რჯერდას, იეჰოვას პატიებულ აფჷ სქანდა

1, 2. მუს ორთჷ იეჰოვა, მუჟამსით მნარღენთ დაშებულს დო მუჭო მოქმედენს თეშ რჩქინა ჩქინდა? (ქოძირით სურათ).

ᲛᲔᲤᲔ დავითის, ჯგირო არჩქილედ, მუშმანწარა რე, ულირს დაშებულშე წუხენქინ. მუშენდა თიქ მუსხირენშა, სერიოზულო დაშუ (ფსალმ. 40:12; 51:3, ეპიგრაფ). მარა, მუჟამსით მთელ გურით ინარღჷ, იეჰოვაქ ქაპატუ თის (2 სამ. 12:13). თაშ ნამდა, დავითის თინა ხოლო ჯგირო უჩქუდ, მუჭო ეუქექუანს კოჩის თიშ რჩქინა, ნამდა იეჰოვაქ აპატუ (ფსალმ. 32:1).

² დავითცალო, ჩქი ხოლო შემლებუნა ქიბგინათ თი ხიოლ, ნამუთ იეჰოვაშ პატიებას მოჸუნს. მუ გურიშ ემაკინალ რე თიშ რჩქინა, ნამდა მთელ გურით ქომნარღენთ, ქუვაღიარენთ დაშებულს დო ვეგებმეორათინ თიშო ირფელს ქუვორთუთ-და, იეჰოვა მზათ რე, მაპატუან სერიოზულ შეცდომეფ ხოლო (იგავ. 28:13; საქ. 26:20; 1 იოან. 1:9). გურშა ელამკინანა თიშ რჩქინა ხოლო, ნამდა იეჰოვა თეშ იჭყოლიდუანს დო მაპატიენა დაშებულს, ითამ ვართ მოხვალამედუკო დღას მუთუნ (ეზეკ. 33:16).

3, 4. მუჭო გინაფლენდჷ ართ და ნათუაშ უკულ დუდის დო მუს გუვარჩიენთ თე სტატიას?

³ მარა მინშა შილებე მიჭირდან თიშ დაჯერება, ნამდა იეჰოვაქ მართალო მაპატუეს. გუვარჩუათ ჯენიფერიშ მაგალით, ნამდგაქ ჭეშმარიტებას მირდჷ. დიდა დო მუმა თის ჭეშმარიტებას ჭიჭენობაშე ოგურუანდჷ. მარა, მუჟამსით გემწირდჷ, მშობლეფიშ ტყობაშე, არასწორო ქიდიჭყჷ ცხოვრება. მარა წანეფიშ უკულ, თიქ დართჷ ღორონთის დო დინათ. ჯენიფერ იჩიებ: „ულირს ფარაშ შიბას ვორდჷ გინოჸუნელ, უზნეო ცხოვრებას მეპჸუნდჷ, ბრელს ფშუნდჷ დო აკაბცხაშე იფეფთქებუდ. მუჭოთ თაშინ, მიჩქუდ, ნამდა იეჰოვას შეულებ მაპატუან ჩქინ ცოდეფ. მარა, თიშ უმკუჯინუო, ნამდა მნარღენდჷ ჩქიმ საქციელს დო იეჰოვას პატიება ფთხი, მიჭირდჷ თიშ დაჯერა, ნამდა ღორონთიქ მართალო ქუმაპატუ“.

⁴ მინშა თქვა ხოლო ხომ ვა ფიქრენთ, ნამდა იეჰოვას ვა აფჷ პატიებულ თქვანდა ულირს დაშებულ? იეჰოვას ოკო, მუჭოთ დავითის, ჩქი ხოლო ბჯერდან, ნამდა თიქ ქუმაპატუეს დაშებულ. თე სტატიას გუვარჩიენთ, მუშენ რე მნიშვნელოვან, ბჯერდან, ნამდა იეჰოვა მაპატუეს დო მუ მიმეხვარებუნა თეს?

ᲛᲣᲨᲔᲜ ᲠᲔ ᲛᲜᲘᲨᲕᲜᲔᲚᲝᲕᲐᲜ, ᲑᲯᲔᲠᲓᲐᲜ, ᲜᲐᲛᲓᲐ ᲘᲔᲰᲝᲕᲐᲥ ᲛᲐᲞᲐᲢᲣᲔᲡ?

5. მუ ოკო სატანას, დუმოჯერუან? ქიმიჸუნით მაგალით.

⁵ იეჰოვაქ მაპატუესინ თიშ ქობჯერან-და, სატანას ვა ვაღორებეთ. სატანა ირფელს ორთჷ, ნამდა მიმოტებაფუან იეჰოვაშ მსახურება. მაგალთო, თე მიზანიშ მიოჭირნაფალო თიქ შილებე ეცადას, ქუდმოჯერუან, ნამდა თიშმანწარა მაფუნა დაშებულ, იეჰოვა დღას ვა მაპატიენა. ქიგიფშინათ ბიბლიას მოჩამილ ართ კოჩიშ შემთხვევა, ნამდგას, სექსუალურ უზნეობაშ გურშენ, კორინთის კრება ქუდატებაფუეს (1 კორ. 5:1, 5, 13). მუჟამსით თიქ იეჰოვაჸურე მიკირთჷ, სატანას ოკოდ, და დო ჯიმალეფქ ვაპატუესკო დო ვემიღესკო თინა. თის თანაქრისტიანეფ ვემიღენდეს-და, თე კოჩის შილებედ უფიქრებუდუკო, ნამდა იეჰოვა ხოლო ვაპატიენდ თის დო შედეგო თეშ გეგნაჸუნუდ წუხებას, ნამდა მიოტენდჷ ღორონთიშ მსახურებას. გვალო თენა ვაკოდუო სატანას ხოლო?! თიშ მიზან დო ხრიკეფ ამდღა ხოლო ვა თირე. მარა ჩქი ჯგირო მიჩქუნა თიშ გეგმეფ (2 კორ. 2:5–11).

6. მუ მიმეხვარებუნა, ვეგნვაჸუნათ დაშებულშე წუხებას?

⁶ იეჰოვაქ მაპატუესინ თიშ ქობჯერან-და, დაშებულშე წუხებას ვეგნვაჸუნუთ. მუჟამსით მუდგარენს დუვაშენთ, გასაკვირ ვა რე, პწუხენდათ თეშე (ფსალმ. 51:17). თენა ჯგირ ხოლო რე, მუშენდა, მუჟამსით სინდის მაწუხენა, თენა მოხვარუნა, გიშასწორებელო ნაბიჯეფ გეგნობდგათ (2 კორ. 7:10, 11). მარა იმნარღითინ თიშ უკულ ხოლო, დაშებულშე წუხებას ქუვაგრძელენთ-და, თექ შილებე გურ თეშ გომტახან, ნამდა იეჰოვაშ მსახურება მიმოტებაფუან. თეშ გინაწონს, იეჰოვაქ მაპატუესინ თენა ქობჯერან-და, ვეგნვაჸუნუთ წუხებას. შედეგო, შემალებენა ხიოლით დო სუფთა სინდისით ვემსახურათ ღორონთის. იეჰოვას ხოლო ზუსტას თენა ოკო (კოლ. 1:10, 11; 2 ტიმ. 1:3). მუჭო შემლებუნა დებრწმუნათ, ნამდა იეჰოვაქ მაპატუეს დაშებულ?

ᲛᲣᲭᲝ ᲨᲔᲛᲚᲔᲑᲣᲜᲐ ᲓᲔᲑᲠᲬᲛᲣᲜᲐᲗ, ᲜᲐᲛᲓᲐ ᲘᲔᲰᲝᲕᲐᲥ ᲛᲐᲞᲐᲢᲣᲔᲡ?

7, 8. მუნერ პიროვნებათ გაჩინებაფუ იეჰოვაქ მოსეს მუშ დუდ დო მუშა მარწმუნენა თენა? (გამ. 34:6, 7).

⁷ დეფიქრით, მუნერ პიროვნებათ გუმოჩინებაფუეს იეჰოვაქ მუშ დუდ. მაგალთო, ქიგიფშინათ, მუ უწუ თიქ მოსეს სინაიშ გვალასa (წეკითხით გამოსვლაშ 34:6, 7). მართალ რე, იეჰოვას ქიანაშ ჯგირ თვისება უღჷ დო ნებისმიერ შეულებუდ თქუკო, მარა მოსეს დუდ გაჩინებაფუ მოჭყოლოფე დო შხვეფიშ გაჭირებაშ გურშა მიმაღალარ ღორონთო. მუჭო შილებე თეცალ ღორონთიქ ვაპატუას პიროვნებას, მით მთელ გურით ნარღენს დაშებულს? თენა უგურე საქციელ იჸუაფუდ, მუდგას იეჰოვა დღას ვაკეთენს, მუშენდა თინა ვა რე თეცალ.

⁸ შემლებუნა ბჯერდან, ნამდა იეჰოვა, სიმართლეშ ღორონთ, დღას ვადმაღორენა დო მუშ დუდის ვაგმოჩინებაფუანა თიცალო, მუნერით სინამდვილეს ვა რე (ფსალმ. 31:5). თაშ ნამდა, შემლებუნა ვენდათ თიშ სიტყვას. ულირს დაშებულიშ გურშენ გურ ბრალს დიო ხოლო ქიგერდვანან-და, დეფიქრით: მართალო ქობჯერსო, ნამდა იეჰოვა შხვეფიშ გაჭირებაშ გურშა მიმაღალარ დო მოჭყოლოფე ღორონთ რე დო ვაპატუასინ თეშ ვედიტენს თიცალ პიროვნებას, მით ნარღენს დაშებულს? იმწკუმა, მუშენ ოკო ვა ბჯერდას, ნამდა ჩქიმდა ხოლო პატიებულ აფჷ?

9. მუს ბგებულენთ ფსალმუნეფიშ 32:5-შე იეჰოვაშ პატიებაშ გურშენ?

⁹ დეფიქრით, მუს იჩიებუნა ბიბლიაშ მაჭარალეფ იეჰოვაშ პატიებაშენ. მაგალთო, ქიდეკვირით, მუ თქუ დავითიქ, იეჰოვაშ გურშენ (წეკითხით ფსალმუნეფიშ 32:5). თიქ თქუ: „სი მაპატი ჩქიმ ცოდა დო დაშებულ“. ებრაულ სიტყვაქ, ნამუთ თე მუხლის თარგმნილ რე, მუჭოთ პატიება, შილებე ითარგმნას, მუჭოთ „ეჭოფუა“ ვარდა „ღალა“. მუჟამსით იეჰოვაქ დავითის აპატუ, თაშ ქოფთქუათინ, თიქ გეჭოფ თიშ ცოდეფ დო მიდეღ. თეშნერო, დავითის შურქ მადგჷ, მუჟამსით თე მონკა ოღალქ მანწყჷ (ფსალმ. 32:2–4). ჩქი ხოლო შემლებუნა თეცალ სიმშვიდე ქიბგინათ. დაშებულს მთელ გურით ქომნარღენთ-და, ოკო ვეგნვაჸუნათ წუხებას დო ვეგლებღათ თი მონკა ოღალ, ნამუთ იეჰოვაქ უკვე ჩამთხინუეს.

10, 11. მუს ნიშნენს სიტყვეფ, იეჰოვა ირო მზათ რე პატიებაშო? (ფსალმ. 86:5).

¹⁰ წეკითხით ფსალმუნეფიშ 86:5. თე მუხლის დავით იეჰოვაშე იჩიებ, ნამდა თინა „ირო მზათ რე პატიებაშო“. თე სიტყვეფიშ გურშენ ართ წყაროს ჭარჷ: „პატიება [იეჰოვაშ] პიროვნებაშ ნაწილ რე“. მუშენ შემლებუნა თეშ რაგად? თეშ პასუხის მუხლიშ მაჟია ნაწილ მარზენა: „ართგურ ჸოროფას ვარკენქ თის, მით სქან სახელს შინანს“. მუჭოთ წოხოლენ სტატიაშე გებგით, იეჰოვა დღას ვა ურთინუანს ოჭიშის დო ვეჩეთხიებ თინეფს, მიდგას თინა უჸორა დო ომსახურუნა. თეცალ ჸოროფაშ ჭყოლოფათ, „ბრელ მუდგარენს პატიენს“ თიცალ ადამიანეფს, მით ნარღენს დაშებულს (ეს. 55:7). თაშ ნამდა, იეჰოვაქ გაპატუესინ თეშ დაჯერა ქოიჭირან-და, ქოკითხით თქვან დუდის: ხომ ქობჯერს, ნამდა იეჰოვა მზათ რე, აპატუას არძას, მით ნარღენს დო თის პატიებას თხინსჷ? იმწკუმა მა მუშენ ვა მაპატიენდ, მუჟამსით თენა ფთხი?

¹¹ გურშა ელამკინანა თიშ რჩქინა ხოლო, ნამდა იეჰოვას ჯგირო არჩქილე არასრულყოფილეფ ვორეთინ (ფსალმ. 139:1, 2). მორთ ასე ქობძირათ, მუს იჩიებ დავით ხოლო ართ ფსალმუნს დო ქიგებგათ, მუჭო მარწმუნენა თექ ინოჭარილ სიტყვეფ ხოლო, ნამდა იეჰოვა მაპატიენა.

ᲗᲥᲕᲐ ᲕᲐᲒᲒᲝᲭᲧᲝᲠᲓᲐᲜ ᲗᲘᲥ, ᲛᲣᲗ ᲘᲔᲰᲝᲕᲐᲡ ᲕᲐᲭᲧᲝᲠᲓᲣ

12, 13. ფსალმუნეფიშ 103:14-იშ თანახმას, მუ შჷ იეჰოვას ჩქინ გურშენ დო მუს გინაჭყვიდირაფუანს თენა?

¹² წეკითხით ფსალმუნეფიშ 103:14. დავით იეჰოვაშ გურშენ იჩიებ: „თის შჷ, ნამდა ტვერ ვორეთ“. თეშნერო დავით მირაგადუნა ართ-ართ მიზეზის, მუდგაშეთ იეჰოვა ირო მზათ რე, აპატუას მუშ მსახურეფს, მით ნარღენა შეცდომეფს. იეჰოვას თინა ხოლო შჷ, ნამდა არასრულყოფილეფ ვორეთ. თეს უჯგუშო ქინვანჭათინ, მორთ უმოს ქიფჩუათ დავითიშ სიტყვეფშე.

¹³ დავით თაქ იჩიებ, ნამდა იეჰოვას ჯგირო უჩქჷ ჩქინ აგებულება. თიქ ადამ დიხაშ ტვერშე გაჭყჷ დო ჯგირო უჩქჷ, მუ ოსაჭირ ადამიანს ქიარსებასინ. მაგალთო, ოჭკუმალ, ლურ დო ჰაერ (დაბ. 2:7). ადამიან სრულყოფილ რდასინ ხოლო, თე ირფელ იშენით ოსაჭირ. მარა თიშ უკულ, მუთ ადამ დო ევაქ შეცოდეს, „დიხაშ ტვერ“ თი გაგებათ ხოლო ვორეთ, ნამდა თე შეზღუდვეფს, ნამუთ ადამიანს თეშით ხოლო უღუდ, ცოდამ მიდრეკილებეფქ ხოლო ქიგიაძინ. ადამ დო ევაშე არასრულყოფილებაქ გინმაჩეს, მუდგაშ გურშენ გლახაშ კეთებაშ სურვილ ეთოპჸუნა. მარა, მუჟამსით დავითიქ თქუ, იეჰოვას შჷ, ჩქი ტვერ ვორეთია, თის ხოლო გულისხმენდჷ, ნამდა რახანს იეჰოვას უჩქჷ ჩქი არასრულყოფილეფ ვორეთინ, ირიათო მიშურს ჩქინ მდგომარეობაშა. დავითიშ სიტყვეფ თაშ შილებე გაკობძინათ: იეჰოვას არჩქილე, ნამდა მინშა მეფჩირთუთ დო მუჟამსით თენა მოხვადუ, ქიმნარღენთ-და, თინა ჭყოლოფას გეგმირჩქინანს დო ქუმაპატიენა (ფსალმ. 78:38, 39).

14. ა) მუჭო ეჭარ დავითიქ იეჰოვაშ პატიება? (ფსალმ. 103:12). ბ) მუჭო ოძირანს დავითიშ შემთხვევა, ნამდა იეჰოვა სრულას პატიენს? (ქოძირით ჩარჩო „იეჰოვა პატიენს დო იჭყოლიდუანს“).

¹⁴ ხოლო ართ, მუთ დუმარწმუნენა, ნამდა იეჰოვას პატიებულ აფჷ ჩქინდა, 103-ა ფსალმუნიშ მა-12 მუხლის ინოჭარილ დავითიშ სიტყვეფ რე (წეკითხით). თინა იჩიებ, ნამდა, მუჟამსით იეჰოვა მაპატიენა, თიშმაშორაშა მითხინუანა ჩქინ ცოდეფს, „მუჭოთ ბჟაეიოლ რე შორს ბჟადინოლშე“. ბჟაეიოლ დო ბჟადინოლ ართმაჟიაშე არძაშ უმოს შორ წერტილეფ რე; ბჟაეიოლ რენ თექ დღას ვეჸუაფ ბჟადინოლ დო ვართ პირიქით. მუს მირაგადუნა თე შედარება იეჰოვაშ პატიებაშენ? ართ ნაშრომს თეშ გურშენ ჭარჷ: „ღორონთიქ ცოდეფ თეშმაშორაშა ჩამთხინუეს-და, შემლებუნა ბჯერდან, ნამდა გოდინაფილ რე ირფელ, მუთ თიწკუმა რე დაკავშირებულ, თაშ ქოფთქუათინ, თიშ შურ ხოლო“. მუჭოთ მიჩქუნა, მუდგაინიშ შურს ქიბგინანთინ, შილებე თექ მუდგარენეფ ქუგმოშინან. მარა, მუჟამსით იეჰოვა მაპატიენა, თაშ ქოფთქუათინ, თიშმაშორაშა მეუღ ჩქინ ცოდა, ნამდა თიშ „შურ“ ხოლო დინუ დო მუთუნ ვა სქიდუ თიცალ, მუთ ქუგაშინანდ ჩქინ დაშებულს დო დუმასაჯენდეს (ეზეკ. 18:21, 22; საქ. 3:19).

15. მუშ კეთება შემლებუნა, ულირს დაშებულიშ გურშენ სინდის სვანჯის ვა მარზენან-და?

¹⁵ იეჰოვაქ გაპატუესინ თეშ დაჯერა ქოიჭირან-და, მუჭო მიგეხვარებუნა 103-ა ფსალმუნს ინოჭარილ დავითიშ სიტყვეფ? ულირს დაშებულიშ გურშენ სინდის სვანჯის ვა გარზენან-და, თეცალ კითხვეფშე დეფიქრით: მა ხომ ვა მოჭყორდუ თინა, მუთ იეჰოვას ვაჭყორდუ? ხომ ვაგმოჭყორდჷ, ნამდა თის ჯგირო არჩქილე, ცოდამეფ ვორეთინ დო ირო აპატიენს თის, მით მთელ გურით ნარღენს დაშებულს? ვარდა ხოლო, ხომ ვამჭირს თიშ გოჭყოლიდაფა, მუთ იეჰოვაქ უკვე გიჭყოლიდუ? გიპჭყოლიდეო ჩქიმ ცოდეფ, ნამუთ იეჰოვაქ ქუმაპატუ დო დღას ვეგიშინანს? ჩქიმ ულირ ცოდეფს თინა ვეკნაჯინენ-და, მა მუშენ ოკო კინვოჯინედე?! (ფსალმ. 130:3). თაშ ნამდა, იეჰოვაქ მაპატუესინ თენა ქობჯერან-და, შემალებენა ჩქი ხოლო ქუვაპატუათ ჩქინ დუდის დო წიმი იბდათ.

16. ქიმიჸუნით მაგალით, მუშენ რე გლახა ულირს დაშებულშე ირიათო წუხება (ქოძირით სურათ).

¹⁶ თეცალ მაგალით ქიმიპჸუნათ: ულირს დაშებულიშ გურშენ ირიათო წუხება მოგენს მანქანაშ ჸუნაფას თეშ, ნამდა თოლ ირიათო უკახალე ოჯინე სარკეჸურე გიღუდას. მუშო ოკო რაგად, მინშა საჭირო რე თე სარკეშა გეჯინა, მუშენდა შილებე უკახალე საფრთხე ქოძირე დო ეიჩილითუე. მარა წიმი უსაფრთხოთ ულაქ ქეშგალებუასინ, წოხოლე ოკო უჯინე შარას. თეშნერო, მინშა ვა რე გლახა ჩქინ ულირ შეცდომეფიშ გოშინა, მუდგაქ შილებე ქიმმეხვარან, კინ იგივექ ვა მაღოლან. მარა ირიათო ულირშე ქოფიქრენთ-და, თეშე წუხებაქ შილებე მეცილან, ამდღა მუთ შემლებუნან ირფელ გუვაკეთათ ღორონთიშ მსახურებას. თეშ მანგიორო, წიმი ოკო იბჯინათ – ოკო უჯინათ შარას, ნამდგას ახალ ქიანაშა მეპჸუნთ, სოდეთ ულირს მოხვალამირ გლახა „მეტო მითინს ვა გაშინე“ (ეს. 65:17; იგავ. 4:25).

ᲓᲐᲠᲬᲛᲣᲜᲘᲗ ᲗᲥᲕᲐᲜ ᲓᲣᲓ

17. მუშენ ოკო ვეცადათ, დუვარწმუნათ ჩქინ დუდ, ნამდა იეჰოვას უჸორთ დო მზათ რე, მაპატუან?

¹⁷ ირიათო ოკო ვეცადათ, დუვარწმუნათ ჩქინ დუდ, ნამდა იეჰოვას მანგარო უჸორთ დო ირო მზათ რე, ქუმაპატუან (1 იოან. 3:19). მუშენ რე თენა თეცალ მნიშვნელოვან? მუშენდა სატანას ვა ულამ გაჩერება; თინა ირნერო ეცადებ, ქუდმოჯერუან, ნამდა იეჰოვას ვართ უჸორთ დო ვართ მაპატიენა ჩქინ შეცდომეფს. თის ირო თენა ოკოდ დო თენა ოკოდას იჸი – მუდგათიჸინ მიმოტებაფუან იეჰოვაშ მსახურება. ეშმაკ ირიათო უმოსო ეცადებ თე მიზანიშ მენჭირნაფას, მუშენდა უჩქჷ, ნამდა ჭიჭე დრო აფჷ დოსქილადირ (გამოცხ. 12:12). მუთუნით ოკო ვამვოგებაფუათ თის თე ბრძოლა!

18. მუჭო შეილებუნა დერწმუნათ, ნამდა იეჰოვას უჸორთ დო ირო მზათ რე, ქუგაპატუან?

¹⁸ წოხოლენ სტატიაქ ქუმოძირუეს, მუჭო დუვარწმუნათ ჩქინ დუდ, ნამდა იეჰოვას მართალო უჸორთ. თე სტატიაქ ქუდმოგურუეს, მუჭო დებჯერათ, ნამდა იეჰოვას დასურო პატიებულ აფჷ ჩქინდა. მაგალთო, ოკო დეფიფქრათ, მუნერ პიროვნებათ მოჩინებაფუანა იეჰოვა მუშ დუდის დო მუჭო ეჭარუნა ბიბლიაშ მაჭარალეფ, მუნერ პატიება უჩქჷ თის. ოკო ვაგმოჭყორდან, ნამდა იეჰოვას არჩქილე, ცოდამეფ ვორეთინ დო ჭყოლოფათ მომრენა. დო მუჟამსით თინა მაპატიენა, სრულას იჭყოლიდუანს ჩქინ დაშებულს. თე რჩევეფს გეგმიბრინუანთ-და, დავითცალო ჩქი ხოლო დარწმუნებულ იპჸით, ნამდა იეჰოვა მოჭყოლოფე რე დო ფთქუანთ: მადლობა იეჰოვა, ნამდა „მაპატი ჩქიმ ცოდა დო დაშებულ“ (ფსალმ. 32:5).