ღორონთიშ მოსაწონ თაყვანიშცემა

1. მუშენ იჸი ჩქინო ჯგირ, ღორონთის სწორას ქოფცენთ თაყვანს-და?

იეჰოვა ღორონთი ზრუნენს ჩქინო დო თინა ჸოროფათ გიმოწურუანა ირ შარა დო კარს. ღორონთის სწორას ქოფცით თაყვან-და, უზომეთ ბედნერეფ იპჸით დო ბრელ პრობლემას ევუჩილითუანთ დუდის. თეშ გარდა, იეჰოვა ხვამას ვემმარკენა დო ირო ქელამდირთუნა (ესაია 48:17). ამდღა ოშობით რელიგია არსებენს. არძას მუშობურო წანს ღორონთი დო მიორჩქ, ნამდა ჭეშმარიტებას ოგურუანს თიშ გურშენ. მარა თინეფიშ გურაფეფი, მი რე ღორონთი დო მუს მელუ თინა ჩქინდე, შურო ვა რე ართიანწკუმა სარხოს.

2. მუჭო გებგათ, მუნერ თაყვანიშცემას იწონუანს ღორონთი დო ნამ მაგალით მიმეხვარებნა თეშ გაგებას?

² მუჭო ოკო მეხვადე, მუნერ თაყვანიშცემა მოწონს იეჰოვას? აუცილებერ ვა რე, დიგურუე დო ართიანს ქეშუდარე არძა რელიგია, მუთ ქოარსებენსინ. დასაბაღ რე ქიგებგათ, მუს ოგურუანს ბიბლია სინამდვილეს სწორ რელიგიაშ გურშენ. ქიმიპჸონათ მაგალითი: ბრელ ქიანას ფარშივ ფარაშ პრობლემა არსებენს. მუჭო მიქციებუდ თეცალ ფარაშ გიშაჩინება სქან საქმე ქოჸოფედკონ? დიჭყანდიო არძა ფარშივ კუპიურაშ გურაფას? მუშო ოკო რაგად, ვარ. უმოს ჭკვერულ იჸიდ, დიო ნამდვილ ფარაშ გიშაჩინებას ქიდიგურუანდ-და. მუჟამს გიჩქ, მუნერ რე ნამდვილ ფარა, ვა რე ძნელ ფარშივ ფარაშ გიშაჩინება. თეშნერო, მუჟამს ქიდიბგურუანთ სწორ რელიგიაშ გიშაჩინებასინ, ვა გამჭირდუნა თიშ მეხვამილაფა, ნამ რელიგიეფ ვა რე სწორი.

3. მუჭოთ იესოქ თქუ, მუ ოკო ვაკეთათ, ქუმოკონა ღორონთიქ ჩქინ თაყვანიშმცემლობა მიწონუას-და?

³ მნიშვნელოვან რე იეჰოვას თაყვან მუს ოკონ თეშ ფცათ. ბრელს მიორჩქ, ნამდა არძა რელიგია მოწონს ღორონთის. მარა ბიბლია თეს ვა მოგურუანა. შილებე კოჩ მუშ დუდის ქრისტიანო თვალუნდას, მარა ხვალე თენა ვა ბაღუ საქმეს. იესოქ თქუ: «მით მირაგად: „უფალი, უფალი“, არძას ვემნართე ზეციერ სამეფოშა, ხვალე თინეფ მინულა, მით ასრულენს ჩქიმ ზეციერ მუმაშ ნებას“». ქუმოკონა ღორონთიქ ქუმომწონუან-და, ოკო დიბგურუათ დო შევასრულათ ირფელ, მუდგას თინა ითხინს ჩქინდე. იესოქ „უკანონობაშ მაკეთებელეფ“ დუძახ თინეფს, მიდგა ვასრულენს ღორონთიშ ნებას (მათე 7:21—23). ფარშივ ფარაშნერო, ცრუ რელიგია ხოლო მუთუნშა ვა ღირუ. ხოლო უფრაშ თინა რე, ნამდა თეცალ რელიგია მადინაფ შარას გიორინუანს ხალხის.

4. მუ თქუ იესოქ ფართო დო ჭიფე შარეფიშ გურშენ დო სოიშა მეჸუნს თე შარეფს ხალხი?

⁴ იეჰოვა არძას არზენს მარადიულ სიცოცხლეშ საშვალებას. მარა დედამიწას მარადიულო ქიფცხოვრათინ თიშენ, ღორონთის საჭირო რენ თეშ ოკო ფცათ თაყვან დო ამდღარშე ოკო მივაჸუნათ თიშ ნორმეფს. მარა ბრელს შურო ვაინტერეს თენა. ათეშენ თქუ იესოქ: „მინორთით ჭიფე ჭიშკარით, მუშენდა განიერ დო ფართო რე შარა, ნამუსით ღურაშა მეჸუნს დო ანაყუ გილურს თით; ჭიფე რე ჭიშკარ დო ჭიფე რე შარა, ნამუსით სიცოცხლეშა მეჸუნს, დო ჭიჭე მითინ მიოგორუანს თის“ (მათე 7:13, 14). სწორ რელიგიას მარადიულ სიცოცხლეშა მეპჸუნთ, სწორ ვა რენ ფერს — ღურაშა. იეჰოვას ვაკო ხალხიშ ღურა, ათეშენ თინა ირ კოჩის არზენს მუშ გაჩინებაფაშ საშვალებას (2 პეტრე 3:9). მუჭოთ ვორწყეთინ, მუნერო ფცენთ ღორონთის თაყვანსინ თინა, ღურა დო თელაშ საკითხ რე.

მუჭო გებგათ, ნამ რელიგია რე სწორი?

5. მუჭო შემლებნა გიშეფჩინათ სწორ რელიგიაშ მიმაჸუნალეფი?

⁵ მუჭო ოკო ბგორათ სიცოცხლეშა მიურსინ თი შარა? იესოქ თქუ, ნამდა სწორ რელიგიაშ გიშაჩინება შილებედკონ იჸიდ თე რელიგიაშ მიმაჸუნალეფიშ საქმეეფით. „თინეფს მუნეფიშ ნაყოფით იჩინენთ, — თქუ იესოქ. — ჯგირ ჯას ნაყოფ ხოლო ჯგირ მუკმუღუ“ (მათე 7:16, 17). შხვა სიტყვეფით ქოფთქუათინ, სწორ რელიგიაშ მიმაჸუნალეფიშ გიშაჩინება შილებე, მუდგა თინეფს წანა დო მუჭო იქციებუნან თით. მართალ რე, თინეფ ვა რენა სრულყოფილეფ დო ჩირთუნა, მარა მუჭო ჯგუფინ, ღორონთიშ ნებაშ შესრულებას ოცადნა. მორთ ქობძირათ, ამშვი ნიშანი, ნამუთ მიმეხვარებუნა სწორ რელიგიაშ მიმაჸუნალეფიშ გიშაჩინებას.

6, 7. მუჭო უჯინენა ღორონთიშ მსახურეფ ბიბლიას დო მუ მაგალით დომტუეს იესოქ?

⁶ ღორონთიშ მსახურეფიშ გურაფეფ ბიბლიაშა რე გერსხილი. ბიბლიას ინოჭარ: „მთელ წმინდა წერილ ღორონთშე რე შთაგონებულ დო მარგებელ რე ოგურაფალო, გიმასაარგამებელო, გიშასწორებელო დო სიმართლეს ორდალო, მუშენდა ღორონთიშ კოჩ ირფელს რკვიებულ დო ირნერო მზათ რდას ირ ჯგირ საქმეშო“ (2 ტიმოთე 3:16, 17). მოციქულ პავლექ თანაქრისტიანეფს მეჭარ: „მუჟამს თქვანდა მიოჭირინუ ღორონთიშ სიტყვაქ, ნამუთ ჩქინდე მირჩქილეთინ, თინა კოჩიშ სიტყვაცალო ვემეიღებნა, მუჭოთ სინამდვილეს რენ თეშ — ღორონთიშ სიტყვაცალო მიღით“ (1 თესალონიკელები 2:13). თაშ ნამდა, სწორ რელიგიაშ მიმაჸუნალეფიშ რწმენა დო საქციელ ხალხიშ ტრადიციეფშა დო აზრიშა ვარინ, თინა ღორონთიშ სიტყვაშა რე გერსხილი.

⁷ თე მხარეთ იესო ქრისტექ მაგალით დომტუეს. თინა ირფელს ღორონთიშ სიტყვაშე ოგურუანდ. ლოცვას თიქ ზეციერ მუმას უწუ: „სქან სიტყვა ჭეშმარიტება რე“ (იოანე 17:17). იესოს ჯერდ, ნამდა ღორონთიშ სიტყვა ჭეშმარიტება რდუ დო ირფელს, მუდგას ოგურუანდუნ, წმინდა წერილეფს ოთანხმუდუ. თინა ხშირას იჩიებუდ: „ინოჭარილ რე“ (მათე 4:4, 7, 10). თეშ უკულ წმინდა წერილეფშე მოჸუნდ ციტატეფი. თეგვარო, ამდღა ღორონთიშ მსახურეფი მუნეფიშ აზრეფს ვეგნოჩანა ხალხის. თინეფს წანა, ნამდა ბიბლია ღორონთიშ სიტყვა რე დო ირფელ, მუდგას ოგურუანა, ბიბლიაშა რე გერსხილი.

8. მუ მიშურს იეჰოვაშ თაყვანიშცემაშა?

⁸ ჭეშმარიტ რელიგიაშ მიმაჸუნალეფ ხვალე იეჰოვას ცენა თაყვანს დო ხალხის თიშ სახელს უცხადენა. იესოქ თქუ: „იეჰოვას, სქან ღორონთის ცი თაყვან დო ხვალე თის შეუსრულ წმინდა მსახურება“ (მათე 4:10). ათეშგურშენ ღორონთიშ მსახურეფ იეჰოვაშ მეტ მითინს დო მუთუნს ვა ცენა თაყვანს. ღორონთიშ თაყვანიშცემაშა თინა ხოლო მიშურს, ნამდა ხალხის დაგურუან, მუ ჯოხო ღორონთის დო მუნერ თვისებეფ უღუ თის. ფსალმუნიშ 83:18 ინოჭარ: „სი, ნამუშ სახელ რე იეჰოვა, ხვალე სი რექ უზენაეს მთელ დედამიწას!“. იესო ხალხის ოხვარუდ, მეტ ქუგუგებდესკო ღორონთიშ გურშენ. ართშა თიქ ლოცვას თქუ: „სქან სახელ გეგმუცხად კათას, მით სი მუჩ თე ქიანაშე“ (იოანე 17:6). ათეშნერო, ჭეშმარიტ თაყვანიშმცემელეფ ხალხის ღორონთიშ სახელს უცხადენა დო თიშ განზრახვეფ დო თვისებეფშენ ოგურუანა.

9, 10. მუნერო ოძირანა ქრისტიანეფ ართიანიშ ჸოროფას?

⁹ ღორონთიშ მსახურეფს სუფთა გურით უჸორა ართიანი. იესოქ თქუ: „ჩქიმ მოწაფეეფ რეთინ თის, თით გეგენა, ნამდა ართიანიშ ჸოროფა გაღვენუნა“ (იოანე 13:35). პირველ ქრისტიანეფს ართიანიშ თეცალ ჸოროფა უღდეს. ჸოროფა, ნამუსით ღორონთი მოგურუანა, აკმარღვანს რასობრივ, სოციალურ დო ეთნიკურ ბარიერს დო აკმოშაყარანს ხალხის ჭეშმარიტ საჯიმალოს (წეკითხი კოლოსელეფიშ 3:14). ცრუ რელიგიაშ მიმაჸუნალეფს ვა უჩქუნა, მუ რე თეცალ ართობა. სოვრეშე მიჩქუნა თენა? თინეფ ართიანს ჸვილუნა, შხვადოშხვა რჯულშე დო ეთნიკურ ჯგუფშე რენა თიშენ. ჭეშმარიტ ქრისტიანეფ ვეჭოფნა იარაღის თანაქრისტიანეფიშ დო ვართ შხვეფიშ ოჸვილარო. ბიბლია იჩიებ: „თეთ გიშეჩინებე ღორონთიშ სქუალეფ დო ეშმაკიშ სქუალეფი: მით სიმართლეთ ვექციებ დო მიდგას ვა უჸორს მუშ ჯიმა, ღორონთშე ვა რე . . . ოკო მიჸორდან ართიან, ოღონს კაენიშნერო ვარ, ნამუთ უბადოშე რდუ დო უდუნდებუო დოჸვილ მუშ ჯიმა“ (1 იოანე 3:10—12; 4:20, 21).

¹⁰ მუშო ოკო რაგად, სუფთა გურით ჸოროფა ხვალე თის ვა ნიშნენს, ნამდა შხვა ვა პჸილათ. ჭეშმარიტ ქრისტიანეფს, ართიანს ქიმეხვარანინ თიშენ, ვაზოგნა მუნეფიშ დრო დო ძალა. თინეფ ირფელს ორთნა ართიან გამანგარანინ თიშენ (ებრაელები 10:24, 25). ჭეშმარიტ ქრისტიანეფ გაჭირებაშ დროს ართიანს ელურენა დო შხვეფწკუმა პატიოსანო იქციებუნა. თინეფ მუნეფიშ ცხოვრებას ირინუანა ბიბლიაშ ზუკოლს: „არძას ჯგირ გუკეთათ“ (გალატელები 6:10).

11. მუშენ ოკო ბწანდან, ნამდა რსხება იესოშე მოურს?

¹¹ ჭეშმარიტ ქრისტიანეფს წანა, ნამდა რსხება იესო ქრისტეშე მოურს. ბიბლია იჩიებ: „შხვა მითინწკუმა ვა რე რსხება, მუშენდა ვა არსებენს ცაშ თუდო ხალხშა მეჩამილ შხვა სახელი, ნამუთ გინმოსქილიდუანა“ (საქმეები 4:12). მუჭოთ მა-5 დუდშე ბძირითინ, იესოქ მუშ სიცოცხლე დათმუ ღორონთიშ დამჯერ ხალხიშ გიშაჸიდირალო (მათე 20:28). თეშ გარდა, ღორონთიქ იესო ზეციერ სამეფოშ მეფეთ დარინუ. თე სამეფო მთელ დედამიწას იმართველენს. ღორონთი ითხინს, ნამდა დუჯერათ იესოს დო მივაჸუნათ თიშ გურაფეფს. თაშ ქიმიფქციებუთ-და, მარადიულო იფცხოვრენთ. ბიბლიას ინოჭარ: „მიდგას ღორონთიშ სქუა წანსინ, მარადიულ სიცოცხლე უღუ, მარა მიდგა ღორონთიშ სქუას ვა უჯერსინ, ვა ძირუნს სიცოცხლეს“ (იოანე 3:36).

12. მუს ნიშნენს, ნამდა ჭეშმარიტ ქრისტიანეფ ვა რენა თე ქიანაშ ნაწილი?

¹² ღორონთიშ ჭეშმარიტ თაყვანიშმცემელეფი ვა რენა თე ქიანაშ ნაწილი. რომაელ მართველს, პილატეს, იესოქ უწუ: „ჩქიმ სამეფო თე ქიანაშ ნაწილ ვა რე“ (იოანე 18:36). ნამდგა ქიანას ვა ცხოვრენდანინ, ქრისტეშ ჭეშმარიტ მიმაჸუნალეფ ომორჩილნა ღორონთიშ ზეციერ სამეფოს, იცვენა ნეიტრალიტეტის დო ვემშმულა პოლიტიკაშა. თინეფს ვემშუძნა წილ პოლიტიკურ კონფლიქტეფშა. იეჰოვაშ თაყვანიშმცემელეფ ვაცილნა თინეფს, მიდგას ოკო ნამდგაინ პარტიაშა მიშულა, პოლიტიკურ თანამდებობაშ მეღება ვარდა არჩევნეფს მონაწილება. მართალ რე, იეჰოვაშ მოწმეეფ ნეიტრალურ რენა პოლიტიკურ საქმეეფს, მარა თინეფ კანონეფს იცვენა. მუშენ? თიშენ ნამდა, ღორონთიშ სიტყვა ურაგად თინეფს, ქუდუჯერან „უმაღალაშ ხელისუფლებას“ (რომაელები 13:1). მუჟამს მთავრობა ითხინს თიცალ მუდგარენს, მუთ ღორონთიშ ნებას ოწინააღმდეგუნ, ჭეშმარიტ ქრისტიანეფ მოციქულეფიშ მაგალითის მეჸუნა. მოციქულეფქ თქუეს: „ჩქი კათაშ უმოსო ღორონთის ოკო დუჯერათ, მუჭოთ მართველს“ (საქმეები 5:29; მარკოზი 12:17).

13. მუს ელუნა იესოშ ჭეშმარიტ მიმაჸუნალეფ ღორონთიშ სამეფოშე დო თენა მუს ოკეთებაფუანს თინეფს?

¹³ იესოშ ჭეშმარიტ მიმაჸუნალეფ ქადაგენა, ნამდა კაცობრიობაშ პრობლემეფს ხვალე ღორონთიშ სამეფო გინოჭკირუნს. იესოქ წინასწარ თქუ: „თე სახიოლო ამბეს სამეფოშ გურშენ იქადაგენა მთელ მსოფლიოს არძა ხალხიშ დასამოწმებელო დო თიმწკუმა მოურს აღსასრული“ (მათე 24:14). იესო ქრისტეშ ჭეშმარიტ მიმაჸუნალეფი ვა ურაგადნა ხალხის, ნამდა მიწიერ მართველეფი მაგვარენა პრობლემეფს. თინეფ იჩიებუნა, ნამდა პრობლემეფიშ მოგვარება ხვალე ღორონთიშ ზეციერ სამეფოს შეულებ (ფსალმუნი 146:3). იესოქ დუმოგურუეს, იბლოცათ თე სრულყოფილ მთავრობაშ გურშენ: „მორთას სქან სამეფოქ დო რდას სქან ნება, მუჭოთ ცასინ თეშ, დედამიწას ხოლო“ (მათე 6:10). ღორონთიშ სიტყვას წინასწარ რდუ რაგადებულ, ნამდა თე ზეციერ სამეფო „მოსპუნს არძა თე [ამდღარ] სამეფოს, დო მუ მარადიულო გერდას იჸი“ (დანიელი 2:44; გამოცხადება 16:14; 19:19—21).

14. სქან აზრით, ნამ რელიგიურ ჯგუფ აკმაყოფილენს ჭეშმარიტ თაყვანიშმცემლობაშ მოთხოვნეფს?

¹⁴ დეფიქრი ჟიშე მოჩამილ აზრეფშენ: ნამ რელიგიაშე შილებე ირაგადუას, ნამდა თიშ არძა გურაფეფ ბიბლიაშა რე გერსხილ? ნამ რელიგიაშ მიმაჸუნალეფ აცხადენა ღორონთიშ სახელს? ნამ რელიგიაშე იძირე, ნამდა თიშ მიმაჸუნალეფს ართიან სუფთა გურით უჸორა დო ვა რენა თე ქიანაშ ნაწილი? მი გიმირჩქინანს იესოშა რწმენას დო მი ქადაგენს, კაცობრიობაშ პრობლემეფს ხვალე ღორონთიშ სამეფო გიშანწყუნსინ თის? მსოფლიოს არსებენს თი რელიგიეფშე, ნამ აკმაყოფილენს არძა თე მოთხოვნას? ფაქტეფ ამტკიცენს, ნამდა ჭეშმარიტ თაყვანიშმცემელეფ იეჰოვაშ მოწმეეფ რენა (წეკითხი ესაიაშ 43:10—12).

მუჭო მიქციებუქ?

15. მუს ითხინს ხოლო ღორონთი, თიშ არსებობაშ დაჯერებაშ გარდა?

¹⁵ ღორონთიშ არსებობა ბწანდანინ, თენა ხვალე ვა რე დასაბაღუ. ბიბლიას ინოჭარ, ნამდა დემონეფს ხოლო წანა ღორონთიშ არსებობა დო შიშით კანკალანა (იაკობი 2:19). მარა ფაქტ რე, ნამდა თინეფ ვასრულენა ღორონთიშ ნებას დო ვა უღუნა თიშ მოწონა. ქუმოკონა ჩქინ თაყვანიშცემა ღორონთიქ ქიმიწონუას-და, თიშ არსებობათ ოკო ბწანდან დო თიშ ნება ხოლო ოკო ვასრულათ. ჩქი ქიდიპტუათ ოკო ცრუ რელიგია დო ქუვაკათათ ღორონთიშ ჭეშმარიტ თაყვანიშმცემელეფს.

16. მუ ოკო ვაკეთათ ცრუ რელიგიას ქუვოკათუთ-და?

¹⁶ მოციქულ პავლექ თქუ, ნამდა მუთუნნერ მონაწილებას ოკო ვა ბღებულენდათ ცრუ თაყვანიშმცემლობას. თიქ ჭარ: «„გეგშართით თინეფშე დო გეგმერთით, — იჩიებ იეჰოვა, — უწუნდურს ვემკანჭათ“, „დო მა მეიღენთ თქვა“» (2 კორინთელები 6:17; ესაია 52:11). ათეშგურშენ ჭეშმარიტ ქრისტიანეფ ვემკანჭუნა მუთუნს, მუთ ცრუ თაყვანიშცემას ოხუ.

17, 18. მუ რე „დიდ ბაბილონ“ დო მუშენ რე თევრეშე გიშულა აუცილებერ, მუთ შილებე მალას?

¹⁷ ბიბლიაშე იძირე, ნამდა არძა ცრუ რელიგია მოურს „დიდ ბაბილონშე“a (გამოცხადება 17:5). თე სახელ ჯვეშ ქალაქ ბაბილონს გუმოშინანა. ნოეშ დროს დიდწყარალაშ უკულ თე ქალაქის გორჩქინდ ცრუ თაყვანიშმცემლობაქ. ბრელ გურაფა დო ტრადიცია, ნამუთ ამდღა ირ დიხას რე მოდვალირინ, ჯვეშ ბაბილონშე მოურს. მაგალთო, ბაბილონელეფ თაყვანს ცენდეს ღორონთიშ ტრიადეფს (სუმსახოვან ღორონთეფს). სამება ამდღა ბრელ რელიგიაშ მთავარ გურაფა რე. მარა ბიბლია გასაგებო იჩიებ, ნამდა არსებენს ხვალე ართ ჭეშმარიტ ღორონთი იეჰოვა დო იესო ქრისტე თიშ სქუა რე (იოანე 17:3). ბაბილონელეფს თინა ხოლო წანდეს, ნამდა კოჩის უღურალ შურ უღუდ, ნამუთ სხეულიშ ღურაშ უკულ აგრძელენდ ცხოვრებას დო შილებედ თიქ ოწამებელ ადგილს ქუმოხვადკონ. ამდღა ბრელ რელიგია ოგურუანს, ნამდა კოჩის უღურალ შურ უღუ დო თიქ შილებე ჯოჯოხეთიშ დაჩხირს დეტანჯას.

¹⁸ ჯვეშ ბაბილონს ცრუ თაყვანიშცემაქ მთელ დედამიწას მადუნ თიშგურშენ, ამდღარ „დიდ ბაბილონ“ ცრუ რელიგიაშ მსოფლიო იმპერია რე. ღორონთიქ წინასწარ თქუ, ნამდა თე რელიგიურ იმპერია მითინ ველუნ თეშ მისპუ. ქარწყექო, მუშენ უღუ დიდ მნიშვნელობა, ირნერო გეგშართე „დიდ ბაბილონშე“? იეჰოვას ღორონთის ოკო, სოიშა დიო ხოლო დრო რენ, მუთ შილებე მალას დეთხუე ცრუ რელიგიას (წეკითხი გამოცხადებაშ 18:4, 8).

19. მუს მოიღანს იეჰოვაშ მსახურება?

¹⁹ ცრუ რელიგიაშ დოტება გეგნოჭყვიდ-და, გიჩქუდას, ნამდა ნამთინექ შილებე სქანწკუმა ურთიერთობა ვეკორინუას. მარა იეჰოვა ღორონთიშ მსახურება დო თიშ ხალხწკუმა ურთიერთობა, მუთ ვოდინეთინ თის, ოშ წილო დომრთინუანა. იესოშ მოწაფეეფცალო სი ხოლო ბრელ სულიერ და დო ჯიმა გაჸვენუ; თინეფქ იესოს ქეკაჸუნესკონ თიშენ, ბრელ მუთუნშენ თქვის ვარია. სი დიდ მსოფლიო ოჯახიშ წევრო გინირთუქ, სოდეთ მილიონობით ჭეშმარიტ ქრისტიან მთელ გურით მეიღენს. თეშ გარდა, მომავალს მარადიულ ცხოვრებაშ დიდებულ იმენდ მიგაჩამუ (წეკითხი მარკოზიშ 10:28—30). დრო-ხანიშ უკულ, შილებე თინეფქ ხოლო, მით რწმენაშ გურშენ დუდის გარიდანსინ, დეინტერესან ბიბლიურ გურაფეფით დო გინირთან იეჰოვაშ თაყვანიშმცემელეფო.

20. მუნერ მომავალ ელუ ჭეშმარიტ რელიგიაშ მიმაჸუნალეფს?

²⁰ ბიბლია მოგურუანა, ნამდა მალას ღორონთი თე უბადო ქიანას ახალ სამართლიან ქიანათ დოთირანს დო თის ღორონთიშ სამეფო ხენჯღვერანდას იჸი (2 პეტრე 3:9, 13). ახალ ქიანას დასურო მერეთ ჯგირ ცხოვრება იჸუაფ! თექ ხვალე ართ რელიგია — ჭეშმარიტ თაყვანიშმცემლობა იარსებენს. ჭკვერულ ვეჸინო, ამდღარშე გეგნობდგათ ნაბიჯ დო ქუვაკათათ ჭეშმარიტ თაყვანიშმცემელეფსინ?