თინეფქ ჸოროფა საქმეეფით ქოძირეს

ᲘᲝᲛᲐᲠᲐ დო თიშ ჯიმალეფ, მარსელო დო ივერ, გვატემალას ართ ჭიჭე სოფელს ცხოვრენა. დუდშე ბიბლიაშ გურაფა იომარაქ დიჭყჷ, უმოს გვიანო თის მუშ ჯიმალეფქ ხოლო გეიაჸუნეს. მარა პრობლემა რდჷ. იომარა დო თიშ ჯიმალეფ თოლს ვარწყედეს დო ვართ ბრაილიშ კითხირ უჩქუდეს. ათეშენ ბიბლიაშ მასწავლებერს ოკო წუკითხირუდკო თინეფშა ქოთ აბზაცეფ დო ქოთ თი ბიბლიურ მუხლეფ, ნამუთ აბზაცის რდჷ მოჩამილ.

ხოლო ართ სირთულე კრებაშ შეხვალამეფშა დასწრება რდჷ, მუშენდა თინეფს მუნეფიშით ვეშულებდეს ქიმერთესკო უხოლაშ დარბაზშა, ნამდგაშა 40 წუთიშ ოულარ შარა მეძუდ. მარა და დო ჯიმალეფ ოხვარდეს, არძა შეხვალამას ქიდესწრესკო. მუჟამსით თინეფს შქა მარაშ შეხვალამას დავალება ქიმეჩეს, თანაქრისტიანეფ ოხვარდეს ჯგირო ქიდემახსოვრესკო თინა, მუთ ორაგადე აჸიდეს.

2019 წანაშ მესის, თინეფიშ სოფელს კრებაშ შეხვალამეფიშ ჩატარება ქიდიჭყეს. თე დროს ართ წყვილქ, მით პიონერეფო მსახურენდეს, თე სოფელშა გეგნორთჷ. თინეფს ოკოდეს, სუმხოლოს მეხვარესკო ბრაილიშ კითხირ დო ჭარუაშ დოგურაფას, მარა დიო მუნეფს აჸიდეს დაგურაფალ. ათეშენ, თინეფქ მიდართეს ბიბლიოთეკაშა დო გეჭოფეს წიგნეფ, ნამდა უმოს ქიგეგესკო ბრაილიშ დო თიშ გურაფაშ მეთოდეფიშ გურშენ, მუშენდა უკულ იომარას დო მუშ ჯიმალეფს ბრაილიშ კითხირ დო ჭარუა ქუდაგურესკო.

მუსხირენ თუთაშა სუმხოლოქ ქიდიგურუ ბრაილ დო სულიერო ხოლო წიმი მიდართეს. ასე იომარა, მარსელო დო ივერ სრულ დროთ პიონერეფო მსახურენა. მარსელოქ მომსახურეთ დენიშნჷ. თინეფ აქტიურო ღებულენა მონაწილებას სულიერ საქმეეფს დო თინეფიშ ენთუზიაზმ შხვეფშა ხოლო ჯგირო მოქმედენს.

სუმხოლო მარდულეფ რენა თი ჸოროფათ ელარნაშე, ნამდგას კრებაშე ღებულენა. იომარა იჩიებ: „პირველ შეხვალამაშე მოჸუნაფილ, მოწმეეფ ამდღარშახ გიმირჩქინანა ჩქინ მიმართ ნამდვილ ქრისტიანულ ჸოროფას“. მარსელო გეუძინანს: „კრებას ბრელ ჯგირ მეგობარ პჸუნა დო ბგინაფლენთ, ნამდა ვორეთ მსოფლიო საჯიმალოშ ნაწილ, ნამუთ ჸოროფათ რე გაერთიანებულ“. იომარა დო მუშ ჯიმალეფ მიახიოლანა თი დროს, მუჟამსით იეჰოვა დედამიწას სამოთხეთ გინართინუანს (ფსალმ. 37:10, 11; ეს. 35:5).