ბიბლიურ პრინციპეფიშ გიმორნაფათ გოწაფით თქვან სინდის

1, 2. ა) მუ საჩუქარ მიღეს ადამ დო ევაქ? ბ) მუჭო შეულებუდეს თინეფს ოძირუესკო, ნამდა აფასენდეს თე საჩუქარს?

ᲘᲔᲰᲝᲕᲐᲥ გოჭყაფაშ დღაშე მუჩეს განსაკუთრებულ საჩუქარ, მუდგას ნამდვილ ქრისტიანეფ მანგარო ვაფასენთ, თე საჩუქარ რე ნებაშ თავისუფლება – უნარ, მუდგაშ ჭყოლოფათ ჩქინით შემლებუნა მიბღათ გადაწყვეტილებეფ. ჩქი ვა ბგუთჷ ცხოველეფს, ნამუთ ინსტინქტით მოქმედენა. ღორონთის ვართ დანადგარეფცალო ვაფუთ დაპროგრამებულ. ბიბლიაშე ბგებულენთ, ნამდა პირველ ადამიანქ, ადამქ, ღორონთიშ ამნახანტო იჸუ გოჭყაფილქ (დაბ. 1:26, 27). ათეშენ, გონიერ გუნაჭყეფუეფს, ადამს დო ევას, უღუდეს შესაძლებლობა, მუნეფიშით მიღესკო გადაწყვეტილებეფ.

² იეჰოვას ადამ დო ევაშა კანონეფიშ დიდ სია ვემუჩამ. თიქ უბრალოთ უწუ, ნამდა ქიმკაჯინესკო დედამიწას, გეიოფშესკო თინა მუნეფიშ გამნარყით დო პატი ცესკო ღორონთიშ ძალაუფლებას, მით გინოჭყვიდუნდჷ, მუშ უფლება უღუდეს თინეფს დო მუშ – ვარ (დაბ. 1:28; 2:16, 17). მუჭო შეულებუდეს ადამ დო ევას დაფასესკო ღორონთშე მეღებულ ნებაშ თავისუფლება? თინეფქ ოკო დეფიქრესკო თი ირფელშე, მუთ იეჰოვაქ თინეფს მეჩჷ დო შედეგო იეჰოვაშ ჸოროფაქ დო თიშ გურიშ გახარებაშ სურვილქ ოკო გინაჭყვიდირაფუკო, დემორჩილესკო თიშ მითითებეფს (იგავ. 23:15).

3. მუჭო გიმირინუეს ადამ დო ევაქ ნებაშ თავისუფლებაშ საჩუქარ?

³ მუჭოთ ბიბლიაშე ბგებულენთ, ადამ დო ევაქ ვეგმირინუეს მუნეფიშ ნებაშ თავისუფლება ჭკვერულო დო გინოჭყვიდეს, ვედემორჩილესკო იეჰოვას. თინეფიშ თე გადაწყვეტილებაშე ღორონთიშ ჸოროფა დო მარდულობა ვარინ, ეგოისტობა იძირედ (დაბ. 3:1–7). ადამ დო ევაშ გლახა გადაწყვეტილებაშ შედეგო ამდღა ჩქი ხოლო იპტანჯებუთ (რომ. 5:12).

4. ა) მუ რე გალატელეფიშ 6:5-ის მოშინაფილ ოღალიშ ნაწილ? ბ) ღორონთიშ მოჩამილ ხოლო ნამ საჩუქარშენ მაღვენუნა ჩიება თე სტატიას?

⁴ ცხოვრება ამდღა მანგარ რთულ რე. ირდღას ქიანაშ გადაწყვეტილება მაფუნა მიოღებელ, მუთ ჩქინ „ოღალიშ“ ნაწილ რე (წეკითხით გალატელეფიშ 6:5). ნამთინე გადაწყვეტილებაშ მეღებას ბრელ ამბე ვასაჭირ, მარა ნამთინეშ გინოჭყვიდუა მანგარ რთულ რე. მუჭო შემლებუნა იეჰოვას ახიოლენ თიცალ გადაწყვეტილებეფიშ მეღება? პირველ რიგის, ოკო მარჩქილედან, ნამდა იეჰოვაშ მოხვარა მოსაჭირუნა (იგავ. 16:3; იერ. 10:23). იესო სრულყოფილ რდჷ, მარა თის ხოლო არჩქილედ, ნამდა ღორონთიშ მოხვარა ოსაჭირუდ (ებრ. 5:7). წერმიდგინით, ჩქი არასრულყოფილ ადამიანეფს მუსხით უმოსო ქუმოსაჭირუნა ღორონთიშ ხელმძღვანელობა! იეჰოვაქ ნებაშ თავისუფლებაწკუმა ართო ხოლო ართ მუდგარენ მაჩუქეს, თენა რე სინდის. მორთ ასე გუვარჩუათ, მუჭო მიმეხვარებუნა თინა სწორ გადაწყვეტილებეფიშ მეღებას.

ᲛᲣ ᲠᲔ ᲡᲘᲜᲓᲘᲡ?

5. ა) მუ რე სინდის? ბ) მუჭო მოხვარუნა თინა? (რომ. 2:14, 15).

⁵ სინდის რე ჯგირიშ დო ფურიშ გიშაგორუაშ შინაგან უნარ. სინდის თიცალ კოჩის ხოლო უღჷ, მიდგას მუთუნ ვა უჩქჷ ღორონთიშ კანონეფიშ გურშენ (2 კორ. 4:2). სინდის მოსამართლეცალ რე, ნამუთ ჩქინ ფიქრეფიშ დო საქმეეფიშ გურშენ ვარდა ბრალს გებდვანა დო ვარდა მამართლენა (წეკითხით რომაელეფიშ 2:14, 15). თეს გეძინელ, სინდის მაფრთხილენა, ვა ვაკეთათ თინა, მუთ მიჩქუნა, ნამდა ვა რე სწორ (1 სამ. 26:8–11), დო მოკეთებაფუანა თიცალ მუდგარენს, მუთ მიჩქუნა, ნამდა სწორ რე. რახანს გადაწყვეტილებეფიშ მეღებაშ უნარ მიღუნა, თენა თის ვა ნიშნენს, ნამდა ჩქინ არძა გადაწყვეტილება იეჰოვაშო მისაღებ იჸუაფ. ჩქინ სინდისიქ ოკო მიმეხვარან, ართიანშე გეგშაბგორათ ჯგირ დო ფურ.

6. მუ ოცილ ჩქინ სინდისის, ნამდა ირო სწორას ქომხელმძღვანელან?

⁶ სანარღოთ, ჩქინ სინდის ირო სწორას ვა ფხელმძღვანელენა, მუშენდა, რახანს არასრულყოფილეფ ვორეთ, თინა ხოლო არასრულყოფილ რე. თიშა შილებე გლახათ იმოქმედას ჩქინ აღზრდაქ, კულტურაქ ვარდა ცოდამ სურვილეფქ. ბიბლიაშე ვორწყეთ, ნამდა სინდისიქ შილებე დესუსტას, გილელას დო დაღილქ იჸუას (1 კორ. 8:12; ტიტ. 1:15; 1 ტიმ. 4:2). თეცალ სინდის ვემმეხვარებუნა სწორ გადაწყვეტილებეფიშ მეღებას. თინა შილებე შევადარათ გილალუაფირ სასწორს, ნამუთ ტყურას ოძირანს; თიქ სწორას გეწონასინ, რემონტ ოსაჭირ. ჩქინ სინდისიქ ხოლო სწორას ქომხელმძღვანელანინ, მიკოჯინა ოსაჭირ (1 პეტ. 3:16). მუჭო შემლებუნა თეშ კეთება?

ᲛᲣᲭᲝ ᲒᲝᲞᲬᲐᲤᲐᲗ ᲩᲥᲘᲜ ᲡᲘᲜᲓᲘᲡ?

7, 8. ა) მუ მიმეხვარებუნა სინდისიშ გოწაფუას? ბ) მუჭო ფხელმძღვანელენა ბიბლიურ პრინციპეფ? ქიმიჸუნით მაგალით (ქოძირით სურათ).

⁷ მუჭო გოპწაფათ ჩქინ სინდის? ირდღას ოკო იპკითხათ ბიბლია დო ქიგებგათ, მუ რე იეჰოვაშ თოლს სწორ დო მუ – არასწორ. ღორონთიშ კანონეფიშ გიმორკვიება მიმეხვარებუნა, ქინვანჭათ თიშ აზროვნებას. მარა, მუჭოთ წოხოლენ სტატიას გუვარჩით, რახანს კანონეფ ხვალე კონკრეტულ სიტუაციას დო კონკრეტულ დროს გიმოდირთუ, საჭირო რე, ბგორათ პრინციპეფ, ნამდა უჯგუშო ქინვანჭათ იეჰოვაშ აზროვნებას დო დამოკიდებულებას (ეს. 55:9).

⁸ წერმიდგინით, ნამდა დანიშნულებაშ ადგილშა მიოულარო უდაბნო გაფუნა მიკაულარ, სოდეთ ვართ შარა მიოხე დო ვართ მუთუნ ნიშანეფ რე. თე დროს მანგარო მიგეხვარებუდეს რუკა, სოდეთ აღნიშნულ იჸუაფუდ, მუ დო მუს შეხვადუდით შარას. თეცალ რუკაშ ჭყოლოფათ ქიმეხვადუთ, სწორას გეჸუნთო შარას დოვარ გინორთაფილ გაფუნა თიშა. ჩქინ ცხოვრებას ხოლო უღჷ დანიშნულება – იეჰოვაშ გურიშ გახარება. თე შარას ბიბლია რე რუკა, ნამუთ კონკრეტულ მიმართულებას მარზენა დო თე რუკას მოჩამილ აღნიშვნეფ რე ბიბლიურ პრინციპეფ. თე პრინციპეფს ქიმვაჸუნუთ-და, შემლებუნა დარწმუნებულ ვორდათ, ნამდა ქიმვონჭირინუანთ ჩქინ დანიშნულებაშ ადგილშახ – ირიათო გურს უხარენდათ იჸი იეჰოვას.

9. რომაელეფიშ 9:1-იშ თანახმას ხოლო მუ მიმეხვარებუნა სინდისიშ გოწაფუას?

⁹ სინდის სწორას გოპწაფათინ, ღორონთიშ წმინდა შურიშ მოხვარა მოსაჭირუნა (წეკითხით რომაელეფიშ 9:1). წმინდა შურ მოხვარუნა, ქინვანჭათ, მუ დამოკიდებულება უღჷ ღორონთის შხვადოშხვა საკითხიშ გურშენ. თეს გეძინელ, თიშ სურვილს დო ძალას ხოლო მარზენა, ნამდა იეჰოვაშ მოსაწონო მიფქცუათ (ფილ. 2:13). მარა მუჭო შემლებუნა მიბღათ ღორონთიშ წმინდა შურიშ მოხვარა?

10. მუჭო მიბღათ წმინდა შურიშ მოხვარა? (ლუკ. 11:10, 13).

¹⁰ ქოთხით იეჰოვას წმინდა შურ (წეკითხით ლუკაშ 11:10, 13). შემლებუნა დარწმუნებულ ვორდათ, ნამდა იეჰოვა ხეგოფაჩილო ირზენს წმინდა შურს (იოან. 3:34). თინა გურხვეთ არზენს წმინდა შურს თინეფს, მით მეჸუნა თიშ ხელმძღვანელობას (იგავ. 1:23; იაკ. 1:5). ხოლო მუ მიმეხვარებუნა სინდისიშ გოწაფუას?

11. ა) მუ ოკო რდასჷ ჩქინ ცხოვრებას მთავარ მიზან? ბ) მუშენ რე მნიშვნელოვან, დარწმუნებულ ვორდათ, ნამდა ჩქინ სინდის ჯგირო რე გოწაფილ დო სწორას მუშენს?

¹¹ ირიათო ეცადით, იეჰოვაშე მიღათ მოწონა (იგავ. 8:34, 35). თენა ოკო რდასჷ ჩქინ ცხოვრებაშ მთავარ მიზან. მუდგა სიტუაციას ვა მოფხვადათინ, თე მიზან ირიათო გონებას ქუმაღვენუნა-და, თენა სინდისიშ გოწაფუას ქიმმეხვარებუნა. ჯგირო გოწაფილ სინდისის გაერთიანებულ რე გონება, ნამუთ იეჰოვაცალო აზროვნენს, დო გურ, ნამდგაშოთ მნიშვნელოვან რე იეჰოვაშ გრძნობეფ. რახანს ვორწყეთ, მუნერ რთულ დროს ფცხოვრენთ, მარჩქილენა, მუზმათ მნიშვნელოვან რე, ჯგირო გოწაფილ სინდის მიღუდან. ხშირას თიცალ სიტუაციეფს შეფხვადუთ, ნამდგაშ გურშენ ბიბლიას კონკრეტულ მითითება ვა რე მოჩამილ. თენა შილებე ოხუდას გართობას, სამუშას, განათლებას ვარდა ურთიერთობეფს. მუჭო ოკო გებგათ, ჩქინ მეღებულ გადაწყვეტილება ქუმოწონს დო ვარ იეჰოვას? (2 კორ. 1:12).

12. მუ მიმეხვარებუნა თიშ ძირაფას, ქიმეპჸუნთ დო ვარ სინდისის სწორ მიმართულებათ? (ეფეს. 5:10).

¹² ტომბაშე დეფიქრით თიშე, მუდგას ღორონთიშ სიტყვაშე კითხულენთ (ფსალმ. 49:3). ბიბლიაშ კითხირიშ დროს ქეცადით, ქიმიოგორუათ პრინციპეფს, ნამუთ ქიმგეხვარებუნა, ქინანჭათ იეჰოვაშ აზროვნებას (წეკითხით ეფესოელეფიშ 5:10). არძანერ პრობლემაშ დროს ბიბლიურ პრინციპეფს დოგორუნთ-და, თის ხოლო ქოძირუნთ, ქიმეჸუნდით დო ვარ თქვან სინდისის სწორ გადაწყვეტილებაშა (იგავ. 2:4–9, 11–13). თე პრინციპეფ მიგეხვარებუნა, გოწაფათ თქვან სინდის დო ვეგნურთათ სწორ შარაშე (ებრ. 5:14).

13. მუ ოკო ვაკეთათ გადაწყვეტილებაშ მეღებაშახ? ქიმიჸუნით მაგალით.

¹³ ბიბლიურ პრინციპეფ გადაწყვეტილებაშ მეღებაშახ დოგორით დო ვართ ხოლო მეღებაშ უკულ. ჩქი ვა მოკონა, თი ისრაელეფცალო მიფქცუათ, მიდგაქ ჯვ. წ. 607 წანას იერუსალიმიშ განადგურებაშ უკულ იუდას დოსქიდეს. თინეფქ იერემიას უწუეს: „ქომწუან იეჰოვაქ, სქან ღორონთიქ, მუ შარას გივოდირთათ დო მუჭო მიფქცუათ“ (იერ. 42:3–6). მარა თინეფს უკვე გინოჭყვიდილ აფუდეს, მუს აკეთენდეს. თინეფს ვემეწონეს იეჰოვაშ მითითებაქ, ათეშენ კინ მუნეფიშ დუდშეიან გეგმას მიაჸუნეს დო შედეგო გლახა მიკინდუეს დუდშა (იერ. 42:19–22; 43:1, 2, 4). თაშ ნამდა, გადაწყვეტილებაშ მეღებაშახ, საჭირო რე, დობგორათ ბიბლიურ პრინციპეფ, სოვრეშეთ იეჰოვაშ აზროვნება იძირე, დო უკულ თინეფიშ თანახმას იმოფქმედათ.

14. მუშენ ოკო გივორსხუათ ჩქინ გადაწყვეტილებეფ ბიბლიურ პრინციპეფშა?

¹⁴ მიღით ბიბლიურ პრინციპეფშა გერსხილ გადაწყვეტილებეფ (მათ. 7:24–29; იაკ. 1:23–25). ბიბლიურ პრინციპეფშა გერსხილ გადაწყვეტილებეფს ქობღებულენთ-და, მეპჸუნთ წმინდა შურიშ ხელმძღვანელობას დო იეჰოვა ხოლო დღას ვემმარკენა მუშ თე ძალას (საქ. 5:32). მარა, წმინდა შურიშ ხელმძღვანელობას ვემვაჸუნუთ-და, „ვოწყინებაფუანთ“ თის, შხვანერო ქოფთქუათინ, თიშ ხელმძღვანელობაშ წინააღმდეგ ურთჷ (ეფეს. 4:30; ეს. 63:10; საქ. 7:51). ინა ვარ, იეჰოვაქ შილებე შურო ვა მუჩან თინა (ფსალმ. 51:11; 1 თეს. 5:19). თენა მიმოდინუანდეს, მუშენდა მანგარო მოსაჭირუნა თი ძალა, ნამდგას წმინდა შურშე ბღებულენთ (ეფეს. 3:16).

ᲛᲣᲭᲝ ᲨᲔᲛᲚᲔᲑᲣᲜᲐ ᲛᲘᲕᲝᲒᲝᲠᲣᲐᲗ ᲩᲥᲘᲜ ᲡᲘᲢᲣᲐᲪᲘᲐᲡ ᲛᲔᲣᲠᲔᲜ ᲤᲔᲠ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲤᲡ?

15, 16. ა) მუჭო შემლებუნა ბგორათ ჩქინ სიტუაციას მეურენ ფერ ბიბლიურ პრინციპეფ? ბ) ნამ ბიბლიურ პრინციპეფ მეხვარებ ბიბლიაშ მაგურაფალს, მიოტუას სიგარეტიშ შუმა?

¹⁵ გეგმირინეთ ორკვიებელ საშვალებეფ. ბიბლიურ პრინციპეფიშ გიმორნაფა ქუგოკონან-და, დიო ოკო ქიმიოგორუათ თინეფს. მაგალთო, თქვან ბიბლიაშ მაგურაფალს შილებე ვარჩქილედას, მუშენ რე სიგარეტიშ შუმა გლახა. თინა შილებე იჩიებუდას: „ბიბლიას სიგარეტ შურო ვა რე მოშინაფილ დო სოვრეშე მიჩქუნა, თიშ შუმა არასწორ რენ?!“. მუჭო შეილებუნა დაგორაფუათ თის თიცალ ბიბლიურ პრინციპეფ, ნამუთ მუშ სიტუაციას მეურე, დო ქიმეხვარებ, ქინანჭას, მუშენ რე სიგარეტიშ შუმა არასწორ? ართ-ართ საშვალება, მუთ თეს მიგეხვარებუნა, რე „იეჰოვაშ მოწმეეფიშ ორკვიებელ სახელმძღვანელო“. შეილებუნა ქოუწუათ, ნამდა ქოძირას თემა: „თამბაქო“, ნამდგაშ თუდო მოჩამილ რე სტატია: „მუ დამოკიდებულება უღჷ ღორონთის სიგარეტიშ შუმაშენ?“ (ქოძირით 2014 წანაშ 1 ივანობაშ „გინაჯინალ კოშკი“ [ქორთ.]). ნამ ბიბლიურ პრინციპეფ რე მოჩამილ თე სტატიას?

¹⁶ თე სტატიას ბიბლიაშ მაგურაფალ ქოძირუნს ხუთ ბიბლიურ პრინციპის: 1) თიცალ მუდგარენიშ მონათ ოკო ვეგნიბრთათ, მუდგაქ შილებე ღურაშა ქიმემიჸუნან (რომ. 6:16). 2) დუდ ოკო ეუჩილითუათ ირფელს, მუთ ჩქინ სხეულს აზიანენს (2 კორ. 7:1). 3) იეჰოვას ოკო, ჩქინ სიცოცხლე თიშა მაფუდან მეძღვინელ, შხვანერო ქოფთქუათინ, „მთელ შურით“ ვემსახურათ თის (მათ. 22:37). 4) ჩქინ საქციელით შხვა ოკო ვა დუვაზიანათ (მათ. 22:39; 1 კორ. 10:24). 5) იეჰოვას შეულებ მუჩან ძალა თიშ ოკეთებელო, მუთ სწორ რე (ფილ. 4:13). თაშ ნამდა, მართალ რე, ბიბლიას პირდაპირ სიგარეტიშ შუმა ვა რე მოშინაფილ, მარა თექ მოჩამილ პრინციპეფ ქიმეხვარებ ბიბლიაშ მაგურაფალს, ქიგეგას, მუს ფიქრენს იეჰოვა თე საკითხშენ.

17. მუჭო შეულებ წყვილს, ნამუთ კამპანიაშო ინწყუაფ, დოგორას მუშ სიტუაციას მეურენ ფერ ბიბლიურ პრინციპეფ?

¹⁷ მუჭო შეულებ წყვილს, მით კამპანიაშო ემზადებ, დოგორას თიცალ ბიბლიურ პრინციპეფ, ნამუთ მეხვარებ ჭკვერულ გადაწყვეტილებაშ მეღებას? თინეფს ხოლო შეულებუნა „ორკვიებელ სახელმძღვანელო“ გეგმირინუან. თემას „ქორწილ“ მოჩამილ რე სტატიეფ, სოვრეშეთ ძირითად ბიბლიურ პრინციპეფიშ ძირაფა შეიალებენა. ქობძირათ ამშვ პრინციპ: 1) ირფელქ, მუდგას დუვაგეგმენთ, ოკო განადიდას იეჰოვა (1 კორ. 10:31, 32). 2) ჩქინ მიკაქუნალ ოკო რდასჷ სიტუაციას მეურენ ფერ, მოკრძალებურ დო ვართ ხოლო გამომწვევ (1 ტიმ. 2:9; 1 პეტ. 3:3, 4). 3) ჩქინ მიზან ოკო ვა რდასჷ შხვეფიშ გაკვირება ქონებათ დოვარ შხვა მუთუნით (იოან. 17:14; იაკ. 1:27; 1 იოან. 2:15, 16). 4) ირფელ ორგანიზებულო ოკო ხვადუდას (1 კორ. 14:40). 5) სუფრას ოკო ვეჸუას დუდეშქუმალირ დროშტარებაქ, მუდგას გინოჸუნელ შუმა ახასიათენს (გალ. 5:21). 6) გერინაფილ ოკო რდასჷ მიდგაინ, მით პასუხიშმგებელ იჸუაფ სუფრას (იოან. 2:8, 9).

18, 19. ა) ხოლო ნამ ორკვიებელ საშვალება შემლებუნა გიმიბრინუათ? ბ) თე საშვალებაშე ნამ პრინციპეფ ძირით თიცალ, ნამუთ მიგეხვარებუნა, მიღათ გადაწყვეტილება დღესასწაულეფწკუმა დაკავშირებით? (ქოძირით ჩარჩო „შეილებუნანო ქინანჭათ პრინციპეფს?“).

¹⁸ ხოლო ართ საშვალება, მუდგაქ ბრელს გიმადირთჷ, რე წიგნ „ბიბლია მოგურუანა ქრისტიანულ ცხოვრებას“. თე პუბლიკაციას შხვადოშხვა თემა რე მოჩამილ დო თითოეულ თემაშ თუდო თის მეურენ ფერ ბიბლიურ მუხლეფ რე გიმოჭარილ. თემას გონწყუნთინ, ქოძირუნთ კითხვეფს ბიბლიურ მუხლეფწკუმა ართო, მუთ პრინციპიშ ინონჭაფას მიგეხვარებუნა. მაგალთო, შილებე ქრისტიანს ოინტერესუდას, შილებე დო ვარ ნამდგაინ კონკრეტულ დღესასწაულს ქიდესწრას. მუჟამსით გონწყუნს თემას „დღესასწაულეფ“, ქოძირუნს ქვესათაურს „დღესასწაულეფ, ნამდგას ქრისტიანეფქ დუდ ოკო ეუჩილითუან“.

¹⁹ გუვარჩუათ ნამთინე მასალა, ნამუთ მოჩამილ რე პუნქტის „მუშენ რე არასწორ თი დღესასწაულეფს მონაწილებაშ მეღება, ნამუთ ტყურა რელიგიაშე მოურს? (1 კორ. 10:21; 2 კორ. 6:14–18; ეფეს. 5:10, 11)“. თექ მოჩამილ რე ნამთინე დღესასწაულ, ნამდგას ქრისტიანეფ ვაღნიშნენა. მაგალთო, ქვესათაურს „ეროვნულ დღესასწაულეფ“ მოჩამილ რე ბიბლიურ პრინციპეფ, ნამუთ მეხვარებ ქრისტიანს, გეგნოჭყვიდას, დესწრას დო ვარ თიცალ დღესასწაულეფს, ნამუთ ოხუ ქიანაშ პოლიტიკურ ისტორიას, ომეფიშ გოშინას ვარდა თიცალ დღესასწაულეფს, სოდეთ ცნობილ ადამიანეფს განადიდენა. მუ მარდულეფ ვორეთ, ნამდა იეჰოვაშ ორგანიზაცია თეცალ საშვალებეფს მარზენა ჩქინ სინდისიშ გაწაფალო.

ᲗᲥᲕᲐᲜ ᲪᲮᲝᲕᲠᲔᲑᲐᲗ ᲥᲐᲫᲘᲠᲔᲗ, ᲜᲐᲛᲓᲐ ᲯᲒᲘᲠᲝ ᲒᲝᲬᲐᲤᲘᲚ ᲡᲘᲜᲓᲘᲡ ᲒᲘᲦᲣᲜᲐ

20. მუჭო შემლებუნა ვოძირუათ, ნამდა სინდის სწორას მაფუნა გოწაფილ?

²⁰ ჩქი მანგარო ვაფასენთ ღორონთშე მეღებულ საჩუქარს – ნებაშ თავისუფლებას. მარა, თეწკუმა ართო, მარჩქილენა, ნამდა საჭირო რე, გოფწაფათ სინდის, ნამდა თე საჩუქარ სწორას გეგმიბრინუათ. ჯგირო გოწაფილ სინდის მიმეხვარებუნა, მიბღათ თიცალ გადაწყვეტილებეფ, ნამუთ იეჰოვას განადიდენს დო თიშ ნებას მეურდას იჸი. თეშო იეჰოვაშ წმინდა შურიშ მოხვარა რე საჭირო. ათეშენ ირიათო ოკო ფთხუათ ღორონთის წმინდა შურ დო მივაჸუნათ თიშ ხელმძღვანელობას. სინდისიშ გოწაფუას ბიბლიურ პრინციპეფ ხოლო მიმეხვარებუნა. მორთ ირფელ გუვაკეთათ, ნამდა ღორონთშე მეღებულ თე საჩუქარეფ – სინდის დო ნებაშ თავისუფლება – თეშ გეგმიბრინუათ, ნამდა გურ გუხარათ იეჰოვას; შედეგო ღორონთიშ სიტყვაშ ძალას ჩქინ დუდშა ქიბგინანთ (2 ტიმ. 3:16, 17; ებრ. 4:12).