime pa Litumbi lya Gelisimu ni kulengesya yakwamba upile kwa ŵanduwo: Mbumba ja Simiyoni, Lefi, Yuda, Isakala, Yosefe, soni mbumba ja Benjamini. 13 Nambosoni mbumba syakuyichisyasi sikajime pa Litumbi lya Eba ni kugombelesya matembelelo: Mbumba ja Lubeni, Gadi, Aseli, Sebuloni, Dani, soni mbumba ja Nafitali. 14 Alefi akaŵechete mwakwesya maloŵe kwa Ayisalayeliwo kuti:
15 “‘Jwamlweseche* ali mundu jwakupanganya yiwanichisyo yakusepa kapena yiwanichisyo yagumba yachisyano ni kuyisisa. Yeleyi yigambile kuŵa yakusepasepa yapanganyisye ni makono mundu jwalunda* soni yili yakunyalaya kwa Yehofa.’ Pelepo ŵandu wosope akajanjeje kuti, ‘Ame!’*
16 “‘Jwamlweseche ali mundu jwangachimbichisya babagwe kapena mamagwe.’ Pelepo ŵandu wosope akajanjeje kuti, ‘Ame!’
17 “‘Jwamlweseche ali mundu jwakusejesya chimanyisyo cha malile ga mlongo mjakwe.’ Pelepo ŵandu wosope akajanjeje kuti, ‘Ame!’
18 “‘Jwamlweseche ali mundu jwakumtendekasya mundu jwangalola kusokonechela litala.’ Pelepo ŵandu wosope akajanjeje kuti, ‘Ame!’
19 “‘Jwamlweseche ali mundu jwangatenda yachilungamo kwa mundu jwamtundu wine jwakutama pasikati pawo, kwa mwanache jwangali babagwe,* kapenasoni kwa jwamkongwe jwamasije.’ Pelepo ŵandu wosope akajanjeje kuti, ‘Ame!’
20 “‘Jwamlweseche ali mundu jwakugonana ni ŵamkwawo babaŵawo, pakuŵa welewo uli ungachimbichisya babaŵawo.’* Pelepo ŵandu wosope akajanjeje kuti, ‘Ame!’
21 “‘Jwamlweseche ali mundu jwakuchigona chinyama chamtundu wine uliwose.’ Pelepo ŵandu wosope akajanjeje kuti, ‘Ame!’
22 “‘Jwamlweseche ali mundu jwakugonana ni alumbugwe, chinga alumbugwewo ŵaŵelechele kwine baba ŵawo kapena mama ŵawo.’ Pelepo ŵandu wosope akajanjeje kuti, ‘Ame!’
23 “‘Jwamlweseche ali mundu jwakugonana ni akwegwe ŵakwe ŵakongwe.’ Pelepo ŵandu wosope akajanjeje kuti, ‘Ame!’
24 “‘Jwamlweseche ali mundu jwakumjuŵilila mjakwe ni kumwulaga.’ Pelepo ŵandu wosope akajanjeje kuti, ‘Ame!’
25 “‘Jwamlweseche ali mundu jwakupochela yipupu ni chakulinga chakuti amwulaje mundu jwangalemwa.’ Pelepo ŵandu wosope akajanjeje kuti, ‘Ame!’
26 “‘Jwamlweseche ali mundu jwangakuya maloŵe ga m’Chilamusi chelechi.’ Pelepo ŵandu wosope akajanjeje kuti, ‘Ame!’