მიღით ჭკვერულ გადაწყვეტილებეფ დამატებით განათლებაწკუმა დაკავშირებით

1, 2. ა) მუ გადაწყვეტილება აფუნა ახალგაზრდეფს მიოღებელ? ბ) მუ იგულისხმებ ტერმინს „დამატებით განათლება“? (ქოძირით „განმარტება“).

ᲑᲐᲦᲐᲜᲔᲤᲡ ხშირას ოკითხუნა: „მუ გოკო აკეთე მირდუქინ?“. არძაშ უჯგუშ, მუთ შეილებ ცხოვრებას აკეთენ, იეჰოვაშა სრულ დროთ მსახურება რე. მარა დუდიშ ეიოჯუმალარო ფარა ხოლო ხომ დეგესაჭირებ?! (2 თეს. 3:10). შილებე უკვე ნაფიქრებ გაფუდას, სო იმუშენქ დო მუს გაკეთენქ, მირდუქინ.

² ნამთინე ახალგაზრდა, მშობლეფიშ ელნაჩემუთ, ისხუნუანს, სავალდებულო საბაზო განათლებაშ მეღებაშ უკულ დამატებით განათლება ხოლო მიღას, ნამდა სამუშაშ დოჭყაფაქ შეიალებუას.a ფიქრენქო დამატებით განათლებაშ მეღებაშენ? მუნერ განათლება ოკო მიღე? თე სტატიას მოჩამილ რე ბიბლიურ პრინციპეფ, ნამუთ მიგეხვარებ, ჭკვერულო ქიმუდირთე თე საკითხის, მუთ ჭკვერულ გადაწყვეტილებეფს მიგოღებაფუანს. მართალ რე, თე სტატია უმოსო ახალგაზრდეფს ოხუ, მარა თინა ნებისმიერ ქრისტიანს მეხვარებ, მიდგას დამატებით განათლებაშ მეღება ულამ. თაქ გარჩიებულ პრინციპეფ მშობლეფს ხოლო მეხვარებ, სწორ რჩევეფ ქიმეჩან მუნეფიშ სქუალეფს.

ᲝᲙᲝ ᲛᲘᲦᲔᲜᲘᲝ ᲓᲐᲛᲐᲢᲔᲑᲘᲗ ᲒᲐᲜᲐᲗᲚᲔᲑᲐ?

3. მუშენ შილებე ნამთინე ქრისტიან ფიქრენდას დამატებით განათლებაშ მეღებას?

³ ნამთინე ქიანას კოჩის დუდიშ ეჯუმალა დამატებით განათლებაშ მეღებაშ უმშო ხოლო შეულებ. მარა რე ქიანეფ, სოდეთ დამატებით განათლებაშ მეღება რე საჭირო, ნამდა ქიშუე სამუშა, სოდეთ ნორმალურ ხელფას დო პირობეფ რე. თეცალ სამუშაქ შილებე ქრისტიანს მეხვარას, უმოს დრო დუთმას ქადაგებას დოვარ შხვა თეოკრატიულ საქმეეფს. მარა, მუჭოთ თაშინ, დამატებით განათლებაშ მეღება ქრისტიანშე მსხვერპლის ხოლო ითხინს დო სირთულეეფ ხოლო მოჸუნს.

4. მიშ გინაჭყვიდირალ რე, მიღას დო ვარ პიროვნებაქ დამატებით განათლება? (ქოძირით სქოლიო).

⁴ ბიბლია იჩიებ, ნამდა „არძას მუშ ოღალ გილუღ“ (გალ. 6:5). თაშ ნამდა, არძა სრულწლოვან ქრისტიანქ მუშით ოკო გინოჭყვიდას, მიღას დო ვარ დამატებით განათლება.b მარა, მუჟამსით საქმე არასრულწლოვანს ოხუ, მშობლეფიშ გინაჭყვიდირალ რე, მუ განათლებას მიღენს თინა (ეფეს. 6:1). თეწკუმა ართო, თინეფშე გეწურაფა მეხვარებ სქუას, მირდუნ, თე საკითხწკუმა დაკავშირებით სწორ გადაწყვეტილება მიღას (იგავ. 22:6).

5. მუჟამ ოკო დიჭყას პიროვნებაქ დამატებით განათლებაშ მეღებაშენ ფიქრ დო მუშენ? (ქოძირით სურათ).

⁵ ხშირ შემთხვევას პიროვნებას საბაზო განათლებაშ მეღებაშ თებაშახ აფჷ გინაჭყვიდირალ, მიღენს დო ვარ დამატებით განათლებას. მუშო ოკო რაგად, ჭკვერულ იჸუაფ, თიქ გადაწყვეტილებაშ მეღებაშახ თე საკითხ მშობლეფწკუმა ართო გარჩუას. თენა მშობლეფს ქიმეჩანს დროს, ნამდა შეიალებუან შხვადოშხვა ვარიანტიშ გორუაქ. თეს გეძინელ, მეჩანს საშვალებას, სკოლას გეგშეგორან საგან, ნამდგაშ რჩქინა მომავალს თინეფიშ სქუას დამატებით განათლებაშ მეღებაშ დროს დო სამუშაშ შიბას გიმადირთუ. აუცილებერ რენო, თე საკითხ თეიშახ გინოჭყვიდან, სოიშახ სქუა საბაზო განათლებაშ მეღებას ათენდას? ვარ, აუცილებერ ვა რე (იგავ. 22:6). ნამთინე ახალგაზრდა ისხუნუანს, დიო სკოლა გათუას, სამუშა ქიშუას, პიონერობა ქიდიჭყას დო უკულ გინოჭყვიდას, მიღას დო ვარ დამატებით განათლება. ნამთინე უმოს გვიანო გინოჭყვიდუნს დამატებით განათლებაშ მეღებას.

6. მუ მეხვარებ პიროვნებას დამატებით განათლებაწკუმა დაკავშირებით ჭკვერულ გადაწყვეტილებაშ მეღებას?

⁶ მუ მიგეხვარებ დამატებით განათლებაწკუმა დაკავშირებით ჭკვერულ გადაწყვეტილებაშ მეღებას? პირველ რიგის, ქილოც თე საკითხშენ (იაკ. 1:5). უკულ დეფიქრ ჟირ მხარეშე: პირველ, სინამდვილეს მუ მოტივით გოკო თე განათლებაშ მეღება? (ფსალმ. 26:2). მაჟია, მუ ჯგირ დო გლახა მხარეეფ უღჷ თი განათლებას, ნამდგაშ მეღება სი გოკო? (იგავ. 14:15). მორთ ცალ-ცალკე გუვარჩუათ თე მხარეეფ.

ᲓᲔᲤᲘᲥᲠ სᲥᲐᲜ ᲛᲝᲢᲘᲕᲔᲤᲨᲔ

7. მუს ოკო გოუჩან გურ ქრისტიანეფქ დამატებით განათლებაშ მეღებაშენ ფიქრიშ დროს?

⁷ დამატებით განათლებაშ მეღებაშენ ქოფიქრენქ-და, მთავარ, მუდგაშეთ ოკო დეფიქრე, თინა რე, მუშენ გოკო თე განათლებაშ მეღება. ბრელ თიშენ ღებულენს დამატებით განათლებას, ნამდა მუნეფს უჸორან თიცალ სამუშაქ ქაშუან ვარდა თიცალქ, სოდეთ ჯგირო უგანა. გლახა რენო თე მოტივეფ? იშენდოიშენ ვარ (1 ტიმ. 5:8). მარა ბიბლია მაფრთხილენა, ნამდა ჩქინ ცხოვრებას არძაშ უმოს მნიშვნელოვანო ფარა ვეგნვოშქვათ დო ვეფიფქრათ, ნამდა ხვალე თის შეულებ ჩქინ თხილუა (იგავ. 23:4, 5; 1 ტიმ. 6:8–10; 1 იოან. 2:17). ჩქინ მოტივ ფარაშ შიბა ვარდა შხვეფიშ თოლს პატიგედვალირ ვორდათინ თინა ქორენ-და, ირო თიცალ გრძნობა მაღვენუნა, ნამდა მუდგარენ მორკუნა დო, თეწკუმა ართო, იეჰოვაწკუმა გილებლუანთ ურთიერთობას.

8, 9. ა) მუ დამოკიდებულება ოკო უღუდან ქრისტიანეფს განათლებაშ მიმართ? (მათ. 6:33). ბ) მუშ გურაფა შეილებ ხოსეფინაშ, მორინიშ დო ირისიშ მაგალითშე?

⁸ მუნერ დამოკიდებულება ოკო მიღუდან განათლებაშ მეღებაშენ? ოკო ფშუდან, ნამდა მუთუნ ვა რე იეჰოვაშ მსახურებაშე უმოს მნიშვნელოვან (მათ. 22:37, 38; ფილ. 3:8). თაშ ნამდა, განათლებას უჯინ, მუჭოთ საშვალებას, ნამუთ მიგეხვარებ, მთელ ყურადღება იეჰოვაშ მთელ გურით მსახურებაშა გაფუდას გინოღალირ (წეკითხით მათეშ 6:33).

⁹ ქობძირათ, მუქ მეხვარ ნამთინე ქრისტიანს, ვადინუესკო სწორ დამოკიდებულება დამატებით განათლებაწკუმა დაკავშირებით. ხოსეფინა, ნამუთ ჩილეს ცხოვრენს, იჩიებ: „დამატებით განათლება თიშენ მიბღჷ, ნამდა უმოს გუვაკეთიკო იეჰოვაშო. ათეშენ თიცალ განათლება გიშებგორ, ნამუთ ჩქიმ სულიერ მიზნეფიშ მეჭირნაფას მიმეხვარებუდ“. და მორინქ თუმაშ სტილისტობაშ ართწანიან კურსიშ მიკულა გინოჭყვიდ. მუშენ გიშეგორ თიქ თე პროფესია? თინა იჩიებ: „მიზანო მიღუდ, თექ გინიბლიკო ოქადაგებშა, სოდეთ მეტ მაქადაგებელ რდჷ საჭირო. ათეშენ თიცალ მუდგარენიშ გურაფა მოკოდ, მუთ თე მიზანიშ მეჭირნაფას მიმეხვარებუდ. გურაფა გუვათენ, ქოთ ქიდიპჭყჷ სტილისტო მუშობა დო გინაულარო ფარა ხოლო ქელეფშაყარე. მუჟამსით გინიბლჷ თექ, სოდეთ მეტ მაქადაგებელ რდჷ საჭირო, ჩქიმ პროფესიაშ ჭყოლოფათ სამუშა ხოლო ქიფში“. ირის, ნამდგაქ უმოს ბრელხანიან კურს მიკორთჷ, ნამდა სტომატოლოგობა ქიდიგურუკო, მირაგადუნა: „დამატებით განათლებას შეულებ ეწგოდირთას, მარა თის ნამდვილ წარმატება დო კმაყოფილება დღას ვა მაღინე სქანდა. ნამდვილ ბედნერობაშ მიოღებელო ართ მუდგარენ რე საჭირო: ცხოვრებას პირველ ადგილს იეჰოვა ოკო გემირდან დო თენა მომღანა ნამდვილ წარმატებას დო კმაყოფილებას“. თაშ ნამდა, მუჟამსით ჩქინ ცხოვრებას არძაშ უმოს მნიშვნელოვან იეჰოვაწკუმა ურთიერთობა იჸი, თენა მიმეხვარებუნა თიცალ გადაწყვეტილებეფიშ მეღებას, ნამუთ ულიებ ბედნერობას მომღანა.

ᲓᲔᲤᲘᲥᲠ ᲒᲐᲜᲐᲗᲚᲔᲑᲐᲨ ᲛᲔᲦᲔᲑᲐᲨ ᲯᲒᲘᲠ ᲓᲝ ᲒᲚᲐᲮᲐ ᲛᲮᲐᲠᲔᲔᲤᲨᲔ

10. მუჭო შემლებუნა მივაჸუნათ კანონიშ 32:29-ს ენოჭარილ პრინციპის დამატებით განათლებაშ მეღებაშენ ფიქრიშ დროს?

¹⁰ შილებე უკვე გიღუდას მუდგარენ ვარიანტეფ, მუს იგურუანქ ვარდა მუ კურსეფს მიკურქ. მარა იშენით ჯგირ იჸუაფ, შხვა ვარიანტეფშე ხოლო დეფიქრე, თიცალეფშე, ნამუთ სქან გიშაგორილ სფეროს ვარდა შხვა სფეროს ოხუ (ქეშუდარით იგავეფიშ 18:17). რშუდას, ნამდა ამდღა დამატებით განათლებაშ მეღება ჸუდეშე, ონლაინკურსით, ხოლო რე შეიოლებერ. თიშე ხოლო დეფიქრ, ნამდა დუდიშ ეიოჯუმალარო შილებე შუროთ ვა გოსაჭირუდას დამატებით განათლებაშ მეღება. ქობძირათ ფინეთის მახორუ ართ დაშ, იოჰანაშ, შემთხვევა, ნამდგას ვემუღებ დამატებით განათლება. თინა იჩიებ: „სკოლა გუვათენ, გვერდგანაკვეთიან სამუშას მუშობა დო პიონერო მსახურება ქიდიპჭყჷ. ბრელ შხვადოშხვა ადგილს მუფშენდჷ, მარა ვორწყედ, ნამდა იეჰოვა ირო ასრულენს მუშ სიტყვას დო დღას ვემურკებ ჩქიმდა თინა, მუთ მოსაჭირუდ“. რშუდან, ნამდა ნებისმიერ დამატებით განათლებაშ მეღებას უღჷ ქოთ ჯგირ მხარეეფ დო ქოთ – გლახა. ათეშენ ქოკითხ სქან დუდის: „ქოღირუნო თი ჯგირ მხარეეფ თი გლახა მხარეეფშა, ნამუთ თე განათლებაშ მეღებას მოჸუნს?“ (წეკითხით კანონიშ 32:29; 1 კორ. 10:23). თუდო გუვარჩიენთ მუსხირენ მხარეს, მუთ მიგეხვარებუნა თე კითხვაშა პასუხიშ მეჩამას.

11. მუშენ რე მნიშვნელოვან, დეფიფქრათ, მუზმა დროს დუთმენთ გურაფას? (ქოძირით სურათეფ).

¹¹ მუნერ გრაფიკით გაჸი ოგურაფალ. წინასწარ დეფიქრ, მუზმა დრო დეგესაჭირებ მთელ მარას გაკვეთილეფშა დასწრებას, პრაქტიკეფიშ მიკულას დო დავალებაშ კეთებას. ქუდგოსქიდუნო დრო სულიერ საქმეეფშო დო ოჯახურ პასუხიშმგებლობეფშო? (ფილ. 1:10). თეშ ხომ ვეგნოშურდუქ, ნამდა კრებაშო მომზადებაშ დოვარ პირად გურაფაშ დუდ ვა გაღვენუ? თექ აღოლ ინდოეთის მახორუ ჯეროზის. თინა იჩიებ: „მანგარო მიჭირდჷ რეგულარულო მსახურება დო კრებაშ შეხვალამეფს ყურადღებათ მიკოხუნა. თეწკუმა ართო, ხშირას მიჩირთუდ შეხვალამეფ. გურს უჩანქინ, ფხვადუქ, ნამდა ვა ღირუდ გურაფაშა თესხი დროშ დო ენერგიაშ მიკოხარჯება“. მარა ნამთინე კურს ბრელ დროს ვეთხინს, მთელ დღა ვასაჭირ დო ბრელ დავალება ხოლო ვა რე ოკეთებელ. მაგალთო, რებეკა მოზამბიკშე, კმაყოფილ რე მუშ გიშნაგორა განათლებათ. თინა იჩიებ: „გურაფას დღაშე ხვალე ჟირ საათ ოსაჭირუდ, მუდგაქ საშვალება ქომუჩ, პიონერო მსახურება გუვაგრძელკო“.

12. მუ კითხვეფშე ოკო დეფიქრე, მუდგათ ქაძირანქ, ნამდა გოკო, ჭკვერულო გეგმირინუე დრო? (ეკლ. 12:1).

¹² მუსხი ხანს გაჸი ოგურაფალ. დეფიქრ, მუზმა თუთას ვარდა წანას გაჸი ოგურაფალ. ქიჸუაფუნო თე განათლებაშ მეღება დროშ ჭკვერულო გიმორნაფა? (ეფეს. 5:15–17). ახალგაზრდა ქორექ-და, ქიმერჩანსო თე გურაფა თიშ საშვალებას, ნამდა, ონდო ახალგაზრდულ ძალეფ გიღჷ, არძაშ უჯგუშ უძღვინე იეჰოვას, მაგალთო, სრულ დროთ ემსახურე თის? (წეკითხით ეკლესიასტეშ 12:1). ხომ ვა რე თიცალ კურსეფ, ნამდგაშ საშვალებათ უმოს ჭიჭე დროშ დინახალე გავითარენთ თიცალ უნარეფს, ნამუთ ქიმგეხვარებ სი გოკონ ფერ სამუშაშ შიბას? მაგალთო, პროფესიულ სასწავლებერეფ ვარდა დაწესებულებეფ, სოდეთ, უნივერსიტეტეფიშ გინაწონს, უმოს ეფას დო უმოს ჭიჭე დროშ დინახალე შეგალებე საჭირო უნარეფიშ გავითარება. მარიო, ნამუთ ჩილეს ცხოვრენს, იჩიებ: „იფსხუნე ჟირწანიან კურს მიკობრთიკო, ნამდგაქ, უნივერსიტეტიშ გინაწონს, ბრელით უმოს ეფიქ ქუდომზოჯ. მარაშე ხვალე ოთხ დღას მაფუდ ოგურაფალ, მუთ საშვალებას მარზენდჷ, პიონერო ხოლო იმსახურიკო“.

13. მუქ შილებე მოხვადას, ოგურაფშა ჸუდეშე ოულარქ ქუგაჸუ-და?

¹³ სო გაჸი ოცხოვრებელ. შილებე განათლებაშ მიოღებელო ოცხოვრებშა ჸუდეშე შორს ვა გაჸუას გინაულარქ, მარა, მუჭო მიქციებუქ თიცალ დროს, მუჟამსით განათლებაშ მიოღებელო შილებე შხვა ქალაქშა ვარდა სტუდენტეფიშ საერთო საცხოვრებელშა გაჸუას გინაულარქ? რშუდას, ნამდა ოჯახიშ დოტებაქ შილებე მანგარო გეცილას სულიერო, მითუმეტეს, მუჟამსით იეჰოვას ვამსახურუნ ფერწკუმა გაჸი ოცხოვრებელ, იჸუაფუნო თენა ნათესე დოვარ შხვა მიდგაინ (იგავ. 22:3; 1 კორ. 15:33). მატიასიქ, ნამუთ მოზამბიკის ცხოვრენს, ართწანიან გურაფაშ კურს მიკორთჷ, ნამუთ იშენდოიშენ ძვირ ვა რდჷ. მარა თინა იშენით ნარღენს მუშ გადაწყვეტილებას. მუშენ? მატიას იჩიებ: „ჸუდეშე შორს, სტუდენტეფიშ საერთო საცხოვრებელს, ფცხოვრენდჷ, ათეშენ 24 საათის თექიანეფწკუმა მიხვადუდ ურთიერთობა დო ირდღას მიღუდ ცდუნება, გევაჸუნიკო თინეფს. არძას ელუჩანქ, ვეგშაგორან თიცალ გურაფაშ კურს, მუდგაშ გურშენ ოჯახშე შორს იჸუაფუდეს“. ართ და ხოლო, ნამუთ რუსეთშე რე, იჩიებ: „რახანს ჸუდეს ჩქიმ მშობლეფწკუმა ართო ფცხოვრენდჷ დო ვართ ხოლო სტუდენტეფიშ საერთო საცხოვრებელს, ბრელ საფრთხეს დო ცდუნებას ეუჩილითე დუდ“. შილებე გვალო ონლაინკურსის ხოლო ქიმიოგორუე დო ჸუდეშე დიგურუე.

14. მუჭო მიგეხვარებ ლუკაშ 14:28-ს მოჩამილ პრინციპ დამატებით განათლებაშ მეღებაშე ფიქრიშ დროს?

¹⁴ მუ დოიზოჯუ გურაფა. ნამთინე გურაფაშ კურს ეფ ღირჷ ვარდა სახელმწიფო აფინანსენს თის. თეცალ შემთხვევას მუდგარენ რჩქინაშ მეღება ვარდა უნარეფიშ გავითარება ბრელით უმოს ეფ დოიზოჯუ. მარა შხვა შემთხვევას დამატებით განათლებაშ მეღებას ბრელ ფარა ოსაჭირ. მინშა, კონკრეტულ სასწავლებერს ქუმოხვადენ, ცალკე ოკო გილართე მასწავლებერშა ომეცადინებშა, მუთ დამატებით ფარას ითხინს. ნამთინე გურაფაშ კურს თიცალ ძვირ ღირჷ, ნამდა სტუდენტეფ წანეფიშ დინახალე სურებულენა ვალეფს. მოზამბიკის მახორუ ედილსონ ნარღენს მუშ გადაწყვეტილებას დო იჩიებ: „ჩქიმ ოჯახიქ ოჭკუმალ დო შხვა აუცილებერ საჭიროებეფ მირკჷ, ნამდა ოთხ წანას ქუმოგურუკო“. თაშ ნამდა, ონდო მუდგაინ კურსის ვარდა პროგრამას გიშეგორუნდე, დეფიქრ: „მუსხი დომზოჯუ? ქიმკარნენო თიშა ჩქიმ ოჯახის ვარდა მა? უმოს ეფიან ვარიანტ ხოლო ხომ ვეგორე?“ (წეკითხით ლუკაშ 14:28). ვალქ ქიგმადვ-და, მუსხი ხანს მაჸი ოგაფალ? მომავალს სამუშაქ ქუმაშუ-და, დუდ გემაჯუმე დო ვალ ხოლო გეგნმაგინენო? (იგავ. 22:7).

15. მუდგაინიშ გურაფაშ დოჭყაფაშახ მუშენ ოკო დეფიქრე, ქუგაშინ დო ვარ სქან განათლებათ სამუშა?

¹⁵ ქუგაშინო სქან განათლებათ სამუშა. დეფიქრ თიშე, მუ მოთხოვნეფ რე თექ, სოდეთ სი ცხოვრენქ ვარდა გილამ ცხოვრება. მართალო გემგოდირთუნო ნაგურეფ სამუშაშ შიბას? ნამთინე კურსის გურაფაშ დროს ნაკლებო დუგოგურუანა თიცალ მუდგარენეფს, მუთ სამუშას გიმგოდირთუ. თინეფ უმოსო თეორიას ოგურუანა დო მთელ ყურადღება აკადემიურ დო ფილოსოფიურ საკითხეფშა აფუნა გინოღალირ (კოლ. 2:8). დეკვირ, მუს იჩიებ ართ და ინდოეთშე: „კურსიქ, ნამუთ მა მიკობრთჷ, ვემმეხვარ თი უნარეფიშ გავითარებას, მუდგას დამსაქმებელეფ ითხინა. შედეგო, იბგურენ თი სფეროს სამუშაქ ვადმაჭყინ“. მაჟია პრობლემა თინა რე, ნამდა შილებე თიცალ მუდგარენ დიგურუე, მუთ იშენდოიშენ მოთხოვნად ვა რე. სუბლიმქ, ნამუთ ცენტრალურ აფრიკაშ რესპუბლიკას ცხოვრენს, კონდინციონერეფიშ გარემონტება დიგურუ. თინა იჩიებ: „მა ფცხოვრენქინ თექ, ხალხიშ უმენტაშ მუშით არემონტენს კონდინციონერეფს. ათეშენ სამუშაშ შიბაქ მანგარო გამჭირდჷ.“

16. მუშენ იჸუაფ ჯგირ, დეფიქრე, სო გაჸი ომუშებელ გურაფას გათენქინ უკულ?

¹⁶ თიშე ხოლო დეფიქრ, სამუშას ქიდიჭყანქინ, კონკრეტულო მუ გაჸი ოკეთებელ. ქიჸუაფუნო თინა სი მორწონსინ ფერ საქმე? (ეკლ. 3:12, 13). მუნერ გარემოს იჸუაფუქ დო მიწკუმა გაჸი ომუშებელ? ქიჸუაფუნო თინა უსაფრთხო? თიცალ გარემოს ხომ ვა გაჸი ომუშებელ, სოდეთ პირველობაშ გურშენ ართიანს ონირზუნა? სტრესულ ხომ ვეჸუაფ? თე საქმეშენ, მუჭოთ წესინ, მუზმას გაფულენა? ქოიბაღუნო თინა დუდიშ მიკაჯინალო? სამუშა ვადინუენ, ირიათო ოგურაფალ ხომ ვა გაჸი? დო მუთ არძაშ უმოს მნიშვნელოვან რე, ქიმერჩანსო თინა იეჰოვაშ საქმეშ პირველ ადგილშა გერინაფაშ საშვალებას? (ეკლ. 12:13). მუშო ოკო რაგად, სამუშაშ შიბა თეშით ხოლო ქოჭირს-და, შილებე დიდ არჩევან ვამღუდან. მარა, მუს იგურუანქინ თეშა იჸუაფ დამოკიდებულ, ქუგაშინ დო ვარ სამუშა. ინდოეთის მახორუ ტაბითა, ნამდგაქ ჭალაშ ამშვთუთიან კურს მიკორთჷ, იჩიებ: „იფიფქრ, მაჭალო მუშობა ქიმმეხვარებუდ პიონერო მსახურებას. სამუშა დროს ხოლო ჩქიმ გემოშა ქიგვონწყუნდ დო თე საქმეშ დაჭყაფალო ბრელ ფარა ხოლო ვედმესაჭირებუდ“. თე კურსიქ მართალო მეხვარ ტაბითას, ქიდიჭყუკო მუშობა დო პიონერო ხოლო ქიმსახურუკო.

17. ა) სო შეულებ ქრისტიანს, მიღას ინფორმაცია, მუთ განათლებაწკუმა დაკავშირებით ჭკვერულ გადაწყვეტილებაშ მიოღებელო ოსაჭირ? ბ) ნამ ბიბლიურ პრინციპეფ მიგეხვარებ გადაწყვეტილებაშ მეღებას? (ქოძირით ჩარჩო „ბიბლიურ პრინციპეფ, ნამდგაშეთ ოკო დეფიქრე“).

¹⁷ ჩქი გუვარჩით მუსხირენ მხარე, ნამდგაშეთ მნიშვნელოვან რე, დამატებით განათლებაშ მეღებაშ გინოჭყვიდუაშახ დეფიქრე. მარა სო შეილებ გორე ინფორმაცია, ნამუთ ჭკვერულ გადაწყვეტილებაშ მეღებას მიგეხვარებ? შეილებ სასწავლებერშა ქიმერთე ვარდა თიშ ვებგვერდშა მიშელე დო თევრეშე მიღე საჭირო ინფორმაცია. ქიმშაჯინ ვაკანსიეფს დო ქოძირ, მუზმა სამუშა ადგილ ქორე გურაფა გოკონ თი სფეროს. შეილებ რჩევა ქელაკითხუე თინეფს, მიდგაქ თეცალ მუდგარენ იგურუ ვარდა თე სფეროს მუშენს (იგავ. 13:10). ქოკითხ თინეფს, მუ ჯგირ დო გლახა მხარეეფ უღჷ თე გურაფაშ კურსის ვარდა თე სფეროს მუშობას. რჩევა თანაქრისტიანეფს ხოლო ქელაკითხე, მით ხიოლით ომსახურუნა იეჰოვას (იგავ. 15:22). მუშ გურაფას ვარდა მუნერ სამუშას ელაიჩანა თინეფ? შილებე თიცალ გურაფაშ კურს ვარდა სამუშა ელაიჩან, ნამდგაშეთ შურო ვაიფიქრებ.

18. მუ ოკო ფშუდან?

¹⁸ მუჭოთ ბძირით, დამატებით განათლებაშ მეღებას მუშ ჯგირ დო გლახა მხარეეფ უღჷ. ათეშენ მთელ გურით ოკო ქილოცე დო დეფიქრე შხვადოშხვა ვარიანტშე. რშუდას, დამატებით განათლებაშ ჭყოლოფათ შილებე მატერიალურო საქმე ჯგირო გიღუდას, მარა ნამდვილ ბედნერობა თეშა ვარინ, იეჰოვაწკუმა ხოლოშიან ურთიერთობაშა რე დამოკიდებულ (ფსალმ. 16:9, 11). იეჰოვა ირო იზრუნენს მუშ ხალხშე თინეფს მუდგა განათლება ვა უღუდანინ (ებრ. 13:5). გურაფა უკვე გინოჭყვიდილ ქუგაფუნ-და, ანწ მუს ოკო მიაქცუე ყურადღება? მუ მიგეხვარებ, გურაფაშ დროს ვადინუე იეჰოვაწკუმა ხოლოშიან ურთიერთობა? თე საკითხეფშენ უკულიანს სტატიას ქიფჩიებუთ.