Detulonomo
26 “Pachimkajinjile m’chilambo chakumpa Yehofa Mlungu jwenu kuti chiŵe chipanje chenu soni pachimkachijigale chilambocho ni kutanda kutamamo, 2 payosope yachimkalime kweleko, mkajigale sine mwa mbeju syenu syandanda kukomala syachimkagungule m’chilambo chakumpa Yehofa Mlungu jwenu. Mbejusyo mkasiŵiche mu lukalala* ni kwawula nasyo kumalo gachakasagule Yehofa Mlungu jwenu kuti kukaŵe lina lyakwe. 3 Pamyiche kweleko mkajawule kwa jwakutaga mbopesi jwakutumichila pandaŵijo ni kumsalila kuti, ‘Lelo mbiche kukulosya kuyamichila kwangu kwa Yehofa Mlungu jwetu ligongo lyakutujinjisya m’chilambo chaŵalumbile Yehofa kwa achinangolo ŵetu kuti chachitupa m’weji.’
4 “Kaneko jwakutaga mbopesijo akajigale lukalalalo mmyala mwenu ni kuluŵika pasogolo pa malo gakupelechela mbopesi ga Yehofa Mlungu jwenu. 5 Pamyiche pameso pa Yehofa Mlungujo, mkaŵechete kuti, ‘Nangolo jwetu jwaliji Mualamu jwakwendajenda mwamti jwapite ku Iguputo ni kutamaga kweleko mpela mlendo, pampepe ni ŵandu ŵamnono ŵamwiŵasa mwakwe. Nambo paŵaliji kweleko, jwalakwe ŵaŵele mtundu wekulungwa, wamachili soni wa ŵandu ŵajinji. 6 Kweleko Aiguputo ŵatandite kututendela ngasa, kutulagasya nambosoni kutukamulisya masengo gakupweteka gaukapolo. 7 Myoyo twatandite kumlilila Yehofa, Mlungu jwa achinangolo ŵetu, mwamti Yehofajo ŵapikene kulila kwetu soni ŵayiweni yakusawusya yetu, yipwetesi yetu nambosoni yilagasyo yetu. 8 Pambesi pakwe, Yehofa ŵatukopwesye m’chilambo cha Iguputo ni mkono wakwe wamachili soni wetambasukule, nambosoni mwakutenda yindu yakutesya woga, yimanyisyo soni yakusimonjesya. 9 Kaneko jwalakwe ŵatuyikasisye kumalo agano ni kutupa chilambo chelechi, chilambo chakwenda mkaka ni uchi. 10 Sambano une mbiche ni mbeju syandanda kukomala syanapandile m’chilambo chaŵambele Yehofa.’
“Pamyiche pameso pa Yehofa Mlungu jwenu ni lukalalalo, mkatindiŵaleje pameso pa Yehofa Mlungu jwenujo. 11 Mmwejo pampepe ni ŵamwiŵasa mwenu, Alefi nambosoni ŵandu ŵamitundu jine ŵakutama pasikati penu mkasangalaleje ni yindu yambone yampele Yehofa Mlungu jwenu.
12 “Pammalisisye kusonganganya chalikumi kutyochela pa mbeju syamwalimile m’chaka chatatu, chachili chaka chakupeleka chalikumi, mkajigaleje yalikumi yenuyo ni kumpa Mlefi, mundu jwamtundu wine jwakutama pasikati penu, mwanache jwangali babagwe,* soni jwamkongwe jwamasije. Jemanjaji akalyeje yalikumi yeleyi m’misinda jenu* mpaka kwikuta. 13 Kaneko mkaŵecheteje pameso pa Yehofa Mlungu jwenu kuti, ‘Ndyosisye yindu yeswela yosope yeneyi m’nyumba mwangu ni nampele Mlefi, mundu jwamtundu wine jwakutama pasikati petu, mwanache jwangali babagwe, soni jwamkongwe jwamasije. Ndesile yeleyi mwakamulana ni yaŵatulamwile wawojo, mwamti nganingasa kapena kuleka malamusi gawo. 14 Nganindya yindu yeswela yeleyi panaliji mkulila chiwa cha mlongo mjangu. Nganinayikamulasoni yindu yeleyi panaliji jwangaswejela kapena kuyipeleka ligongo lya ŵandu ŵawe. Mbikanile maloŵe ga Yehofa Mlungu jwangu, soni ndesile yosope yaŵalamwile wawojo kuti nayitende. 15 Sambano wawojo alole pasi pano kutyochela kwinani, kumalo gawo geswela gakutama, soni ŵape upile ŵandu ŵawo Ayisalayeli. Achipesoni upile chilambo chatupelechi, chilambo chakwenda mkaka ni uchi, mpela yiŵatite pakulumbila kwa achinangolo ŵetu.’
16 “Lelo Yehofa Mlungu jwenu akumlamula kuti mkuyeje malamusi soni yamlamwileyi. Myoyo msunjeje soni kuyitenda yeleyi ni mtima wenu wosope soni ni umi* wenu wosope. 17 Lelo mpikene maloŵe gelega kutyochela kwa Yehofa gakumsimichisya kuti jwalakwe chachiŵa Mlungu jwenu naga mkwenda m’matala gakwe soni kusunga malamusi gakwe ni yosope yamlamwile jwalakwe, nambosoni naga mkupikanila maloŵe gakwe. 18 Nambosoni lelo Yehofa ampikene jemanja mli mkuŵecheta mwakusimichisya kuti chimchiŵa ŵandu ŵakwe, chipanje chakwe chapadela, mpela yaŵatite jwalakwe pakumsalila jemanja. Ampikenesoni mli mkuŵecheta kuti chimchipikanilaga malamusi gakwe gosope. 19 Pelepo jwalakwe chachimkwesya jemanja kupunda mitundu jine josope ja ŵandu jaŵajipanganyisye. Yeleyi yichitendekasya kuti ŵandu aŵecheteje yambone yakwamba jemanja nambosoni chimchiŵa ŵakumanyika soni ŵakuchimbichika, mpela yaŵatite Mlungu pakumsalila jemanja. Nambotu yeleyi yichitendekwa naga chimchilosya kuti mli ŵandu ŵaswela pameso pa Yehofa Mlungu jwenu.”