იეჰოვას ოკო, არძაქ ინარღას დაშებულ

1. მუს ნიშნენს დაშებულიშ ნარღება?

ᲛᲣᲟᲐᲛᲡᲘᲗ არასწორო იფქციებუთ, საჭირო რე, იმნარღათ ჩქინ საქციელ. ბიბლიაშე ბგებულენთ, ნამდა თინა, მით ნარღენს დაშებულს, იჯოგუანს მუშ გლახა საქციელს, ირნერო ოცად, მიოტუას არასწორიშ კეთება დო ვეგემეორას თინა (ქოძირით „ბიბლიურ სიტყვეფიშ ენწყუმა“ — „დაშებულიშ ნარღება“).

2. მუშენ ოკო მიჩქუდან, მუ მიშურს დაშებულიშ ნარღებაშა? (ნეემ. 8:9—11).

² არძას ოკო მიჩქუდან, მუ მიშურს დაშებულიშ ნარღებაშა, მუშენდა ჩქი ადამ დო ევაშ არასრულყოფილ გამნარყ ვორეთ დო თინეფშე მემკვიდრეობათ ცოდა დო ღურა მაფუნა მეღებულ, ათეშენ არძა ირდღას ვაშენთ (რომ. 3:23; 5:12). უჩილათ მითინ ვა რე. ძალიერ რწმენაშ მენდულ კათას ხოლო უხვადუდ არასწორ სურვილეფწკუმა ბრძოლა, მაგალთო, მუნერით რდჷ პავლე მოციქულ (რომ. 7:21—24). ნიშნენსო თენა თის, ნამდა მთელ ცხოვრებას მაჸინა ოწუხებელ ჩქინ შეცდომეფიშ გურშენ? ვარ. იეჰოვა მოჭყოლოფე ღორონთ რე დო თის ოკო, ბედნერეფ ვორდათ, მუდგას ჯგირო ოძირანს ნეემიაშ დროს მახორუ იუდეველეფიშ შემთხვევა (წეკითხით ნეემიაშ 8:9—11). იეჰოვას ვაკოდ, თინეფქ ულირს დაშებულშე წუხებას გინაჸუნესკო. თეშ მანგიორო, ოკოდ, ხიოლით ემსახურესკო თის. იეჰოვას ჯგირო უჩქჷ, ნამდა დაშებულიშ ნარღებას ბედნერობა მოუღ, ათეშენ მოგურუანა, მუ მიშურს თიშა. შემლებუნა დარწმუნებულ ვორდათ, ნამდა ჩქინ არასწორ საქციელს მთელ გურით ქიმნარღენთ-და, მოჭყოლოფე ზეციერ მუმა მაპატიენა.

3. მუს გუვარჩიენთ თე სტატიას?

³ თე სტატიას უმოსის ქიგებგენთ დაშებულიშ ნარღებაშ გურშენ დო გუვარჩიენთ სუმ მხარეს: 1) მუ დაგურუ იეჰოვაქ ისრაელეფს დაშებულიშ ნარღებაშ გურშენ? 2) მუჭო ოხვარ იეჰოვა ადამიანეფს, მთელ გურით ინარღან დაშებულ? დო 3) მუ დაგურუ იესოქ მუშ მიმაჸუნალეფს დაშებულიშ ნარღებაშ გურშენ?

ᲛᲣ ᲓᲐᲒᲣᲠᲣ ᲘᲔᲰᲝᲕᲐᲥ ᲘᲡᲠᲐᲔᲚᲔᲤᲡ ᲓᲐᲨᲔᲑᲣᲚᲘᲨ ᲜᲐᲠᲦᲔᲑᲐᲨ ᲒᲣᲠᲨᲔᲜ?

4. მუ დაგურუ იეჰოვაქ ისრაელეფს დაშებულიშ ნარღებაშ გურშენ?

⁴ მუჟამსით იეჰოვაქ ისრაელეფს კანონეფ მეჩჷ, თე ხალხიქ პირობა დოდვჷ, ნამდა დემორჩილებუდეს თე კანონეფს. თაშ ქიმიქციებუდეს-და, იეჰოვა დოთხილანდ თინეფს დო კურთხევეფით გეიოფშანდ. თე კანონეფიშ გურშენ იეჰოვაქ თინეფს უწუ: „კანონ, ნამუსით ამდღა გიზოჯუნთ, ვართ ძნელ დაცვებელ რე დო ვართ თიცალ, კოჩის ვაკეთებუასინ“ (კან. 30:11, 16). მარა ისრაელეფ თე კანონეფს ვემიაჸუნუდეს-და, მაგალთო, შხვა ღორონთეფიშ თაყვანიშცემას ქიდიჭყანდეს-და, იეჰოვა მიოტენდ თინეფშა კურთხევეფიშ მეჩამას დო თიშ უმშო დოსქილადირეფ გლახა მდგომარეობას იჸუაფუდეს. თექ ქუმოხვადუკონ ხოლო, თინეფ უიმენდოთ ვეჸიდეს, მუშენდა მუნეფიშ ღორონთის დართუდეს-და, კინ შეიალებედეს თიშ მოწონაშ მეღება (კან. 30:1—3, 17—20). შხვა სიტყვეფით ქოფთქუათინ, თინეფს საშვალება მიაჩამუდეს, ინარღესკო მუნეფიშ არასწორ საქციელ. თაშ ქიმიქციებუდეს-და, იეჰოვა მიღენდ თინეფს დო კინ ვა მარკენდ კურთხევეფს.

5. სოვრეშე იძირე, ნამდა იეჰოვას ხე ვაუღალ მუშ ხალხშა? (2 მეფ. 17:13, 14).

⁵ ისრაელეფ, ღორონთიშ გიშაგორილ ხალხ, ვამორჩილუდეს თის დო მანგარ გლახათ იქციებუდეს. თინეფ კერპთაყვანიშმცემლობაწკუმა ართო, ქიანაშ საზიზღარ საქმეს ორთუდეს, მუდგას მუთუნ ჯგირ ვა მოუღუდ თინეფშა. მარა იეჰოვას ხე ვაუღალ თე ხალხშა დო ოცადუდ, სწორ შარაშა დართინუკო. თინა წინასწარმეტყველეფიშ პიჯით ელუჩანდჷ მუშ ხალხის, ინარღესკო დაშებულ დო დართესკო თის (წეკითხით 2 მეფეეფიშ 17:13, 14).

6. მუჭო ოძირანდჷ იეჰოვა ისრაელეფს წინასწარმეტყველეფიშ საშვალებათ, ნამდა საჭირო რდჷ, ინარღესკო მუნეფიშ საქციელ? (ქოძირით სურათ).

⁶ იეჰოვა ხშირას წინასწარმეტყველეფს მეუშქვანდჷ მუშ ხალხის, ნამდა გაფრთხილუკო, მუ მაჸუნუდ შედეგო თინეფიშ დაუმორჩილებლობას. მაგალთო, თიქ ისრაელეფს იერემიაშ პიჯით უწუ: „დუმართ განდგომილ ისრაელ . . . მეტო ვეპჸიქ სქანდე გარისხებულ, მუშენდა ართგურ ვორექ . . . ირო ვეპჸიქ სქანდე ნაწყენ. ოღონც სი აღიარ დაშებულ, მუშენდა ვამორჩილუდ სქან ღორონთის, იეჰოვას“ (იერ. 3:12, 13). თიქ იოელიშ პიჯით ხოლო უწუ: „დუმართით მთელ გურით“ (იოელ. 2:12, 13). იეჰოვას ესაიაშ პიჯით თეცალ მუდგარენ აფჷ ნარაგადა მუშ ხალხშა: „გესუფთით, ნუმ ორთუთ ჩქიმ თოლიშ წოხოლე გლახას“ (ეს. 1:16—19). დეკვირით, მუ ორგადაფუ იეჰოვაქ ეზეკიელს: „მოხიოლუნ გიჩქუნანო უბადოშ ღურა?! . თინა ვამსხუნუნო, მიკირთას უბადოქ მუშ უბადო შარაშე დო იცოცხლას?! მითინიშ ღურა ვა მოხიოლ . . . დუმართით დო იცოცხლით“ (ეზეკ. 18:23, 32). იეჰოვას გურ ეხარებ, მუჟამსით ადამიანეფ ნარღენა დაშებულს, მუშენდა თის ოკო, თინეფქ მარადიულო იცოცხლან. თაშ ნამდა, იეჰოვა შორშე ვა უჯინე, მუშით მუჟამ მეხვადუ კოჩ, ნამდა ოკო დითირას დო მიკირთას ღორონთჸურე. მორთ ქობძირათ თეშ მუსხირენ მაგალით.

7. მუ დაგურუ იეჰოვაქ მუშ ხალხის ოსიაშ დო თიშ ოსურიშ მაგალითით?

⁷ გუვარჩუათ, მუ დაგურუ იეჰოვაქ ისრაელეფს წინასწარმეტყველ ოსიაშ დო თიშ ოსურიშ მაგალითით. თიქ უღალატ ოსიას დო მრუშენდჷ. ქიმეჩუო იეჰოვაქ თის მიკორთაშ საშვალება? ღორონთიქ ოსიას უწუ, „კინ მეუ დო ქიჸოროფე ოსურ, ნამუთ შხვა კოჩის უჸორს დო მრუშენს, თეშ ქიჸოროფე, მუჭოთ იეჰოვას უჸორს ისრაელეფ, მით შხვა ღორონთეფს ცენა თაყვანს“ (ოს. 3:1; იგავ. 16:2). დეკვირით, ოსიაშ ოსურ დიო ხოლო ვა რდჷ გიშასწორებულ დო კინ აშენდჷ, მარა იეჰოვაქ იშენით ქუწუ ოსიას, ნამდა მიდართუკო თიშა, ქაპატუკო დო გერიგუკო.a თე მაგალითით იეჰოვას ოკოდ, ქაძირუკო ისრაელეფს მუშ დამოკიდებულება. თიშ უმკუჯინუო, ნამდა თინეფ დიო ხოლო საზიზღარ საქმეეფს ორთუდეს იეჰოვაშ წოხოლე, თის იშენით მანგარო უჸორდჷ მუშ ხალხ დო წინასწარმეტყველეფს მეუშქვანდჷ, ნამდა ქიმეხვარუკო თირუას დო დაშებულიშ ნარღებას. თე მაგალით ოძირანს, ნამდა იეჰოვა ორწყე კოჩიშ გურს დო ოცად, თიცალ ადამიანეფს ხოლო ქიმეხვარას, მით აგრძელენა გლახაშ კეთებას (იგავ. 17:3). მორთ, ასე უჯგუშო ქიგებგათ, მუჭო ორთჷ იეჰოვა თეს.

ᲛᲣᲭᲝ ᲛᲔᲸᲣᲜᲡ ᲘᲔᲰᲝᲕᲐᲡ ᲐᲨᲔᲜᲡᲘᲜ ᲤᲔᲠ ᲙᲝᲩ ᲜᲐᲠᲦᲔᲑᲐᲨᲐ?

8. მუჭო მეუდირთჷ იეჰოვაქ კაენს, ნამდა ქიმეხვარუკო მიკორთას? (დაბ. 4:3—7; ქოძირით სურათ).

⁸ ადამ დო ევაშ პირველ ქომოლსქუაქ, კაენქ, ცოდამქ დებად. ბიბლიას კაენიშ გურშენ ჭარჷ, ნამდა „თიშ საქმეეფ უბადო რდჷ“ (1 იოან. 3:12). შილებე ზუსტას ათეშენ ვემიწონუ იეჰოვაქ კაენ დო თიშ შესაწირ. გიშესწორუკონ თიშ მანგიორო, თის „გურქ მოურთჷ დო სახექ აკუცუ“. მუ აკეთ იეჰოვაქ? თიქ ქუდურაგადუ კაენს (წეკითხით დაბადებაშ 4:3—7). იეჰოვაქ გემუანო ეჩუ თის დო უწუ, ნამდა ჯგირს გაკეთენდ-და, ქიმიწონუანდ. მარა, თეწკუმა ართო, გაფრთხილ, ნამდა ცოდას ვებრძოლებუდ-და, გლახას ქიმიკინდუანდ. მუ გლახა რე, ნამდა კაენქ ველერჩქილუ იეჰოვაშ ნარაგად, ვა დაჸუნ თის დო ვემეჩ საშვალება, ქიმეხვარუკო მიკორთას. საინტერესო რე, რახანს კაენქ ვემიღ მოხვარა, არძა ცოდამ ადამიანიშ მოხვარაშა ეიჸოთუო გურ იეჰოვაქ? მუშო ოკო რაგად, ვარ!

9. მუჭო მიჸუნ იეჰოვაქ დავით ნარღებაშა?

⁹ იეჰოვას მანგარო უჸორდჷ მეფე დავით. თიქ თე მეფეშ გურშენ თქუ, ჩქიმ გურს მოწონსინ ფერ კოჩ რენია (საქ. 13:22). მარა დავითიქ მანგარ სერიოზულ ცოდეფ ჩედინ, მუნერით რე მრუშობა დო კოჩიშ ჸვილუა. მოსეშ კანონიშ მიხედვით თინა ოჸვილარ რდჷ (ლევ. 20:10; რიცხ. 35:31). დავითის დუდშე მუთუნ ვეგიოხედ ნარღებაშ, მარა იეჰოვას მუთუნით ვაკოდ თე კოჩიშ დინაფა დო მანგარო ოკოდ, გეგშესწორუკო.b ათეშენ წინასწარმეტყველ ნათან ქიმუშქვჷ თის, ნამდგაქ მაგალით ქუმუჸუნ, ნამდა ქაძირუკო, მუშმაშხვა აფუდ დაშებულ. დავითიქ აზრიშა ქუმორთჷ დო მანგარო ინარღჷ, მუთ აკეთ (2 სამ. 12:1—14). თიშ ართ-ართ ფსალმუნშე ჯგირო იძირე, მუშმანწარას გენიცადენდჷ მუშ საქციელს (ფსალმ. 51, ეპიგრაფ). თე ფსალმუნს ბრელ ადამიანშა ეუქექუაფ გურშა დო მუხვარებ, ინარღესკო დო გეგშესწორესკო. მუშმაჯგირა რე, ნამდა ჩქინ მოჸოროფე მუმაქ დავითის ქიმეხვარ გიშასწორებას.

10. მუშ კეთებას გინმოჭყვიდირაფუანა იეჰოვაშ მოთვინებაშე დო პატიებაშე ფიქრ?

¹⁰ იეჰოვას ჯოგჷ დო ვაძირუაფ მუთუნნერ ცოდა (ფსალმ. 5:4, 5). მარა თის მანგარო უჸორთჷ, ათეშენ, მუჟამსით ვაშენთ, მთელ გურით ოკო, ქიმმეხვარან. თინა მანგარო აფუნა დაშებულინ ფერეფს ხოლო ოხვარ, ინარღან მუნეფიშ საქციელ დო დეახლოვან თის. მართალო მუჭო მამშვიდენა თეშ რჩქინა! იეჰოვაშ მოთვინებაშე დო პატიებაშე ფიქრ გინმოჭყვიდირაფუანა, ირნერო ვეცადათ, ვა დუვაშუათ თიშ წოხოლე დო, მეფჩირთით-და, ხეთეშე საქმეთ ქუვოძირუათ, ნამდა მნარღენთ დაშებულს. ასე ქობძირათ, მუ დაგურუ იესოქ მუშ მიმაჸუნალეფს დაშებულიშ ნარღებაშ გურშენ.

ᲛᲣ ᲓᲐᲒᲣᲠᲣ ᲘᲔᲡᲝᲥ ᲛᲣᲨ ᲛᲘᲛᲐᲸᲣᲜᲐᲚᲔᲤᲡ ᲓᲐᲨᲔᲑᲣᲚᲘᲨ ᲜᲐᲠᲦᲔᲑᲐᲨ ᲒᲣᲠᲨᲔᲜ?

11, 12. მუ დაგურუ იესოქ მუშ მიმაჸუნალეფს იეჰოვაშ პატიებაშ გურშენ? (ქოძირით სურათ გვერდის).

¹¹ ახ.წ. პირველ საუკუნეს მესიაქ ქუმორთჷ. მუჭოთ წოხოლენ სტატიას ხოლო მიფშინეთ, იეჰოვაქ მანათალ იოანე დო იესო ქრისტე გიმირინუ თიშო, ნამდა ადამიანეფს ქაძირუკო, მუსხით მნიშვნელოვან რდჷ, ინარღესკო დაშებულ (მათ. 3:1, 2; 4:17).

¹² დედამიწას მსახურებაშ დროს იესო ოგურუანდჷ მუშ მიმაჸუნალეფს, ნამდა იეჰოვა ირო მზათ რე პატიებაშო. თენა ჯგირო ქაძირუ თინეფს, მუჟამსით შარასეჩილათირ სქუაშ იგავ მოუჸონ. თე იგავს ახალგაზრდა ბოშ ჸუდეშე მეურს დო დუდეშქუმალირ ცხოვრებას იჭყანს, მარა აზრიშა ქუმურსინ, ჸუდეშა ირთუ. მუჭო შეხვადუ თის მუამუშ? იესოქ თქუ: „მუმაქ შორშე ქუმუკინდუ სქუას თოლ დო მანგარო ეცოდ; ირულ, გურშა ქიხუტოლუ დო გოჯუნ“. სქუას ულამუდ, მუამუშის ქოთხუკო, მოინალეთ ქიგემრინევა, მარა მუმაქ თიშ გურშენ თქუ „ჩქიმ ბოშ“ დინაფილ რდჷ დო გამკორჩქინდუა, დო დართინუ ოჯახშა (ლუკ. 15:11—32). დედამიწაშა მოულაშახ იესოს ბრელშა აფუდ ძირაფილ, მუჭო იჭყოლოფუანდჷ მუშ ზეციერ მუმა თინეფს, მით აშენდეს. თე იგავიშ საშვალებათ იესოქ ჯგირო ქუმოძირუეს, მუნერ პატიება უჩქჷ იეჰოვას დო მუჭო იჭყოლოფუანს ცოდამეფს.

13, 14. მუ დიგურუ მოციქულ პეტრექ დაშებულიშ ნარღებაშ გურშენ დო მუ დაგურუ შხვეფს თე საკითხშენ? (ქოძირით სურათ).

¹³ მოციქულ პეტრექ იესოშე დიგურუ, მუჭო პატიენს იეჰოვა თინეფს, მით მთელ გურით ნარღენა ცოდას. პეტრე ხშირას ჩირთუდ, მარა იესო ირო მზათ რდჷ, ქაპატუკო თის. მაგალთო, თიშ უკულ, მუთ თიქ სუმშა ივარუ, ნამდა იჩინენდჷ იესოს, მანგარო გენიცად მუშ საქციელ (მათ. 26:34, 35, 69—75). გათელებაშ უკულ, იესოქ დუდ ქაძირუ პეტრეს. მუჭოთ იძირე, თე დროს პეტრე ხვალე რდჷ (ლუკ. 24:33, 34; 1 კორ. 15:3—5). იესოს უჩქუდ, ნამდა მოციქულ მანგარო ნარღენდჷ მუშ საქციელს, ათეშენ ოკოდ, დარწმუნუკო, ნამდა პატიებულ აფუდ თიშა.

¹⁴ მოციქულ პეტრეს გუნამორს აფუდ, მუჭო პატიენს იეჰოვა თინეფს, მით ნარღენა მუნეფიშ გლახა საქციელს. ათეშენ თამამას შეულებუდ შხვეფს ხოლო ოგურუკო თე საკითხიშ გურშენ. ჟარნეჩდომავითა დღაშ დღახუშ უკულ ჭიჭე ხანშა, პეტრეს ჩიება უღუდ აკოშაყარელ იუდეველეფწკუმა დო თინეფს უწუ, ნამდა მესია აფუდეს ჸვილირ. მარა იშენით გემუანო ეჩუ თინეფს დო ელუჩ: „ინარღით დაშებულ დო მიკირთით, ნამდა დილასას თქვან ცოდეფქ, ქუმორთას იეჰოვაშე ჭყანაშ მოკათაფაშ დროქ“ (საქ. 3:14, 15, 17, 19). პეტრექ თეშნერო ქაძირუ, ნამდა დაშებულიშ ნარღება პიროვნებას გინაჭყვიდირაფუანს, მიკირთას ღორონთჸურე, დითირუას აზროვნება, მიოტუას არასწორო მოქმედება დო ქიდიჭყას თიშ კეთება, მუთ ღორონთიშ თოლს მოსაწონ რე. მოციქულქ თინა ხოლო ქაძირუ მარჩქილეეფს, ნამდა იეჰოვა დოლასუნდ თინეფიშ ცოდეფს, გიჭყოლიდუანდ დო დღას ვეგიშინანდ. წანეფიშ უკულ თიქ ქრისტიანეფს თეცალ მუდგარენ უწუ: „იეჰოვა . . . გითვინენა, მუშენდა მითინიშ მოსპუალა ვაკო. თეშ გინაწონს, ოკო, ნამდა არძას მიაჩას დაშებულიშ ნარღებაშ საშვალებაქ“ (2 პეტ. 3:9). მართალო, მუჭო ელამკინანა გურშა თეშ რჩქინა, განსაკუთრებულო თიმწკუმა, მუჟამსით სერიოზულო ვაშენთ.

15, 16. ა) მუჭო დიგურუ პავლექ, მუს ნიშნენს პატიება? (1 ტიმ. 1:12—15) ბ) მუს გუვარჩიენთ უკულიან სტატიას?

¹⁵ მოციქულ პავლეს ბრელ გლახა საქმე აფუდ ნაკეთებ. თინა უდუნდებელო თხოზუდ ქრისტიანეფს. არგამა რე, თის ბრელ მუდგარენ აფუდ ონარღებელ დო მანგარო ოსაჭირუდ ღორონთშე პატიება. ალბათ ქრისტიანეფიშ უმენტაშ მუთუნით ვეფიქრენდ, პავლე ღორონთჸურე დღას გემკირთუდუნ. მარა იესო ადამიანურ გინაჯინშე ვა უჯინედ პავლეს. ქოთ თინა დო ქოთ თიშ ზეციერ მუმა ორწყედეს თე პიროვნებაშ ჯგირ თვისებეფს. იესოქ თიშ გურშენ თქუ: „თე კოჩ მა გიშაბგორ“ (საქ. 9:15). იესოქ სასწაულ ხოლო გაკეთ პავლეშა თიშ ოძირაფალო, ნამდა საჭირო რდჷ, ინარღუკო დაშებულ (საქ. 7:58—8:3; 9:1—9, 17—20). ქრისტიანო გინორთაშ უკულ, პავლე ხშირას იჩიებუდ, მუნერ მარდულ აფუდ იეჰოვას დო იესოს, ნამდა თიშ მიმართ თეცალ სიკეთე დო ჭყოლოფა გიმირჩქინეს (წეკითხით 1 ტიმოთეშ 1:12—15). თინა შხვეფს ხოლო ოგურუანდჷ: „ღორონთ მუშ ჯგირ გურით ოცად, დაშებულიშ ნარღებაშა ქიმეიჸუნას“ (რომ. 2:4).

¹⁶ ართშა პავლექ ქიგეგ, ნამდა კორინთიშ კრებას რდჷ კოჩ, ნამუთ უზნეოთ ცხოვრენდჷ. ათეშენ მითითებეფ ქიმეჩ კრებას, სოვრეშეთ იძირე, მუნერ ჸოროფას გიმირჩქინანს იეჰოვა, მუჟამსით მუშ მსახურეფს ასაჯენს, დო მუნერ ჭყოლოფათ მეურე თინეფს, მუჟამსით ნარღენა დაშებულს. თე ბიბლიურ მონაკვეთის უკულიან სტატიას კილ-კილშა გუვარჩიენთ.