2022 – ოწუხებელით ეფშა წანა – მუს იჩიებ ბიბლია?

2022 წანას ახალ ამბეეფს მინშა ომეფ, ეკონომიკურ პრობლემეფ დო ბუნებრივ კატასტროფეფიშ მეტის მუთუნს ვა გებგონენდით. ხვალე ბიბლიას შეულებ ემინწყან, მუშენ ხვადუდ თე მოვლენეფ.

მუშენ ხვადუდ თე მოვლენეფ 2022 წანას?

თე წანას მოხვალამირ მოვლენეფ ამტკიცენს, ნამდა ფცხოვრენთ დროს, ნამდგას ბიბლია მიშინუანს, მუჭოთ „ბოლო დღალეფს“ (2 ტიმოთე 3:1). თე პერიოდიქ 1914 წანაშე დიჭყჷ. ქიდეკვირით, მუჭო ისრულებ ამდღარ მოვლენეფით ბიბლიურ წინასწარმეტყველებეფ:

„ომეფ“ (მათე 24:6).

•  „2022 წანას ევროპას კინ საშინელ ომქ ქიდიჭყჷ“a

„ოჭკუმალიშ სინაკლებე“ (მათე 24:7).

•  „2022 შქირენაშ წანა რდჷ“b

„ეპიდემიეფ“ (ლუკა 21:11).

•  «პოლიომელიტიშ ინფექციურ ლახალაქ კინ დუმართეს, „მაიმუნიშ ყვავილიშ“ ვირუს ივრცელებ დო კოვიდ-19 კინ დიდ პრობლემათ სქიდუ. თე ირფელ ოძირანს, მუნერ ოშქურანჯ რე გინმიდვალურ ფერ ლახალეფ დო მუნერ დაუცველეფ ვორეთ ადამიანეფ»c

„ოშქურანჯ მოვლენეფ“ (ლუკა 21:11).

•  „ტემპერატურაშ მოძინა, გოლოფა, დაჩხირიშ გორჩქინა დო დიდწყარალა – 2022 წანას მოხვალამირ თე მოვლენეფ გვარიან ხანს ვა გაჭყორდუნა, მუშენდა თეცალ კლიმატურ კატასტროფეფიშ შედეგო ანთასობით კოჩიქ ღურჷ დო მილიონეფს ოცხოვრებელ ადგილეფს აჸუეს დატებელქ“d

„არეულობეფ“ (ლუკა 21:9).

•  „ეკონომიკურ პრობლემეფიშ, განსაკუთრებულო ინფლაციაშ გურშენ, 2022 წანას ხალხ ხოლო უმოსო გიშმეშ მთავრობეფიშ წინააღმდეგ“e

მუს ოკო ველდათ მომავალ წანაშე?

მითინს ვეშულებ თიშ რაგად, ზუსტას მუ მოხვადუ 2023 წანას. ართ მუდგარენ, მუთ გინოჭყვიდილო მარაგადენან თინა რე, ნამდა ღორონთიშ სამეფო, შხვანერო ქოფთქუათინ, ზეციერ მთავრობა, უჯგუშობაშა დოთირანს დედამიწას (დანიელი 2:44). თე მთავრობა მოსპუნს ადამიანეფიშ ტანჯებაშ მიზეზეფს დო დედამიწას ღორონთიშ ნებას დამყარენს (მათე 6:9, 10).

ელაიჩანთ, მიაჸუნათ იესოშ ნარაგადის დო „კურცხას რდათ“ თით, ნამდა ქიდეკვირათ ბიბლიურ წინასწარმეტყველებეფიშ შესრულებას (მარკოზი 13:37). მუჭო შეულებ ბიბლიას მიგეხვარან? უჯგუშ მომავალიშ მუ რეალურ იმენდის გარზენა თინა თქვა დო თქვან ოჯახის? თეშ გურშენ მეტ ინფორმაციაშ მიოღებელო, ქორთხინთ, ჩქი ქიდმეკავშირათ.