სექტანტეფ რენანო იეჰოვაშ მოწმეეფ?
ვარ. იეჰოვაშ ორგანიზაცია სექტა ვა რე. ჩქი ქრისტიანეფ ვორეთ დო ირფელს ვორთუთ, ნამდა მივაჸუნათ იესო ქრისტეშ მაგალითის დო იფცხოვრათ თიშ გურაფეფიშ თანახმათ.
მუ რე სექტა?
სიტყვა „სექტა“ შხვადოშხვა კონტექსტის შხვადოშხვა მნიშვნელობათ გიმირინუაფ. მორთ გუვარჩუათ, ნამ ჟირ გავრცელებურ კონტექსტის გიმირინუანა თე სიტყვას დო ქიგებგათ, მუშენ ვა რე სწორ იეჰოვაშ მოწმეეფს სექტანტეფ დუძახათ.
ნამთინეშ აზრით სექტა რე ახალ ჩამოყალიბებურ რელიგია, ნამუთ ტრადიციულ ვა რე. იეჰოვაშ მოწმეეფს ვამუგონებნა ახალ რელიგია. პირველ საუკუნეს მახორუ ქრისტიანეფცალო ჩქი ხოლო თაყვანს ფცენთ ღორონთის დო მეპჸუნთ თინეფიშ მაგალითის თით, ნამდა ფხემძღვანელენთ თი გურაფეფით, ნამდგაქ ღორონთიშ შთაგონებათ ბიბლიას ინიჭარ (2 ტიმოთე 3:16, 17). ჩქი ბჯერა, ნამდა წმინდა წერილეფ ოკო რდას თიშ განმსაზღვრელ, მუ რე სწორ დო მუ არასწორ.
ნამთინეშ აზრით სექტა ოშქურანჯ რელიგიურ მიმდინარეობა რე, ნამდგას ადამიან ხემძღვანელენს. იეჰოვაშ მოწმეეფიშ ლიდერ ადამიან ვა რე. ჩქი მეპჸუნთ თი მითითებას, ნამუთ იესოქ მუშ მიმაჸუნალეფს მეჩჷ: „ართ რჸუნა წინამძღოლ — ქრისტე“ (მათე 23:10).
იეჰოვაშ მოწმეეფ ვა რენა საშიშ სექტაშ წევრეფ. თე ორგანიზაცია ზრუნენს, მუჭოთ მუნეფიშ ხალხშო თეშ, საზოგადოებაშო ხოლო. მაგალთო, ჩქინ მსახურებათ მივეხვარით ხალხის, დეთხინუესკო გლახა ჩვევეფ, მუნერით რე ნარკოტიკეფიშ დო ოშუმალიშ გლახათ გიმორნაფა. თეს გეძინელ, დაარსეს ჭარუა დო კითხირიშ კურსეფ, ნამდგაშ ჭყოლოფუათ ანთასობით ხალხიქ დიგურუ ჭარუა დო კითხირ. თეწკუმა ართო, ვოხვარუთ სტიქიურ უბედრობეფიშ შედეგო დაზარალებურეფს. ჩქი ირნერო ვოცადუთ, ჯგირ გუკეთათ შხვეფს, მუდგაშ კეთება ელუჩ იესოქ მუშ მიმაჸუნალეფს (მათე 5:13—16).