მუჭო გიმირჩქინანა უხუცესეფ ჸოროფას დო ჭყოლოფას შემცოდველწკუმა?

1. მუ შილებე აკეთას თიქ, მით სერიოზულო დაშენს?

ᲬᲝᲮᲝᲚᲔᲜ სტატიაშე გებგით, მუ უწუ პავლე მოციქულქ კორინთიშ კრებას თი ჯიმაშ გურშენ, მით სერიოზულო აშენდჷ. თინა ვა ნარღენდჷ დაშებულს, ათეშენ უხუცესეფქ თინა კრებას ოკო ვედიტუესკო. მარა, მუჭოთ თე სტატიაშ მთავარ მუხლშე იძირე, ღორონთის შეულებ დუმაშებელეფ ნარღებაშა ქიმიჸუნას (რომ. 2:4). მორთ ქობძირათ, მუჭო ოხვარ თინეფს იეჰოვა უხუცესეფიშ საშვალებათ დო მუჭო მეჸუნს ნარღებაშა.

2, 3. მუ ოკო ვაკეთათ, მუჟამსით ქიგებგენთ, ნამდა თანაქრისტიანქ სერიოზულო შეცოდ, დო მუშენ რე თეშ კეთება საჭირო?

² ქრისტიანქ სერიოზულო დაშუნ თენა უხუცესეფს ვარჩქვენუნან-და, ვეშიალებენა თიშ მოხვარა. ათეშენ, მუ ოკო ვაკეთათ, მუჟამსით ქიგებგენთ, ნამდა თანაქრისტიანქ სერიოზულო შეცოდ, მუდგაშ გურშენ შილებე კრება ქუდატებაფუან? პირველ რიგის ოკო ქუწუათ, ნამდა უხუცესეფშა ქიმერთას დო მოხვარა ქოთხუას (ეს. 1:18; საქ. 20:28; 1 პეტ. 5:2).

³ მარა მუ ოკო ვაკეთათ, თინა უხუცესეფწკუმა დორაგადაფაშენ ვარიას ქიჩიებუნ-და? თე დროს ჩქი ოკო ქიმეფრთათ უხუცესეფშა დო ქივეჩუათ თე ამბე, ნამდა შეიალებუან თიშ მოხვარაქ. თეს ჸოროფა მოკეთებაფუანა, მუშენდა ვა მოკონა თანაქრისტიანიშ დინაფა. მუჟამსით პიროვნება აგრძელენს გლახაშ კეთებას, იეჰოვაწკუმა ურთიერთობას გილელუანს დო შილებე კრებას ხოლო გოუტახას სახელ. ათეშენ, მუდგა ძნელ ვა მაფუდანინ, იეჰოვაშ დო თანაქრისტიანიშ ჸოროფა გინმოჭყვიდირაფუანა, ქიმეფრთათ უხუცესეფშა (ფსალმ. 27:14).

ᲛᲣᲭᲝ ᲝᲮᲕᲐᲠᲣᲜᲐ ᲣᲮᲣᲪᲔᲡᲔᲤ ᲗᲘᲡ, ᲛᲘᲓᲒᲐᲥ ᲡᲔᲠᲘᲝᲖᲣᲚᲝ ᲨᲔᲪᲝᲓ

4. მუ რე უხუცესეფიშ მიზან, მუჟამსით შემცოდველს შეხვადუნა?

⁴ მუჟამსით კრებას მიდგაინ სერიოზულო ცოდენს, უხუცესეფიშ საბჭო გიშაგორუნს სუმ შესაფერის უხუცესის, მით იმსახურენა კომიტეტის, ნამუთ შეხვადუ თე პიროვნებას.a თე ჯიმალეფს ოსაჭირუნა მოკრძალება დო თანდაბლობა. მართალ რე, თინეფ ირნერო ეცადებუნა, დუმაშებელს ქიმეხვარან, ინარღას მუშ საქციელ, მარა თინა ხოლო არჩქილენა, ნამდა მითინშა ვა დანძალებენა თირუა (კან. 30:19). უხუცესეფს თინა ხოლო არჩქილენა, ნამდა არძა ვემიქციებ მეფე დავითცალო, ვემიღენს მოხვარას დო ვენარღენს (2 სამ. 12:13). ნამთინექ შილებე ველერჩქილუას იეჰოვაშ შეგონება (დაბ. 4:6—8). მარა, თე ირფელიშ უმკუჯინუო, უხუცესეფიშ მიზან რე, მუდგათიჸინ ქიმეხვარან პიროვნებას, ნარღებაშა ქიმერთას. ნამ ბიბლიურ პრინციპეფ მეხვარებ თინეფს, მუჟამსით შეხვადუნა შემცოდველს?

5. მუჭო ოკო მეუდირთან უხუცესეფქ თის, მით სერიოზულო აშენს? (2 ტიმ. 2:24—26; ქოძირით სურათ).

⁵ უხუცესეფშო დუმაშებელ დინაფილ ძვირფას შხურ რე (ლუკ. 15:4, 6). ათეშენ, მუჟამსით თის შეხვადუნა, ვა ურაგადუნა ჸინჩას დო გლახათ ვაქცუნა; ვართ თის ფიქრენა, ნამდა თიწკუმა შეხვალამა უბრალოთ ფორმალობა რე, ნამუთ აუცილებერო ოკო მიკორთან. თეშ მანგიორო, თინეფ თი თვისებეფს გიმირჩქინანა, ნამუთ 2 ტიმოთეშ 2:24—26-ის ირწყებე (წეკითხით). უხუცესეფს ოკონა, აზროვნებაშ თირუას ქიმეხვარან პიროვნებას, ათეშენ გემუანო დო ჸოროფათ მეუდირთუნა თის.

6. მუჭო ამზადენა უხუცესეფ გურს დო გონებას, ონდო შემცოდველს შეხვადუნა? (რომ. 2:4).

⁶ უხუცესეფ გურს დო გონებას ამზადენა შეხვალამაშო. თინეფ ოცადუნა, იეჰოვაცალო ქიმუდირთან დუმაშებელს დო ირიათო შუნა პავლეშ სიტყვეფ: „ღორონთ მუშ ჯგირ გურით ოცად, დაშებულიშ ნარღებაშა ქიმეიჸუნას“ (წეკითხით რომაელეფიშ 2:4). უხუცესეფს ოკო ვა გაჭყორდან, ნამდა პირველ რიგის თინეფ ჭყიშეფ რენა, მიდგაქ ოკო მიაჸუნან ქრისტეშ ხელმძღვანელობას დო თიცალო იზრუნან კრებაშო (ეს. 11:3, 4; მათ. 18:18—20). ონდო კომიტეტ შეხვადუ პიროვნებას, ნამდგაქ შეცოდ, თინეფ ლოცულენა დო ფიქრენა მუნეფიშ მიზანშენ — ქიმიჸუნან პიროვნება დაშებულიშ ნარღებაშა. თინეფ გეგმირკვიენა ბიბლიას დო პუბლიკაციეფს დო ლოცვას მოხვარას ქოთხინა იეჰოვას, ნამდა ქინანჭან თე პიროვნებაშ აზროვნებას დო სიტუაციას. თეწკუმა ართო, თინეფ დეფიქრებუნა, მუ ინფორმაცია ოსაჭირუნა თე პიროვნებაშ გურშენ, ნამდა უჯგუშო ქინანჭან, მუშენ გევითარ თის თეცალ დამოკიდებულებაქ დო აზროვნებაქ დო მუშენ მიქცუ თაშ (იგავ. 20:5).

7, 8. მუჭო ოცადუნა უხუცესეფ, იეჰოვაცალო მოთვინება გეგმირჩქინან, მუჟამსით შემცოდველს შეხვადუნა?

⁷ უხუცესეფ ოცადუნა, იეჰოვაცალო მოთვინება გეგმირჩქინან. თინეფს შუნა, მუჭო ოცადუდ იეჰოვა ულირს თინეფიშ გიშასწორებას, მით სერიოზულო აშენდჷ. მაგალთო, თიქ მოთვინებათ მეუდირთჷ კაენს, გაფრთხილ, ნამდა ცოდა გლახაშა ქიმიჸუნანდჷ დო იმენდ ხოლო ქიმეჩ, გეგშესწორებუქ-და, მეიღენქია (დაბ. 4:6, 7). იეჰოვაქ მეფე დავითშა შეგონებაშ მიოჩამალო წინასწარმეტყველ ნათან გოუტუ. თიქ თიცალ მაგალით ქუმუჸუნ მეფეს, ნამდგაქ ქიმეხვარ, ინარღუკო მუშ საქციელ (2 სამ. 12:1—7). იეჰოვა უდუჯერებელ ისრაელ ერს ირიათო მეუშქვანდჷ წინასწარმეტყველეფს (იერ. 7:24, 25). თინა ვა უჯინედ, მუშით მუჟამ ინარღენდ მუშ ხალხ დაშებულს. თეშ მანგიორო, მუ გინოდგუნდჷ პირველ ნაბიჯის დო ელუჩანდჷ, მიკირთესკო.

⁸ უხუცესეფ ხოლო ოცადუნა, იეჰოვაცალო ქიმუდირთან თის, მიდგაქ სერიოზულო შეცოდ. 2 ტიმოთეშ 4:2 თინეფს ელუჩანს, მოთვინება გეგმირჩქინან, მუჟამსით შემცოდველს შეხვადუნა. თაშ ნამდა, თის გიშასწორებაშ სურვილქ გოურჩქინდასინ, უხუცესიქ მშვიდას დო მოთვინებათ ოკო მეუდირთას. ჯიმას გურ ქუმალე დო გენჭირელო ქიჩიებუნ-და, შილებე შემცოდველქ ვემირჩქილუას თიშ რჩევა დო ვემიკორინუას მუშ საქციელიშ ნარღება.

9, 10. მუჭო ოხვარუნა უხუცესეფ შემცოდველს, ქუგოხვადას, მუქ მიჸუნ დაშებაშა დო მუზმათ სერიოზულო აფჷ დაშებულ?

⁹ უხუცესეფ ოცადუნა, ქიგეგან, მუქ მიჸუნ პიროვნება დაშებაშა. მაგალთო, ჭიე-ჭიეთ ხომ ვემიოტუ ღორონთიშ სიტყვაშ გიმორკვიება ვარდა მსახურებაშა გილულა? ხომ ვა გურკჷ ლოცვეფს ვარდა მიკოსურებულო ხომ ვა ლოცულენდჷ? ხომ ვემიოტუ არასწორ სურვილეფწკუმა ბრძოლა? გლახა საზოგადოებაწკუმა ხომ ვა უღუდ ურთიერთობა ვარდა არასწორ გართობას ხომ ვეგშეგორუნდჷ? ქოხვადუნო, ნამდა თიშ თეცალ გადაწყვეტილებეფ დო საქმეეფ გურს ჭუნსჷ მუშ ზეციერ მუმას, იეჰოვას?

¹⁰ უხუცესეფს შეულებუნა კითხვეფ ქუდუსვან პიროვნებას, ნამდა დაფიქრან, მუშენ გილელ იეჰოვაწკუმა თიშ ურთიერთობაქ დო მუქ მიჸუნ ცოდაშა. მუშო ოკო რაგად, თე დროს თინეფ ვენათხოზუნა საჭირო ვა რენ ფერ მანგარ პირადულ დეტალეფს (იგავ. 20:5). თეწკუმა ართო, წინასწარმეტყველ ნათანქ აკეთ დავითწკუმან თეშ, შეულებუნა მაგალითეფ ქუმუჸონან თის, ნამდა დაფიქრან დო ქაძირუან, მუსხით გლახა რე თიშ საქციელ. შილებე პიროვნებაქ გვალო პირველ შეხვალამას ქიმეხვადას, მუშმაშხვა დაშუ დო მანგარო გენიცადას. შილებე გვალო თე შეხვალამაქ იჸუას დასაბაღიქ, ნამდა ინარღას დაშებულ.

11. მუჭო ოქცუდ იესო შემცოდველეფს?

¹¹ უხუცესეფ ოცადუნა, მიაჸუნან იესოშ მაგალითის. იესოქ სავლეს მეხვარ, დეფიქრუკო მუშ საქციელშე დო თეცალ მუდგარენ კითხჷ: „სავლე, სავლე, მუშენ ფთხოზუქ?“. თეშნერო, იესოქ თინა ქუგახვამილუ, ნამდა არასწორო იქციებუდ (საქ. 9:3—6). თიქ უბადო ოსურკოჩიშ, იზებელიშ, გურშენ ხოლო თქუ: „დრო მეფჩჷ დაშებულიშ ონარღებელო“ (გამოცხ. 2:20, 21).

12, 13. მუჭო არზენა უხუცესეფ შემცოდველს დროს ნარღებაშო? (ქოძირით სურათ).

¹² უხუცესეფ მეჸუნა იესოშ მაგალითის დო ხეთეშე ვა ფიქრენა, ნამდა შემცოდველ მუთუნიშ მანარღებელ ვა რე. მართალ რე, მიდგარენქ შილებე კომიტეტწკუმა პირველ შეხვალამას ქიმერთას ნარღებაშა, მარა მიდგარენს უმოს მეტ დროქ დესაჭირას, ათეშენ უხუცესეფქ შილებე თიწკუმა ხვალე ართ შეხვალამას ვეგეჯერდან. შილებე პირველ შეხვალამაშ უკულ ქრისტიანქ დეფიქრას თი ირფელშე, მუთ უხუცესეფქ ეჩუეს დო იეჰოვას თანდაბლურო ქოთხუას პატიება (ფსალმ. 32:5; 38:18). ათეშენ, უკულიან შეხვალამას შილებე თინა გვალო შხვა აზრის გერდას, ვინემ პირველ შეხვალამას გერდჷ.

¹³ პიროვნებას დაშებულიშ ნარღებას ქიმეხვარანინ, უხუცესეფ მიშულა თიშ მდგომარეობაშა დო გემუანო ოქცუნა. თინეფ ლოცულენა დო იმენდ უღუნა, ნამდა იეჰოვა ქიმეხვარებ შარასეჩილათირ ქრისტიანს, აზრიშა ქუმორთას დო მიკირთას ღორონთჸურე (2 ტიმ. 2:25, 26).

14. მიშ ჭყოლოფა რე, ნამდა პიროვნება ნარღენს დაშებულს დო მუშენ?

¹⁴ პიროვნება დაშებულს ქონარღენს-და, თენა მანგარ სახიოლო ამბე რე (ლუკ. 15:7, 10). მართალ რე, უხუცესეფქ ნამ შეულებუდესინ ირფელ გაკეთეს დუმაშებელიშ მახვარებელო, მარა სინამდვილეს მიშ ჭყოლოფათ მოხვად თექ, უხუცესეფიშიო? დეკვირით, მუ ჭარჷ პავლექ თინეფიშ გურშენ, მით სერიოზულო აშენა: „ეგება ღორონთიქ ქიმეჩას თინეფს უფლება, ინარღან დაშებულ“ (2 ტიმ. 2:25). თაშ ნამდა, იეჰოვა ოხვარ პიროვნებას აზროვნებაშ თირუას დო ვართ ხოლო ნამთინ ადამიან. პავლე თიშე ხოლო იჩიებ, მუ ჯგირობუა მოუღ შემცოდველშა დაშებულიშ ნარღებას: თინა სწორას იჭყანს აზროვნებას დო სატანაშ ხეშე ირსხენს დუდის.

15. მუჭო ოხვარუნა უხუცესეფ პიროვნებას თიშ უკულ ხოლო, მუთ ინარღენს დაშებულს?

¹⁵ მუჟამსით პიროვნება ნარღენს დაშებულს, კომიტეტ თიწკუმა სამწყემსო მონახულებეფს დაგეგმენს, ნამდა ქიმეხვარან თის რწმენაშ გამანგარებას, ცდუნებეფწკუმა ბრძოლას დო სწორას მოქციებას (ებრ. 12:12, 13). მუშო ოკო რაგად, კრებაშ უხუცესეფ მითინს ვა ურაგადუნა, მუ დაშუ შემცოდველქ. მარა მუშ რაგადიქ შილებე საჭიროქ იჸუას კრებაშა?

„ᲐᲠᲫᲐᲨ ᲬᲝᲮᲝᲚᲔ ᲒᲐᲣᲓᲦᲐᲜ“

16. მუს გულისხმენდჷ პავლე სიტყვეფს „არძაშ წოხოლე“? (1 ტიმ. 5:20).

¹⁶ წეკითხით 1 ტიმოთეშ 5:20. პავლექ ტიმოთეს, ნამუთ მუცალო უხუცეს რდჷ, უწუ, ნამდა ცოდაშ მაკეთებელს „არძაშ წოხოლე“ გაუდღანუკო. სიტყვეფ „არძაშ წოხოლე“ იშენდოიშენ მთელ კრებას ვა ნიშნენდჷ. პავლე გულისხმენდჷ თი მუსხირენ კოჩის, ნამდგას შილებე თეშით ხოლო უჩქუდუკო, მუ დაშუ შემცოდველქ. შილებე თინეფ დაშებაშ მოწმეეფ რდესკო ვარდა პირადო თიშე აფუდესკო გაგებულ თე ამბე. თაშ ნამდა, უხუცესეფ ხვალე თეცალ ადამიანეფს ქუწინა, ნამდა საქმეშა მიკოჯინელ რე დო შემცოდველქ შეგონება მიღჷ.

17. დაშებულიშ გურშენ კრებას ბრელს ქუჩქჷ ვარდა უკულ შილებე ქიგეგან-და, მუ განცხადებაქ ოკო იკეთინას კრებას დო მუშენ?

¹⁷ მინშა შილებე კრებას ბრელს უჩქუდას, მუ დაშუ პიროვნებაქ ვარდა დიდ რე შანს, უკულ ქიგეგანინ. თეცალ შემთხვევას სიტყვეფშა „არძაშ წოხოლე“ შილებე მართალო მთელ კრება მიშეშას. თაშ ნამდა, თე დროს ართ-ართ უხუცეს კრებაშ წოხოლე გაკეთენს განცხადებას, ნამდა ათე დო ათე ჯიმაქ ვარდა დაქ შეგონება მიღჷ. მუშენ ხვადუ თენა? თეშ პასუხის პავლე მარზენა: მუშენდა „თექ შხვეფშო ჭკუაშ დაგურაფალქ იჸუას“, ნამდა თინეფქ ხოლო ვეშეცოდან.

18. მუს ორთუნა უხუცესეფ, მუჟამსით საქმე ნათილ მოზარდეფს ოხუ? (ქოძირით სურათ).

¹⁸ მუ ხვადუ თიმწკუმა, მუჟამსით 18 წანაშახიან ნათილ მოზარდ სერიოზულო ცოდენს? უხუცესეფიშ საბჭო დაგეგმენს, ნამდა ჟირ უხუცესიქ ქეშეხვადას თე მოზარდის ქრისტიან მშობლეფწკუმა ართო.b უხუცესეფ ქიგეგენა, უკვე მუ ნაბიჯეფ აფუნა გინოდგუმილ მშობლეფს, ნამდა ქიმეხვარესკო თის დაშებულიშ ნარღებას. მოზარდის სწორ განწყობა ქოუღ დო მშობლეფ ხოლო ქაგრძელენა თიშ მოხვარას-და, ჟირ უხუცესიქ შილებე გინოჭყვიდას, ნამდა ვა რე საჭირო, უხუცესეფიშ კომიტეტიქ ქეშეხვადას თე მოზარდის დო თიშ მშობლეფს. უხუცესეფს არჩქილენა, ნამდა ღორონთის მშობლეფშა აფჷ მეჩამილ მუნეფიშ სქუაშა გურაფაშ დო თიშ გიშასწორებაშ პასუხიშმგებლობა (კან. 6:6, 7; იგავ. 6:20; 22:6; ეფეს. 6:2—4). თეშ უკულ, უხუცესეფ მინშა მშობლეფწკუმა გეგნამოწმენა, ქოღებულენს დო ვარ მოზარდ საჭირო მოხვარას. მარა მუ ოკო აკეთან უხუცესეფქ, მუჟამსით ნათილ მოზარდ ვა ნარღენს დაშებულს დო აგრძელენს გლახათ მოქციებას? თე შემთხვევას უხუცესეფიშ კომიტეტ ქეშეხვადუ თის ქრისტიან მშობლეფწკუმა ართო.

ᲘᲔᲰᲝᲕᲐᲡ ᲒᲣᲠᲨᲐ ᲛᲔᲣᲦ ᲨᲮᲕᲔᲤᲘᲨ ᲒᲐᲭᲘᲠᲔᲑᲐ ᲓᲝ ᲛᲝᲭᲧᲝᲚᲝᲤᲔ ᲠᲔ

19. მუჭო მეჸუნა უხუცესეფ იეჰოვაშ მაგალითის, მუჟამსით შეხვადუნა პიროვნებას, ნამდგაქ სერიოზულო შეცოდ?

¹⁹ უხუცესეფ, მით თეცალ შემთხვევეფს კომიტეტის მსახურენა, იეჰოვაშ წოხოლე გინაფლენა პასუხიშმგებლობას, ნამდა კრებაშ სიწმინდე დეცვან (1 კორ. 5:7). მარა, თეწკუმა ართო, ოცადუნა, მუთ შეულებუნან ირფელ გაკეთან, ნამდა დუმაშებელ ნარღებაშა ქიმიჸუნან. თექ ქეშიალებუანინ, თინეფქ იმენდ ოკო ვადინუან, ნამდა პიროვნება გეგშესწორებ. თეშნერო, თინეფ მიაჸუნუნა იეჰოვაშ მაგალითის, ნამდგას გურშა მეუღ შხვეფიშ გაჭირება დო მოჭყოლოფე რე (იაკ. 5:11). ზუსტას თეცალ ჸოროფა უღუდ მოციქულ იოანეს ხოლო და დო ჯიმალეფიშ მიმართ. თიქ ჭარჷ: „ჩქიმ საჸოროფო სქუალეფ, თე ირფელს თიშენ რჭარუნთ, ნამდა მითინქ ვეშეცოდათ, მარა ნამდგაინ ქეშეცოდენთ-და, პჸუნა თინა, მით მიმეხვარებუნა მუმაწკუმა — მართალ იესო ქრისტე“ (1 იოან. 2:1).

20. მუს გუვარჩიენთ თე სტატიეფიშ სერიაშ ბოლო სტატიას?

²⁰ სანარღოთ, მინშა ქრისტიან ვა ნარღენს დაშებულს. ათეშენ, თინა კრებას ვედიტებე. მუჭო მეურენა უხუცესეფ თეცალ სერიოზულ შემთხვევეფს? თე საკითხის თე სტატიეფიშ სერიაშ ბოლო სტატიას გუვარჩიენთ.