წიგნ „ესაია“ გურშა ემქექუანა

1, 2. მუჭო მოხვარუნა იეჰოვა, მუჟამსით დუდის გლახათ ბგინაფლენთ?

ᲬᲔᲠᲛᲘᲓᲒᲘᲜᲘᲗ ბაღანა, ნამუთ ჩხე ჩილამურით ინგარს. თინა შილებე თიშენ ინგარს, ნამდა მუშ ოჯახ შხვადო გინმურს ოცხოვრებშა დო მეგობრეფ აფჷ დატებელ; ვარდა თიშენ, ნამდა ქუდაშუ დო თენა მანგარო აწუხენს. მუს ქიმინუნს თე დროს მოჸოროფე დიდა? თინა გურშა ქიხუტოლუანს მუშ ბაღანას, ქურჩქილე, მუ აწუხენს დო დარწმუნენს, ნამდა მანგარო უჸორს.

² ბიბლიას იეჰოვა მუშ დუდის მოჸოროფე დიდას უგურუანს, ნამუთ გურშა ეუქექუანს სქუას. თინა იჩიებ: „მუჭოთ ქომოლსქუას ეუქექუანს გურშა დიდა, მა ხოლო თეშ გეიქექუანთ გურშა“ (ეს. 66:13). იეჰოვას თიშე ბრელით უმოსო უჸორთ, ვინემ მშობელს უჸორს სქუა (ეს. 49:15). მუშ სიტყვაშ, ბიბლიაშ, საშვალებათ იეჰოვა გურშა ემქექუანა დო მარზენა ძალეფს, მუჟამსით გურგოტახილ ვორეთ დო ემოციურო გლახათ ბგინაფლენთ დუდის (რომ. 15:4).

3. მუს გუვარჩიენთ თე სტატიას?

³ წიგნ „ესაია“ ეფშა რე გურიშემაქექაფალ აზრეფით, ნამუთ იეჰოვაშე მოურს (ეს. 40:1). ჩქინ მოჸოროფე მუმაქ თე წიგნ თიშენ ოჭარაფუ ესაიას, ნამდა გურშა გეუქექუკო იუდას მახორუ ხალხის, მუშენდა თი დროს ქიანას მანგარ რთულ სიტუაცია რდჷ. თინეფცალო ჩქი ხოლო „მანგარ გლახა დო ძნელ გინაღალარ დროს“ ფცხოვრენთ, ათეშენ გურიშექექაფა მოსაჭირუნა (2 ტიმ. 3:1). მორთ წიგნ „ესაიაშე“ მუსხირენ მუხლ გუვარჩუათ, ნამუთ დუმამშვიდენა დო გუმამანგარენა, მუჟამსით 1) მდგომარეობა ვეველუთინ თეშ მათირუნა, 2) ნაბეტანს პწუხენთ დაშებულშენ დო 3) საჸოროფო ადამიან მაფუნა ღურელ.

ᲛᲣᲟᲐᲛᲡᲘᲗ ᲛᲓᲒᲝᲛᲐᲠᲔᲝᲑᲐ ᲕᲔᲕᲔᲚᲣᲗᲘᲜ ᲗᲔᲨ ᲛᲐᲗᲘᲠᲣᲜᲐ

4. მუჭო შილებე იბგინათ დუდ, მდგომარეობაქ ვეველუთინ თეშ დუმათირეს-და?

⁴ ჩქინ ცხოვრებაქ შილებე ვეველუთინ თეშ დითირას (ეკლ. 9:11; 1 კორ. 7:31). შილებე ჯანმრთელობაშ პრობლემაქ ქუმაშუან, ფინანსურო ქიმკოპჭირდათ, პოლიტიკურ არეულობაქ ქუმოხვადას ვარდა დანიშნულებაქ დუმათირან. თეცალ სიტუაციეფიშ დროს შილებე მნერვიანენდათ. ვა რე გასაკვირ, მაფიქრუაფუდან, მუ ვაკეთათ. ართ ჯიმა, ჯოზეფ, ნამდგაქ ბეთელს 17-წანიან მსახურებაშ უკულ პიონერო დენიშნჷ, იჩიებ: „ვა მიჩქუდ, მუ ვაკეთიკონ. ბეთელს თესხი წანაშ მსახურებაშ უკულ მანგარ რთულ რდჷ ჩქიმო ახალ ცხოვრებაშ დოჭყაფა. ვა მიჩქუდ, სოვრეშე დიპჭყიკო“. მუჭო მიმეხვარებუნა იეჰოვა წიგნ „ესაიაშ“ საშვალებათ, მდგომარეობაქ ვეველუთინ თეშ დუმათირეს-და?

5. მუშა მარწმუნენა იეჰოვა ესაიაშ 42:16-ის? (ქოძირით სურათ).

⁵ წეკითხით ესაიაშ 42:16. იეჰოვა თინეფს, მით, თაშ ქოფთქუათინ, თოლს ვარწყე დო უჩინებ შარას გეჸუნს, ოპირ, ნამდა ქუხელმძღვანელენს დო უკმელას სინთეთ გინუშქვანს. მუჟამსით სიტუაცია ვეველუთინ თეშ მათირუნა, შილებე ჩქი ხოლო თეშ ბგინაფლენდათ დუდის, ითამ „თოლს ვა ვორწყეთ“, „გეპჸუნთ უჩინებ დო ართმანგ ვა რენ ფერ შარას“ დო „ვორეთ უკმელას“. შილებე თიცალ გრძნობა მიღუდან, ნამდა ტყას ვორეთ დო ვა მიჩქუნა, მუჭო გიშვაგათ. მარა იეჰოვა მოპირუნა, ნამდა მუდგანერ სიტუაციას ვეშეფხვადათინ, თინა ირიათო ქომხელმძღვანელენა დო დღას ვემმოტენა. თინა ხედოხეთ გილამიჸუნანა დო გეგშამიჸუნანა უკმელაშე, შარას გომსინთანა დო ართმანგ ვა რენ ფერ ოულარს რზენო გინომშქვანა. იეჰოვა თეშო მუშ სიტყვაშ დო ორგანიზაციაშ საშვალებათ ჭკვერულ რჩევეფს მარზენა (ფსალმ. 119:105; ეს. 30:21). თეწკუმა ართო, ჩქინ მახვარებელო ირინუანს ჩქინ თანამორწმუნეეფს დო შხვეფს. იეჰოვას უჸორთ დო არჩქილე, მუს ბგინაფლენთ, ათეშენ თიმწკუმა ხოლო, მუჟამსით ვა მიჩქუნა, სო იბდათ დო მუჭო „გიშაბრთათ“ რთულ სიტუაციაშე, შემლებუნა ვენდათ თიშ ხელმძღვანელობას (ეს. 41:10; 1 პეტ. 5:6, 7).

6. მუშა შემლებუნა ვორდათ დარწმუნებულ, სიტუაციაქ ვეველუთინ თეშ დუმათირეს-და?

⁶ ჟიშე მოშინაფილ ჯოზეფ იჩიებ, მუჭო იგინეს მუქ დო მუშ ოსურქ იეჰოვაშ ჸოროფა ბეთელშე ულაშ უკულ. თინა მირაგადუნა: „გინულაშ პერიოდის ჩქი არგამათ ქობძირით იეჰოვაშ ხე. თიქ ძვირფას და დო ჯიმალეფიშ საშვალებათ მიმეხვარეს. ღორონთიქ ზუსტას საჭირო დროს იზრუნ ჩქინ მატერიალურ დო ემოციურ საჭიროებეფშენ დო ამდღა ხოლო თაშ რე“. თქვან სიტუაციაქ ხოლო ველუდითინ თეშ დითირ-და, შეილებუნა დარწმუნებულ რდათჷ, ნამდა, მუდგანერ რთულ მდგომარეობა ვაიღუდანინ, იეჰოვა ქიმერჩანა ძალას დო ქოიხელმძღვანელენა (ეს. 54:10; 58:11). ჯოზეფ აგრძელენს: «ჩქინ ართ-ართ ობირეშ ჯგირო იჩიებ: „ჭუმან მუნერ დღა მელჷ, ვა მიჩქჷ დიო, მარა, მიჩქჷ, ალამრე ღორონთ ირო!“.a შილებე ირფელქ თეშ ვედას, მუჭოთ ჩქი მაფუდეს დაგეგმილ, მარა ართ მუდგარენ შემლებუნა ბჯერდან: იეჰოვა ირ შარა-კარს ჩქინწკუმა იჸუაფ».

ᲛᲣᲟᲐᲛᲡᲘᲗ ᲓᲐᲨᲔᲑᲣᲚᲨᲔ ᲜᲐᲑᲔᲢᲐᲜᲡ ᲞᲬᲣᲮᲔᲜᲗ

7. მუ სირთულეს ხვადუნა თინეფ, მით დაშებულშე ნაბეტანს წუხენა?

⁷ მუჟამსით სერიოზულო ვაშენთ, უხუცესეფ ჸოროფათ მოხვარუნა დო ჩქი ხოლო ირფელს ვორთუთ, ნამდა იგივექ ვა მაღოლან (იგავ. 28:13; იაკ. 5:14–16; 1 იოან. 1:9). მარა იეჰოვაშე პატიებაშ მეღებაშ უკულ ხოლო, შილებე დაშებულშე ნაბეტან წუხება იშენით ვა მოსვანჯუანდან. შილებე ფიფქრენდათ: „მუჭო მაპატიენდ იეჰოვა თეცალ მუდგარენს?!“ (2 კორ. 2:7). თეცალ გრძნობეფ ბუნებრივ რე, მუშენდა ძნელ რე, გიჭყოლიდუე დაშებულ დო ათეშენ შილებე ბრელ ხანს გინაფლენდე დუდის გლახათ. მეფე დავითიქ ჭარჷ: „სიმშვიდე მემდინუ ჩქიმ ცოდაქ . . . შურო მუთუნიშ დუდ ვა მიღჷ დო გვალო განადგურებულ ვორექ“ (ფსალმ. 38:3, 8). ულირს დაშებულიშ გურშენ მინშა დუდის თაშ ქოგინაფლენქ-და, წიგნ „ესაია“ გურშა ეიქექუანს.

8, 9. მუჭოთ ესაიაშ 1:18-შე იძირე, მუჭო პატიენს იეჰოვა ცოდეფს სრულას?

⁸ წეკითხით ესაიაშ 1:18. თიშ ეიოჭარალო, მუჭო პატიენს იეჰოვა ცოდეფს სრულას, თის მანგარ ჯგირ მაგალით მოჸუნს. იეჰოვა იჩიებ, ნამდა ჩქინ ცოდეფს, „ალდაჩხირიშფერ რდასინ ხოლო“, „თირცალო“ დარჩიალენს. ალდაჩხირიშფერ რე მანგარ ჭითა, ნამუთ ადვილო ვეშეჸუნნე ნოჭკერშე. მარა იეჰოვა მარწმუნენა, ნამდა, მუჟამსით მაპატიენა, ბოლოშა იჭყოლიდუანს ჩქინ ცოდეფს დო დღას ვა გომშინანა.

⁹ გუვარჩუათ მეფე დავითიშ შემთხვევა. მართალ რე, დავითიქ იმრუშ დო კოჩ ხოლო დაჸვილაფუ, მარა იეჰოვაქ აპატუ თის დო უმოს გვიანო, ართგურ კოჩო ხოლო მიშინუ (2 სამ. 11:3, 4, 14, 15; 12:13; 1 მეფ. 9:4, 5). იეჰოვაქ დავით თიშ ცოდეფით ვარინ, თიშ ართგურობათ შეაფას. იეჰოვა ჩქი ხოლო ჸოროფათ მაპატიენა, მუჟამსით მნარღენთ დაშებულს დო მოხვარუნა, სუფთა სინდისით გუვაგრძელათ თიშ მსახურება. ხოლო მუჭო ელამკინანა გურშა წიგნ „ესაია“, მუჟამსით დაშებულიშ გურშენ ნაბეტანს პწუხენთ?

10. მუ გურიშემაქექაფალ აზრის ვორწყეთ ესაიაშ 38:17-ის?

¹⁰ წეკითხით ესაიაშ 38:17. ფრაზაქ „ოჭიშიშ უკახალე გაფჷ კინოჸოთამილ არძა ჩქიმ ცოდა“ შილებე თაშ ხოლო ითარგმნას: „სქან თოლშე ჩათხინაფილ გაფჷ ჩქიმ ცოდეფ“. თაქ იეჰოვაშ გურშენ რაგადებულ რე, ნამდა ითამ თინა ნარღენსინ ფერ დუმაშებელიშ ცოდას ეჭოფუნს დო უკახალე კინიჸოთანს, სოდეთ მეტო ვა ძირუნს თის დო დღას ვეგიშინანს. ართ ლექსიკონიშ თანახმას თე აზრიქ შილებე თაშ ხოლო ირაგადუას: „[ჩქიმ ცოდეფ] თეშ გინაშქვჷ, ითამ თინეფ დღას ვამკეთებუდას“. თაშ ნამდა, იეჰოვა ქუმაპატიენან უკულ, თეშ მიჯინენა, ითამ დღას ვა დამშებუდან, ვართ პასუხის მოფთხინა თეშ გურშენ მუთუნ დროს დო ვართ დუმასაჯენა, მუშენდა სრულას ლასუნს თინეფს. ღორონთ მოპირუნა: „ვეგიფშინანქ სქან ცოდეფს“ (ეს. 43:25). მართალო, მუ გურიშემაქექაფალ რე თეშ რჩქინა! იეჰოვა, უზენაეს მოსამართლე, ჩქინ ცოდეფს ვა გომშინანან-და, ჩქი მი ვორეთ, ჩქინ დუდის ირიათო გითუშინათინ?!

11. მუდგა ვა მაფუდან დაშებულინ, მუ რე იეჰოვაშო მნიშვნელოვან? (ქოძირით სურათ).

¹¹ ულირს დაშებულიშ გურშენ ნაბეტან წუხებას ქიდიპჭყანთ-და, საჭირო რე, ქიგიფშინათ, მუს მირაგადუნა იეჰოვა ჸოროფათ. თინა სრულას მაპატიენა დო დღას ვა გომშინანა დაშებულს. თის ვა ვოონჯღორუთ ულირს დაშებულიშ გურშენ დო, არასრულყოფილ ადამიანეფიშ გინაწონს, მოხუჯურ დროს ვა უჯინე, ნამდა გეგთომშინან თინა (ეს. 57:16). იეჰოვაშო მნიშვნელოვან თინა ვა რე, მუნერ ადამიანეფ ვორდით, თიშო მნიშვნელოვან რე, მუნერეფ ვორეთ ასე დო მუნერიშ მენჭირნაფას ვოცადუთ (ეს. 55:7). მართალო, მუ მოჸოროფე დო მპატიებელ ღორონთის ვომსახურუთ! მორთ დღას ვემეფჩათ უფლება დაშებულშენ ნაბეტან წუხებას, მიდამღან ბედნერობა, ნამუთ ამდღა შემლებუნა მიღუდან დო კურთხევეფ, ნამდგას მომავალს მიბღენთ ღორონთშე.

ᲛᲣᲟᲐᲛᲡᲘᲗ ᲡᲐᲸᲝᲠᲝᲤᲝ ᲐᲓᲐᲛᲘᲐᲜ ᲛᲐᲤᲣᲜᲐ ᲦᲣᲠᲔᲚ

12. მუჭო ბგინაფლენთ დუდის, მუჟამსით საჸოროფო ადამიან მიღურუნა?

¹² მუჟამსით საჸოროფო ადამიან მიღურუნა, მანგარ დიდ გურჭუას ბგინაფლენთ, მუთ გურშე ვეშმურს. თე დროს შილებე მიკვედან, მუშენ დუშვჷ იეჰოვაქ თიშ ღურა. ჯიმა მიკელ, ნამდგაშ მშობლეფქ გაზიშ აფეთქებაშ გურშენ ჸუდეს მილეჭვეს, იჩიებ: „გურ ეკოსოფილ მაფუდ დო იეჰოვაშე ვორდჷ გურმულირ, მუშენ დუშვ-მაქ თინეფიშ ღურა. იეჰოვაშ ბრალ ვა რდუნ ქომჩქუდ, მარა გურ თიშენ მუმალედ, მუშენ ვაკეთ მუთუნ, თექ ვა მოხვადუკონ“. შილებე თქვა ხოლო გიგინაფუდან თაშ დუდ. თეცალ საშინელ გურჭუაშ დროს მუ იმენდის მარზენა იეჰოვა დო მუჭო ელამკინანა გურშა?

13. მუ იმენდის მარზენა იეჰოვა ესაიაშ 25:8-ს?

¹³ წეკითხით ესაიაშ 25:8. იეჰოვა მოპირუნა, ნამდა „სადღამუშოთ მოსპუნს ღურას“. წერმიდგინით დრო, მუჟამსით ღურა ვეჸუაფ. დღას ვა გაჸინა ონგარალ საჸოროფო ადამიანიშ ღურაშ გურშენ (ეს. 35:10). მეტო ვეგმოცადუნთ თი ჭუას, ნამუთ თიცალ მუდგარენიშ ძირაფას მოჸუნს, მუნერით რე სასაფლა ვარდა პამიატნიკ, მუთ ოძირანს, ნამდა თქვან საჸოროფო ადამიან თექ რე საფლებურ. თეშ მანგიორო, გიღუნა დიდებულ იმენდ, ნამდა თქვან საჸოროფო ადამიანეფ ირიათო თქვანწკუმა იჸუაფუნა ცოცხალ დო ჯანმრთელ. თენა უბრალოთ ჯგირ სურვილეფ ვა რენ, რეალობა რე, ნამდგას მოპირუნა პიროვნება, მიდგას ქოთ შეულებ თეშ კეთება (გიმოცხ. 21:4, 5).

14. მუ გრძნობეფ გირჩქინდუ, მუჟამსით გათელებაშ იმენდშენ ფიქრენქ? (ეს. 26:19; ქოძირით სურათ).

¹⁴ წეკითხით ესაიაშ 26:19. იეჰოვა ხვალე ღურაშ მოსპუალას ვარინ, თის ხოლო მოპირუნა, ნამდა ჩქინ საჸოროფო ადამიანეფს, მით ღურაქ მიდამღეს, სიცოცხლეს დურთინუანს. თინეფიშ გურშენ იეჰოვა იჩიებ: „გემწოდირთუნა ჩქიმ ღურელეფ“. თენა ოძირანს, ნამდა იეჰოვა თინეფს მუშ დუდშა ეჭოფუნს. თის მუშ მეხსიერებას ჸუნსჷ თინეფ დო მერჩქინელ დროს გათელენს. მუჭოთ ოჭმარეშ ცუნდ გიშმაცოცხალენს მცენარეეფს, თეშ იეჰოვა, ნამდგაშე მოურს სიცოცხლე, გაკურცხინუანს ღურაშ ლურით დორულაფირეფს. მუშმადიდა ხიოლ იჸუაფ კინ თინეფიშ ძირაფა! (ქეშუდარით მარკოზიშ 5:42).

15. მუჭო მოხვარუნა გათელებაშ იმენდ, გაურზათ გურჭუას?

¹⁵ თიშ უმკუჯინუო, ნამდა ბჯერა ღორონთიშ დუნაპირებ გათელებაშ, ჩქინ გურს ჭუა იშენით სქიდუ. მარა გურშა ემქექუანა თიშ რჩქინა, ნამდა იეჰოვას შჷ ჩქინ საჸოროფო ადამიანეფ. თე იმენდიქ ჟიშე მოშინაფილ მიკელს ხოლო მანგარო ეუქექუ გურშა. თინა იჩიებ: „ესაიაშ 26:19-ქ მიმეხვარ თიშ ინონჭაფას, ნამდა იეჰოვაშო ჩქიმ ჟირხოლო მშობელ მანგარ ძვირფას რე. თის ჟირხოლო მუშ მეხსიერებას ჸუნსჷ, ონდო მერჩქინელ დროს ვა გათელენს თინეფს. თეშ რჩქინა გურშა ემქექუანს დო ძალას მარზენს“. ჯგირ იჸუაფ, ჩქი ხოლო წერმიბდგინათ თი დრო, მუჟამსით კინ გურშა ქიფხუტოლუანთ ჩქინ საჸოროფო ადამიანეფს. თენა ჭიჭეთ ვარა ეუქექუანს ჩქინ შეჭირებულ გურს.

16. ნამ მუხლეფქ ეიქექუ გურშა რთულ სიტუაციეფიშ დროს?

¹⁶ თე სტატიას ჩქი გუვარჩით მუსხირენ ბიბლიურ მუხლ წიგნ „ესაიაშე“, ნამდგას შეულებ გურშა ემქექუან, მუჟამსით სიტუაცია ვეველუთინ თეშ ითირუ, მუჟამსით ულირს დაშებულიშ გურშენ ნაბეტანს პწუხენთ დო მუჟამსით საჸოროფო ადამიან მაფუნა ღურელ. მანგარ მარდულ ვაფუთ იეჰოვას, მით მუშ სიტყვაშ საშვალებათ გურშა ემქექუანა დო მამშვიდენა (ფსალმ. 94:19). პირადო თქვა ნამ ბიბლიურ მუხლეფ ეიქექუანა გურშა რთულ სიტუაციაშ დროს? ქეცადით, ქიდემახსოვრათ თინეფ, ქიგიჭარათ ვარდა თიცალ ადგილს ქიმკაჭარათ, სოდეთ ხშირას მოიოლუნა თოლშა. მოკონა, ჩქინ მოჸოროფე ზეციერ მუმაშ სიტყვეფქ ირიათო ემქექუან გურშა.