Numeli

2 Sambano Yehofa ŵaŵechete kwa Mose soni Aloni kuti, 2 “Myisalayeli jwalijose akunjeje tenti jakwe kumalo kwajikunjile matenti gulu jakwe jakola mbumba* sitatu. Mundu jwalijose akunjeje tenti jakwe mwakuŵandikana ni pachili chikwangwani cha achinangolo ŵakwe. Ayisalayeliwo akunjeje matenti gawo mwakulolegana ni chitenti chakusimanilana, mwakuchisyungulila chitenticho.

3 “Gulu jakola mbumba sitatu jakumanyika ni lina lyakuti Yuda jikunjeje matenti gakwe mbali ja kungopokolyuŵa. Mundu jwalijose akunjeje tenti jakwe pamalo pakali kagulu kakwe.* Nasoni mwanache jwa Aminadabu ni jwali jwakulongolela ŵandu ŵa mu mbumba ja Yuda. 4 Achalume ŵakwe wosope ŵaŵalembile usilikali ŵakwanile 74,600. 5 Mbumba ja Isakala jikunjeje matenti gakwe mbali jimo mwakuŵandikana ni mbumba ja Yuda. Netanele mwanache jwa Suwala ni jwali jwakulongolela ŵandu ŵa mu mbumba ja Isakala. 6 Achalume ŵakwe wosope ŵaŵalembile usilikali ŵakwanile 54,400. 7 Mbumba ja Sebuloni jikunjeje matenti gakwe mwakuŵandikana ni mbumba ja Yuda kumbali jinejo. Eliyabu mwanache jwa Heloni ni jwali jwakulongolela ŵandu ŵa mu mbumba ja Sebuloni. 8 Achalume ŵakwe wosope ŵaŵalembile usilikali ŵakwanile 57,400.

9 “Achalume wosope ŵaŵalembile usilikali ŵa mu gulu jakumanyika ni lina lyakuti Yuda, wosope pampepe ŵakwanile 186,400. Jemanjaji ni ŵachaŵeje gulu jandanda pakusama.

10 “Gulu jakola mbumba sitatu jakumanyika ni lina lyakuti Lubeni jikunjeje matenti gakwe mbali ja kummwela. Mundu jwalijose akunjeje tenti jakwe pamalo pakali kagulu kakwe.* Elisuli mwanache jwa Seduwele ni jwali jwakulongolela ŵandu ŵa mu mbumba ja Lubeni. 11 Achalume ŵakwe wosope ŵaŵalembile usilikali ŵakwanile 46,500. 12 Mbumba ja Simiyoni jikunjeje matenti gakwe mbali jakuŵandikana ni mbumba ja Lubeni. Selumiyele mwanache jwa Sulisadayi ni jwali jwakulongolela ŵandu ŵa mu mbumba ja Simiyoni. 13 Achalume ŵakwe wosope ŵaŵalembile usilikali ŵakwanile 59,300. 14 Mbumba ja Gadi jikunjeje matenti gakwe mwakuŵandikana ni mbumba ja Lubeni kumbali jinejo. Eliyasafu mwanache jwa Leuwele ni jwakulongolela ŵandu ŵa mu mbumba ja Gadi. 15 Achalume ŵakwe wosope ŵaŵalembile usilikali ŵakwanile 45,650.

16 “Achalume wosope ŵaŵalembile usilikali ŵa mu gulu jakumanyika ni lina lyakuti Lubeni, wosope pampepe ŵakwanile 151,450. Jemanjaji ni ŵachaŵeje gulu jaŵili pakusama.

17 “Pamkusaka kusamisya chitenti chakusimanilana, matenti ga Alefi gaŵeje pasikati pa matenti ga mbumba sinesyo.

“Dongosolo jajakuyisye mbumba jilijose pakukunga matenti gakwe, akuyejesoni dongosolo jijojo pakusama jwalijose pamalo gakwe, mwakamulana ni gulu jakwe jakola mbumba sitatu.

18 “Gulu jakola mbumba sitatu jakumanyika ni lina lyakuti Efulayimu jikunjeje matenti gakwe mbali ja kungapililolyuŵa. Mundu jwalijose akunjeje tenti jakwe pamalo pakali kagulu kakwe.* Elisama mwanache jwa Amihudi ni jwali jwakulongolela ŵandu ŵa mu mbumba ja Efulayimu. 19 Achalume ŵakwe wosope ŵaŵalembile usilikali ŵakwanile 40,500. 20 Mbumba ja Manase jikunjeje matenti gakwe mbali jimo mwakuŵandikana ni mbumba ja Efulayimu. Gamaliyele mwanache jwa Pedasuli ni jwali jwakulongolela ŵandu ŵa mu mbumba ja Manase. 21 Achalume ŵakwe wosope ŵaŵalembile usilikali ŵakwanile 32,200. 22 Mbumba ja Benjamini jikunjeje matenti gakwe mwakuŵandikana ni mbumba ja Efulayimu kumbali jinejo. Abidani mwanache jwa Gidoni ni jwali jwakulongolela ŵandu ŵa mu mbumba ja Benjamini. 23 Achalume ŵakwe wosope ŵaŵalembile usilikali ŵakwanile 35,400.

24 “Achalume wosope ŵaŵalembile usilikali ŵa mu gulu jakumanyika ni lina lyakuti Efulayimu, wosope pampepe ŵakwanile 108,100. Jemanjaji ni ŵachaŵeje gulu jatatu pakusama.

25 “Gulu jakola mbumba sitatu jakumanyika ni lina lyakuti Dani jikunjeje matenti gakwe mbali ja kumpoto. Mundu jwalijose akunjeje tenti jakwe pamalo pakali kagulu kakwe.* Ahiyeseli mwanache jwa Amisadayi ni jwali jwakulongolela ŵandu ŵa mu mbumba ja Dani. 26 Achalume ŵakwe wosope ŵaŵalembile usilikali ŵakwanile 62,700. 27 Mbumba ja Aseli jikunjeje matenti gakwe mbali jimo mwakuŵandikana ni mbumba ja Dani. Pagiyele mwanache jwa Okilani ni jwali jwakulongolela ŵandu ŵa mu mbumba ja Aseli. 28 Achalume ŵakwe wosope ŵaŵalembile usilikali ŵakwanile 41,500. 29 Mbumba ja Nafitali jikunjeje matenti gakwe mwakuŵandikana ni mbumba ja Dani kumbali jinejo. Ahila mwanache jwa Enani ni jwali jwakulongolela ŵandu ŵa mu mbumba ja Nafitali. 30 Achalume ŵakwe wosope ŵaŵalembile usilikali ŵakwanile 53,400.

31 “Achalume wosope ŵaŵalembile usilikali ŵa mu gulu jakumanyika ni lina lyakuti Dani, wosope pampepe ŵakwanile 157,600. Jemanjaji aŵeje ŵakumalichisya pakusama pa magulu gakola mbumba sitatusitatu gala.”

32 Ŵeleŵa ali Ayisalayeli ŵaŵalembile usilikali mwakamulana ni mena ga achinangolo ŵawo. Asilikali wosope ŵaŵalembile kutyochela m’matenti ga Ayisalayeli ŵakwanile 603,550. 33 Nambo pakalembela jweleju Alefi nganiŵalemba mena gawo. Mose ŵatesile yeleyi mwakamulana ni yaŵamlamwile Yehofa. 34 Ayisalayeli ŵatesile yosope yele Yehofa ŵamlamwile Mose. Jemanjaji ŵakuyaga dongosolo jeleji paŵatamaga m’matenti gawo m’magulu ga mbumba sitatusitatu soni pakusama. Jwalijose ŵatamaga soni kusama pakujigalila liŵasa lyakwe soni nangolo jwakwe.