Numeli

3 Sambano awu uli msela wa liŵasa* lya Aloni soni Mose pandaŵi jele Yehofa ŵaŵechetaga ni Mose palitumbi lya Sinai. 2 Ŵanache ŵachalume ŵa Aloni mena gawo galiji aga: Mwanache jwandanda kupagwa ŵaliji Nadabu. Papalisoni Abihu, Eliyesala soni Itamala. 3 Gelega ni gagaliji mena ga ŵanache ŵachalume ŵa Aloni ŵaŵasagulidwe ni kwaŵika kuti atumichileje mpela ŵakutaga mbopesi.* 4 Nambope Nadabu ni Abihu ŵawulajidwe ni Yehofa paŵapelekaga mbopesi pameso pa Yehofa pakamulichisya masengo moto wakutindana ni chilamusi. Yeleyi yatendechele mu chipululu cha Sinai. Jemanjaji ŵawile mkanaŵe kuŵeleka mwanache jwalijose jwamlume. Nambo Eliyesala soni Itamala ŵapitilisye kutumichila mpela ŵakutaga mbopesi pampepe ni Aloni, baba ŵawo.

5 Kaneko Yehofa ŵamsalile Mose kuti, 6 “Mwajigale Alefi, ni myiche nawo pasogolo. Mwajimiche jemanjajo pameso pa jwakutaga mbopesi Aloni kuti amtumichileje jwalakwejo. 7 Jemanjaji atendeje utumiki wawo ku chitenti chakusimanilana. Pakutenda yeleyi, chachiŵa ali mkukwanilisya udindo wawo wakumtumichila Aloni soni ŵandu ŵane wosope ku chitentiko. 8 Jemanjajo asamalileje yindu yosope yakutaŵila chitenti chakusimanilana, soni atumichileje ku chitentiko. Jemanjajo pakutenda yeleyi chachiŵa ali mkukwanilisya udindo wawo wakwatumichila Ayisalayeli. 9 Mwapeleche Alefi kwa Aloni soni kwa ŵanache ŵakwe. Napeleche jemanjaji kutyochela pasikati pa Ayisalayeli kuti amtumichileje Aloni. 10 Mumsagule Aloni soni ŵanache ŵakwe kuti atumichileje mpela ŵakutaga mbopesi. Nambo mundu jwalijose jwanganaŵa jwakutaga mbopesi* naga aŵandichile kwali jemanjajo, mkusosekwa kumwulaga.”

11 Yehofa ŵapitilisye kuŵecheta ni Mose kuti, 12 “Mpikane. Une ngwajigala Alefi kutyochela pasikati pa Ayisalayeli kuti ajinjile mmalo mwa ŵanache wosope ŵandanda kupagwa ŵa Ayisalayeli, mwamti Alefiwo chachiŵa ŵangu. 13 Yeleyi yili myoyo ligongo mwanache jwalijose jwandanda kupagwa ali jwangu. Palisiku lyanawuleje mwanache jwalijose jwandanda kupagwa m’chilambo cha Iguputo, namswejesye mwanache jwalijose jwandanda kupagwa kuti aŵe jwangu pasikati pa Ayisalayeli, chinga mwanache jwa mundu kapena mwanache jwa chinyama. Myoyo, ŵanache ŵeleŵa aŵeje ŵangu. Une ndili Yehofa.”

14 Yehofa ŵapitilisye kuŵecheta ni Mose mu chipululu cha Sinai kuti, 15 “Mtende kalembela jwa ŵanache wosope ŵachalume ŵa mu mbumba ja Lefi, mwakamulana ni mena ga achinangolo ŵawo soni maŵasa gawo. Mumlembe jwamlume jwalijose, kutandila jwa mwesi umo kwawulaga msogolo.” 16 Myoyo Mose ŵalembile jemanjajo mwakamulana ni yaŵamlamwile Yehofa. 17 Mena ga ŵanache ŵachalume ŵa Lefi ni aga: Gelisoni, Kohati soni Melali.

18 Sambano mena ga ŵanache ŵachalume ŵa Gelisoni mwakamulana ni maŵasa gawo galiji Libini soni Simeyi.

19 Ŵanache ŵa achalume ŵa Kohati mwakamulana ni maŵasa gawo ŵaliji Amulamu, Isala, Hebuloni soni Usiyele.

20 Ŵanache ŵa achalume ŵa Melali mwakamulana ni maŵasa gawo ŵaliji Mahili soni Musi.

Gelega ni gagaliji maŵasa ga mbumba ja Lefi mwakamulana ni mena ga achinangolo ŵawo.

21 Mwa Gelisoni mwakopweche liŵasa lya Libini soni liŵasa lya Simeyi. Gelega ni gagaliji maŵasa gakutyochela mwa Gelisoni. 22 Achalume wosope ŵakutyochela mwa Gelisoni ŵakutandila mwesi umo kwawula msogolo ŵaŵalembile mena gawo ŵakwanile 7,500. 23 Maŵasa gakutyochela mwa Gelisoni gakungaga matenti gawo kunyuma kwa chitenti cha Mlungu, chakungapililolyuŵa. 24 Jwakulongolela maŵasa gosope gakutyochela mwa Gelisoni ŵaliji Eliyasafu mwanache jwa Layeli. 25 Masengo ga ŵanache ŵachalume ŵa mu liŵasa lya Gelisoni ku chitenti chakusimanilana galiji gakusamalila chitenti chosopecho, yakuwunichila kusa ni mkati mwa chitenticho soni likatani lya pamlango wakwinjilila mu chitenticho. 26 Ŵasamalilagasoni nguwo sya lutenje lwakusyungulila luŵala lwa chitenticho, likatani lya pamlango wakwinjilila mu luŵala lwakusyungulila malo gakupelechela mbopesi ni chitenti cha Mlungu nambosoni ngonji sya chitenticho soni yosope yakwayana ni utumiki welewu.

27 Mwa Kohati mwakopweche liŵasa lya Amulamu, Isala, Hebuloni soni liŵasa lya Usiyele. Gelega ni gagaliji maŵasa gakutyochela mwa Kohati. 28 Achalume wosope ŵakutyochela mwa Kohati ŵakutandila mwesi umo kwawula msogolo ŵaŵalembile mena gawo ŵakwanile 8,600. Masengo ga jemanjaji galiji gakusamalila malo geswela. 29 Maŵasa gakutyochela mwa Kohati gakungaga matenti gawo mbali ja kummwela kwa chitenti cha Mlungu. 30 Jwakulongolela maŵasa gosope gakutyochela mwa Kohati ŵaliji Elisafani mwanache jwa Usiyele. 31 Masengo ga jemanjaji galiji gakusamalila libokosi lya chilanga, tebulo, chakuŵikapo nyali, malo gosope gakupelechela mbopesi, yiwiya yakamulichisya masengo pakutumichila kumalo geswela, likatani lyamkati nambosoni yosope yakwayana ni utumiki welewu.

32 Jwakulongolela mbumba ja Lefi ŵaliji Eliyesala mwanache jwa jwakutaga mbopesi Aloni. Jwalakweju jwalolelaga wosope ŵaŵakamulaga masengo kumalo geswela.

33 Mwa Melali mwakopweche liŵasa lya Mahili soni liŵasa lya Musi. Gelega ni gagaliji maŵasa gakutyochela mwa Melali. 34 Achalume wosope ŵakutyochela mwa Melali ŵakutandila mwesi umo kwawula msogolo ŵaŵalembile mena gawo ŵakwanile 6,200. 35 Jwakulongolela maŵasa gosope gakutyochela mwa Melali ŵaliji Suliyeli mwanache jwa Abihayilo. Maŵasa gakutyochela mwa Melali gakungaga matenti gawo mbali ja kumpoto kwa chitenti cha Mlungu. 36 Masengo ga ŵanache ŵachalume ŵa Melali galiji gakulolela mafelemu ga chitenti cha Mlungu, mbalaŵala syakwe, yipilala yakwe soni yakwimichila yipilalayo. Ŵalolelagasoni yida yosope yakamulila masengo gawo nambosoni yosope yakwayana ni utumiki welewu. 37 Jemanjaji ŵalolelagasoni yipilala yosope ya mumbali mwa luŵala lwakusyungulila chitenticho pampepe ni yakwimichila yakwe, yichili* yakwe nambosoni ngonji syakwe syakukunjila.

38 Mose soni Aloni pampepe ni ŵanache ŵakwe ŵakungaga matenti gawo chakungopokolyuŵa kwa chitenti cha Mlungu, kwakuli kusogolo kwa chitenti chakusimanilana. Jemanjaji masengo gawo galiji gakusamalila malo geswela, soni pakutenda yeleyi ŵaliji ali mkukwanilisya udindo wawo wakwatumichila Ayisalayeli. Mundu jwalijose jwakuŵandichila kwali jemanjajo ŵasosekwaga kuwulajidwa.

39 Achalume wosope ŵa mu mbumba ja Lefi ŵakutandila mwesi umo kwawula msogolo ŵele Mose soni Aloni ŵalembile mena gawo mwakamulana ni maŵasa gawo, pakupikanila yaŵalamwile Yehofa, ŵakwanile 22,000.

40 Kaneko Yehofa ŵamsalile Mose kuti, “Mtende kalembela jwa ŵanache wosope ŵandanda kupagwa ŵachalume ŵa Ayisalayeli ŵakutandila mwesi umo kwawula msogolo. Mwaŵalanje jemanjajo soni mwalembe mena gawo. 41 Mwajigale Alefi kuti aŵe ŵangu mmalo mwa ŵanache wosope ŵandanda kupagwa ŵa Ayisalayeli. Nambosoni mjigale yilango ya Alefi kuti yiŵe yangu mmalo mwa yilango yosope yandanda kupagwa ya Ayisalayeli. Une ndili Yehofa.” 42 Pelepo Mose ŵalembile mena ga ŵanache wosope ŵandanda kupagwa ŵa Ayisalayeli mwakamulana ni yaŵamlamwile Yehofa. 43 Achalume wosope ŵandanda kupagwa ŵaŵalembile mena gawo ŵakutandila mwesi umo kwawula msogolo ŵakwanile 22,273.

44 Yehofa ŵapitilisye kuŵecheta ni Mose kuti, 45 “Mwajigale Alefi mmalo mwa ŵanache wosope ŵandanda kupagwa ŵa Ayisalayeli, soni mjigale yilango ya Alefi mmalo mwa yilango yosope yandanda kupagwa ya Ayisalayeli. Mwajigale Alefiwo kuti aŵe ŵangu. Une ndili Yehofa. 46 Pakuŵa chiŵalanjilo cha ŵanache ŵandanda kupagwa ŵa Ayisalayeli chikupunda chiŵalanjilo cha Alefi ni achalume 273, myoyo mwawombole achalume ŵeleŵa. 47 Mlokotele mbiya syakumwombolela mundu jwalijose syakwana masekeli* msano, mwakamulana ni usito wa liganga lyakupimila lya sekeli lya kumalo geswela. Sekeli jimo jili magela* 20. 48 Mbiyasyo msipeleche kwa Aloni soni ŵanache ŵakwe mpela chakwawombolela ŵanache ŵachalume ŵa Ayisalayeli ŵapundile chiŵalanjilo cha Alefiwo.” 49 Myoyo Mose ŵalokotele mbiya syosope syakwawombolela ŵanache ŵandanda kupagwa ŵakupunda chiŵalanjilo cha Alefi ŵala. 50 Mbiya syaŵalokotele syakwawombolela ŵanache ŵandanda kupagwa ŵa Ayisalayeliwo syaliji masekeli gakwana 1,365, mwakamulana ni usito wa liganga lyakupimila lya sekeli lya kumalo geswela. 51 Kaneko Mose ŵajigele mbiya syakuwombolela sila ni kusipeleka kwa Aloni soni ŵanache ŵakwe mwakamulana ni maloŵe* ga Yehofa. Mose ŵatesile yosope yeneyi mpela yaŵatite Yehofa pakumlamula.