მოხვარა თოლს ვარწყენან თინეფშო

მთელ მსოფლიოს სოდგარენ 43 მილიონ კოჩ თოლს ვარწყე დო 295 მილიონს თოლს მანგარო ორკჷ.a სანარღოთ, ბრელს, მიდგას თე პრობლემა უღჷ, გლახათ დო უსამართლოთ ხოლო ოქცუნა.

მუ დამოკიდებულება უღჷ ღორონთ თოლს ვარწყენან თინეფიშ მიმართ? მუს იჩიებ ბიბლია თინეფიშ გურშენ? მუჭო ოხვარუნა თეცალ კათას იეჰოვაშ მოწმეეფ?

მუ დამოკიდებულება უღჷ ღორონთ თოლს ვარწყენან თინეფიშ მიმართ?

ბიბლიაშე ბგებულენთ, ნამდა იეჰოვასb მანგარო აწუხენს თოლს ვარწყენან თინეფიშ მდგომარეობა. თის ოკო, თე კათას სამართლიანო ოქცუდან დო თეწკუმა ართო, მიღან თი რჩქინა, ნამდგას იეჰოვა ირზენს. თეს გეძინელ, ღორონთ თინეფს მომავალიშ სარკო იმენდის არზენს.

ბიბლიურ მუხლ: „ჭყელ ჸოფედას თინა, მით შარას ეიოჩილითუანს თოლს ვარწყენ ფერს“ (კანონ 27:18).

ბიბლიურ მუხლ: „ღორონთ ვეგმირჩქინანს გიშაკერძაფას“ (საქმეეფ 10:34).

ბიბლიურ მუხლ: იესოქ „თოლს ვარწყედუნ თინეფს, თოლსინთე ქუმუკათუ“ (ლუკა 7:21).

ბიბლიურ მუხლ: „თოლს ვარწყენან თინეფს თოლსინთე ქუმაკათუნა“ (ესაია 35:5).

მნიშვნელობა: იეჰოვა მოპირუნა, ნამდა მალას, მუჟამსით დედამიწას ღორონთიშ სამეფოშ მმართველობა ქიდიჭყაფუ, თოლს ვარწყენან თინეფს თოლსინთე ქუმაკათუნა.

მუჭო ოხვარუნა თეცალ კათას იეჰოვაშ მოწმეეფ?

მთელ მსოფლიოს იეჰოვაშ მოწმეეფ თოლს ვარწყენან თინეფს თი იმენდიშ გურშენ უცხადენთ, ნამდგას ღორონთ მარზენა. მუჭო ვორთუთ თეს?

• ჩქი გიშვაშქვანთ ბიბლიას, ბიბლიაშ ოგურაფალ პუბლიკაციეფს დო ვიდეოეფს თიცალ ფორმატეფით, ნამდგაშ გიმორნაფა შეულებუნა თოლს ვარწყენა დო თოლს მანგარო ორკუნან თინეფს. თე ფორმატეფ შქას რე ბრაილ, დიდ შრიფტ დო აუდიო.

• ჩქი რეგულარულო ვატარენთ ქრისტიანულ შეხვალამეფს, ნამდგაშა დასწრება არძას, თინეფ შქას, თოლს ვარწყენან თინეფს ხოლო შეულებუნა.

• ჩქი არძას ფთავაზენთ, ართ-ართ იეჰოვაშ მოწმეწკუმა ქიდიგურუას ბიბლია.c

თე ირფელ უფასო რე, მუშენდა მეპჸუნთ იესოშ ნარაგადის: „უფასოთ მუგაჩეს დო თქვა ხოლო უფასოთ გეგნოჩით“ (მათე 10:8).

იეჰოვაშ მოწმეეფს გურშა მემღუნა თოლს ვარწყენან თინეფიშ მდგომარეობა. ჩქი ირნერო ქელუდირთუთ არძას, მიდგას ოკო, ღორონთის ჩქინწკუმა ართო ემსახურას. ქოძირით მუსხირენ იეჰოვაშ მოწმეშ მაგალით, მით თოლს ვარწყე.

ტალიტა ალნაშის, ნამუთ შვედეთის ცხოვრენს, დაბადებაშე თოლს მანგარო ორკჷ. ქიგეგით, მუჭო დაგურუეს მშობლეფქ ბიბლია დო მუჭო ელუდირთეს თის დო თიშ ოჯახის მეგობრეფქ.

სინტია პაბლო, ნამუთ ფილიპინეფს ცხოვრენს, ვართ ჸუჯის ირჩქილე დო ვართ თოლს ორწყე. ქიგეგით, მუჭო ოხვარუდეს თის თანამორწმუნეეფ ᲙᲝᲕᲘᲓ-19 პანდემიაშ დროს? წეკითხით სტატია „კრება მიკაჯინე ჸუჯის ვერჩქილე დო თოლს ვარწყენ ფერ დას პანდემიაშ დროს“ [ქორთ.].

ბიბლიაშ ოგურაფალ მუ საშვალებეფს გიშვაშქვანთ თეცალ კათაშო?

პუბლიკაციეფ ბრაილიშ შრიფტით. ჩქი მუსხირენ ნინაშა გიშვაშქვანთ ბიბლიაშ მუჭოთ სრულ, თეშ ნაწილობრივ თარგმანს ბრაილიშ შრიფტით (ქოძირით თე ნინეფიშ სია ჩარჩოს «ბიბლიაშ „ახალ ქიანაშ თარგმან“ ბრაილიშ შრიფტით»). თეს გეძინელ, ბრაილიშ შრიფტით ჩქინ ბრელ პუბლიკაციას ხოლო გიშვაშქვანთ, ნამუთ ბიბლიაშა რე გერსხილ. თინეფშო, მიდგას ოკო ბრაილიშ შრიფტით კითხირიშ დოგურაფა, მუვამზადით ბროშურა „ქიდიგურეთ ბრაილიშ შრიფტით კითხირ“. თე ბროშურა ოხვარ თოლს ვარწყენ ფერ პიროვნებას, თოლს ორწყენ ფერ ადამიანიშ მოხვარათ ქიდიგურუას ბრაილიშ შრიფტით კითხირ.

• შეილებუნა იეჰოვაშ მოწმეეფს პირადო ქოთხუათ პუბლიკაციეფ ბრაილიშ შრიფტით ვარდა მითხუათ, ჸუდეშა ქუმგაკითხუან.

• ვებსაიტშე jw.org გეგნოჭარით ფაილეფ სპეციალურ პორტატულ მოწყობილობაშო.d

• შეილებუნა იეჰოვაშ მოწმეეფს პირადო ქოთხუათ პუბლიკაციეფ დიდ შრიფტით ვარდა მითხუათ, ჸუდეშა ქუმგაკითხუან.

• ვებსაიტშე jw.org გეგნოჭარით დიდ შრიფტით გიშაშქუმალირ პუბლიკაციეფიშ ელექტრონულ ვერსიეფ.

• შეილებუნა აუდიოჩანაწერეფს გინოჭარუაშ უმშო ქურჩქილათ jw.org დო JW ბიბლიოთეკაშ აპლიკაციას, ვარდა ქოისხუნნან-და, გეგნოჭარათ.

• ვებსაიტ jw.org-შე გეგნოჭარით ფაილეფ, ნამუთ შეილებუნა გონწყათ თიცალ პროგრამეფით, მუნერეფით რე, ეკრანიშ წამკითხველ დო წიგნეფიშ ელექტრონულ ფლეიერ.e

• ვიდეოეფ აუდიოეჭარუათ.f იეჰოვაშ მოწმეეფ 100-შე უმოს ნინაშა გიშვაშქვანთ ვიდეოეფს აუდიოეჭარუათ. თე ვიდეოეფ ოხვარ ხალხის, ქიგეგან დო გეგმირინუან პრაქტიკულ ბიბლიურ რჩევეფ.

• დოგორით კრებაშ შეხვალამაშ უხოლაშ ადგილ.

• ქიგეგით ჩქინ ირწანიან კონგრესეფიშ გურშენ.

• ქიდესწრით იესოშ ღურაშ გოშინაშ ონჯუას, ნამუთ ჩქინო წანმოწანაშ არძაშ უმოს მნიშვნელოვან მოვლენა რე.

ხოსე ლუის აიალა, ნამუთ მექსიკას ცხოვრენს, დაბადებაშე ჸუჯის ვერჩქილე დო 29 წანერ რდუნჷ თეშ თოლსინთექ ხოლო მეუდინ. ქიგეგით, მუსხით მნიშვნელოვან რე ჩქინ შეხვალამეფ თიშ ცხოვრებას დო მუჭო მეხვარეს თის, გინირთუკო ბიბლიაშ ჯგირ მასწავლებერო.